JAMITA MINGGU 16 JULI 2023
PANGARAMOTION NI DEBATA MARADOPHON BANGSO NA PINILLITNA
Psalmen 65:1-9
Minggu 6 Dung Trinitatis
TURPUK
Ende sian si David. Ingkon nalom ni roha di Ho do pujipujian, ale Debata di Sion, jala gararon do tu Ho bagabaga. Ale sitangihon tangiang, tu Ho do ro nasa sibuk. Gumogo do angka alualu ni hajahaton asa ahu, sai Ho ma manesa angka pangalaosionnami. Martua ma halak na pinillitMi, jala niloasMi dumonok manginganhon angka alamanMi. Sai pasabam ma rohanami binahen ni hinadenggan ni bagasMu, joroM na badia i. Tung na songkal do pangalusiM tu hami di bagasan hatigoran, ale Debata ni hatuaonnami, haposan ni saluhut ujung ni tano on dohot laut, angka na dao i. Ho do sipaojak angka dolok marhitehite gogoM, marhohos hagogoon. Ho do sipaso hasak di angka laut, hasak ni angka galumbangna i dohot ogaoga ni angka bangso. Jadi mabiar ma angka partopi laut maradophon tanda angka na binahenMi, marolopolop ma dibahen Ho angka parmulaan ni habinsaran dohot hasundutan.
PATUJOLO
Buku Psalmen i ma sada buku na mansai arga di tradisi dohot pamujion ni halak Israel (patudos 1 Kronika 15:16-22; Psalmen 149:1-150:6). Jotjot do buku Psalmen on, dipangke gabe tuntunan, ojahan jala pasingkophon angka ulaon parugamoon na dipangke halak Israel. Marragam do angka na manaruthon buku Psalmen on. Disurathon ma i marhite: Si Musa, Raja David, Raja Salomo, Asap, Heman dohot anak ni si Kora. Angka nasida ma na tarsurat na manurathon buku Psalmen on. Alai adong dope pigapiga bindu na so adong dibahen goar ni panuratna. Gonopma sude buku Psalmen on sahat tu 150 bindu.
Buku Psalmen on molo di Bibel na marhata Heber didok ma "Tehillim" jala molo di Bibel na marhata Junani didok ma "Psalmorum", lapatanna pujipujian manang buku Pujian na mamangke alat musik gesek jala diiringi alat musik petik. Marragam do angka bentuk jala gaya penulisan ni Buku Psalmen on. Adong ma i marhitehite bentuk pujipujian, tangiang pangidoan dohot hata hamuliateon. Saluhutna i dibagi jala di suraton marhite pembagian tu beberapa parbagianan songon naung didok, jala na umpenting asa diboto do tu bagian dia do horongna, marhite fungsi dohot pembagianna di makna ni syair dohot sajakna.
Psalmen 65 on masuk ma tu horong ni hata hamuliateon tu Debata, di nasa denggan ni basaNa. Laos marhite i, ia turpuk on i ma songon sada ende pujipujian na manghorhon perenungan na mansai bagas di siala pambahenan ni Debata na mansai nyata di bagasan ngolu ni jolma. Marhite turpuk ni Jamita on dipaingot do hita tu nasa hinaburju ni Debata di bagasan ngolunta.
HATORANGAN
Marhite turpuk ni Jamita na dienet sian Psalmen 65 on, diarahon do hita tu sada pamingkirion tu huaso dohot hasangapon ni Debata marhitehite hinauli ni pambahenanNa di portibi on. Boi do i tangkas idaonta, marhite hirahira boha do responta manghajonjonghon pambahenan ni Debata i di bagasan ngolu siapari. Molo tapamanat pangarimangion ni si David di buku Psalmen on, mansai tangkas do dipasahat angka tangiang pangidoanna tu Debata. Dipatinggil Debata do parbinegeanNa marhitehite na binegeNa angka alualu ni bangsoNa (ayat 3). Herbang do nang tanganNa manjalo jolma jala manesa angka pangalaosion ni jolma (ayat 4). I ma na dihamuliatehon angka jolma, marhite na mangulahon angka hatuaon nang angka bagabagana tu Debata (ayat 2). I ma songon hinauli ni hubungan ni Debata dohot jolma. Marhite i ma asa dipuji si David Debata di angka alus naung binahen ni Debata, marhite tangiang naung maralus di bagasan halongangan (ayat 6-9). Marhite hatorangan na di ginjang i, tapamanat ma hatorangan ni turpuk ni Jamitanta sadari on na dienet sian Psalmen 65, na pataridahon, songon dia do pataridahon pujipujian tu Debata.
1. Dipapatar Debata do Asi ni RohaNa, Umbege Angka Alualu ni BangsoNa.
Hinauli jala hinadenggan ni basa ni Jahowa, di angka pambahenanNa dohot di angka jadijadianN, mamorsan angka na masa jala talup manean, mamboan saluhutna tu angka hadengganon. Ndang adong na jinadihon ni Debata gabe jadijadian na marisuang. Marhite angka pambahenanNa manjadi do i. Dipataridahon Debata do huasoNa dohot hasangaponNa na manjadi di liat portibi on. Marhite asi ni roha ni Debata di bagasan ngolu ni ganup jolma, sada na mansai tangkas dipaingot di bagasan panindangion ni parpsalmen mandok: "Ingkon nalom ni roha di Ho do pujipujian." Huaso ni Debata na manjadi di bagasan ngolu ni ganup jolma, tangkas do i tarida, molo tapamanat di ngolunta. Songon pardalanan ni bangso Israel na sai tongtong dipaingot di angka pambahenan ni Debata. Di Buku 2 Musa 14:14 didok: "Jahowa do marporang humophop hamu, asal hohom hamu." Dipatinggil Debata parbinegeanNa di na mangurupi angka na masa na niadopan ni Bangso Israel uju i. Marhite sahulut pangaramotion ni Debata i, songon dia ma sikap songon na pinangido ni Debata asa ulahonon ni nasida? Di Jesaya 40:15 didok: "Ai songon on do hata ni Tuhan Jahowa, na badia ni Israel. Marhitehite hamulakon dohot hahohomon jumpangan hatuaon hamu, marhitehite hasabamon dohot marhitehite nalom ni roha maruli hagogoon hamu." Asa marhite saluhutna pambahenan ni Debata dapot nasida ma hatuaon, hasabamon dohot hagogoon, na sian Debata di bagasan ngolunasida.
Mansai arga do hatuaon, hasabamon dohot hagogoon na sian Debata. Ingkon adong do i di bagasan ngolunta be. Marhite i, pujionta ma Debata na di ginjang. Di Psalmen 65:2 didok: "Asa sombaon di Sion ma Jahowa." Marhite i ma digohi pamujion tu Debata. Ingkon gararon do tu Debata angka bagabaga. Debata di bagasan hatimbulanNa dohot huasoNa, na digombarhon songon di na tumimbo i ma di Sion. Pandohan "Sion" parjolo sahali boi do i tajaha di Bibelta di 2 Samuel 5:7, didok disi: "Hape dipapatu si David do benteng Sion, i ma huta ni si David." Di mula na i Sion dilapati do songon sada benteng, manang pertahanan, manang songon tanda ni hahotan na adong di Jerusalem. Jala marhite i ma muse, adong do pangantusion na asing taringot tu Sion, i ma na patuduhon songon sa huta manang inganan. Jadi marhite i, sion digombarhon do songon sada inganan pertahanan na adong di bagasan sada huta. Jala dung di udut ni angka partingkian, huta Sion manang benteng Sion i, dibahen ma goarna gabe huta ni si David (ida 1 Rajaraja 8:1; 1 Kronika 11:5; 2 Kronika 5:2). Di bagasan pardalanan ni harajoan ni si Salomo, dipauli ma disi Bagas Joro ni Debata, jala sahat do ingananna tu na humaling ni Sion (ida Psalmen 2:6; 48:2; 132:13). Jala di pardalanan ni angka harajaon manang kekuasaan, huta Sion i pe dipangke ma i laho pataridahon jala simbol ni Jerusalem. Manang gombaran ni huaso ni Debata. Mansai arga do hata na manggombarhon i dison marhite hata "Sion". Molo secara Teologis gabe dipangke do i pataridahon hadirion ni bangso Israel, bangso na pinillit ni Debata (ida Jesaya 60:11), jala makna spiritual na boi idaonta i ma, huta Sion merujuk ma tu Jerusalem na Imbaru (patudos Heber 12:22; Pangungkapon 14:1). Jala marhite i ma, patubegehonon ni nasida angka ende na imbaru jala manongtong di huta Sion (patudos Pangungkapon 14:3).
Psalmen 65:3, dipataridahon do disi alu-alu ni ponjot i roha tu Debata na manangihon tangiang. Mansai argado panghorhon ni tangiang di ganup jolma na porsea. Sada silasniroha na mansai polin dibagasan pardalanan ni haporseaon ni ganup jolma, ima molo tulus jala tolhas (terwujud) nasa tangiangna. Marhiteima ima di pangiar par-Psalmen do ditingkion suaranya tu Jahowa Debata na patulushon nasa tangiang. Dipatubehehon Ibana do Ise Debata sijalo Tangiang, jala Ise do na Umbege jala patulushon salutna nasa tangiang i. Debata namangalusi saluhutna angka tangiang, jala alus ni Debata mangalobi i, lobi sian na piningkiran (Efesus 3:20). Marhiteima alusan ni Debata do nasa tangiang na digomgom jala marhite haporseaon na polin. Ai marhite panjangkonon ni Debata di saluhut nasa tangiang i, ro ma saluhutna jolma dibagasan haporseaonna.
2. Herbang do tangan ni Debata dinamanjalo sude jolma sian hadoasaonna.
Pardenggan basa do Jahowa, jala lambat dung tarimas. Marhite hinaburju nai, ise ma Debata na sarupa dohot Ibana (Mika 7:18), alai dipataridahon Ibana do dirina tu angka na tinompana (2 Musa 34:7). Jala marhite nasa pambahenan na I ma, patutma jalo on ni Ibana nasa Puji-pujian na marsangap. Di patubehon par- Psalmen do di Ayat 4 on, ai nunga be sahat tu langit angka dosa na diporsan ni bangso i, jala nasa pambahenan na jat pe nunga mangalobi i sian asi-asi na naeng patut siajaloon na. Ai marhite sian ima, lam godang ma dosa napatar na mambahen dang dapotan be asi ni roha i. Holan denggan basa ni Jahowa sambing nama na pataluphon jala pamonangkon nasida. Asa boi dapot nasida angka silasniroha tu angka joloan on (Psalmen 33:12). Gabe bangso na pinillit ni Debata ma nasida, jala asa tarida pe nasida, holan sian bagasan asi ni roha ni Debata doi (Johanes 6:44).
Par-Psalmen ayat 6, mangikrarhon, “tung na songkal do pambahenan ni Debata di nasa pangalusina, marhitei taridama hatigoran ni pambahenanNa, Ibana do Debata ni hatuan, jala gabe haposan di saluhut ujung ni tanoon”. Marhite angka pambahenan ni Debata na songkal jala halongangan i, tarida ma salutna haluaon na sian Debata i. Dipataridahon pe angka jadi-jadian nai (halongangan), olo do i laho mamangkulingi manang na mamincang nasida, disaluhutna pambahenan ni ganup jolma i. Marhite pangkuling ni Debata dia angka pambahenan na, gabe songgot-songgot dia angka parulaon tu na denggan na mai. Asa tontong adong pangkirimon na mangolu di ganup jolma, ingkon tontong manjaga habadiaon ni Debata (Jesaya 64:3).
3. Maralus do angka tangiang di angka halongangan.
Tongtong do dibagasan haporseaon na polin par Pesalmen laho patolhashon nasa pambahenan ni Debata. Kepercayaan pemazmur kepada Allah terungkap lewat kesungguhan berdoa. Tangian do parhitean dibahen Debata, mangalusi sahutna angka nanaeng sibahenonna di portibion. Dialusi Debata doi marhite huasona naso terbatas jala tarungkur i. Marhitei ma, Psalmen 65 on mendorong hita asa manontong dibagasan nasa tangiangta. Unang nean martangiang holan ala ni hinauli ni pandohan ni angka hata na terangkai, alai martangiang ma hita dibagasan todi na sian Debata, asa marhitei adong persekutuan na apit hita maradophon Debata. Molo porsea jala yakin do hita dinasa tangiang ta na tapasahat tu adopan ni Debata, dibagasan haporseaon na polin, maralus do saluhutna i.
HAHONAAN
Dipatubegehon do pambahenan ni Debata dibagasan ngolu, dihaporseai par Pesalmen do ia ngolu on tontong do dibagasaan pasu-pasu na marharoan sian Debata. Haporseaan ni par Pesalmen boi tarida mai, marhite-hite nasa tangiang na pinasahaatna jala boi manjadi. Tangiang pangidoan i dipasahat marhite kesungguhan dibagasan nasa tangiang na. Dialusi Debata do nasa tangiang i, namartujuan laho paulihon sahutna alam semesta, tarlumobi ma paulihon portibion (Psalmen 65:3,6). Allah menjawab doa dengan kuasaNya yang tidak terbatas. Kuasa Allah terbukti jika kita memandang tegaknya gunung-gunung dan tenangnya gelombang-gelombang lautan. Pemazmur melukiskan bahwa Allah berdaulat sepenuhnya atas ciptaanNya baik di darat dan di laut.
Dipabotohon par Pesalmen do muse, ia salutna jolma ingkon pasahathon dirina tu adopan ni Debata, menyaksikan jala marnida angka mujijat halongangan na binahen ni Debata, jala saluhutnya i tarpatupa/ terjadi dang na ala kebetulan, alai alani huaso, ketetapan, dohot hata (firman) ni Debata na manontong, na iangkon patar tu adopan ni nasuhutna jolma, jala saluhutna jolma ingkon manjalo i dibagasan biar mida Jahowa, jala ingkon mambahen sikap: menaruh rasa hormat tu Debata (Psalmen 65:9). Tanda halongangan (mujijat), namasa dibagasan ngolu ni Jolma, ima sada Huaso ni Debata na mansai balga (patar). Saluhutna do boi di patupa (diciptakan Debata): Gunung berapi, marragam ni hamalumon, dohot angka ulaon na masa na mambahen habut roha. Sahutna i boi doi ture, so holan ala ni pangaramotion ni Debata. Ibana do pataluphon saluhutna. Masa pe angka na masa di pardalan ni ngoluon. Unang hita tahuton, ai Debata do na marhuaso diatas ni saluhutna. Amen. (ats)
Posting Komentar