JAMITA MINGGU 18 JUNI 2023
SATIA MANGULAHON HATA NI DEBATA
2 Musa 19:1-8
Minggu 2 Dung Trinitatis
TURPUK
Patolubulanhon dung ruar halak Israel sian tano Misir, di ari na sasada i sahat ma nasida tu halongonan Sinai. Ai borhat do nasida sian Rapidim, gabe sahat nasida tu halongonan Sinai, laos marsaro nasida di halongonan i; disi do marsaro Israel tondong ni dolok i. Dung i nangkok ma si Musa tumopot Debata. Jadi dijouhon Jahowa ma tu ibana sian dolok i, ninna ma: "Songon on ma dohononmu tu pinompar ni si Jakob, paboaonmu tu halak Israel. Nunga diida hamu na Hubahen i tu halak Misir, na Huboan i hamu hira di atas ni habong ni pidong rajawali pasahat hamu tu Ahu. On pe molo ditangihon hamu soarangKu, jala diradoti hamu padan na Hubahen i, jadi hasianHu ma hamu sian nasa bangso, ai gok di Ahu do liat portibi on. Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel." Jadi ro ma si Musa, dijou ma angka sintua ni bangso i, jala diaturhon tu jolonasida sude angka hata ondeng, angka na tinonahon ni Jahowa tu ibana. Jadi sahata ma sandok bangso i mangalusi, angka didok nasida ma: Saluhut na pinaboa ni Jahowa, bahenonnami ma. Jadi mulak ma si Musa mamboan angka hata ni bangso i tu Jahowa.
PATUJOLO
Molo di hata Heber buku on digoari ma syemot jala di hata Gorik didok ma exodus lapatanna ruar manang laho. Di buku on disurathon do songon dia haluaon ni bangso Israel sian tano parhatobanan Misir, jala disi ma tong dipatuduhon songon dia bangso Israel gabe bangso ni Debata jala manean tano na binagabagahon ni Debata tu nasida mamungka sian ompunasida.
Di buku on dipatorang do songon dia hapapatar ni huaso ni Debata di parngoluon ni bangso Israel di adopan ni angka bangso na asing. Songon dia muse Debata pahot padanNa dohot bangso i marhitehite angka uhum dohot patik, jala dipajongjong nasida undungundung ni Debata.
Sian na uju i sahat tu nuaeng dihaporesai halak Jahudi do panurat ni buku on i ma si Musa. Dipamasuk ma buku on tu horong ni pentateukh i ma angka buku na dihaporseai halak Jahudi na sinurathon ni si Musa.
HATORANGAN
Adong do sada hasurungan ni bangso Israel sian angka bangso na asing, i ma: Dipaloas Debata do bangso i marnida hapapatar ni huasoNa (ayat 4). Molo di hata Heber didok ma i ra'ah lapatanna marnida jala manghilala, dohot hata attah (kata ganti orang tunggal) lapatanna hamu, ho. Jadi ra'ah attah lapatanna na niidamuna manang na hinilalamuna. Lapatanna disi ndang holan hatahata sambing huaso manang hagogoon ni Debata, na tutu situtu do i masa na niida jala masa di tongatonga ni ngolu ni bangso Israel.
Boasa ingkon dipatandahon jala dipatuduhon Debata huasoNa di tongatonga ni ngolu ni bangso i? (ayat 3) Di hata Heber didok amar Yaaqob bayith dohot hata nagad Yisrael. Adong dua hata na dipangke disi i ma hata amar dohot nagad lapatanna mandok, pataridahon dohot patujolohon. Lapatanna asa dipapatar Debata pe huasoNa tu hita jolma asa adong do hata si dohononta, si pataridahononta, si patujolohononta tu angka pinomparta. Antong nasa silehonlehon ni Debata na adong di hita ndada laho parburnang diri i pangkeonta alai gabe dalan ma i laho manghatindanghon huaso dohot hasangapon ni Debata.
Asa tahe unang holan arta na di hasiangan on taetong na gabe siteanon tu angka pinomparta. Di ginjang ni saluhutna i ingkon Debata do na parjolo tabahen gabe arta siteanteanon tu angka pinomparta. Ra molo tasungkun tu portibi on aha do kunci ni sukses? Pintor hatop do dialuasi: Hamoraon, hasangapon dohot hagabeon. I do memang somalna dipangke standart ni kesuksesan di haportibion, lumobi ma di hita halak Batak. Alai ndada i kunci ni kesuksesan hombar tu hata ni Debata, alai: shama qol do lapatanna manangihon hata ni Debata dohot berith eth shamar lapatanna mangaradoti padan ni Debata. Lapatanna kunci ni kesuksesan di adopan ni Debata ndada holan manangihon alai ingkon dohot do tong mangaradoti. Manangihon jala mangaradoti hata manang padan ni Debata. I do kunci ni kesuksesan di ngolu ni halak na porsea.
Ra molo adong keluarganta na marpangkat na timbo, isarana songon presiden, gubernur, bupati dohot angka lan na asing. Olo do didok jolma naung tabo ngolunta, ala di rohanasida nunga be adong na mambacking i hita halak na gogo. Alai ndang sadia i sasintongna molo maradophon na didok di turpuk on, asa molo adong na mambacking hita, molo didok di turpuk on, ingkon holan Debata do. Molo angka jolma do na tapangasahon tarbatas do gogona jala ndang manongtong i. Alai molo Debata do tapangasahon ndang na hasuhatan huasoNa jala ndang marujung. Di hata Heber didok segullah kol ki am erets lapatanna hasianHu ma ho sian nasa bangso, ai gok di Ahu do liat portibi on. Molo talapati hata segullah i ma hata na mandok: sumurung manang hasian, arta jala ampuna ni Debata.
Molo naung didok sumurung manang hasian, tontu angka sipatujolohononhon ma on sian nasa na ringkot. Alai ndada holan maimaima hita manang holan manjalo sambing sian Debata gabe ndang mangulahon manang aha, alai molo naung didok sumurung, ba parangenta pe tutu ingkon sumurung ma sian angka halak na asing na so mananda Debata. Ingkon tarida do paboa na anak ni Debata hita, ampuna ni Debata. Ingkon tarida ma i di parngoluonta si ganup ari. Molo di turpuk ni Epistelta didok: "Aha ma gunana ale angka donganhu molo didok halak, di ibana do haporseaon alai ndang adong di ibana pangulaon?" (ida Jakobus 2:14). Didok muse di ayat 17 anggo so adong pangulaon ni haporseaon i, naung mate do hadirionna. Lapatanna disi amang/inang molo olo do hita manangihon jala mangaradoti hata ni Debata, tapataridahon songon anak ni Debata hita di ngolunta gabe hasian ni Debata ma hita. Gabe sumurung ma hita di adopan ni Debata, angka sipajolohonon ni Debata ma hita sian nasa jolma.
HAHONAAN
Hombar tu ojahan ni Jamita di Minggunta sadari on, "Satia Mangulahon Hata ni Debata." I do kunci ni kesuksesan di halak na porsea. Hasatiaan i ndada holan satia manangihon hata ni Tuhan i, alai ingkon satia do nang mangaradoti hata ni Debata. Molo naung didok mangaradoti, tontu ingkon di bagasan pangantusion do, dibege, dipahusorhusor, dipeop jala diulahon. Molo naung taradoti hata ni Tuhan i, i do na gabe pataridahon naung parsidohot hita mambahen hata ni Debata gabe siteanon tu angka pinomparta. Molo naung taradoti hata ni Debata, gabe anak hasian ni Debata ma hita, gabe sumurung ma hita di adopan ni Debata sian nasa jolma na adong liat portibi on. Amen. (ejs)
Posting Komentar