Buku Hesekiel i ma sada sian buku na adong di Padan na Robi. Buku on masuk ma tu horong ni buku ni angka panurirang na balga. Buku on marisi 48 bindu jala ni buku on dibahen ma di holang ni Buku Jeremia dohot sampulu dua buku ni angka panurirang na metmet sian Bibel halak Heber. Molo di Bibel na disurathon di hata Junani (Septuaginta) dibahen ma di holang ni buku Jeremia dohot buku Daniel. Panurirang Hesekiel targoar do sada panurirang ni halak Jahudi na mamboan barita na uli uju di tano habuangan bangso ni Debata (hirahira taon 593-771 andorang Kristus) hatiha i bangso Babel diuluhon raja Joiakim sian bangso Jehuda jala raja Nebukadnesar sian Babel. Panurat ni buku on i ma panurirang Hesekiel. Uju i di na manghobasi panurirang Hesekiel, diulahon bangso Israel angka na so hinalomohon ni Debata, i ma marhite na so olo nasida mangulahon angka na denggan. Laho paubahon nasida ditongos Debata ma panurirang Hesekiel asa dipaingot bangso i jala mulak ma nian mangulahon lomo ni roha ni Debata.
HATORANGAN
Di bindu 33 on dipabotohon do panghirimon ni Debata di bangso Israel. Dipasahat Debata hataNa marhite panurirang Hesekiel asa tung marhumabon nian roha ni bangso i jala dipasahat hatorangan taringot tu haluaon na naeng dapoton ni bangso i. Adong do tolu impola na boi tapaihutihut sian turpuk ni Jamita on:
1. Debata do na marsuru jala patotophon naposoNa (ayat 7)
Hesekiel i ma sada goar na marharoroan sian hata Heber, lapatanna "Debata na mampargogoi." Di ayat on dipabotohon do molo panurirang Hesekiel i ma sahalak naposo ni Debata na marhaporseaon na togu jala na sai tongtong paingothon bangso ni Debata asa manadinghon dosa jala mulak tu Debata asa jaloon nasida haluaon na sian Debata. Molo di Buku Padan na Imbaru disurathon do paboa Jesus Kristus i ma songon sahalak na gok huaso laho pasahathon Hata ni Debata tu saluhut jolma. Songon i ma nang panurirang Hesekiel, ditongos gabe songon sahalak panjaga ni bangso ni Debata, tung borat angka ulaon siulahononhon ni Panurirang Hesekiel di na manurirangi ibana, songon dia ma asa hombar tu ulaonna i adong si hatindanghononna tu bangso i. I do umbahen asa tung gomos situtu dipaima Panurirang Hesekiel asa tung marhamubaon nian roha ni bangso i. Ai i do umbahen na ditotophon Debata si Hesekiel songon sahalak na manjaga bangso Israel asa mangolu di bagasan hasintongan ni Debata, i ma marhite na mangalehon angka poda, maminsang di angka pangalaho na maralo tu lomo ni Debata, jala paingothon bangso Israel asa mulak tu dalan lomo ni roha ni Debata. Panjaga, ulaon ni si Hesekiel hombar ma tu pangkuling ni sarune, i ma songon sada tanda na naeng masa, isarana songon angka mara manang hamatean. Tangkas situtu dipaandar turpuk on na ditongos sahalak jolma laho manjaga jolma na asing gabe songon tanda asi ni roha ni Debata. Tudos ma i songon haroro ni Jesus Kristus, na ro tu portibi on gabe sahalak jolma laho patuduhon balga ni asi ni roha ni Debata di jolma i. Songon sahalak na porsea hita di Debata totap ma hita manjaga diri asa tongtong hita mardalan di dalan lomo ni roha ni Debata molo pe ro angka sitaonon di ngoluta. Lumobi ma di na mangadopi angka ajaranajaran nang hatahata naso hombar tu Hata ni Debata manang angka pangajari na so tutu na naeng mangaliluhon haporseaonta di Jesus Kristus. Molo marsiajar hita jala taida di angka naung masa, godang do jolma na marbalik manadinghon haporseaonna molo masa angka parungkilon na dokdok di ngoluna. Laho do ibana mangalului alus jala dalam asa malua sian hinaporsukna marhite angka ulaon na so hombar tu lomo ni roha ni Debata. Alai unang ma nian songon i hita, molo naung gabe jolma na marhaporseaon hita, didok do asa manongtong mamodai jala paingothon angka dongan jolma (ida Lukas 17:3).
2. Ulaon na hombar tu Hata ni Debata jala barita asa marhamubaon ni roha (ayat 8-9)
Di turpuk on dipabotohon do angka na naeng ulahonon ni Panurirang Hesekiel marhite Hata ni Debata. Ingkon dipinsang jala dipaingot do angka jolma parjahat asa tung ditadingkon angka dalanna na jat. Jala molo sahat ro di ujung ni ngolu ni halak parjahat i ndang ditadinghon dope dalanna na jat i, ingkon tungguon ni Debata ma tu si Hesekiel. Boasa gabe songon i, boasa ndang marna muba rohana. I ma songon sada ulaon na mansai dokdok di Panurirang Hesekiel. Alai molo naung dipasahat ibana do angka hata poda asa tung marhamubaon roha halak parjahat alai ndang diulahon, nda ingkon mate ma parjahat i dohot hasalanna (dosana) alai molo si Hesekiel mangolu ma, ala manontong do ibana mangulahon na sinuru ni Debata. Artina manang ise na olo umbege jala manjalo hata poda manang sipaingot, na mangolu ma ibana, gok angka pasupasu ni Debata. Alai manang ise na so olo manangihon jala ndang mulak manadinghon dalanna na maralo tu lomo ni Debata, hona uhum ni Debata ma ibana. On ma sada parsuruon ni Debata tu si Hesekiel asa tongtong mangaradoti bangso Israel songon sahalak panurirang ibana, sipasahat angka na pinangido ni Debata asa malua bangso sian rimas jala padaohon sian hamatean.
Tangkas do dipabotohon marhite turpuk on, asa molo adong sahalak panurirang (naposo ni Debata) tongtong ma diparateatehon angka jolma. Di na pasahathon Hata ni Debata mardongan hata na gok huaso, asa boi paubahon roha ni jolma, asa tung boi dijalo jala boi gabe sitindangi Hata ni Debata. Di partingkian si nuaeng on godang jolma na so olo manangihon Hata ni Debata na pinasahat ni angka parhalado ala ni na hurang di angka metode manang di na hurang tangkas pasahathon angka Jamita, gabe godang jolma na holan si pananginangi alai ndang disosoi asa olo mangulahon angka jamita naung ditangihonnasida. Marhite turpuk on dipabotohon do tu hita, molo naung manjalo tohonan songon sahalak naposo ni Debata songon panurirang Hesekiel, ingkon tau gabe sitiruon ma, asa saurdot hata na didok di jamita (poda) dohot pangulahonon di ngolu si ganup ari. Tontu ndang boi ulahononta i molo so mardonganhon Tondi ni Debata. Songon na nidok ni Apostel Paulus, hita naung manjalo Tondi, gabe silehon poda na mardonganhon halambohon ma (patudos Galatia 5:22).
3. Haluaon na sian Debata di bangso na olo pubahon roha (ayat 10-11)
Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran (2 Timoteus 3:16). Hata ni Debata gok huasona maradophon angka jolma na marhaporseaon (patudos Johannes 1:1-3 dohot 14). Adong do hata na mandok sian parbuena do tandaon bonana, songon i do nang ngolu ni jolma naung manjalo Hata ni Debata, ingkon tarida do parbuena di ngolu si ganup ari. Diarahon do hita asa tongtong marningot mardalan di dalan ni Debata asa dapotan haluaon hita, i ma songon tanda asi ni roha ni Debata di jolma, asa unang mate di bagasan dosa.
Ndang dihalomohon Debata molo gabe mate halak parjahat i so ingkon mida hamumulak ni parjahat i tumadingkon dalanna, asa mangolu ibana. Manongtong do Debata paingothon hita asa unang sai lalap mangulahon angka ulaon na maralo tu lomo ni rohaNa. Molo dalan na so hinalomohon ni Debata na taula, ingkon dapotan uhum do hita disi. Jala manongtong do Debata paingothon asa mangolu hita di angka dalan hatigoran. Dipaingot do hita asa mulak jala manadinghon dalan na sala, asa mangolu di bagasan gomgoman ni Debata marhite tondiNa. Jadi marhite dioangido Debata do hita asa gabe sitindangi di hataNa na manongtong satia mangulahon angka dalan na pinatuduhon ni Debata. Molo olo hita pajonokhon dirinta tu Debata, ndang paholangon ni Debata diriNa sian hita. Manongtong do Debata manarihon nasa na ringkot di ngolunta. Songon na pinasahat ni panurirang Hesekiel di turpuk on asa mangulahon ulaon na hombar tu Hata ni Debata jala na pinangido ni Debata huhut paubahon roha. Molo naeng manjalo haluaon na sian Debata do hita, ingkon mangolu ma hita di bagasan hasintongan. Ai ndang dihalomohon Debata hamatean ni halak parjahat so ingkon mida hamumulak ni parjahat i tumadinghon dalanna.
HAHONAAN
1. Gabe sitindangi do hita tu saluhut bangso. Si hatindanghononta i ma haluaon na sian Jesus Kristus.
2. Adong do tingki na haduan tungguon ni Debata hita hombar tu na taula tagan di ngolunta. Dipangido do hita asa mangolu di bagasan habadiaon, manadinghon angka dalan na maralo tu lomo ni roha ni Debata, asa jaloonta haluaon na sian Jesus Kristus.
3. Songon halak Kristen hita, ingkon manongtong do hita mangarahon diri tu angka ulaon na pinangido ni Kristus. Jala ndang ulaon na mura paholang diri sian dosa. Sada ulaon na borat do i sasintongna, i do sipata alana asa sai mangolu jolma i di bagasan dosa, ala ndang tolapna maralohon angka sitaonon mangihuthon Hata ni Debata gabe mangalului angka alus na hatop na so hombar tu lomo ni roha ni Debata. Asa marhite Hata ni Debata dipaingot hita asa sai tahalungunhon haluaon na sian Jesus Kristus.
Posting Komentar