EPISTEL MINGGU 30 APRIL 2023
MARLAS NI ROHA ALA NI PANGARAMOTION NI DEBATA
Johannes 10:1-10
Minggu Jubilate
TURPUK
Na tutu situtu do na hudok on tu hamu: Manang ise na so bongot sian pintu, laho tu bara ni birubiru, na manjangkit sian dalan na asing laho bongot, panangko do i jala pamangus. Alai na bongot sian pintu i, i do siparmahan birubiru i. Ungkapon ni sijaga pintu i ma di ibana jala dibege angka birubiru i do soarana; jala dijou do angka birubiruna di goarna be, laho manogihonsa tu balian. Ia dung diparuar sude na di ibana, sai di jolonasida ma ibana mardalan, gabe diihuthon angka birubiru ma ibana, ai ditanda do soarana. Alai ndang olo nasida mangihuthon tu na asing; na maporus do nasida mida i, ai ndang ditanda nasida soara ni na asing i. Asa dihatahon Jesus pe hata umpama ondeng tu nasida, ndang diboto nasida lapatan ni na nidokna i tu nasida. Dung i didok Jesus ma muse tu nasida: Na tutu situtu na hudok on tu hamuna: Ahu do pintu na tu birubiru i. Saluhut angka naung manjoloani Ahu, panangko do i jala pamangus; alai ndang ditangihon angka birubiru i nasida. Ahu do pintu i. Paluaon do ganup na bongot sian Ahu; na laho bongot jala laho ruar ma ibana, dapotan jampalan. Anggo panangko, holan manangkoi, maneati jala mangago do, umbahen na ro Alai anggo Ahu, asa adong hangoluan di nasida, pola marlobilobi di nasida, umbahen na ro.
PATUJOLO
Pangaramotion ni Debata sai tongtong do i mandongani parngoluon ni angka jolma. Pangaramotion ni Debata di saluhut na tinompa tujuanna: Na parjolo, asa manjadi pasupasu di jolma i di tano on di angka jadijadian ni Debata nang nasa isi ni portibi on. Dilehon Debata do di jolma i pingkiran, hapistaran nang bisuk asa suman tu pangalaho ni Debata asa dirajai angka jadijadian ni Debata. Na paduahon, hangoluan na so mansadi jala mardalan hombar tu lomo ni roha ni Debata. Molo masa pe angka hamagoan di ngolu ni jolma dohot nasa na tinompa. Ndang na mansohot Debata patuduhon lomo ni rohaNa. Sai ramotan ni Debata do saluhut na tinompaNa. Na Patoluhon, asa pasangaphon goar ni Debata. Diparsinta Debata do asa saluhut na tinompaNa pasangap goarNa marhite hata dohot pambahenan. Molo dipatupa angka jolma i na uli na denggan di bagasan goar ni Debata, gabe marsangap ma goar ni Debata. Ala ni mansai ringkot do denggan pangantusionta taringot pangaramotion ni Debata. Songon dia do pangaramaotion ni Debata na nidokna di bagasan turpuk on? Tapamanat ma.
HATORANGAN
Adong dua rumang ni parmahan maradophon birubiru na marmahani huhut mangaramoti na pinarmahanna: Na parjolo, parmahan na so denggan, parmahan na so tinanda ni birubiru i. Rumang ni parmahan on ndang adong biarna laho mangago angka na pinarmahanna ala so ibana nampunasa. Tudos do gombaran on ma rumang ni parmahan na didok di Hesekiel 34:1-10. Na paduahon, parmahan na tutu, parmahan na umboto birubiruna dohot soara ni birubiruna, baliksa nasa birubiruna pe ditanda do soara ni parmahanna. Ndada holan i, luluanna do na mago i, jala mulak boanonna na tardempar i, jala lilitanna do na mabugang i, jala pargogoanna do na marsahit i.
" ... na so bongot sian pintu, … na manjangkit sian dalan na asing, ... panangko do i jala pamangus (ayat 1). Adong dope angka birubiru na so masuk tu rumang ni parmahan na denggan (ida Johannes 10:16). Dipatudos muse songon eme dohot simaremeeme (ida Mateus 13:24-30). Jala adong muse do na manguji asa bongot sian na so dalanna, maralo tu ruhut naung niaturhon ni Debata marhite Jesus Kristus (patudos Johannes 3:14-16).
"Alai na bongot sian pintu i, i do siparmahan birubiru i. Ungkapon ni sijaga pintu i ma di ibana jala dibege angka birubiru i do soarana; jala dijou do angka birubiruna di goarna be, laho manogihonsa tu balian. Ia dung diparuar sude na di ibana, sai di jolonasida ma ibana mardalan, gabe diihuthon angka birubiru ma ibana, ai ditanda do soarana" (ayat 2-4). Dipadomu do gombaran di turpuk on. Didok do Jesus pintu na tu birubiru i (ayat 7) jala didok muse parmahan na denggan (ayat 11 dohot 14). Jotjot do masa songon i di Evangelium Johannes dohot di Padan na Imbaru. Di turpuk na asing didok, "Jesus do roti hangoluan jala Ibana do nang silehon roti" (ida Johannes 6:35 dohot 51). Di turpuk na asing pe didok, "Jesus do hasintongan dohot sihatahon hasintongan (ida Johannes 14:6 dohot 8:45-46). Didok muse Jesus do dalan jala sipatudu dalan (ida Johannes 14: 6). Di turpuk na asing didok muse do, Jesus do pelean laos sipasahat pelean (ida Heber 10:12,14 dohot 13:15).
Di Padan na Robi somal do didok parmahan. Didok parmahan sada tudutudu do i tu Debata dohot Mesias (ida Psalmen 23, 80:2, Jesaya 40:10-11 dohot 1 Petrus 5:1-4). Mansai ringkot do adong parmahan di tongatonga ni angka birubiru. Debata do parmahan na sintong, na gabe sitiruon ni angka parmahan di portibi on. Ndang songon angka partogi ni halak Jahudi na digoari do "parmahan pargapgap" (ida Jeremia 23:1-8, Hesekiel 34:1-10 dohot Jesaya 56:8-12). Sahalak parmahan pe didok do songon "siradoti bagas ni Debata" (patudos Epesus 4:11 dohot Titus 1:5 dohot 7).
Ditangihon na pinarmahanna i do soara ni parmahan i (ayat 3). I ma pataridahon panandaon dohot haundohon na marondolan tu parsaoran siapari. Ai jouonna ma angka birubiruna hombar tu goarna be. Tangkas do ditanda Jesus na pinarmahanNa, marlapatan do i, paboa parmahan na denggan, ditanda do sude na pinarmahanna i. Didok muse, "ia dung diparuar sude na di ibana, sai di jolonasida ma ibana mardalan, gabe diihuthon angka birubiru ma ibana, ai ditanda do soarana" (ayat 4-9). On ma patuduhon pangaramaotion di haluaon dohot ngolu si ganup ari. Boi do nang i paboa hasomalan laho patupahon di angka birubiru i angka jampalan na bidang jala marhandang di tingki borngin. Di manogotna i jouonna ma angka dorbia i tu jolona. Ala parsaoran si ganup ari ni parmahan i dohot na pinarmahanna, sai tangihonon ni angka birubiru i do soara ni parmahanna, ndang olo i paihutiuhut soara ni parmahan na asing (ayat 5).
Huria na pinaojak ni Kristus di portibi on, ingkon pajumpang jala ingkon maralo do maradophon angka parmahan pargapgap, i ma angka parpoda haliluaon (patudos 1 Timoteus 4:1-3, 2 Timoteus 4:3-4 dohot 1 Johannes 4:5-6). Pangajarion ni Jesus ndang diantusi nasida (ayat 6) gabe dipatorang ma astuanna tu nasida (ayat 7-10). "Asa dihatahon Jesus pe hata umpama ondeng tu nasida." Somalna molo didok umpama marlapatan ma i paboa sada na masa marguru tu na somal di sada luat, asing ni i boi do tong dilapati songon patorang hasintongan di haporseaon, gabe boi mura antusan. Alai boi do tong songon sada dalan mandok hasintongan di angka na porsea, alai asa unang diboto angka na so marnida mata ni haporseaonna (patudos Johannes 16:29 dohot Markus 4:11-12). Turpuk jamitanta sadari on udut ni Johannes 9 do, nasida na nidokna di ayat 6 on, i ma halak Parise. Lapatanna na pinatorang ni Jesus uju na didokNa: "Na tutu situtu" paboa sada hasintongan do i na so muba jala na so mose. Jala hasintongan na pinasahat ni Jesus i ma paboa Jesus do pintu i. Na nidok ni Jesus on lam pahothon paboa holan Jesus do dalan na sintong (ida ayat 8 dohot 10 patudos Johannes 14:6). On ma hatandian ni Barita na Uli. Bibel do pustaha ni Debata laho patandahon Debata, pambahenanNa dohot sangkapNa. Holan sada do dalan jala hasintongan tu Debata, i ma haporseaon di bagasan Jesus Kristus (patudos Ulaon ni Apostel 4:12, 1 Timoteus 2:5 dohot Johannes 8:12).
Digoar do angka panangko jala pamangus sude na manjoloani Jesus, i ma angka na di duru ni Jesus. Tung sura pe joujou angka na manjoloani Jesus i tu angka birubiru ni Jesus, ndang tangihonon ni birubiru i anggo nasida. Molo adong na olo manangihon soara ni na manjoloani Jesus, ndang birubiru ni Jesus na masuk sian pintu i ibana, alai na mangangkat do i sian dalan na asing, i ma na nidokna angka panangko dohot pamangus.
Ala uju masa ari parningotan di haompoan ni bagas joro di Jerusalem do na dihatahon di Johannes bindu 9 dohot 10 (ida Johannes 10:22), marhadomuan tu angka halak Parise tudosan ni parmahan pargapgap, manang parmahan siida gaji (patudos Jeremia 23:1-8 dohot Hesekiel 34:1-10).
"Ahu do pintu i. Paluaon do ganup na bongot sian Ahu; na laho bongot jala laho ruar ma ibana, dapotan jampalan. Anggo panangko, holan manangkoi, maneati jala mangago do, umbahen na ro Alai anggo Ahu, asa adong hangoluan di nasida, pola marlobilobi di nasida, umbahen na ro" (ayat 9-10).
"Paluaon do ganup na bongot sian Ahu." Holan Jesus do dalan tu Debata (patudos Johannes 14:6). Didok dison "malua manang paluaon," marhadomuan do songon na somal didok di Padan na Robi taringot tu haluaon pardagingon. Molo didok di ayat 10 "panangko" patuduhon roha ni angka parmahan pargapgap jala pataridahon roha na jat di angka parmahan na so hasea i. Roha laho manangko, maneati dohot mangago do tahi ni angka parmahan na so tutu. Tudos do i songon parorot na manganhon sipanganon ni na pinarorot naso mamingkirhon na pinarorotna. Alai molo Jesus, disarihon do angka birubiruNa. Roha na mangahut tu diri jala angka na impolan di perak, parmahan na niupaan, i ma angka parmahan na so tutu (patudos Johannes 10:12-13).
"Alai anggo Ahu, asa adong hangoluan di nasida, pola marlobilobi di nasida, umbahen na ro" (ayat 10).
Jotjot dihatahon hata on songon sada padan taringot tu hangoluan jala hinaringkot di parngoluon ni jolma. Alai ndang holan i dohot do tong paboa asa tung ditanda Jesus dohot angka pasupasu ni partondion, ndang na gabe mamboan hangoluan marhite arta nang hamoraon. Na nidokna di turpuk on ndang na gabe asa marnampuna di arta hamoraom, alai asa ditanda jala partohap di hangoluon na tutu. Songon angka naung dihatahon di angka Barita na Uli di na dihatahon jala dibaritahon Jesus harajaon ni Debata. Di Evangelium Johannes disurathon do taringot tu barita na binoan ni Jesus di hangoluon si saleleng ni lelengna.
HAHONAAN
- Jesus do pintu, holan marhite pintu i do dalan laho ruar dohot laho bongot. Sai na paluaonNa do ganup na bongot sian pintu i. I ma haluaon di pardagingon dohot di partondion.
- Jesus do parmahan na denggan, na mangalehon hangoluan dohot nasa na ringkot di na pinarmahanNa.
- Huria ni Tuhan, i ma halak Kristen, angka na porsea di Ibana, i ma birubiru ni Tuhanta Jesus. Angka Birubiru i, sai na ramotan ni Tuhanta Jesus do (ida Psalmen 23:1-6) angka na tangi di soaraNa jala na mangihuthon parmahan i.
- Huria i, i ma pamatang ni Kristus jala Kristus i do pintu dohot parmahan na denggan. Ala ni i, naeng ma huria i gabe hataridaan ni Kristus tu saluhut bangso. Gabe harbangan manuju tu pintu i. Ai holan i do dalan asa bongot tu harajaon na manongtong. Jala ingkon boi do huria i pataridahon songon parmahanion ni Kristus na patupahon parmahanion tu nasa na tinompa bahen hasangapon di Debata. Amen. (bs)
Posting Komentar