EPISTEL MINGGU 4 JUNI 2023
DEBATA SITOLUSADA SITOMPA SALUHUT
Mateus 11:25-27
Minggu Trinitatis
TURPUK
Uju i ma didok Jesus hataNa songon on: "Hupuji Ho, Amang, Tuhan na manggomgomi banua ginjang dohot tano on, ala ditamondinghon Ho hata i sian jolo ni angka na pistar dohot na marroha, gabe dipapatar Ho i tu angka siondihononhon. Olo, Amang, ai i do dihalomohon rohaM hian. Saluhutna i, nunga dipasahat Damang tu Ahu; asa ndang adong na mananda Anak i dungkon ni Ama i; Ama i pe, ndang adong na mananda i, ia so holan Anak i, angkup ni na pinodaan ni Anak i, mangihuthon lomo ni rohaNa."
PATUJOLO
Ojahan ni Evangelium Mateus 11 on i ma hangoluan na marpusathon tu Jesus. Hita na porsea di Ibana ingkon do tahangoluhon hasintonganNa i. Di ayat 25-27 disurathon do taringot tu hasadaon ni Ama dohot AnakNa, i ma na patuduhon holong i tu hita. Asa marhite i diajari hita manghaholongi donganta jolma. Lumobi ma di na manghaholongi Debata Ama jala haporseaonta tu Jesus Kristus ma na gabe parhitean asa lam mananda hita di hasintongan ni huaso ni Debata tu ganup hita jolma marhite Jesus Kristus na tahaporseai di bagasan ngolunta.
HATORANGAN
Di bagasan turpuk on dipabotohon do hasadaon ni Debata Ama dohot AnakNa, i ma Jesus Kristus. Hasadaon i boi do taida, parjolo, mulai sian ayat 25. Di bagasan ayat on dipataridahon Jesus do holong pamujionNa tu Debata Ama. Sian pamujion ni Jesus tu Ama i, songon na didok Jesus di hataNa mandok: Hupuji Ho, Amang, Tuhan na manggomgomi banua ginjang dohot tano on. Jala di bagasan holong i do hasadaon i marhite holong pamujion ni Jesus na mamuji Debata Ama, naung patuduhon holongNa tu portibi on. Marhite holong i do tubu las ni roha jala sian las ni roha ni Jesus didok hataNa mamuji Debata Ama.
Boasa dipatuduhon Jesus pamujionNa tu Debata Ama? Ala diboto Jesus do Ama i na manggomgom saluhut portibi on. Pamujion ni Jesus di Ama i patuduhon holongNa tu Debata Ama, di angka haburjuon na pinapatarNa marhite angka naung tinamondinghon ni Ama i angka hata sian jolo ni angka na pistar dohot na marroha, jala dipapatar angka siondihononhon. Sian hata ditamondinghon hata i sian jolo ni angka na pistar dohot na marroha, ima na paboahon tu hita angka hapistaran dohot marroha haportibion do i. I do gabe ditamondinghon (disembunyikan), jala gabe di ondihon tu angka jolma na gale manang siondihononhon manang orang kecil. Berarti marhite i dang di halomohon Debata hita na mengandalhon angka hapistaran jala marroha sian angka huaso haportibion, alana ditamondinghon Debata do angka sisongoni, marhite i ingkon ma nian ta tundalhon angka hapistaran jala parrohaon na mengandalhon haportibin. Jala dipapatar Debata do angka na siondihononhon, Debata patuduhon angka holongna tu angka jolma na memang toho marserep ni roha na lao pasangaphon Debata daong na mengandalhon hapistaran na marhite haportibion. Ala holong na di patuduhon Debata, ima Debata na manggomgomi banua ginjang dohot tano on, gabe dipatuduhon Tuhan Jesus Kristus ma holongna tu Debata Ama marhite pamujion. Jala pamujion na dipatuduhon Jesus tu Ama i, ima na lao mangajari hita angka na ganup porsea tu Ibana asa manontong lao patuduhon pamujionta tu Debata marhite Jesus Kristus, asa marhite pamujionta i boi lam tarpasu-pasu pardalanan parngoluonta.
Di Ayat 26, diolohon Jesus saluhut na dihalomohon Debata Ama, sian on boi nta ida hasadaon holong i marhite pangoloan ni Jesus tu na dihalomohon Ama i. Dipatuduhon Jesus haundukonNa tu saluhut na dihalomohon roha ni Debata Ama. Ima pangoloion Jesus na lao pataridahon haunduhon ni roha jala gabe marsangap Debata Ama, Debata na manggomgomi saluhut pargulmitan di portibion. Sian pangoloion ni Jesus i, boi attusanta berarti saluhut na di halomohon Debata ima angka dalan nadenggan tu sandok ganup portibion, tarlumobi tu pardalanan parngoluonta angka na porsea tu Ibana. Alani salauhut na dihalomohon Debata dibagasan parngoluonta ingkon ma i nian taulahon jala angka nadenggan na nta ulahon i songon na dihalomohon roha ni Debata gabe parhitean mai tu angka donganta naso mananda hasintongan ni Jesus Kristus.
Di Ayat 27, marhite hasadaon holong ni Debata Ama dohot Anak ni Debata ima Tuhan Jesus Kristus, gabe saluhutnai dipasahat Amai tu AnakNa ima Tuhan Jesus Kristus. Debata Ama pasahathon saluhut huaso dohot hamuliaon tu Tuhan Jesus Kristus na lao mangalehon dame tu saluhut portibion jala lao manesa angka dosa ni saluhut jolma. Tuhan Jesus na naumpuna huaso jala dohot hamuliaon na sarupa dohot Debata Ama, na gabe perantara na manjalo huaso dohot hamuliaon i na sian Debata Ama. Saluhut paruuhuman (penghakiman) di pasahat Ama i tu Jesus Kristus, Ibana dilehon wewenang na lao padengganhon manang memperbaiki hubungan Debata dohot jolma na naung sega hinan. Jala Jesus na gabe siboan Dame marhite holongNa tu ganup portibion tarlumobi tu saluhut jolma. Ibana diporbadia i jala badia na gabe peguasa mutlak, na lao mangatur jala magurus saluhut angka na masa di portibion na naung sega hinan. Na lao mangulahon i saluhutna , Ibana dilehon huaso na dibanua ginjang dohot na di tano on (Mat. 28:18), huaso mangarajai nasa daging (Joh. 17:2), jala huaso paruhumon (Joh. 5:22). Marhite i gabe manontong tu hita ganup jolma asa porsea jala marposniroha tu Tuhan Jesus. Diuduti muse songon dia hajonokon ni Debata Ama dohot Anak ima Tuhan Jesus Kristus na mandok ndang adong na mananda Anak i dungkon ni Ama i; Ama i pe, ndang adong na mananda i, ia so holan anak i, na marlapatan hasadaon Ama dohot Anak ima na lao patuduhon holongNa tu ganup portibion. Ala ni ganup jolma na naeng laong mananda Debata ingkon porsea jala ro tu adopan Jesus Kristus, ala hatiuron parbinotoan di sangap ni Debata adong dibagasan bohi ni Kristus (2 Kor 4:6). Holong ni Debata tu ganup jolma na mardosa marhite perantara na di pasahat huaso tu Tuhan Jesus Kritus. Jala Jesus do dalan i dohot hasintongan dohot hangoluan. Ndang adong na sahat tu Ama i, ia so marhite sian Jesus (Joh. 14:6).
HAHONAAN
Marhite turpuk jamita on diajari do hita marsihaholongan marhite holong ni Ama dohot anak, ima songon na dipatuduhon Jesus pamujion tu Debata Ama na manggomgomi banua ginjang dohot tano on. Ala ni hita na ganup porsea ingkon do manontong songon Jesus ima mandok mauliate jala nta puji Jahowa marhite angka tangiang jala parulaon nta siganup ari, ingkon do nta puji Ibana na mangalehon hangoluan tu hita ganup jolma. Jala sian holong ni Debata gabe ma nian patoruk dohot paserep roha hita. Ai manontong do haluaon na pinarade dibagasan holongNa marhite holan dibagasan Kristus i do saluhut haluaon jala hadameon na nunga diparade tuhita saluhut angka jolma na porsea tu Ibana. Antong nta pataridahon ma nian holong na dipatuduhon Kritus i marhite turpuk on, songon pamujion na binahen Jesus na lao mamuji Debata Ama na manggomgomi banua ginjang dohot tano on. Jala Kristus i do gabe parhitean nta asa mananda hita tu Debata Jahowa. Ai holan dibagasan Kristus do lam magodang hita, antong gok ma las ni rohanta, ndang adong na boi mambuat haluaonta i sian hita, manontong do Debata marhite Tuhan Jesus Kristus satia dibagasan holong ni rohaNa. (as)
Posting Komentar