JAMITA PARNINGOTAN DI HANANAEK NI JESUS - KAMIS 18 MEI 2023
MANGHAPORSEAI JESUS NAUNG MANAEK TU BANUA GINJANG
Johannes 6:60-63
TURPUK
Asa torop ma sian angka siseanNa na umbegesa mandok: "Hata na kasar do i; ise pabegebege i?" Alai diboto Jesus ma di bagasan rohaNa, naung marmungutmungut angka siseanNa siala hata i, jadi didok ma tu nasida: "Tung ala ni i do hamu targasip? Beha nama anggo idaonmuna Anak ni Jolma i manaek tu ingananNa hian? Tondi i do na pangoluhon; ndang marguna anggo daging i. Angka hata naung Huhatahon tu hamu, Tondi do i dohot hangoluan.
PATUJOLO
Sahat tu sadari on sai adong dope jolma na so porsea di hamamate dohot hananaek ni Jesus. Dietong do i holan turiturian sambing na so tarpingkiran ni jolma. Songon i ma uju na rap Jesus dohot angka siseanNa i. Uju manghobasi Jesus di portibi on, sai didok do tu angka siseanNa i, ia Ibana na ingkon mate do jala hehe, dung i manaek tu banua ginjang, asa marhite i ma singkop panghobasionNa di portibi on.
Dipatorang Jesus do tu angka siseanNa i, paboa Ibana do roti hangoluan, roti na tuat sian banua ginjang. Ise na manganhon roti i dapotan hangoluan ma ibana. Roti na nidok ni Jesus disi i ma dagingNa sandiri. Nang mudarNa i pe ingkon do inumon ni jolma, asa dapotan hangoluan.
Dung didok Jesus hata i, sude do jolma mangetong hataNa i na so tarantusan jala ndang tarpingkiran ni jolma. Angka ninna ma: "Beha ma bahenon ni halak on mangalehon dagingNa panganonta?" (ida Johannes 6:52). Alai dipatorang Jesus do aha lapatanna umbahen na didok hata i. Marhite panghataion ni Jesus tu angka na torop i dohot sude siseanNa i, godang do sian nasida na ganggu haporseaonna, alai godang do tong na dapotan pasupasu sian hata i.
HATORANGAN
Marhite turpuk ni Jamita di ari parningotan di hananaek ni Jesus na dienet sian Evangelium Johannes bindu 6 on boi do tabereng adong tolu massam ni angka halak na mambege hata ni Jesus: na parjolo, halak Jahudi (ida di ayat 41 dohot ayat 52), i ma angka na manulak Jesus, na paduahon, halak na torop (ida di ayat 60 dohot ayat 66) na mangihuthon Jesus, jala na patoluhon, sisean ni Jesus na 12 i (ida di ayat 67). Sian na tolu massam ni halak na umbege hata ni Jesus on dipangke sibolis do nasida asa unang porsea di hata ni Jesus i.
Didok di ayat 60 Asa torop ma sian angka siseanNa na umbegesa mandok: "Hata na kasar do i; ise pabegebege i?" Adong do pigapiga angka halak na malo mangalapati hata "kasar" dison na mandok 'maol tarjalo roha'. Alai adong do muse na mangalapati hata "kasar" on songon 'ndang na apala maol diantusi, alai maol tarjalo manang jangkonon' (patudos songon na disurathon di versi New International Version - This is a hard teaching, lapatanna ini adalah ajaran yang sulit, hata na maol). "Who can accept it?" lapatanna "siapa yang bisa menerimanya?", ise ma na boi manjalo i? Maol do tarjalo roha ni nasida pangajarion ni Jesus i, lumobi ma taringot tu hamamateNa di hau pinarsilang (patudos di Johannes 12:34 dohot di 1 Korint 1:23).
Ndang lomo roha ni nasida di pangajarion na pinasahat ni Jesus i. Lumobi ma uju na didok Jesus asa "Manganhon daging ni Anak ni Jolma i jala manginum mudarNa." Molo dipangasahon do pingkiran ni hajolmaon mangalapati hata i, ndang na boi tarjalo roha nang pingkiran ni jolma i, ai pintor dirajumi do songon na mangallang jolma. I do na adong di roha nang pingkiran nasida umbahen na didok hata na kasar hata ni Jesus i. Di turpuk on didok, gabe marmungutmungut do nasida. Ndang adong sian nasida na mandok asa tung dipatorang Jesus tutu, aha do lapatan ni hataNa i.
Tabereng ma di ayat 41, disi dipaboa, halak Jahudi do na marmungutmungut, alai di bagasan turpuk ni Jamitanta sadari on, i ma di ayat 60-63, gabe bali do parmungutmungution i tu sisean ni Jesus. Nang pe so didok nasida secara langsung, alai diboto Jesus do angka aha na di roha ni nasida na marmungutmungut i. Laos disungkun Jesus ma tu nasida, mandok "tung ala ni i do hamu targasip?" Pangajarion ni Jesus na so tarjalo ni roha ni nasida i ma uju na nidokNa paboa na tuat do Ibana sian banua ginjang (ida di ayat 41, 50, 51 dohot 58) jala pangajarion na kasar do on di nasida.
Diuduti Jesus muse mandok di ayat 62, "Beha nama anggo idaonmuna Anak ni Jolma i manaek tu ingananNa hian?" Didok di turpuk on Anak ni Jolma, na mandok Jesus do i songon Anak ni Jolma. Alai pandohan "manaek tu ingananNa hian" pataridahon huaso ni Debata, pataridahon hatuhanon ni Jesus, paboa naung adong hian do ingananNa rap dohot Debata Ama, alai tuat Ibana sian surgo mebat tu hita.
Pangantusion ni halak Jahudi taringot tu pangajarion ni Jesus, uju na nidokna "daging", dipangasahon nasida do pingkiran ni hajolmaon. Alai di na dihatahon Jesus angka hataNa i di ayat 60-63 asa marpangantusion nasida na umbegesa, asa unang ma mangasahon pingkiran ni jolma dilapati hataNa i, alai mangasahon tondi dohot haporseaon do, ndang marguru tu pangantusion ni jolma. Boi do tong diantusi na nidok ni Jesus, ndang daging ni hajolmaon songon daging na somal taantusi, ai ndang patupaon ni daging na si songon i agia aha. Unang ma tapingkiri daging na nidok ni Jesus i songon daging na di pingkiran ni jolma, alai TondiNa i nang Jesus sandiri do na mangalehon hangoluan.
Angka sisean, i ma angka na mangihuthon Jesus. Alai dung ditangihon nasida pangajarion ni Jesus, gabe dihilala nasida songon na so boi be ihuthonon nasida Jesus i. Hata na nidok nasida i ma, na ingkon manganhon daging dohot manginum mudar ni Jesus. HananaekNa tu Banua Ginjang, na paboahon tutu situtu do sude naung nidokNa i. Gabe i ma na manambai sogo ni roha ni halak na so manjalo hajolmaon ni Jesus na dipelehon tu nasida marhite hamamateNa di hau pinarsilang (ayat 62). Daging hajolmaon ni Kristus i, ndang marparbuehon manang aha, asing ni molo dilehon Tondi i hangoluan. Alai nang pe songon i, sude do hata ni Kristus i digohi Tondi, i ma Tondi na pangoluhon. Angka hataNa i do na paluahon. Pamingkirion ni hajolmaon ni angka sisean tu hataNa i, patuduhon gale ni haporseaon ni angka siseanNa i. Ndang holan haporseaon na so togu na dapot ni Jesus sian siseanNa i, alai tutu molo tapaihutihut sahat tu angka ayat na mangihut, pola sampe adong do na gabe sahalak parjehe sian angka siseanNa i.
Evangelium Johannes on disurathon laho patanghon angka halak Jahudi, angka halak na umbege jala na mangihuthon Ibana, paboa Jesus do Mesias naung tinurpukhon ni Debata di angka Padan na Robi jala Ibana do sipalua jolma sian dosa. Asa sude jolma na porsea di Ibana dapotan hangoluan si saleleng ni lelengna.
Molo taingot jala tapatupa ari parningotan di hananaek ni Jesus, ndang boi gait rohanta, jala tapingkiri paboa holan barita naung somal boti dibahen. Alai na boi taulahon marhite hatorangan ni turpuk on i ma, sian ayat 60 asa taingot tongtong di haroro ni Jesus tu portibi on, na maol do i tarjalo roha ni jolma molo dipangasahon pikiran hajolmaon, alai ingkon marhite haporseaon na togu do asa boi tajangkon Ibana di ngolunta. Ayat 61-62, diboto Debata do angka aha na di bagasan rohanta, tung saluhut do diboto Jesus, andorang so tadok pe hatanta, songon siseanNa i, nunga diboto Jesus na di bagasan roha nasida. Ayat 63, Tondi i do na pangoluhon hita di adopan ni Debata.
HAHONAAN
Sadari on marningot do hita di ari hananaek ni Jesus manopot ingananNa, sada halongangan jala las ni roha do i di hita angka na porsea. Jala disosoi do hita marhite turpuk ni Jamita di Evangelium Johannes 6:60-63 dohot ojahan ni Jamita, "Manghaporseai Jesus Naung Manaek tu Banua Ginjang." Molo sian pingkiran ni hajolmaon, ndang tarjalo roha angka na masa di Jesus i, i ma hamamateNa, haheheonNa sahat tu hananaekNa tu Banua Ginjang. Alai ndang adong na so tarpatupa ni Debata. Jala ndang adong na boi managambati angka sangkap ni Debata tu saluhut na tinompaNa di portibi on.
Na ingkon ro do Ibana marhite Jesus Kristus jala mate manobus hita jolma, jala ingkon hehe Ibana di ari patoluhon. Haheheon ni Jesus Kristus i patuduhon paboa naung talu do hamatean i. Nunga sae be huaso ni dosa i, alai hangoluan si saleleng ni lelengna nama na nilehonNa tu hita jolma na porsea jala na mangulahon parsuruonNa. Jadi tahaporseai ma i di bagasan ngolunta, tatiop ma tongtong naung manaek Jesus tu Banua Ginjang, i ma na gabe sada tanda paboa naung talu hamatean i dibahen Tuhanta Jesus Kristus. Amen. (is)
Posting Komentar