EPISTEL PARNINGOTAN DI HANANAEK NI JESUS - KAMIS 18 MEI 2023
MANGHAPORSEAI JESUS NAUNG MANAEK TU BANUA GINJANG
Heber 12:1-6
TURPUK
Dibahen i nang hita pe, ala na sai torop ni sitindangi humaliang hita, tapeakhon ma nasa na pasorathon ro di dosa na girgir manghaliangi, jala marbenget ni roha ma hita marlojong tu bagasan paraloan na sonson di jolonta. Tabereng ma induk ni haporseaon i jala na paujunghonsa, i ma Jesus na manaonhon parsilangon i, singkat ni las ni roha tohapNa i hian, so dietong i hailaon, gabe hundul di siamun ni habangsa ni Debata. Paingotingot hamu ma Ibana na pataontaonhon paraloan sisongon i dompak Ibana sian angka sipardosa, asa unang marnaloja hamu, unang mandate tondimuna. Ndang adong dope pola tiris mudarmuna laho mangalo di parungkilon maralohon dosa i. Nunga lupa hamu di pangapulon na hinatahonNa tu hamu ala anak hamu, ai ninna do: "Ale anaha, unang tois roham di pangajarion ni Tuhan i, jala unang ho mandele jumpa dipinsang ho." Ai diajar Tuhan i do na hinaholongan ni rohaNa, jala dilinsingi do ganup anak na jinangkonNa.
PATUJOLO
Parngoluon di portibi on boi do digombarhon songon sahalak jolma na mandohoti sada paraloan. Jala tujuan ni paraloan i asa mandapot hamonangan do, sian na mamungka, sahalak na mandohoti paraloan nunga ingkon parade dirina jala dungo saleleng paraloan i. Tontu godang do angka sipangambati na ingkon adopanna. Godang do angka alo na mangelaela ibana asa unang tolhas ibana tu ujung ni paraloan i. Jala sahalak na mandohoti sada paraloan ingkon di bagasan benget ni roha do, molo ndang marhabengeton olo ma gabe talu jala ndang jumpang hamonangan di ibana. Songon i ma nang ngolu ni jolma i saleleng di hasiangan on.
Ngolu na nidokna songon paraloan dison boi do talapati songon manguji haporseaonta saleleng mangolu hita di portibi on. Paraloan i ingkon diulahon do di bagasan habengeton, di hata Junani didok hypomonēs lapatanna daya tahan, kesabaran, habengeton, na mandok asa di bagasan habengeton do hita mangulahonsa (ida Heber 10:36 dohot Pilippi 3:12-14). Songon paraloan naung digombarhon i, na ingkon sahat tu ujungna, songon i ma nang ngolunta on na ingkon sahat tu ujungna. Ujung ni paraloan ni ngolunta on i ma manghaporseai Jesus naung manaek tu banua ginjang. Ala Ibana do parhitean di hita laho manopot Ama i. Dibahen i marhite turpuk ni Epistel on diarahon do hita asa pahot jala patanghon haporseaonta marhite naung mate, hehe jala manaek Ibana tu banua ginjang laho paradehon inganan di angka na porsea di Ibana.
HATORANGAN
1. Ngolu ni halak na porsea (ayat 1-2).
Di Surat Jakobus on dipasahat si Jakobus do paboa na so marguna do haporseaon i molo so marulaon (ida Jakobus 2:20). Tutu do i, molo taringot na mandok porsea do, sibolis pe porsea do adong Debata sisadasada, jala angka dotdot, alai ndang marsomba angka sibolis i tu Debata (ida Jakobus 2:19). Marhite turpuk ni Epistel on diajari do hita ala na sai torop ni sitindangi humaliang hita, tapeakhon ma nasa na pasorathon ro di dosa na girgir manghaliangi, jala marbenget ni roha ma hita marlojong tu bagasan paraloan na sonson di jolonta.
Parbue ni haporseaon na boi tabereng di bagasan turpuk on i ma, na parjolo, tapeakhon ma nasa na pasorathon ro di dosa na girgir na manghaliangi. Diajari do hita asa padaohon diri sian nasa na roa, mambolonghon dosa na sai manonson hita, ala i do na mangambati dalanta jonok tu adopan ni Debata. Alai molo nunga tapasiding i saluhutna, roha dohot ngolunta on pe gabe manuju tu adopan ni Debata ma.
Na paduahon, marbenget ni roha marlojong tu bagasan paraloan na sonson di jolonta. Paraloan di bagasan ngoluta on ingkon taulahon do di bagasan habengeton, jala marhite pangarimangion di bagasan rohanta asa unang pintor mandele hita di tonga dalan laho manopot haporseaon tu Jesus Kristus. Ai nunga parjolo Jesus i manaon na porsuk, i ma marhite naung mate tarsilang Ibana di dolok Golgata, singkat ni las ni roha do tohapNa i hian, so dietong i hailaon. Alai gabe marhamonangan do Ibana marhite na gabe hundul di siamun ni habangsa ni Debata.
2. Unang marnaloja hamu, unang mandate tondimuna (ayat 3-4).
Paingotingot hamu ma Ibana na pataontaonhon paraloan sisongon i dompak Ibana sian angka sipardosa, asa unang marnaloja hamu, unang mandate tondimuna. Na marlapatan ma i ingkon torus do tabahen Jesus i gabe tiruan jala na gabe patoguhon hagirgiron di bagas rohanta. Ingkon tu Ibana do hita manatap asa dapotan dalan, pangurupion jala angka aha na hinalomohon ni Debata di hita uju masa parungkilon di tongatonganta.
Ingkon taingot do Ibana jala tarimangi naung pinatupaNa humophop hita jala marusaha hita patupahon hombar tu naung pinatupaNa di hita. Ingkon tapatudos do na masa di Jesus tu na masa di hita, songon dia hinaporsuk na tinaon ni Jesus tu na tataon. Marhite i ma boi dapotonta paboa na umporsuk do na tinaon ni Jesus marimbangkon na tataon, sian na masa nang sian balga na pe, lumobi ma nang di habengeton, dao umbengetan do Ibana sian hita.
Mansai denggan do habengeton ni Jesus i mangadopi saluhut na dokdok i, umbahen i do Ibana ma na gabe tau tiruan di hita. Ndang sadia dope haporsukon na niadopan ni jolma na tutu situtu mangihuthon Jesus, molo tapatudos tu hinahansit na tinaon ni Jesus uju di ngoluNa di portibi on. Dibahen i dipaingot do hita asa unang marnaloja jala unang pintor mandate nang tondinta.
3. Diajar Tuhan i do na hinaholongan ni rohaNa (ayat 5-6).
Durus do mudar ni Jesus laho humophop jolma i, laho mangalo parungkilon, mangalo dosa. Ndang hea mandele Jesus di adopan ni Debata. Alai marujung do saluhutna na bernit i, manang na songon dia pe porsuk nang ganjang ni sitaonon i, dihamonanghon Jesus do saluhutna i marhite naung hehe Ibana sian na mate jala manaek tu banua ginjang. Dibahen i ingkon marlas ni roha do halak Kristen dihaheheon ni Kristus, unang lalap di angka panolsolion nang pandelean ala ni angka sitaonon na masa di ngolunta. Unang tapasuda tingkita di angka panolsolion na so marniula.
Molo porsea hita di Jesus naung hehe sian na mate jala manaek tu banua ginjang, ingkon barani do hita mangambati asa unang tapangke tingkinta laho mamingkiri angka hasusaan manang sitaonon na masa di ngolunta. Tapangke ma tingki i gumodang laho mangula ulaon na denggan, patupahon nasa na ture di hangoluan on.
Molo tung pe ro angka sitaonon di ngolunta, ingkon tarajumi do sai na adong do masa i, alai ndada asa mandele hita. Alai marhite i, lam tu toguna ma hita maniop Tuhan i jala porsea ma hita sai na ajaran ni Tuhan i do na hinaholongan ni rohaNa. Asa marhite i lam jumonok hita tu adopanNa.
Halak na porsea ingkon marsiajar do asa mangarajumi angka na hansit na tinaon ni Jesus (ayat 3), asa taantusi paboa ndang gabe sidalian haporsuhon i asa gabe mandele. Ala ndang sadia dope na tapatupa mangalo dosa marimbangkon na pinatupa ni Jesus. Jala hita pe ingkon tigor do pangantusionta mangalapati angka partinaonan ni Jesus.
Di ari parningotan di hananaek ni Jesus Kristus sadari on taingot ma manang sadihari pe hita mangadopi angka hamaolon dohot hasusaan, sai na marujung do saluhutna i dibahen Tuhanta naung hehe jala manaek tu banua ginjang.
HAHONAAN
Marhite turpuk ni Epistel di parningotan hananaek ni Jesus sadari on dipaingot do hita asa mamangke tingkinta mangula angka na denggan jala mangargahon panobusion ni Jesus di hita. Di partingkian si nuaeng on mansai godang halak na pasudasuda tingkina dohot gogona marningot angka sitaonon dohot hansit ni roha tu donganna. Gabe ndang margogo manguduti ulaon na denggan di ngoluna jala gabe tarambati marsaor dohot donganna.
Alai marhite na marningot hita di hananaek ni Jesus tu banua ginjang, molo porsea do hita disi, porsea ma tong hita sai na boi do taadopi angka na lungun jala na paet. Tapatuduhon ma i di ngolunta si ganup ari, las ni roha dohot panghirimon, mangasahon huaso hananaek ni Jesus. Sai monang ma hita maralohon dosa dohot angka hisaphisap ni daging ala naung monang do Jesus maralohon i sude jala manaek Ibana tu banua ginjang. Tahaporseai ma i, asa hita pe gabe parsidohot di hangoluan si saleleng ni lelengna, naung pinaradeNa. Amen. (is)
Posting Komentar