EPISTEL MINGGU 30 JULI 2023
DEBATA NA MANDONGANI JALA NA MANGONDIHON
2 Korint 13:5-13
Minggu 8 Dung Trinitatis
TURPUK
Unjuni hamu ma dirimuna manang na di bagasan haporseaon hamu; sulingkit hamu ma dirimuna. Na so ditanda hamu do dirimuna paboa naung Jesus Kristus di bagasan hamu? Ai ia so i, sandok na so tau do hamu. Alai dihirim rohangku tandaonmuna do ndang na so tau hami. Alai martangiang do hami tu Debata, asa unang diula hamu agia aha na roa; ndada asa hami idaon na tau, naeng hamu mangulahon na denggan dipangido rohanami, nang pe songon na so tau hami idaon. Ai ndang adong gogonami mangalo hasintongan i, sandok manghophop hasintongan i do. Ai las do rohanami hamu margogo, nang pe gale hami. Laos on do tangiangnami: Naeng gabe togu rohamuna. Dibahen i husurat songon i di na holang dope ahu, asa unang posi pambahenhu dung ro ahu marguru tu huaso na nilehon ni Tuhan i tu ahu, laho pauliulihon, ndada manegai. On pe ale angka dongan, sai las ma rohamuna, sai olo ma hamu patoguon jala apoan, sada ma pingkiranmuna; radoti hamu ma dame i, asa didongani Debata, Parholongroha jala Pardame i hamu. Masitabian ma hamu marhitehite umma na badia. Na manongos tabi tu hamu saluhut angka na badia i. Sai didongani asi ni roha ni Tuhan Jesus Kristus, dohot holong ni roha ni Debata, dohot parsaoran ni Tondi Parbadia ma hamu saluhutna!
PATUJOLO
Turpuk jamita on ima surat na paduahon sian Apostel Paulus tu huria na adong di huta Korint. Laos surat on ma na gabe panimpuli tu huria na adong di huta Korint. Tangkas do ta antusi ia huta Korint ima huta na berkembang di jala gabe pusat ekonomi, pendidikan, budaya, politik dohot angka na asing. Alai laos di huta Korint on do dapoton angka roha nang pangalaho na maralo tu ulaon lomoniroha ni Tuhan Jesus Kristus. Dibagasan pergumulon do huria I mangadopi angka ragam ni jolma na berbeda latar belakang, laos dibagasan pergumulan do nasida mangadopi angka potensi dohot ragam ni kemampuan, jala dibagasan pergumulan do huria I mangadopi angka konflik namasa na mandok dirina do na hebat jala na sintong, salah do naasing, leas marnida naasing jala gabe ginjang rohana, marlumbalumba laho manggulut angka pangkat. Alanii disurathot Apostel Paulusma turpuk on tu huria i. di pangujungi surat on ima turpuk sadarion, ditaringoti Apostel i di angka poda nang si paingot parpudi tu huria I, asa di haroro ni Apostel Paulus na patoluhon tu huta Korint, unang adong be na didapot na so marhamubaon dope sian angka ulaon hajahaton. Alai naeng ma nian dapoton ni Apostel I huria Korint dibagasan ngolu na imbaru, mangasahon Tuhan Jesus Kristus. Dibagasan turpuk on ditaringoti si Paulus do molo ro ibana mandapothon huria I, ndang be maralangalang ibana dirohana (Ay.2), lapatanna, molo dibagasan hajahaton dope nasida pasti ma muruk, manang tarrimas ibana marguru tu huaso na ni lehon ni Tuhan I, alai molo dibagasan hamubaon jala manghangoluhon Kristus do dapoton ni si Paulus huria I, tontu las ma rohana, jala ulaon lasnirohama di harorona mandapothon huria i. Ai laho paulihon (membangun) do harorona ndanda laho manegai. Molo pe juppa ni Apostel I nasida dibagasan na so marhamubaon dope jala gabe posi pe pambaenanna na pasti tujuan utamanya adalah naeng pauliulihon huria I (Ay. 10).
HATORANGAN
Di jolo ni turpuk on, sai songon na sangsi dope huria Korint tu haapostelon ni si Paulus, pola songon na dipangido nasida tu sipaulus sada bukti parnidaan di nasida paboa tutu Kristus manghatai tu ibana, ala memang sian pamerengan ni halak Korint sai hena na gale do si Paulus, gabe songon na so porsea nasida di hagogoon ni Kristus. Jala molo pangantusian halak Korint, ndang margogo Debata mangalehon gogo tu nasida, ai mate do ibana di hau silang songon tanda hagaleonna. Jotjot dope halak Korint marida hagogoon ni Jesus nang si Paulus secara fisik, hape nang pe mate Kristus alanai hagaleon ni jolma I do, jala na mulak mangolu do Ibana binahen huaso hagogoonNa. Nang si Paulus I pe tahe margogodo alan ni Kristus dohot alani haporseaon ni huria I tu Jesus Kristus (ay.1-4).
Di tahi ni Apostel Paulus di nanaeng ro mandapothon Huria Korint na patoluhon, naeng ma niang unang be adong halak na porsea di Tuhan Jesus alai parulaonna ndang pataridahon paboa siihuthon Jesus ibana. Jala molo pe dibagasan ragam ni sitaonon nasida din a manghaporseai Tuhan Jesus Kristu, ingkon adong ma posniroha panghirimon na mangolu pabua Debata mandongani jala manondihon ngoluna. Dibahen I didok si Palus asa sude ma huria I mananda hadirionna paboa naung di janghon jala mangolu dibagasan Kristus. Antong sude ma nasida manguji hadirionna ganup manang na dibagasan haporseaon do nasida di Tuhan Jesus? Sadar do nasida paboa naung Jesus Kristus dibagasan nasida, lapatanna disadari nasida do panobuson ni Tuhan Jesus marhitehite na tarsilang I Ibana?? Manang na sebatas status do nasida manghaporseai Jesus? Dibahen I dipamanat si Paulus nasida, jangan hanya mengoreksi orang boleh, tetapi tidak mampu menilai diri sendiri. Jadi molo ndang hantus manang molo so sadar huria I paboa naung Jesus Kristus dibagasan nasida, ndang Manahan nasida di ragam ni sitaonon/ tidak tahan uji (Ay. 5). Di sungkun-sungkun ni Apostel I, naeng ma nian adong intropeksi/penilaian di huria I marhite na menguji hadirionna be asa hot di haporseaon na be, ai molo hot do haporseaonna di Tuhan Jesus na tau do ibana (tahan uji), alai molo so hot be haporseaonna, holan sebatas status do haporseaonna, na so tau ma ibana (tidak tahan uji).
Nang pe dibagasan sungkungsungkun si Paulus tu huria I alai anggo ibana marposniroha marpanghirimon tu huria I, na pasti marsihohot do huria I di haporseaonna di Tuhan Jesus. Laos dibagasan posniroha di si Paulus tumangianghon huria asa dipaholang dirina sian nasa ulaon na jahat. Jadi molo pe idaon gale si Paulus alai margogo do ibana marhite huaso ni tangiang na, jala dibagasan hagaleonna do ibana tumangianghon huria I, ndanda naeng paburnangburnang hadirionna (menombokan diri), asa idaon tama di adopan ni huria I, alai memang sian tulus ni roha do ibana martangiang asa naeng ma nasida mangulahon na denggan jala unang be mangulahon ulaon na roa (Ay.6-7). Memang godang dope di huria I na so manahan uju ro pangunjunan, siala sai olo dope nasida mangalo hasintongan, jala seolaholah songon na margogo nasida molo mangalo hasintongan. Dibahen ido idaon sai hera na gale idaon secara fisik si Paulus, ala memang manaon do ibana di hasintongan, ndang margogo ibana maralohon hasintongan alai terus do ibana berjuang mangulahon hasintongan. Ido disoarahon di tangiang na asa margogo jala togu rahani huria I molo pe ragam hasusaan na namangunjuni nasida molo manghophop hasintongan dibagasan Jesus Kristus (Ay. 8). Marhite on boi do idaon ta, on ma dalan ni Debata mandongani jala mangondihon huria I, asa tongtong uli roha, parange nang haporseaon nasida di Tuhan Jesus. Dipangujungi surat ni Apostel Paulus on dipatuduhon Debata ma pangaramotionNa tu huria I marhitehite apostelNa si Paulus. Dipabotohon tu nasida dibagasan Tuhan Jesus do dapotan las niroha, dibahen I las ma roham molo marsitaonon alani Tuhan Jesus. Dungi didok muse di bagasan Tuhan Jesus do dapoton kesempurnaa/ hatoguon dibahen I dioloi ma jala unang ditulak molo adong na mangalehon panoguon dohot apopao dibagasan Tuhan Jesus. Jala dipabotohon muse dibagasan Tuhan Jesus do dapoton hasadaon ni pamingkirion sian na marragam, dohot dibagasan Jesus do adong dapoton dame. Dibahen I dipaboa si Paulus tu huria I asa marlasnoha, olo ma nasida dipatogu dohot diapoi, sada ma roha nang pingkiran nasida nang pe berbagai latar belakang ni huria I, diradoti ma dame, marsitabian. Asa molo diulahon do I sai na donganan ni Debata Ama, Anak nang Tondi Parbadia I ma nasida.
HAHONAAN
1. Jangan penar menilai orang dari luarnya. Godang do jolma boi menilai, nang marnida hahurangan ni donganna alai jotjot lupa marnida kelemahan sendiri (Bandingkan Mat. 7:3). Bahkan lebih senang menilai dan mengkritik kekurangan orang lain, dan tidak terima bila di kritik atau diingatkan. Nian idaon do Jesus songon na so margogo/marhuaso, ala ni lea ni na niadopanNa tarlumobi di namate Ibana di hau silang, alai marhite turpuk on naeng dohononna, molo pe Mate Jesus dibagasan hagaleon alai margogo situtu do Ibana marhite huasoNa, na hehe jala mulak mangolu Ibana. Unang ma nian halak Kristen nilai kemasan tung massai uli alai isi (haporseaon) na ndang hombar tu status siihuthon Kristus, alani ndang boi menghakimi seseorang, apakah dia seorang yang menghidupi imannya. Alai marhite turpukon naeng ma nian hita songon hata ni tuhan ta di Luka 14:11 ai nasa na patimbohon dirina, sipaoruon do; jala na paoru dirina, ido sipatimbbon. Namarlapatan tumagonan do hita lea idaon ni jolma alai arga diadopan ni Debata.
2. Marsihohot di haporseaon paboa naung ditobus Jesus Kristus. Adong istilah Kristen KTP (Kristen Tanpa Pertobatan), unang be nian adong pandohan on tu halak Kristen di sude luat, holan status di KTP (Kartu Tanda penduduk) na do mandok paboa na Kristen ibana, alai pangalaho nang parulaonna ndang dope songan sada Kristen siihuthon Kristus Jesus. Godang do jolma tu madinghon status ha Kristennon na holan humongkop arta, jabata, reputasi, parkarejoan, keuntungan dohot lan angka na asing. Jala adong dope halak Kristen molo adong parsahiton manang ragamni parungkilon ndanda hagogoon na sian Debata dilului jala dipangido, alai hagogoon ni portibi on do dilului dohot dipanido. Tontu nasa halak Kristen na so marsihohot di haporseaonna boi dohohon ibana ma Kristen KTP. Ancaman ni si parjahat terus menggerogoti haporseaon ni angka na porsea, dari segala cara baenonna do dalan asa unang be marsihohot angka siihuthon Kristus i. dibahen I ingkon manat ma nian sude halak Kristen di haporseaonna di Tuhan Jesus, unang marisuang panobuson ni Tuhan Jesus, dibahen I did ok di hata ni Debata 1 Korint 16:13 “Dungo ma hamu, marsihot marhaporseaon, tang ma hamu jala margogo”
3. Marragam do cara ni Debata mandongani jala mangondihon huria na. Molo di turpuk Jamita minggu na tarsurat di 1 Musa 28: 10-22, cara ni Debata mangaramoti jala mangondihon si Jakob marhite parnipion. Molo di turpuk jamita on, cara ni Debata mandongani dohot mangondihon huria I ima marhitehite naposoNa Apostel Paulus, na paingothon nasida. Lan dope ragam cara ni Debata laho mandongani, mangaramoti jala mangondihon hita. Ingkon boi do pos roha nang pe dibagasan ragam ni parungkilon adong haporseaon marhite parungkilon i, naeng do patuduon ni Debata huasoNa na mandongani jala mangondihon hita. Dibahen I molo hot hita di haporseaon di Tuhan ta, jala Manahan di ragam ni parungkilon, manghophop hasintongan, pasidinghon nasa hajahaton, mangulahon na denggan , mangalului huhut mangeahi dame, sai di dongani jala di ramoti Tuhan Debata do hita. Antong sai didongani asi ni roha ni Tuhan Jesus Kristus, dohot holong ni roha ni Debata, dohot parsaoran Tondi Parbadia ma hita saluhutna! Amen. (ps)
Posting Komentar