EPISTEL MINGGU 23 JULI 2023
MARHAPORSEAON JALA MAGODANG DI BAGASAN TUHAN
Psalmen 86:1-11
Minggu 7 Dung Trinitatis
TURPUK
Tangiang sian si David. Sai paeleng ma pinggolMu, ale Jahowa, alusi ahu, ai na dangol jala na pogos do ahu. Sai ramoti ma rohangku, ai hasian do ahu; sai urupi ma naposoM, na marhaposan tu Ho, ale Debatangku. Asi ma roham di ahu, ale Tuhan, ai sai tu Ho do ahu joujou manipat ari. Sai palas ma roha ni naposoMon, ai Ho do ale Tuhan dihalungunhon rohangku. Ai anggo Ho ale Tuhan, pardengganbasa jala marpamuati rohaM, jala godang situtu do asi ni rohaM di sude angka na manjou Ho. Sai tangi ma ale Jahowa tangianghon jala parateatehon soara ni anggukhon. Di ari hagogotanhi Ho do hujou, ai sai alusanMu do ahu. Ndang adong tudoshon Ho di tongatonga ni angka Debata, ale Tuhan, jala ndang adong tudoshon angka pambahenanMi. Ro do sogot sude parbegu angka na tinongosMi marsomba tu joloM ale Tuhan, jala pasangaphon goarMu. Ai timbul do Ho jala mambahen angka halongangan, sasada Ho do Debata. Sai ajarhon ma tu ahu ale Jahowa dalanMu, asa marpangalaho ahu di bagasan hasintonganMi; sai pasada ma rohangku manghabiari goarMu.
PATUJOLO
Di hata Heber digoari ma Buku Pslamen on Tehillim lapatanna pujipujian tu Debata. Molo di hata Gorik digoari ma Psalmoi lapatanna angka ende na niiringan alat musik. Mansai ringkot do musik di panombaon ni halak Jahudi tu Debata. Ala marhitehite ende do dipangke halak Jahudi songon patuduhon haporseaon dohot holong ni rohana tu Debata.
Marragam do angka na manurathon Buku Psalmen on, isarana songon si Musa, Anak ni Kora, Anak ni si Asap, Salomo, Etan dohot si Heman. Alai si David na gumodang manuraton angka ende i, pola adong 73 Psalmen na sinuratna sian 150 bindu na di bagasan buku on. Dihaporseai do angka Psalmen na tarsurat di buku on songon angka tangiang manang pujian tu Debata na ginohan Tondi Parbadia, laho patuduhon bagas ni parsoaran ni Debata dohot jolma i.
HATORANGAN
Adong do pandohan na mandok : Molo mangido tangan ingkon ditoru, maksudna molo hita na porlu ingkon mangelek ma hita asa dapotan asiniroha. Molo dingolu nta on, gok do jolma mangharingkoton pasupasu ni Debata, isarana : Hamamalum sian sahit, dibuka dalan pansarian ngolu siap ari, dilehon ari dohot cuaca na dengan, ganjang ni umur dohot lan nasing. Alai dina mangidoi ibana, ndada na mangelek paserepon roha tu adopan ni Debata, gariada dihaginjanghon ibana do dirina, so dipardulihon lomo niroha ni Debata. Alai si Daud dang songoni, dung gabe raja ni Israel di Daud gok do angka na marlate roha lao mandabuhon si Daud sian hundulanna, gok akkal dohot pangotootoion dipatupa asa mandabu si Daud sian harajaonna i. Jala diboto si Daud dang taralo ibana i sude molo mangasahon dirina sandiri, ingkon raphon Debata do ibana asa boi monang manaluhon saluhut pangagoi. Dibagasan hagogotanai dipaserep si Daud ma dirina lao mengelek asiniroha ni Debata, asa taruli pasupasu ni Debata. Sipata olo tubu sungkun-sungkun, boasa sahalak raja na sanggap i olo jala boi paserephon dirina tu adopan ni Debata, alai hit ana so diadia maol jala bangkol lao paserephon dirinta tu Debata?
Songondia do haserephon roha na pinatuduhon si Daud dina mangido pangurupion ni Debata dihagogotanna? Tangkas pinaboas ni turpuk on ima :
a. Nirajuman si Daud jolma na pogos, dangol do ibana molo ni adopan ni Debata, nang pe sahalak raja ibana (ay 1). Artina arta, pangkat na timbo i dang mambahen ginjang roha ni si Daud tu adopan ni Debata, ai diboto si Daud do alani Debata do i asa adong diibana, ai mulana pe jolma na pogos jala dangol do ibana.
b. Dipangidohon si Daud asa diramoti Debata rohana, asa tongtong marhaposan tu Debata (ay 2). On do na mambahen hita dang sarupa dohot si Daud, ia molo raja Daud parjolo do paisonna rohana tu Debata dungi mangihut ma angka na dengan na asing. Alai molo hita, olo dang dos parohaion dohot pangkataion manang pabahenan. Molo binege hatana jala niida pambahenanna mansai denggan do, alai rohana gok haramunon. Lupa hita, ia Debata nta siida roha dohot piapia ndada siida hata-hata.
c. Dihatinghon si Daud do holan tu Debata sambing do ibana joujou manipat ari, jala pos do roha ni si Daud pardengan basa do Debata jala na marpamuati, ingkon tangihononNa angka na joujou tu Ibana (ay 3-7). Artina satia do si Daud tu Debata, hatop manang leleng nialusan ni Debata angka joujouna. On do hahurangan nta halak Kristen dipartingkianon, dang manahan, hatop mandele jala hatop manimbil. Tutu do hita joujou tu Tuhani diangka hagogotan na masa tu hita songon raja Daud, alai ingkon songon na dirohanta i dang ingkon songon na diroha ni Tuhan i. Joujou nta i sahira lao mangatur Tuhan i, ndada lao pasauthon lomoniroha ni Tuhan I angka joujou nta i alai lao pasonangkon dirinta sandiri, sahira alat pemuas hagiot nta ma ta bahen Tuhan i, ido boasa dang margogo angka tangiang joujou nta.
d. Niangkuan si Daud do, gok do angka sipelebegu na so mananda Debata jala jotjot do nasida patupahon hamaolon dingka halak na porsea. Alai pos do roha ni si Daud, ditingkina ingkon marbalik do angka sipelebeguon lao marsomba tu Debata, alani sangap jala timbul ni goar ni Debata (ay 8-10). Ra, molo sinungkun molo sahalakmu na gabe halak na porsea ditongatonga angka sipelebegu, gabe tadinghonomu do Tuhani jala sarombang dohot sipelebegu na torop i? Alai ia raja Daud daong, dihametmetonai do patuduhonna huaso ni Tuhanna, asa ditanda nasida be ise do Debata jala gabe dohot nasida manomba Tuhan i. Dison do beda nta dohot raja Daud, molo ditongatonga ni Huria songoni ma ganjang-ganjang tangiang nta, alai molo minoritas hita disada-sada luat tor maila do hita martangiang, maila hita patuduhon halak na porsea do hita siihuton Jesus i.
e. Ia raja Daud nang pe ibana sahalak raja, alai dang gabe dalan hasonangan portibion na diharingkoton ibana, songon na somal na masa ditano on. Alai dalan ni Debata do na diharingkoton ibana, ido boasa didok raja Daud : Sai ajarhon ma tu ahu ale Jahowa dalanMu asa marpangalaho ahu dibagasan hasintonganMi (ay 11). Artina, nasa na adong di raja Daud, pangkeonna do i lao manghangoluhon dalan ni Debata, laos on do beda nta halak Kristen dipartingkianon. Jotjotna i hita manadinghon dalan ni Jahowa ima marhitehite parmingguan manang ulaon partondion, siala lao manambahi arta manang sumisik isarana mansari. Jotjotnai hita manadinghon dalan ni Jahowa ima parmingguon siala hagiot lao manambahi sanggap isara maradat di ari Sabbat I dohot lan nasing.
HAHONAAN
Hombar tu ondolan jamita nta di minggu on ima : Marhaporseaon jala mangodang dibagasan Tuhan. Molo ro hagogoton tudia do ho marhaporseaon dohot mangodang? Tu serep niroham marsaor dohot Debata do manang dibagasan pandeleanmu? Sude na masa dingolu nta on, nang las niroha nang habot ni roha, molo nta tatap jala nta lapati do sude na masa dibagasan haporseaon tu Debata, mangodang ma hita dibagasan asiniroha ni Debata, jala patibuhon nialuasan ni Debata angka joujou ni tangiangnta. Alai baliksa, molo sude na masa ditongatonga ni ngolum dilapati dibagasan pandelean, mangodang ma hita dibagasan parungkilon jala na hatophon tu hamatean sisalelengnilelengna do i. (ejs)
1 komentar