EPISTEL MINGGU 11 JUNI 2023
HAPORSEAON I DO NA PALUAHON
Hosea 5:15 - Hosea 6:6
Minggu 1 Dung Trinitatis
TURPUK
Laho ma Ahu mulak tu ingananHu, paima diundukhon nasida dosanasida i, jala dilului nasida bohingku; di bagasan hagogotannasida i pasogotonna ma mangalului Ahu sian nasa rohana. "Beta hita, asa mulak hita tu Jahowa! Ai nunga Ibana mangaribahi, laos Ibana pamalum hita. Nunga Ibana mambugangi, laos Ibana manaoari hita. Sai pangoluonNa do hita dung salpu dua ari, tole patoluarihon paheheonNa hita, asa mangolu hita maradophon Ibana. Sai mananda ma hita, sai ringgas ma hita mangeahi parbinotoan di Jahowa, tudoshon buhasiang ari do sintong ni habibinsarNa, jala sai na ro do Ibana songon udan tu hita, songon udan nene na mamornohi tano i." Tung aha ma bahenonHu tu ho, ale Epraim? Tung aha ma bahenonHu tu ho, ale Juda? Ai tudoshon ombun manogot do hadaulatonmuna, jala tudoshon nambur manogot na tibu manaek. Dibahen i hubarbar nasida marhitehite angka panurirang, hubunu nasida marhitehite hata angka na sian pamanganHu, gabe binsar angka uhumHu songon panondang. Ai lomoan do rohangKu mida asi ni roha asa mida pelean; jala lomoan mida parbinotoan di Debata, asa mida pelean situtungon.
PATUJOLO
Buku Hosea on i ma sada buku na tarmasuk tu horong ni Buku ni Angka Panurirang, lumobi ma Buku Hosea on masuk ma tu Buku na Parjolo di horong ni Angka Panurirang na so pola tarsar goarna (Nabi-nabi Kecil) di Padan na Robi. Goar ni Buku Hosea on, dibahen hombar tu goar ni panurirang na adong di buku on, i ma si Hosea anak ni si Beri, sahalak panurirang na mangolu di harajaon Juda di angka ari ni si Jerobeam anak ni si Joas, raja di Israel.
Di hata Gorik goar ni si Hosea on didok hosyea lapatanna haluaon. Godang do na masa na niadopan ni Panurirang Hosea. Humasusa do bangso i ala holan mangasahon gogo nang pingkirannasida, pola sahat tu mangasahon gogo ni bangso na asing, jala mardongan nasida dohot bangso Assur, ndang mangasahon Debata nasida. Lam tu moruna ma haporseaon, moru nang di angka nasa na ringkot, lam tu segana nang parange ni angka bangso i.
Didok Debata do tu Panurirang Hosea asa mambuat si Gomer sahalak boruboru sibabijalang asa gabe ripena laos dipantubuhon ma angka dakdanak sian boruboru sibabijalang i, songon dalan patuduhon gombaran ni pargoluon ni Bangso Israel uju i di naung marmainan (bersundal), marbalik, manundalhon (menduakan) Debata. Nunga ditundalhon Bangso Israel Debata jala manomba debata ganaganaan (Baal) nasida (patudos Hosea 2:15-16). Sian pardongansaripeon ni panurirang Hosea dohot si Gomer, ditubuhon ma tolu dakdanak, i ma: Jesreel, Nai Sohinasian dohot Lo Ami. Angka goar na nilehon ni Debata tu angka dakdanak ni si Hosea i adong be do lapatanna laho patuduhon na masa di Bangso Israel.
Goar ni si Jesreel didok di Hosea 1:4-5 "dung i didok Jahowa ma tu ibana: "Jou ma goarna si Jesreel; ai otik nari marlulu ma Ahu di angka utang mudar ni si Jesreel tu pinompar ni si Jehu, jala Ahu pasiaphon harajaon ni pinompar ni Israel. Jadi di ari na sasada i ponggolhononHu ma sior ni Israel di rura Jesreel." Jadi goar ni anak ni si Hosea na parjolo i ma na marlapatan Debata laho manguhum angka pinompar ni si Jehu dohot pasiphon harajaon ni pinompar ni Israel.
Goar ni dakdanak paduahon, sahalak boru, digoari ma i, Nai Sohinasian na marlapatan "ai ndang be marpangulahi rohangKu tu pinompar ni Israel, manang marpamuati rohangKu tu nasida (Hosea 1:6).
Dakdanak na patoluhon digoari ma Lo Ami lapatanna, "ai ndang bangsongKu hamu, jala ndang hamu nampuna Ahu (Hosea 1:9). I ma gombaran na masa di parngoluan ni Bangso Israel hatiha i. Nunga be lam moruna haporseaon nasida tu Jahowa. Turpuk ni Epistelta sadari on, manosoi asa masa ma paubahon roha asa polin manghaporseai Jahowa.
HATORANGAN
Molo di roha ni si Hosea, haporseaon i, i ma sada hubungan do i dohot Debata. Napasti molo adong hubungan, adong ma ulaon nanaeng siulahononhon, tarlumobi ma ulaon napinasahat ni Debata tu ibana. Dipillit Debata do si Hosea gabe sada panurirang, nalaho padengganhon pangalaho ni bangsoi na so suman di adopan ni Debata. Dipinsang jala dipaingot si Hosea do taringot tu hajahaton, kesombongan, tarlumobi taringot tu panombaon nasida tu dewa na di somba bangso Israel hatihai. Tegas do si Hosea paingothon nasida di dok: naingkon manolsoli do nasida jala ingkon mulak do nasida muse tu Debata. Dipataridahon ibana do ianggo Debata ni Israel ima Debata natalup marroha jala parasi roha godang, naingot di angka janjiNa tu angka naporsea di Ibana. Tuangka halak na so mananda dirina, na so umboto hasalaanna tu Debata, naso manolsoli di angka dosana, ndang ditangihon Debata alu-alu nasida molo ndang mangakku nasida di hasalaanna jala ingkon do luluan na Debata marhite toruk ni roha. Panjouon ni si Hosea tu bangsoi asa marhamubaon, dilehon ibana do kepastian bahwa, nang pe diuhum Debata bangsoi ala ni dosana, alai Ibana do muse na pamalumhon sian uhuman i asa ganup na mangulahon dosa gabe mananda di asi dohot holong ni Debata. Hamubaon i mengarah tu haimbaruon sian segi kehidupan rohani, ndungi mengarah tu panandaion tu Debata, jala ro Debata songon udan mangalehon halambohon nang hangoluan marhitehon pasu-pasuNa na so ra suda di angka na tigor marroha.
Diayat 1-3 ayat on berbentuk syair dohot ende na niendehon ni saluhut bangsoi na mengarah tu nyanyian penyesalan. Sasintongna endeon hape sada ende ziarah na dipangke angka para imam dohot sude bangsoi di acara hari penyesalan nasional manang hari doa nasional, na dipangke nasida menangkis serangan-serangan dohot angka ancaman sian bangso na asing. Ende paula sambing do di bahen nasida ende pamujian i ndang na marhitehon sian hamubaon manang panolsolion na sasintongna. Holan sahali-sahali do diendehon nasida ende puji-pujian i (diacara khusus), jala adong kesan berengon hera na manolsoli di hadosaonna hape daong, ndung sae i ndang adong be diharingkothon nasida be. Diangka na masa si nuaeng on pe godang do halak Kristen namangendehon ende puji-pujian tu Debata holan sipaula sambing ndang sian roha na ias, alai holan mangihuthon hasomalan sajo. Olo do dibagasan sataoni holan sahali sataon margareja, manang di hari-hari tertentu isarana di ari Natal, paskah, manang angka naasing holan disi ma binereng. Alai napaling parahna olo do bulus dibagasan sataoni ndang hea di dege bagas Joroi, nungnga pola apala mandosdos dihilala rohana martuhan dohot so martuhan. Songoni ma namasa di turpuk on. Karena itu Nabi Hosea mengutipnya sebagai ungkapan pertobatan yang terlalu dangkal dan tak memadai (ayat 4) disadari bangsoi do Debata mangaribahi, laos Ibana pamalumhon, Ibana mambugangi, laos Ibana manaoari (ay 1) adong hasadaron bahwa penyiksaan dohot pengampunan, parsahiton dohot hamamalum ro sian tangan ni sa sahalak (bdk Ayb.5:18). Atas dasar kepercayaan ima tarbege adong ajakan “beta ma hita mulak tu Jahowa” alai sitoho do ianggo pandohan ni bangsoi naeng mulak tu Jahowa? Tarpaima do muse bangsoi hamamalum i dalam waktu singkat, (ay.2). “sai pangoluaonna do hita ndung salpu dua ari, tole patolu arihon” (Bnd. Mzm.41:11). Alai di dok si Hosea holan hamubaon na sasintongna/ sungguh-sungguh do naboi paulakhon roha ni Debata, ndang haporseaon na palsu.
Ayat 4-6 dilehon panurirang Hosea do alus taringot tu ende penyesalan ni bangsoi. Marhitehon ibana adong alus ni debata taringot tu hamuabaon nasida, adong penyesalan alai boha do sasintongna? Adong hasatiaon na sai di hirim Debata sian bangsoi maradophon Ibana, alai holong nang hasatiaon ni bangsoi tu Debata holan saotik jala sipaula sambing do, hatop mago tudoshon ombun manogot, jala tudoshon nambur manogot, natibu manaek. Songoni ma pangalaho ni bangso Israel hatihai tu Debata nasai jonjot manimbil sian Debata. dipaingot dibagasan turpuk on na so satia bangso Israel tu perjanjian, yang mengakibatkan bahwa Allah berfirman secara menghukum dan mengancam jala pola do di pangke angka panurirangNa laho patupahon saluhutna i, laho mangurati dohot maniaphon, mangago dohot mangaloha, paulihon dohot manuan (Bnd. Jer 1:10), alai sasudena i laho mamboan hangoluan do tu angka bangsoNa. Boasa Debata bertindak sebagai penghukum marhitehon angka panurirangNa nang hataNa?, yaitu untuk menghasilkan kasih setia. Tuhan mau supaya bangsa Israel tetap setia dan tinggal dalam perjanjian-Nya. Ai lomoan do rohangKu mida asi ni roha, asa mida pelean; jala lomoan mida parbinotoan di Debata, asa mida pelean situtungon (ay.6), arga do hita di Debata alani i ta argahon ma tongtong Debata di ngolunta, ai hirim do Debata di hatuonta mananda jala marhaporseon namangolu di Ibana, ai haporseaon tu Debata i do napaluahon hita.
HAHONAAN
Marhitehon hatorangan ni Epistel di bagasan turpuk on, adong na gabe sipahusor-husoron dibagasan parngoluonta, ima:
1. Mananda ma hita di Debata, ai marhitehon Ibana do adong hangoluan dibagasan ngolunta sahat tu partingkian on.
2. Mamuji Debata sian nasa roha, ndang holan sipaula sambing. Jala mamangke ganup partingkianta holan pasangap Debata.
3. Tatanda ma dirinta di adopan ni Debata, marhitehon hamubaon ni roha sian pangalaho na so suman mulak mananda Debata, mangulahon lomo ni roha-Na.
4. Adong komitmen mangihuthon Tuhan sian nasa roha dohot haporseaon tu Debata, ai haporseon i do na paluahon, pamonanghon dohot pamalumhon. God Bless! Amen! (sps)
Posting Komentar