wvsOdYmDaT9SQhoksZrPLG0gYqduIOCNl12L9d9t
Bookmark

EPISTEL MINGGU 16 JULI 2023 - MATEUS 13 AYAT 1-9 - PANGARAMOTION NI DEBATA MARADOPHON BANGSO NA PINILLITNA

EPISTEL MINGGU 16 JULI 2023 

PANGARAMOTION NI DEBATA MARADOPHON BANGSO NA PINILLITNA 

Mateus 13:1-9 

Epistel-Minggu-16-Juli-2023-Mateus-13-ayat-1-9-Pangaramotion-ni-Debata-Maradophon-Bangso-na-PinillitNa


Epistel Minggu 16 Juli 2023 
Minggu 6 Dung Trinitatis 

Trinitatis artinya ketritunggalan Allah (hasitolusadaon ni Debata) (bandingkan Matius 28:18-19). 

TURPUK 

Di na sadari ruar ma Jesus sian bagas i, laho hundul tu pasir ni tao. Jadi marpungu ma torop halak tu joloNa, gabe dipanaek Ibana ma sada parau laho hundul tusi, jala sude natorop i jongjong do di pasir i. Dung i godang ma dihatahon tu nasida, huhut pangke umpama, ninna ma: "Na laho tu balian do sahalak panabur laho manabur. Jadi di na manabur i ibana, adong ma boni i deba na mamiltik tu dalan, dung i ro ma angka pidong mamarguti. Alai anggo na deba tu tano na batu on do madabu, di na so sadia hapal tano, jadi tibu ma tubu, dibahen na so bagas tano disi. Alai di na lam timbo mata ni ari, rahar ma; gabe mate, ala so marurat. Anggo na deba tu parsihupian do madabu, laos tubu do angka sihupi i, gabe dipisati ma eme i. Alai na deba nari tu tano na denggan i do madabu, gabe saut ma marparbue, saratus lompit do na deba, onom pulu lompit do na deba, jala tolu pulu lompit do na deba. Hamu angka na marpinggol, pinggol hamu ma i!" 



PATUJOLO 

Buku Mateus, on ima sada buku na mansai ampit songon sada dasar ni Parbaritaon taringot tu Barita na Uli (Injil). Buku on na sinurathon ni si Mateus sian suku Lewi, anak ni si Alfeus (sian bahasa gorik Ἀλφαίος, Halphaios; jala di enet muse sian bahasa Inggris: Alphaeus), sahalak na marulaon Pemungut Cukai, jala di angka tingki na asing muse diulahon ibana do Papungu Pajak. Dibagasan na parjumpang si Mateus dohot Tuhan Jesus, gabe adong ma perubahan ni ngoluna secara total, ala di jalo ibana na mangihuthon Jesus di angka ulaon Pelayananna  (Matius 9:9; Markus 2:14; Lukas 5:27–28). Ulaon na mansai arga di ngolu ni si Matius ima hamubaon ni rohana laho mangihuthon Jesus (Mateus 10:2-4). Laos marhite i ma, mansai godang do kesaksian, panindangion dibagasan rentetan barita na gabe fakta, na boi di surathon si Mateus on songon sada catatan peristiwa. 

Buku ni si Mateus on di surathon tingki pertengahan Abad na parjolo, na sinurasthonna secara khusus tu halak Jahudi na mangkorhon mai laho pataridahon angka hasingkopon ni angka Ulaon Pangkobasion ni Jesus. Mansai marragam na di taringoti dibagasana  buku ni si Mateus on, alai namansai ampit jala arga ima taringot tu Harajaaon ni Debata, na laho mangalusi nasa nubuatan taringot tu haroro ni Mesias na tarsurat di nasa Padan Narobi  (Matius 4:14; 8:17; 13:35; 21:4). Di buku Mateus on dibahendo goar ni lambang ni Mesias marhitehon “Anak ni si David”, na laho  manggombarhaon mai, na sada silsilah dohot garis keturunan do mulai sian si David, Jehuda dohot di Abraham (Mateus 1:1-3). Laos on ma hasingkopon na Napataridahon, Peranan ni haroro ni Jesus sian mulana di Padan Narobi ima nalaho mangalusi sude alus dohot panghokkop ni Debata di nasa natarsurat di padan na robi na dipasahat ni Debata na sahat tu halak Israel. 

Marragam do angka metode dohot gambaran na dipangke di buku Mateus on laho manggombarhon taringot tu Ulaon ni Jesus, adong ma mai marhitehite Pangajarion dohot Perumpamaan (tudos-tudos), nalaho manggombarhon saluhutna taringot tu Harajaaon ni Debata. Jala turpuk jamita on na tarsurat sian Mateus 13:1-9 on, on ma sada tudos-tudos na manggambarhon taringot Harajaon ni Debata na di gombarhon marhite tano, manang jenis-jenis ni tano, nagabe hapeahan ni saluhut suan-suanan na naeng tubu. Marhiteima tasulingkit ma barita na uli nanaeng pahebaheba on ta o. 



HATORANGAN 

Dibagasan turpuk on, tangkas do dipatorang taringot boasa Tuhan Jesus mambahen bentuk panga-jarionna marhitehite perumpamaan.  Molo sian hadirion ni angka apostel i, mansai songgot do roha nasida di bentuk pangajarion na di patupa ni Jesus merhite perumpamaan i, jakla marhite keraguan na masa ditingki i, gabe adong do sungkun-sungkun di angka nasida angka Apostel i, boasa dibahen Tuhan Jesus pangjarion marhitehite perumpamaan i, laon i ma nagabe alus na mansai arga, didok: atik pe di bege nasida taringot tu tudos-tudos taringot tu Harajaan ni Debata alai dang di antusi nasida ahado lapatanna. 

Saluhutna angka sungkun-sungkun taringot tu angka pangajarion taringot tu perumpamaan i, di alusi Tuhan Jesus mai, marhite pangajarion na lebih sederhana, asa boi diantusi nasida ruhutna atikpe sasintongna sian pangantusion i, haporseaon nasida songon na maol do laho manjalo angka perubahan i. Saluhutna angka perumpamaan i na dipatorangna tu angka sisean i,  dihehon do tondi laho mangarti (diberi pengertian), di saluhut angka tujuan ni Debata di sana pangajarionna (Mateus 13:11). Perumpamaan na dipatorang di Buku ni si Mateus 13:1-9 on bai ma ta sulingkit dibagasanan angka pembahasan pemahaman:

1. Ayat 1-2

Dibagasan ayat na pamuhai on, dipatorang dison na gabe pambonsiri dibagasan perumpamaan na mangkatai Tuhan Jesus tu angka jolma na torop na adong di huta Kapernaum, digombarhon do disi na hundul-hundul Tuhan Jesus di parao na adong di topi tao Galilea, jala agak di julur otik tu tao i (asa adong pembatas), gabe sahera na manggombarhon sada inganan teater alam na dipersiaphon, laos saluhutna angka na torop i hundul ma ditopi ni tao Galilea i. Laos mangkatai ma Ibada tu saluhutna angka na torop i. Sada Ulaon situsional do on napinatupa diganup uluan ni angka halak jahudi, di angka parbaritaan ni angka informasi si pasahaton nasida be (Mateus 5:1; 15:29; 24:3; 26:55). 


2. Ayat 3

Dibuhai Tuhan Jesus angka pangkataion taringon tu angka perumpamaan i. Ima  perumpamaan taringot tu harajaon ni Debata, na dipatorang taringot tu ulaon na manaburhon boni. Dibagasan panurathonon di bagasan buku on ima bagian sian Injil Sinoptik, adong do manang na piga na gabe hamiripon ni barita taringot tu na manaburhon boni on, boi ma i tajaha marhitehite (Mateus 13; Markus 4; Lukas 8). Saluhutna nalaho patorangkon taringot tu hasarupaon ni barita taringot ulaon na manabur boni. Digombarhon do disi sada propesi na mansai arga na dipangke ni Tuhan Jesus ima sahalah Pangula na adong dibagasan pardalanan ditopi ni Huta. Penabur i, na haluar jala manadingkon sada huta na laho mangulahon boni i  di parbinsar ni ari, jala mulak muse annon ibana di bot ni ari tu bagasan bagas nasida, gabe sada gombaran jolma na laho manabur jala mulak muse annon sian panaburan dibagasan lasniroha (Panguhum. 19:16-21; Ruth 2:2, 17, 18). Ditingki na manaburhon boni i  nasida, di boan ma tas tempat ni boni i, jala disilangkon ma tas i di tubuh ni panerak i, jala jolma na di gombarhon na manaburhon boni i, di pirpirhon ma boni i di tanganna, jala diserakhon mai, sopola diboto tujuan ni arah ni siserakhononna. Alai napasti, jolma na manerakhon boni i, diboto ibana do tangkas, ia boni nanaeng si serakhonon nai, cukup do laho bagihononna. 


3. Ayat 4 

Turpuk on patorangkan ulaon ninamanaburhon Tuhan Jesus di na parjolo, ima “ditopi ni dalan” manang “mamiltik di dalan”, dibagasan bahasa Gorik, ia hata “dalan" dienet doi sian hata: Hodos na boi doi menunjuk tu dalan na balga, manang dalan na geleng, alai molo dibagasan turpuk on, menjurus doi tu dalan na geleng. Dalan na adong di huta israel jotjotdo di pagari marhite angka batu na disusun songon pagar pembatas, marhite angka pagar i, dang mura-mura masuk angka pinahan na laho manegai porlak i (4 Musa 22:24; Poda 24:30, 31; Yesaya. 5:5). Dalam i ima sada dalan na geleng, alai atik pe songoni dalam i gabe dalan utama doi laho parlewatan ni ganup jolma na laho naeng marulaon. Dalan i, nunga dilewati ganup jolmai bei mar taon-taon lelengna, marhiteima nungan mansai koras, togu ia dalan si lewatan i. Marhiteima, boni na disuathon panabur i, dang boi be masuk tu tanoi, jala boni i holan tergeletak namai di ujung ni tanoi, jala gabe mura mai idaon, jala pidong na martong-tonga langit pe tangkas ma di ida jala tangkas pardompahanna. Gabe murama panganonna ai mengambang do bulir i di atas ni tano. 


4. Ayat 5-6

Di bagasan na manaburhon dinapaduahon i, disampakkon ma boni i tu tano na marbatu, molo di huta israel sada hal na biasa do anggo si songonon on, alana hampir 65 % tano ni israel adong ma i marhitehite na adong batuna. Bahkan di piga-piga wilayah mansai maoldo dapotta tano na denggan, soholan batu na koras si idoan. Mura do sasintong na tubu suan-suanan i, di topi manang sela-sela ni angka batu i, alai molo nunga ro be lasniari gabe mura ma melos bahkan mate suan-suanan i, ala uratna dang masuk bagas tu tanoi, jala aek na gabe sumber ni ngolu pe terbatas do. Marhiteimana, suan-suanan na tubu di batu i pe, mura ma mate (Lukas 8:6). 


5. Ayat 7

Di bagian na manaburhon boni na patoluhon on, madabu mai tu parsihupian (semak berduri). Parsihupian dibuatdoi sian bahasa gorik “a¡kanqa, akantha”,  na tubu dibagasan parsihupian, ima suan-suana na mansai hatop partubuna, jala hatop timbo, laho mangimbangi angka suan-suanan na adong di topina manang di duruna (Job 31:40; Yeremia. 4:3; Mateus. 7:16; Heber. 6:8), alai alai ni godang ni parsihupian i, gabe parsihupian i do na gebe mengambil alih partubu ni boni i (Poda 24:30-34). Marhitei mansai porlu di paias porlak i, marhite di potong di paias saluhutna sahat tu angkar-akar ni saluhutna parsihupian i. Boasa ingkon sahat tu akar ni parsihupian i di paias, asa unang be mura-mura tubu muse, gabe olo muse annon manegai suan-suanan na uli i,  Ai ido karakter ni parsihupian i, halan na naeng manegai do. 


6. Ayat 8

Di bagian na paobathon on, na sinuan ni Tuhan Jesus on, digombarhon do dison manabu tu tano na denggan, jala marparbuemai saratus hali lompit, onompulu hali lompit dohot tolupulu hali lompit. Alai marhite penelitian na adong di huta i, ia hasil bulir na sianuanton angka pangula, boi do imenghasilkan di 7-10 hali lompit sian godang ni boni na di suanhon. Marhitei sada halongangan do jala mujijat na mansai bolon do ia gombaran na pinatorang ni Tuhan Jesus, taringot ni godang ni bulir nanaeng sipanenon, molo di suanhon di tano na denggan. Denggan partubuna, denggan pertumbuhanna, jala denggan parbue ni suan-suananna. Ido na ummarga, molo sian mulana pe, borhat sian hadengganon.


7. Ayat 9

Ayat na parpudion, laho mempertegas di sasa poda na mansai arga, ia poda tu saluhutna jolma na marpinggol, asa di pinggol mai, asa di bege mai. Poda tudos-tudos na gabe gombaran ni Harajaon ni Debata, na laho manggombarhon didia do tubu saluhutna Hata, poda, barita nauli na dijalona be di bagasan ngoluna. Asa unang marisuang parbaritanaulian i, alai asa saluhut na mambege boi mamillit na dumenggan di bagasan ngoluna be. Salah mamillit, salah di panjangkononna jala parbuena. Tangihon ma, jala suan ma di na dumenggan. 



HAHONAAN 

Mansai arga hian do hata tudos-tudos berupa perumpamaan na di gombarhon ni Tuhan Jesus di turpuk on, hata na mansai tegas na dipatupa laho manutup turpuk on. Ia nasa jolma na mambege saluhut na maean mangulahonsa. Sada fenonena namansai sering do i terjadi dibagasan pardalanan ni ngolunta. Marhite na mansai godang ganup ruas ni Huria naung manjalo hata ni Debata na jinalona sian Bagas joro ni Tuhan ta, alai molo taida, berdeba-beda do respon nasida laho manghangoluahon hata ni Debata i. 

Songon turpuk jamita taaon, saluhutna bulir i ditabur, alai maragam do hapeahanna jala hatutubuna. Molo isara penekananna, sude do ganup jolma nunga be mambege barita na Uli i, alai maragam do na pinikkiran ni ganup jolma taringot tusi: adong mai na holan na mamingkiri dirina sandiri, adong na mambege alai dang mangantusi, adong na ambege alai dipangasahon do pikiranna laho mambahen pangantusion na asing, alai memang sada ma Umarga, dinamambege nasida di angka Poda jala diulahon i, dibagasan pardalanan ni Ngoluna. On ma na pinatorang ni Tuhan Jesus, boasa ingkon marhite hata tudos-tudos manang perumpamaan di gombarhon taringot tu Harajaon ni Debata i. Ala memang barita nauli di haroro ni Mesias i, nung be digombarhon i, sian mulanai sian angka panindangion ni Panurirang Jesaya sahat tuna mangudutina, asa boi diboto nasida taringot tu haroro ni Jesus i, atikpe maol di antusi nasida. 

Tabegena suara ni Debata na manggora hita, malua sian haholomon, jala tajalo ma hatiuron i marhite-hite na paradehon tano na denggan di bagasan rohatta be. Dipasu-pasu Tuhan ma hita. Amin. (ats) 


Ginurithon ni Pdt. Andri Tridimensi Simorangkir, S.Th 
HKI Resort Khusus Parapat 

Disunting oleh Vic. Pdt. Timothy Saragi 
HKI Immanuel – Magetan, Jawa Timur 

Catatan: 
Semua iklan yang terdapat pada website dan tulisan ini tidak ada hubungannya dengan timothysaragi.com. 

Dapatkan update artikel terbaru dari timothysaragi.com. Mari bergabung di Channel Telegram "timothysaragi.com Artikel Update", caranya klik link https://t.me/timothysaragicomupdate, kemudian join. Anda harus install aplikasi Telegram terlebih dulu di ponsel. 


Posting Komentar

Posting Komentar