MANOMBA DEBATA SIAN NASA ROHA
Psalmen 95:1-11
TURPUK
Beta hamu itaendehon ma Jahowa, itaolophon ma partanobatoan ni hatuaonta! Itadapothon ma tu jolo ni bohina marhitehite pujipujian, itaolophon ma Ibana marhitehite ende! Ai Debata na timbul do Jahowa, jala raja bolon mangatasi sude angka debata. Di bagasan tanganna do angka ojahan ni tano on, jala guru di Ibana do punsu ni angka dolok. Guru di Ibana do laut, jala Ibana do tumompasa, jala tanganna do jumadihon tano darat. Beta hita manungkap dohot marsomba, marsinggang ma hita tu jolo ni Jahowa, Sitompa hita. Ai Ibana do Debatanta, jala hita bangso pinarmahanna, jala birubiru ni tanganna. Sadarion, aut ditangihon hamu nian soarana! Unang ma tangkangi hamu rohamuna songon uju di Meriba, songon ari uju di masa pangunjunan di halongonan. Uju na niunjunan ni angka ompumuna Ahu, tung diuji Ahu, atik pe naung diida nasida pambahenanku. Tung opatpulu taon bolon lelengna Ahu marbiasbias mida sundut i, jadi ningku ma: Bangso parroha lilu do nasida, alai ndang ditanda nasida angka dalanku. Jadi pola maruari Ahu di bagasan rimashu: Molo tung masuk nasida tu paradiananku!
PATUJOLO
Horas ma di hita saluhutna. Adong do sada ende ni huria na mandok ingkon tasomba do Jahowa Debatanta, jala jotjot do taendehon. Ende i, i ma Buku Ende No. 585 “Somba Ma Jahowa” songon on ma didok hatana: “Somba ma Jahowa Debatanta, Amen Haleluya. Sigomgom langit tano on ro di isina, Amen Haleluya. Beta hita lao marsinggang tu joloNa, Amen Haleluya.” Di ayat dua didok “ala ni denggan ni basaNa na tu hita, Amen Haleluya.” Tama situtu do endehononta i patuduhon parsombaon dohot pamujionta tu Jahowa siala saluhut angka pambahenanNa di ngolunta sian na sorang hita tu portibi on sahat tu sadari on.
Ragam do naung tabolus di hasiangan on, alai tung na so hea do dipasombu Jahowa hita punjung mangadopi dohot mamolus saluhutna i. Turpuk jamita minggu on manaringoti parsombaonta tu Jahowa, Debata na sun badia. Parsombaon na songon dia do na ditaringoti di turpuk jamita on? Ai ndang na saluhut parsombaon hape gabe dihalomohon Jahowa sian hita? Asa antus mangalusi saluhutna i, masuk ma hita tu hatorangan.
HATORANGAN
Turpuk jamita on i ma ende ni parpsalmen na mansoarahon panjouon asa marsomba tu Jahowa Debata. Tangkas do dihilala parpsalmen gogo, huaso nang pangaramotion ni Jahowa di ngoluna. Di ayat 1–2 disosohon do asa mangendehon Jahowa jala mangolophon Partanobatoan ni hatuaon. Marende i ma sada ulaon pabotohon na di bagasan roha marhite nada asa dibege, diboto jala diantusi halak, dia do lapatan manang tona na dipasahat marhite ende i. Mangendehon Jahowa jala mangolophon partanobatoan ni hatuaon i ma sada panindangion na mansai bagas taringot parsaoran jala panandaionna tu Jahowa, Debatana. Hata mangendehon Jahowa ingkon do hata na haruar sian ateatena jala na manghatindangkon pandonganion ni Jahowa di ngoluna. Marhite i halak na umbege manang na manangihon hata ni ende i mangantusi tona ni hata ni ende i asa lam ditanda nasida ma Jahowa, Debata.
Aha do ala na umbahen parpsalmen mangolophon Jahowa? Diparhatopot parpsalmen do taringot huaso dohot gogo ni Jahowa, Debata na hinaporseanna. Di ayat 3–5 dibaritahon do ulaon ni Jahowa, i ma Debata na manompa saluhut nasa na denggan sian na so adong gabe adong. Jahowa do nampuna saluhut jala na mangatasi angka debata na adong di portibi on. Torop do angka debata na di portibi on tarlumobi ma di hatiha ni panurat ni turpuk on, ganup bangso adong be do debatana jala bangso i mambahen debatana hombar tu na ringkot di bidang ni ngolunasida. Molo bidang pertanian adong ma debata na hombar tusi, songon i ma nang di bidang na asing. Jala dibahen nasida do debata i hombar tu na dihaporluhon nasida. Alai anggo Jahowa i ma Debata, Debata na so tinompa ni tangan ni jolma jala Debata na so dipatupa hombar tu pingkiran ni jolma. Jahowa Debata do nampuna jolma i dohot na tinompana, jala di toruNa do sude debata na dibahen angka jolma i. Guru di Jahowa do punsu ni angka dolok na marpardomuan tu inganan ni angka panombaon sude angka bangso tu debatana. Tutu ma Jahowa do Debata Pargogo na so hatudosan, jala Ibana do Raja ni nasa na tinompaNa, jala guru di Ibana do saluhutna.
Molo songon i do gogo ni Jahowa Debata didok di ayat 6-7 mansai tama ma hita manungkap dohot marsomba, marsinggang tu jolo ni Debata na manompa hita. Ibana do Debatanta jala hita ma bangso na pinarmahanNa, jala birubiru ni tanganNa. Sadari on, aut ditangihon nian soaraNa i! Pandohan “sadari on” paboahon unang be marnalemba, unang be gok sidalian, unang be mandok haduan ma i, manang jolo adong tingki. Alai ingkon sadari on, i ma partingkian si saonari (segera) manangihon pangontangNa, manangihon panjounNa marhite saluhut hata dohot pambahenanNa. Parmahan na di tanganna adong tungkot dohot linsinglinsing asa sude angka na pinarmahanNa ndang adong na mandao manang lari sian na dihalomohon ni Jahowa. Ndang dihalomohon Jahowa angka na pinarmahanNa mago alai sai dilului jala diajar do angka na pinarmahanNa i asa hot jala mian di panggomgomanNa. Nang pe mansai maol do diantusi dilapatai torop jolma taringot Jahowa na gabe parmahan di ngoluna di ragam na masa di ngoluna.
Di ayat 9-11 dipaingot Parpsalmen angka pangalaho ni halak Heber/ Israel na mansai tangkang uju di Meriba songon ari uju masa pangunjunan di halongonan. Pangalaho na masa di Meriba i boi do taida di 2 Musa 17:1–7 na manggombarhon parange na so mandok mauliate di sude pambahenan ni Jahowa di ngolunasida. Parange na so mar pos ni roha di pandonganion dohot panarihonon ni Jahowa di ngoluna. Jotjot do nasida di bagasan roha biar, holso dohot parange na sai marungutungut. Parange ni hatoban na so mananda haluaon jala ndang mangalapati pandonganion manang parmahanion ni Jahowa di ngoluna. Parange ni hatoban na mansai tonggi di parhatobanon na marhapatean tu hamagoan, jala ndang sahat tu hapatean ni tano na ni uarihon ni Jahowa tu nasida. Dang adong na sahat sundut na haruar sian parhatobanon ni Misir hinorhon ni pangalaho manang parangenasida na sai marungutungut jala ndang adong roha na unduk tu Jahowa, asing ni si Josua dohot si Kaleb (ida 4 Musa 14:29 – 30). Hinorhon ni ungutungut jala ganggu ni roha boi do mambahen jolma i ndang be tangkas manghilalahon pangaramotion dohot panarihonon ni Jahowa di ngoluna. Laos tubu ma parange na holan menuntut.
HAHONAAN
Marhite hatorangan ni jamita i adong do piga na mansai ringkot siputihonta, i ma:
- Turpuk jamita on manosoi hita asa sai tongtong marhatopothon gogo manang huaso ni Jahowa na mangatasi saluhutna. Debata na so tinompa ni pingkiran ni jolma, alai Debata na manompa jolma.
- Tahangoluhon ma pangaramotion dohot panarihon ni Jahowa di ngolunta. Aut sura boi tabilangi sude pambahenan dohot panarihonon ni Jahowa Debata di ngolunta, ndang na hasuhatan jala ndang na tarbilangan saluhutna. Ndang tarasam sude denggan basa ni Jahowa. Molo songon i, tama ma nian hibul dirinta manomba Ibana. Marsomba tu Jahowa ndang boi malua i sian mamelehon hibul dirina gabe ampuna ni Debata, jala mangudut tu parange na unduk di hata ni Debata.
- Mansai tonggi jala dame do panghilalan molo boi tahilala pandonganion dohot panarihonon ni Jahowa di ngolunta. Disarihon do ngolunta boi marhosa sahat tu sadari on dohot ragam ni pasupasu ni Jahowa. Antong, boasa be adong mian holso dohot hatahuton di na mandalanhon ngolu, jala roha na sai jotjot menuntut na boi mambahen hita ndang sahat tu inganan na naung ni uarihon ni Jahowa marhite Jesus Kristus tu angka na satia.
- Minggu Okuli i ma Minggu na manjou hita asa mangaranap tu Jahowa Debata (ida Psalmen 25:15a). Mangaranap tu Jahowa tontu adong na ditundalhon. Aha do na ringkot ditundalhon uju mangaranap hita tu Jahowa. I ma bangkobangko na jat, parmusuon, neang ni roha, hadatuon, parungutunguton, hansit ni roha, dohot angka saluhut ulaon na so dihalomohon ni Jahowa (patudos 2 Timoteus 3).
- Mangaranap tu Jahowa ingkon do sian nasa roha. Marhite pangaranapon i adong ma parsombaon. Mangaranap tu Jahowa, Debata na badia jala pargogo na so hatudosan. Sian Jahowa do ro pangurupion dohot haluaon tu hita. Halak na sai tongtong mangaranap tu Jahowa i ma halak na marpos ni roha tu Jahowa, manghirim di angka pambahenanNa na denggan i, marhasatiaon mangulahon na denggan dohot mangurupi angka na gale nang na hurangan. Dapotan gogo dohot tua ma ganup jolma na sai mangaranap tu Jahowa di ngoluna. Amen. (dbp)
Bahan khotbah ini dapat diunduh dengan meng-klik link di bawah ini!
Posting Komentar