JAMITA MINGGU 11 JUNI 2023
HAPORSEAON I DO NA PALUAHON
Mateus 9:18-26
Minggu 1 Dung Trinitatis
TURPUK
Uju dihatahon dope hata ondeng tu nasida, nunga ro sada halak na sangap marsomba tu Ibana, huhut ma didok: "Ipe mate borungku; alai ro ma Ho mangampehon tanganmu tu ibana, asa sumuang mangolu." Jadi hehe ma Jesus rap dohot siseanNa laho mangihuthon ibana. Dung i tongon ma adong sada boruboru na tamanangon bulanon leleng ni sampulu dua taon, na ro sian pudiNa manjama rambu ni ulosNa; ai ninna rohana di bagasan: "Nanggo pala ulosNa hujama, mangolu ma ahu." Dung i humusor ma Jesus, dibereng ma ibana, laos ninna ma: "Pos ma roham, ale Inang, haporseaonmi do na pangoluhon ho." Dung i hipas ma boruboru i olat ni na sangombas i. Asa dung sahat Jesus ro di bagas ni na sangap i, diida ma angka pangondasi dohot natorop oruk. Jadi didok ma: "Laho ma hamu, ai ndada na mate si Betet on; na modom do." Jadi diparengkeli nasida do Ibana. Asa dung dipalaho natorop i, bongot ma Ibana, ditangkup ma tanganna, jadi mulak mangolu ma dakdanak i. Dung i sar ma barita i tu na saluat i.
PATUJOLO
Hata haporseaon molo di hata Heber didok ma i emun, emunah dohot he-emin songon na disurathon di Buku 1 Musa 15:6 didok "Jadi porsea ma si Abram di Jahowa, gabe hatigoranna do i dietong Jahowa." Molo di hata Gorik didok ma i Pisteou songon na disurathon di Buku Heber 11:1 didok "Alai anggo haporseaon i pos ni roha do i di angka sihirimon, jala pamotoan na tontu taringot tu na so niida."
Songon dia do hataridaan ni halak na marhaporseaon? Marhite haporseaon i adong do panghirimon na mangolu. Didok di Lukas 1:37 "Ai ndang adong na so tarpatupa Debata." Marhite haporseaon do umbahen na gabe boi malum sian ragam ni parsahiton. Marhite haporseaon do gabe boi malua sian sibolis. Marhite haporseaon do gabe boi margogo, manahan jala monang maralohon angka sitaonon manang parungkilon na di portibi on.
Molo sian buku na sinurat ni si Jakobus, hataridaan ni haporseaon i boi do tarida sian pangulaon. Didok di Jakobus 2:17 "Haporseaon i pe songon i do: Anggo so adong pangulaonna, naung mate do hadirionna."
Turpuk ni Jamitanta sadari on pataridahon songon halak na marhaporseaon di Jesus. Na parjolo, panghorhon ni haporseaon ni sahalak na sangap, i ma si Jairus: Sahalak uluan di Bagas Joro, di na gabe boi mulak mangolu boruna. Na paduahon, panghorhon ni haporseaon ni sahalak ina na tamanangon bulanon leleng ni sampulu dua taon, gabe boi malum sian parsahitonna. I do na naeng pabagasonta pangantusionta sian turpuk ni Jamita di Minggu I Dung Trinitatis on, i ma sian Mateus 9:18-26. Tapamanat ma.
HATORANGAN
Sian turpuk ni Jamita on adong ma tolu na ringkot sipatorangon sian Buku Mateus 9:18-26 on, i ma: Na parjolo, ro ma sahalak na sangap i ma si Jairus: Sahalak uluan di Bagas Joro marsomba tu Jesus (ayat 18). Na paduahon, nanggo pala ulosNa hujama, mangolu ma ahu. Haporseaonmi do na pangoluhon ho (ayat 21-22). Na patoluhon, bongot Jesus tu bagas ni na sangap i laho paheheon boruna naung mate (ayat 23-25).
1. Sahalak na sangap marsomba tu Jesus.
Di turpuk ni Jamita on disurathon do, uju manghatai dope Jesus dohot angka siseanNa dohot angka natorop, pintor ro ma sahalak na sangap, i ma si Jairus: Sahalak uluan di Bagas Joro marsomba tu Jesus, huhut didok: "Ipe mate borungku, alai ro ma Ho mangampehon tanganMu tu ibana, asa sumuang mangolu" (ayat 18). Uluan ni Bagas Joro i mangido asa bongot ma nian Jesus tu jabuna. Jala didok ibana muse asa diampehon Jesus tanganNa tu boruna i. Porsea do si Jairus na boi do mulak mangolu boruna i. Marhite haporseaon na mangolu ndang na mate, gabe manghorhon panombaon na sintong ma i tu Tuhan Jesus. Porsea do si Jairus, na marhuaso do Tuhan Jesus pangoluhon boruna naung mate i.
Porsea situtu do si Jairus tu Jesus, molo diampehon tanganNa na gok huaso, gogo dohot habalgaon gabe masa ma halongangan jala boi do mulak mangolu boruna naung mate i. Songon na tarsurat di Ulaon ni Angka Apostel 16:31 didok "haporseai ma Tuhan Jesus asa malua ho dohot isi ni bagasmi." Na naeng dohonon ni turpuk ni Jamita on, marhite haporseaon ni si Jairus do tu huaso, hagogoon dohot habalgaon ni Tuhan Jesus gabe boi mulak mangolu boruna naung mate i.
2. Haporseaon i do na pangoluhon.
Uju di pardalanan Jesus rap dohot siseanNa laho tu jabu ni si Jairus, uluan ni Bagas Joro i. Adong ma sada boruboru na tamanangon bulanon leleng ni sampulu dua taon, na ro sian pudiNa, manjama rambu ni ulosNa. Ai didok roha ni boruboru na tamanangon bulanon leleng ni sampulu dua taon mandok: "Nanggo pala ulosNa hujama, mangolu ma ahu" (ayat 21). Porsea situtu do boruboru i tu huaso, hagogoon dohot habalgaon ni Tuhan Jesus laho pamalumhon ibana sian parsahitonna. Dung i humusor ma Jesus, diida ma boruboru i, laos ninna ma: "Pos ma roham, ale Inang, haporseaonmi do na pangoluhon ho" (ayat 22). Dung i hipas ma boruboru i olat ni na sangombas i.
Di Lukas 17:19 didok "haporseaonmi do paluahon ho." Aha do lapatan ni hata i? On do: "Huaso, hagogoon dohot habalgaon ni Tuhan Jesus na tahaporseai, i do na paluahon, na pamonanghon jala na pamalumhon." Na porsea situtu do boruboru i di Tuhan Jesus. Dihaporseai ibana do na marhuaso do Jesus laho pamalumhon ibana sian parsahitonna.
3. Dipahehe Jesus sahalak borua naung mate.
Asa dung sahat Jesus di bagas ni na sangap i, diida ma angka pangondasi dohot natorop oruk manang gaor, ala naung mate boru ni si Jairus (ayat 23). Boi sajo do gaor natorop i, ala marsisungkunan nasida sama nasida mandok: "Laho marhua dope ro Ibana tu jabu i, molo naung mate do boruna i? Aha do na boi diulahon Ibana?" Jadi didok Jesus ma tu nasida: "Laho ma hamu, ai ndada na mate si Betet on; na modom do" (ayat 24). Mambege i natorop i gabe diparengkeli nasida do Tuhan Jesus. Di pamingkirion nasida ndang mungkin be boi mulak mangolu naung mate. Ndang porsea nasida di huaso ni Tuhan Jesus na boi patupahon halongangan. Asa dung dipalaho natorop i, bongot ma Jesus, ditangkup ma tangan ni boruboru i, jadi mulak mangolu ma boruboru i (ayat 25).
On ma halongangan bolon, holan Tuhan Jesus do na boi pamasahon asa mulak mangolu naung mate. Huaso sian dia do i na jinalo ni Tuhan Jesus? Didok di Mateus 28:18 "nunga sahat tu Ahu nasa huaso na di banua ginjang dohot na di tano on." On ma na so tolap dipatupa jolma alai tarpatupa Tuhan Jesus do. Didok muse di Lukas 1:37 "ai ndang adong na so tarpatupa Debata." Na naeng dohonon ni turpuk ni Jamita on, molo porsea do hita di Tuhan Jesus, ndang adong na so tarpatupa ni Tuhan i, jala ndang gabe hamatean ujung ni angka na porsea. Alai adong do hangoluan si salelenglelengna. Jala didok di Johannes 5:24 "manang ise na porsea di Ahu, nunga sahat tu ibana hangoluan si salelenglelengna, nunga taripar ibana sian hamatean tu hangoluan."
HAHONAAN
Di bagasan Minggu sadari on, Minggu 1 Dung Trinitatis dipangkulingi do hita sian turpuk ni Jamita Mateus 9:18-26 dohot ojahan "Haporseaon i do na Paluahon." Aha ma na boi sipeoponta na laho ulahononta di tongatonga ni ngolunta:
1. Tahaporseai jala tahangoluhon ma huaso, hagogoon dohot habalgaon ni Tuhan Jesus di bagasan ngolunta, ai i do na paluahon, pamonanghon jala pamalumhon hita sian nasa sitaonon, parungkilon, parsahiton manang ragam ni panosak ni portibi on (patudos Lukas 17:19).
2. Di angka sahit ni zaman on nuaeng: Unang ma marpangusandean hita tu pingkiran dohot tu gogonta sandiri maralohon angka gulmit ni ngolu di portibi on alai marpangunsandean ma jala mangasahon goar ni Tuhan i ma hita asa dipalua jala dipamalum hita (patudos Poda 3:5-6).
3. Hita na porsea angka naung manjalo huhut manghangoluhon haluaon dohot hahipason marhite goar ni Jesus, asa parsidohot ma hita mamaritahon barita haluaon dohot hahipason tu sandok portibi on, gabe siboan jala sipatupa ulaon ni Tuhan Jesus ma hita asa sandok jolma di portibi on gabe porsea tu Tuhan Jesus Kristus (patudos Mateus 28:19-20).
4. Taurupi jala tapaingot ma angka jolma na sai tongtong dope lilu jala na sai mangasahon nang mangalului gogo na sian portibi on laho pamalumhon manang paluahon ibana sian sitaonon manang parungkilon di portibi on. Porsea ma hita di huaso, hagogoon dohot habalgaon ni Tuhan Jesus na tolap pamalumhon hita sian parsahiton dohot na pangoluhon hita sian hamatean (patudos Ulaon ni Angka Apostel 16:31). Amen. (sps)
Posting Komentar