EPISTEL MINGGU 13 AGUSTUS 2023
GABE PASUPASU DI BAGASAN TUHAN
Mateus 8:5-13
Minggu 10 Dung Trinitatis
TURPUK
Dung i bongot ma Jesus tu huta Kapernaum, jadi ro ma tu jolona sada induk ni soldadu mangelehelek Ibana, ninna ma: Ale Tuhan, sai peak do naposongku di jabungku; na sarion do ibana, mansai bernit diahap. Dung i ninna Jesus ma mandok ibana: Ro pe Ahu pamalum sahitna. Dung i didok induk ni soldadu i ma mangalusi: Ale Tuhan, na hurang tama do ahu, tung degeonmu jabungku; dok ma hata sisandok, asa hipas naposongki! Ai gari ahu, jolma na nirajaan, na mangarajai soldadu; molo hudok tu na sada: Tu sadu i ma ho!, laho do ibana; ia tu na sada: Tu on ma ho!, ba, ro do ibana; jala ia hudok tu naposongku: On ma bahen!, jadi i do dibahen. Jadi longang ma roha ni Jesus umbegesa, gabe didok ma mandok angka na mangihuthon Ibana: Na tutu do na hudok on tu hamu: Gari di halak Israel, ndang jumpang Ahu haporseaon na songon i! Alai hudok ma tu hamu: Torop do na ro sogot sian purba dohot sian pastima, gabe dongan sapanganan ni si Abraham dohot si Isak dohot si Jakkob di harajaon banua ginjang i. Alai anggo angka anak ni Harajaon i hian, sipabalion do i sogot tu na holom marimpotimpot; disi ma masa angguhangguk dohot na patungoripon. Laos didok Jesus ma mandok induk ni soldadu i: Laho ma ho, jumpang ho ma hombar tu haporseaonmi! Jadi hipas ma naposona i di na sangombas i.
PATUJOLO
Molo taendehon jala talapati BE. 761 i apalagi di refren i mandok : Di na mamolus sandok ngolu on, gok do na marsak gale. Boan sinondang tu na holom i, asa margogo muse.
Bahen ma ahu parhiteanMu, pasupasuM mabaor ma i. Ale Tuhan hu patupa ma au, baen pasupasu tu dongan sude. Pandohan na mansai marimpola “Bahen ma ahu parhiteanMu, pasupasuM. Dang sude boi dapotan silua gabe pasupasu tu dongan jala na maol do i.
Diajari turpuk on do hita manguhal sada unok sian buku evangelium Mateus on taringot tu Jesus songon Raja Ibana jala mamboan harajaon banua ginjangtu portibion. Naeng boanonna ma harajaon banua ginjang marhuaso di harajaon portibi laos ganup pangisi ni harajaon i baenonna gabe harajaon Banua ginjang. Laos Ibana sandiri do na gabe Raja disi si ongkuhonon ni saluhut angka raja nang saluhut na ginonggomanna. BoanonNa ma haluaon dung jolo mansohot baenonna angka aturan sitiruon marhite holong na balga i, asa tangkas ganup pangisi ni harajaon i mananda Ibana. Ro do Ibana patupahon halongangan bolon, termasuk pamalum angka na marsahit.
HATORANGAN
Godang do pihak pihak na so tuk manjangkon harororo ni Jesu di portibion. Na deba, naeng mangihuthon Jesus holan sekedar mamereng na masa. Adong mai naeng malum jala mambege barita taringot ise do Jesus na ro i alai dang olo manjonok tu Jesus. Alai apala na tumangkas diturpuk on adong dua horong dipatorang ima: Na parjolo, Horong ni halak Jahudi dohot Farise na paihutihut Jesus alai mangolu dibagasan pangiburuon. Dang tarjalo ni horong on Jesus jala dang lomo rohana molo ingkon bongot Jesus mamboan barita haluaon i. Paduahon, ima Induk ni soldadu na sangat peduli tu angka naposona. Topet hatiha i posa sahit ni naposona. Dung dibege Ibana na ro Jesus tu tu huta i, intor sigop do dilului ibana mangelekelek anggiat olo Jesus pamalumhon naposona i.
1. Sahalak Induk ni Soldadu (perwira, Pejabat Tinggi) na sangat marroha tu naposona.
Sai adong dope jumpang halak si songon on dipudian ni ari on. Sahalak Perwira tinggi na so mangasanghon huasona dohot gogona marnaposo. Nang so sadia be jumpang, molo taida angka na baru viral, adong angka perwira tinggi ditembak mate, pembunuhan berencana tu naposona dalan manutupi dosa dohot pangalaosionna. Sikap kepedulian ni induk ni soldadu on nunga apala tangkas andorang so marsahit naposona i jala andorang so sahat dope Jesus tu huta i. Tarbege do barita na olo ibana manghaholong bangso i mamboan tu hamonangon, dame sude pangisi ni luat i termasuk mangurupi ditanggung ibana pajongjonghon Pembangunan bagas joro (Lukas 7:5). Dang sian ibana ruar barita i, alai tung sian pamangan ni torop bangso i do. Boi do idaonta taringot tu kepedulian ni induk ni soldadu on, ima:
a. Na ro ibana mangelekelek Jesus anggiat olo pamalumhon naposona (hamba/budak/ajudan).
Induk ni soldadu i mandok: " Ale Tuhan, sai peak do naposongku di jabungku; na sarion do ibana, mansai bernit diahap” (Tuan, hambaku terbaring di rumah karena sakit lumpuh dan ia sangat menderita."). Nunga tung maol luluan kepedulian sisongon. Hebatna, ala di jaman i sahalak budak/naposo masa kekaisaran Romawi sama sekali tung so diargai do. Sian on boi tahilala dang dietong ibana naposona i ibarat songon barang/benda na gabe alat songon na binahen ni na deba. Memang secara status, tumimbo do ibana dao sian naposona i, alai dison sangat sangat mararga situtu dibaen. Dietong ibana do naposona sarupa derajatna songon jolma na mararga jala layak dilindungi. Dang persoalan ala mantap jala bisuk naposona, alai dianggab layak dilindungi dohot undangundang rodi hak hidupna.
b. Keteladanan Abadi/Tiruan na denggan-Menghargai sesama dohot mengormati hak hidup.
Dipatupa ibana tiruan na denggan sian roha na mangolu tu ganup naposona na patut sitiruon ni ganup jolma di portibion songon dia do sikap maradophon dongan nang naposo. Jotjot do sian hadirionta nang horong ni halak Kristen hita gabe tabahen do status, hamoraon, posisi, jabatan, hoaso, mambahen sada penilaian dohot memperlakukan dongan tumoru bahkan seolaholeh dang jolma hadirionna. Godang do halak na na naeng patimbohon harkat dohot martabatna sandiri molo dung marpahean na arga, sillak, molo dung marmobil fortuner, sian perabot ni jabuna na balga i dohot na asing. Dang tau ibana mangantusi ia arta na sian portibion parsatongkinan jala na lao salpu do i. Laos songon i do nang martabat ni jolma i na boi muba do jala salpu. Alani i, unang ma maoto hita, laos jolma i pe so marbajubaju ibana ro tu portibion, so intor marmobil, so intor marjabatan dohot na asing i. Tiruan na denggan jala na mangolu i do na ummarga, asa unang ma adong na merasa diri hebat manang terlalu besa gabe tabahen donganta songon sidegedegean ni pat manang holan alat songon mesin produksi. Tatiru ma soldadu i na mansai mangargahon ngolu dohot hamalumon ni naposona i.
c. Berjuang asa rap marhangoluan jala malum.
Sahalak perwira tinggi diparhadaphon dohot naposo na sedang marsahit. Pandang na parjolo di hita, ima hatiha molo dung marsahit naposo i otomatis dipandang gale, dang margogo be. Istilahna tidak produktip lagi. Molo pe marsahit manang dia ngoluna, torop dope na asing naeng melamar na gabe singkatna. Manang paling tidak, boasa pola ingkon korbanhononton modal na arga, mangalului parubatan holan paubathon naposo (hamba), sai godang karejo. Antar hira songon i ma di godang na masa. Alai Induk ni soldadu on, praktis sangat berbeda prinsipna. Berjuang do ibana marhite ragam usaha demi arga ni naposona i. sadar, ingkon taangkui tung so margogo do sahalak jolma laho menyelesaikan persoalan ni ngoluna molo holan sian gogona sandiri. Diingot induk ni soldadu on do hata ni bibelta i na mandok: “Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa, …. Alai martua ma baoa na marhaposan tu Jahowa, jala Jahowa haporusanna dibahen. (Yeremia 17:5+7). Porsea situtu do ibana manang ahape sitaonon ni ngoluna sai na jumpang sa do jalan keluarna. Intor ingot do ibana di Jesus Kristus Sipalua i na gabe sasadasa solusi dohot pertolongan, asa ma olo hita ro tu ibana.
d. Tanggungjawab dohot toruk ni roha ni sahalak Pemimpin.
Salah satu hal na mambahen hatop tergerak roha ni Jesus ima rasa tanggung jawab dohot toruk ni roha ni induk ni soldadu on ma. Haputusan na na ingkon dapothononna Jesus, so pola maretongetong sian dia baenon pasiubatni naposona i cukup mambaen madetuk roha ni Jesus. Ale Tuhan, na hurang tama do ahu, tung degeonmu jabungku; dok ma hata sisandok, asa hipas naposongki! Ai gari ahu, jolma na nirajaan, na mangarajai soldadu; molo hudok tu na sada: Tu sadu i ma ho!, laho do ibana; ia tu na sada: Tu on ma ho!, ba, ro do ibana; jala ia hudok tu naposongku: On ma bahen!, jadi i do dibahen. (Matius 8:8-9). Na lomoan roh ni Jesus mida angka jolma na bertanggungjawab bahkan na toruk roha.
e. Parhaporseaon na mangolu (balga-Iman yang besar)- Mandodo roha.
Intor didok induk ni soldadu i do mangalusi Jesus: … “dok ma hata sisandok, asa hipas naposongki!”, laos tarida do sian sikap ni induk ni soldadu on na so adong sangkap manggurui Jesus manang merasa ummalo ala boi diparenta ibana angka naposona. Nang pe so sian pihak ni sisean ibana manang horong ni halak siboto surat manang Jahudi, ternyata olo do hape ummura porsea sisongon di hata ni Jesus. Status/jabatan dohot na asing i dang gabe jaminan hataridaon ni balga manang na mangolu haporseaonna. Sian angka sikap na di ginjang on ma tarida ternyata buka status manang level mambahen sasahalak i boi gabe pasupasu tu donganna. Terbukti dang dope disulingkit taringot tu hadirion ni naposo i diturpuk on, alai na pasti ndang tu dirina induk ni soldadu i patuduhon haporseaon na mangolu. Dang tu dirina dilului ibana jumolo hamalumon i. Jadi intina “SAUT MA HITA GABE PASUPASU TU DONGAN”
2. Pangalaho/Respek sitiruan sian Jesus
Patut do antong balga tantangan ni Jesus sian ragam horong ni halak Jahudi, Farise bahkan Romawi na selalu bersikap ingin menginterogasi molo adong hal-hal di luar nalar undang-udang dohot batasbatas hukum na berlaku di luat i. Gabe torop ma na naeng patangkuphon ibana. Alana molo pola do saut ojak baenon ni Jesus harajaon banua ginjang di portibion akan semakin memunculkan ekses perlawanan dohot kegaduhan maon di kalangan Jahudi-Romawi. Pasti do i. Di roha ni angka raja di portibion molo soal parubatan dohot hamalumon do adong do rumah sakit rodi angka dokter spesialis. Molo alani na manangianghon do adong do pengurus sannhedrin di bagas joro, adong do angka siboto surat dohot angka parhobas ni huria. Hape terlalu egois do hita memandang haroro ni Jesus dohot versi harajaon banua ginjang i holan sebatas kesembuhan manang sebatas beriman. Alai na umbalga porsea tu Jesus, manjanghon Ibana huhut manjanghon hamalumon na binoanna i do. Na umbalga muse ima masalah kesembuhan dan pertobatan dunia (Restorasi), termasuk dibagasanna kesembuhan dunia, yang tidak terukur oleh dunia dan segala parhobasna. Hamamalum (restorasi) dunia na boi saut holan di diri ni Jesus boi saut. Jala holan di Jesus do adong haluaon i. Sadar do perwira i dang sian ibana hamalumon i holan na manghobasi do ibana huhut mempersiaphon haroro ni haluaon i, mermpertanggungjawabhon asa boanon ganup na marsahit gabe dapotan hamalumon sian Kristus Jesus. Jala muse dang sian angka raja ni portibion umbahen na sai gabe pangambati nasida di hamalumon. Ingkon bukaonna jala dohot do tong nasida bertanggungjawab di haroro ni hamamalum ni portibion.
HAHONAAN
Songon sahalak warga Kristen (siihuthon Kristus) hita, nunga songon dia respekta, alusta, tingka kepuasan ni rohanta angka naung berkesempatan manjalo asiasi sian Debata? Songon sada warga kerajaan sorga hita aha do naung tabahen aluasta tu Tuhan i? naung sungkup ninna rohanta ro marminggu, tapasingkolah gellengta, tapodai angka donganta. Dang dope. Adong do inti naung mago sian ngolunta, ima Unduk Ni Roha. Coba jo tabilangbilangi sikapta maradophon Tuhan i naung mangalehon ragam ni haluaon di hita, sadar do hita na so adong tarbahen hita laho pamalumhon ngolunta, na so tuk gogonta laho mangondihon ngolunta? Sotung do dilehon Debata kesempatan tu hita gabe i dalanta marginjang ni roha. Gabe so taingot tanggungjawabta maradophon portibion songon harajaon ni Debata, gabe lupa hita marunduk ni roha tu Jesus raja ni Huria, raja ni Haluaonta i? Hape tabotoma ingkon unduk do hita tu sude hata ni Jesus ulu ni huria laos Ibana do Raja jala mual ni hangoluan dohot haluaonta, raja ni saluhut do Ibana, tuan ni saluhut tuan. Memang dang hal na gampang mangulahon toruk ni roha, alana nunga dilatik portibion hita sedemikian rupa terkadang harus egois bahkan menjadi tuan di angka ugasanta be, ujungna dang tau hita gabe ginjang rohanta mago ma toruk ni roha dang adong be roha saling menghargai, mago ma tanggung jawab. Alani, intina “SAUT MA HITA GABE PASUPASU TU DONGAN”
Asal unang percaya diri berlebihan, dumenggan ma lam tapangolu haporseaonta be di Jesus asa lam tuk hita mangantusi huhut pangolu di bagasan hataNa. Dang pola ganggu rohanta molo tung jumpang angka jolma na percaya berlebihan alai maol do ro tu Jesus, ai so diulahon hata ni Jesus i. Dang boi ibana gabe siulahon hata ai dang mian harajaon banua ginjang ibana. Dang boi ibana dapot gabe pasupasu tu dongan. Dang luluanta asa gabe sihaporseaan ni jolma hita di portibion. Sungkup ma holan Jesus na mangalehon kelayakan tu hita masalah haporseaon dohot tanggung jawab. Alana molo holan sian portibion do dapot hita kepercayaan dang adong mian disi tanggungjawab dohot toruk ni roha. Haporsean na sejati pasti do i tarida molo tahangoluhon tiruan ni Jesus i. laos udut ma muse molo olo hita masiadu songon induk ni soldadu nangkin, na so holan mamingkirhon dirina sandiri, da so pola berbicara taringot tu status alai bertangggung jawab jala peduli lingkungan dohot naposona. Botul botul do dihaporseai ibana Jesus, gabe dipopai Jesus ma ibana huhut dipuji na so dung jumpang di portibion parrohaon sisongon i: “Gari di halak Israel, ndang jumpang Ahu haporseaon na songon i!” Mangolu di bagasan Tuhan pasti do melalpaui saluhut tatanan ni portibion. Apalagi ma jelas parbue ni haporseaon i tu Jesus. Gabe didok Jesus ma tu ibana : “Torop do na ro sogot sian purba dohot sian pastima, gabe dongan sapanganan ni si Abraham dohot si Isak dohot si Jakkob di harajaon banua ginjang i. Alai anggo angka anak ni Harajaon i hian, sipabalion do i sogot tu na holom marimpotimpot; disi ma masa angguhangguk dohot na patungoripon. Laos didok Jesus ma mandok induk ni soldadu i: Laho ma ho, jumpang ho ma hombar tu haporseaonmi! Jadi hipas ma naposona i di na sangombas i. Dang jaminan ala sian purba manang sian pastima harorona gabe dohot bongot tu tarajaon banua ginjang. Gariada uhumanna do sogot angka anak harajaon i tu na holom marimpotimpot ala dang dilahon parsuruon ni Tuhan i. Na umbalga didok tu Induk ni soldadu i, “Laho ma ho , jumpang ho ma hombar tu haporseaonmi! Jadi hipas ma naposona i di na sangombas i”. Parsuruon na umbalga jala boi dibuktikan bahwa ganup na mangulahon porsea tu Jesus sipalua i gabe pasupasu ma ibana, malum jala hipas ma naposona i. Sandok intina “SAUT MA HITA GABE PASUPASU TU DONGAN” Amen. (sa)
Posting Komentar