EPISTEL MINGGU 7 MEI 2023
TANGIHON JALA ULAHON
Psalmen 28:1-9
Minggu Kantate
TURPUK
Tu Ho do ahu joujou ale Jahowa, partanobatoanhu, unang sai sip Ho manundali ahu, asa unang ahu molo tung laos sip Ho manundali ahu, doshon halak angka na manuruk tanoman. Sai tangihon ma soara ni sombasombangku, molo mangangguhi ahu tu Ho, molo hupaherbang tanganhu tu bilut ni habadiaonMu. Unang tung sarat ahu rap dohot angka parjahat dohot angka siulahon hajahaton, angka parhata lesem tu donganna, hape hajahaton do di bagasan rohanasida. Sai baloshon ma tu nasida hombar tu pambahenannasida dohot tu hinajahat ni pangalahonasida; hombar tu parulaon ni tangannasida baloshon tu nasida, tubolhon tu nasida pambahenannasida i. Ai ndang pardulina mangantusi angka jadijadian ni Jahowa manang parulan ni tanganNa; lohaonNa ma nasida sogot jala ndang be paulionNa nasida. Pinuji ma Jahowa, ai nunga ditangihon soara ni sombasombangki. Jahowa do pargogongku dohot lombulombungku, marhaposan tu Ibana do rohangku, jadi dapotan pangurupion ahu; asa marolopolop ma rohangku jala pujion ni endengku ma Ibana. Jahowa do pargogonasida jala partanobatoan ni angka hatuaon ni messiasNa i do Ibana. Sai tumpahi ma bangsoMi jala pasupasu bangso na niainMi, sai parmahani jala usungi ma nasida ro di salelenglelengna.
PATUJOLO
Buku Psalmen digoari do Tehillim di bagasan bahasa Heber na marlapatan ende manang pujipujian. Jala buku Psalmen on i ma sada buku na marisihon angka pujipujian dohot angka tangiang na pinapungu ni bangso Israel uju i. Jala buku on pe dipangke bangso Israel do di bagasan angka punguan nasida. Dung i dipamasuk ma buku on tu Bibel ni bangso Israel. Di bagasan buku Psalmen on, marisihon angka pujipujian na ditujuhon tu Debata, tangiang mangido pangurupion, mangido pasupasu, manesa dosa, dohot angka lan na asing. Angka tangiang na disurat di buku Psalmen on adong do i na dipasahat sian hadirion ni sasahalak jala adong do na dipasahat sian hadirion ni sada bangso. Na dipasahat ni sasahalak manggombarhon roha ni sasahalak (boi do ala ni las ni roha manang ala ni habot ni roha). Molo na dipasahat ni sada bangso, i ma tangiang na manggombarhon hinaringkot na di punguan dohot roha ni bangso ni Israel.
Alai gumodang do di bagasan buku Psalmen on angka hata na manghatindangkon haporseaon tu Debata ala naung dijalo nasida pangurupion na sian Tuhan Debata, haporseaon na marguru tu angka pasupasu ni Debata na mansai godang tu bangso i. Surat Psalmen on, dibagi do tu pigapiga bindu. Sada sian godang ni bindu ni buku Psalmen i ma Psalmen bindu 28 na ginurithon ni Raja Daud na mamangke ende na mansai uli. Impola ni bindu on i ma taringot tu tangiang ni Raja Daud mangido haluaon sian Debata.
HATORANGAN
Dipungka parpsalmen do di bagasan bindu on mandok "tu Ho do ahu joujou, ale Jahowa, partanobatoanhu, unang sai sip Ho, manundali ahu, asa unang ahu molo tung laos sip Ho manundali ahu, doshon halak angka na manuruk tanoman." Pandohan on pabotohon songon dia hasusaan na niadopan ni parpsalmen di ngoluna mardongan roha na marhaporusan na manongtong na dipasahat tu Debata marhitehite tangiang. Adong do pigapiga jolma na mandok ndang ringkot na martangiang. Pandapot on dipasahat na deba ala ndang dialusi Debata tangiangna dohot na pinangidona. Nang pe sipata mardongan ilu jolma i martangiang, sai adong do na mandok paboa sai sip do Debata di angka tangiangna. On ma sada pandapot na mambahen jolma i gabe mago di angka panghirimon, gabe ndang be dibereng angka na naeng masa tu joloan ni ari. On ma angka na masa di ngolu ni jolma na deba na mambahen sungkunsungkun roha ni jolma i taringot tu lapatan ni na martangiang.
Alai ndang songon i molo di parpsalmen, marasing do sian naung didok i. Molo di parpsalmen adong do hadirion asa manorushon parngoluanna jala holan tu Debata do ibana joujou. Tangkas do diantusi jala dihatindangkon parpsalmen paboa Debata do partanobatoanna jala Debata do hagogoon di ibana. Adong tolu bagian isi ni Psalmen bindu 28 on, i ma: Na parjolo, joujou ni parpsalmen (ayat 1-2), na paduahon, pangidoan asa unang ma mago nasida songon halak parjahat (ayat 3-5) jala na patoluhon, mandok mauliate huhut manghatindangkon haporseaoan marhite tangiang pangondianon (ayat 6-9).
Marhite Psalmen 28 on, on ma songon na masa di Raja Daud di na manghilala ibana uju ditinggalhon Debata ibana. Di sada partingkian manghilala ibana sai hira na ndang ditangihon Debata tangiangna jala sai holan na sip do Debata. Ndang diboto ibana boasa tung sip situtu Debata, jala manghilala ibana na so adong be panghirimon i. Mansai tangkas do pangantusion ni parpsalmen paboa holan marhite Debata do haroro ni haluaon i. Alai di bagasan ende on, dipingkiri ibana paboa naeng uhumon ni Debata do ibana songon halak parjahat. Dung i diuduti ibana ma mangido tu Debata asa ditangihon soarana na joujou i, ala i do pangidoan na pinasahatna marhite ende on. Sian na masa di ngolu ni parpsalmen on tangkas ma taboto paboa mansai borat do hape molo ndang ditangihon jolma soaranta na joujou, lam ma molo Debata na so manangihon. Olo muruk do hita molo ndang dibege jolma soaranta, isarana apala mangalehon apala sada pandapot tu hita. Olo do tutu gabe muruk hita ala masa na si songon i di hita. Hea do hita mambahen on songon sada pangarimangon di dirinta?
Dipatorang do di bagasan turpuk on songon dia pangarajumion ni halak na porsea asa tarida muse angka panghirimon i. Didok do asa martangiang di bagasan roha mandok mauliate jala mamuji pasangaphon Debata. Ala holan Debata do na boi sipangasahonon di ngolu ni halak na porsea. Marsiajar do hita marhite Psalmen 28 on asa unang mansohot hita na martangiang i. Olo do sipata tahilala songon na dao Debata ala ndang dialusi dope tangiangta. Boi do masa si songon i ala ni angka pingkiran na sai sungkunsungkun di dirinta, sai mian di bagasan roha mandok, aha do ulaning na sala asa ndang maralus tangiangta i. Alai sada hasintongan na ringkot sipeoponta paboa ditangihon Debata do tangiangta i lumobi ma ala naung joujou hita tu Ibana jala marpanghirimon tu Ibana.
Antong sai tapuji ma Debata jala ingkon holan pujipujian ma ruar sian hita. Ai nunga ro Kristus tu portibi on, dilehon do diriNa tu hau pinarsilang asa malua hita sian dosa, gabe mardame hita dohot Debata. Dung i mulak mangolu do Ibana sian na mate jala hehe manaluhon hamatean asa mangolu nang hita, manaek tu banua ginjang parade inganan di angka na porsea, asa gabe sitindangi hita di saluhut pambahenan dohot ulaon ni Debata na bolon i tu saluhut portibi on.
HAHONAAN
Ojahan ni Minggunta sadari on i ma "Tangihon jala Ulahon", on ma sada pandohan na mansai tangkas tujuanna. Dipangido do hita asa manangihon Barita na Uli, i ma Hata ni Debata. Ala ni i ma ingkon tangi do hita di Hata ni Debata, alai unang holan na manangihon hape ndang diulahon. Ingkon boi do rap tapatupa na dua on di bagasan ngolunta. Antong unang ma lupa hita gabe sitindangi tu angka keluarganta nang tu angka humaliangta pe. Taarahon jala tabetabetahon ma saluhut na humaliang hita asa mananda jala manghilalahon pasupasu nang haluaon na pinatupa ni Tuhanta di bagasan Jesus Kristus. Unang ma adong sian hita na mangarahon donganna tu angka ulaon na so hinalomohon ni Debata, isarana songon tu angka hamusuon, parbolatbolatan, hosom, hatangkangon dohot angka lan na asing. Alai marsibetabetaan ma hita tu angka ulaon harajaon ni Debata asa malua hita nang keluarga dohot saluhut ruas ni huria. Amen. (hh)
Posting Komentar