Jamita Minggu 15 Oktober 2023 Minggu 19 Dung Trinitatis tarsurat do di buku Mateus 22 ayat 1-14 na manurathon umpama na pinasahat ni Jesus taringot harajaon banua ginjang na dipatudos songon pesta parunjuhon na pinatupa ni sahalak raja. Jala dibahen ma ojahanna "Torop do na Tarjou Alai Otik do na Tarpillit." Tapamanat ma hatoranganna.
Pendahuluan
Turpuk ni Jamita Minggu 15 Oktober 2023 sadari on manurathon songon dia umpama na pinasahat ni Jesus taringot tu harajaon banua ginjang na dipatudos songon sada ulaon manang pesta na pinatupa ni sahalak raja. Jala digokhon ma angka halak na asa parsidohot di ulaon i. Molo taringot tu ulaon, somalna adong do panggokhonon manang mangontang halak, jala taringot tu na mangontang adong do pandohan ni Halak Batak na mandok "gokhon sipaimaon, joujou sialusan." Molo naung sahat do gokhon, ingkon denggan do i diadopi. Lumobi ma di angka ulaon ni Halak Batak. Molo naung ro do gokhon, isarana sian paranak manang parboru, ingkon rade do hita mangalehon tingki asa boi ro hita tu ulaon i. Na pasti bahenonta do dalan boha asa boi adopanta uloaon i jala asa unang kecewa halak na manggokhon hita. Tabahen do angka pangaradeon songon tandok, tortor, tumpak, ulos dohot angka na asing. Sipata dao pe inganan manang luat dipamasa ulaon i jala nang pe ingkon ruar sian kantongta modal alai ndang gabe harugian i tahilala asal ma boi taadopi ulaon i. Sudena i diula, boha ma asa gok las ni roha ni hasuhuton ni ulaon i lumobi ma di na mangontang.
Molo tajaha do angka Buku Evangelium di Bibelta i, ndada holan sahali on be Jesus mambaen umpama taringot tu harajaon banua ginjang. Angka umpama taringot tu harajaon banua gingang, i ma songon umpama sahalak sada na mora (bdk. Mateus 20:1-16), umpama songon dakdanak (bdk. Mateus 18:1-5), songon sahalak panabur boni (bdk. Mateus 13), umpama taringot tu anak boru na sumpulu (bdk. Mateus 25) dohot na asing dope. Jala dang holan taringot tu "harajaon banua ginjang" dibahen Jesus umpama dohot do di angka pangajarion na asing, jotjot do Jesus mamangke umpama. Di turpuk ni Jamita on didok Jesus do umpama taringot tu harajaon banua ginjang na dipatudos tu sahalak raja na patupahon pesta mamestahon ianakhonna na mangoli.
Pembahasan
Jamita Minggu 15 Oktober 2023 sadari on naeng pasahathon tu hita pigapiga pangantusion taringot tu harajaon banua ginjang na dipatudos songon sahalak raja na patupa pesta. Molo didok marpesta na pasti ulaon las ni roha do i. Jala dalan manggohi las ni rohanasida pasti adong do na niontang ni nasida. Di turpuk on didok, sahalak raja do nampuna ulaon i manang na gabe "suhut bolon." Tontu boi do taantusi ia sahalak raja tardok halak na sangap do, jala na nihormatan ni saluhut halak. Na pasti balga do ulaon i jala angka halak na diundang i pe pasti torop do, ro di angka sisolhot, nang angka rekan pejabat. Songon i do somalna molo marpesta angka uluan na sangap. Jala boi dohonon tung ise ma na so las rohana molo sahat tu ibana undangan i, lumobi ma ala sahalak raja na sangap do nampuna ulaon i.
Alai tung ngeri hian do na masa di turpuk ni jamita on, dung sahat gokhon i. Nunga rade be angka na hombar tu ulaon i ro di angka sipanganon laho manjangkon angka undangan na ro tu pesta i. Dipangido raja i do jala dijou angka naposona, molo di halak Batak na gabe songon parhobas i ma angka parboru. Ia raja i, na gabe hasuhuton ni ulaon i dipangido ma angka boruna (parhobas) laho manjou angka halak asa ro, gabe parsidohot di ulaon i, di na hirahira naung singkop jala nunga rade be nasa na ringkot di ulaon pesta las ni roha i. Hape ndang adong na ro nanggo sada. Hape molo dipatudos tu hata ni halak Batak adong do pandohan "gokhon do sipaimaon, joujou do sialuson." Sasintongna nunga tingkos na binahen ni raja i songon na manghasuhuthon ulaon di pesta i. Digokhon do angka jolma jala adong do muse panjouon, marhite angka naposona alai ndang adong olo ro.
Alai nang pe songon i diulahi raja i do muse marsuru angka naposona, didok "paboa hamu ma tu angka na ginokhonanmuna, nunga rade be angka sipanganon, nunga singkop be nasa na ringkot." Lapatanna raja i, na gabe asuhuton di pesta i nunga mansai tangkas paboahon haradeonna, haradeon manjanghon, manamue dohot patupahon nasa na ringkot di sipanganon nasida pe. Alai sai tong do marsidalian nasida dibahen do tois ni rohanasida, na sada laho tu hauma, na sada laho tu partigaatigaan dohot angka na asing. Gabe tubu ma sungkunsungkun, aha do ulaning umbahen na borat rohanasida ro tu pesta i? Boi dohonon ala ni toisna do, gabe marsidalian be ma nasida.
Sasintongna umpama on laho mengecam halak Jahudi do hatiha i. Songon halak Jahudi na saleleng on na manghirim di harajaon ni Debata marhite Mesias. Na naeng dohonon ni Jesus: "Nunga sahat be harajaon ni Debata i songon panggokhonon asa masuk tu harajaon ni Debata." Gokhon i dipasahat tu nasa halak na manghirim saleleng on diharoroNa. Ia raja i, nampuna ulaon i, i ma Debata, na ro tu portibi on laho manamue hita, na rade do Ibana manamue hita di pesta i. Saonari rodo gokhonNa jala joujouNa, alai ndang adong na ro, jala laos martois ni roha do sude mambahen sidalianna be. Halak Jahudi na saleleng on sai radot di patik ni Tuhan i, alai laos so adong do parulaonna na tutu di patik i, songon angka siboto surat na so porsea di harajaon banua ginjang na binoan ni Jesus. Songon angka na sangap di Israel na so olo manjanghon pangajarion ni Tuhan i, marhite angka panurirang, songon naung disurathon di angka sejarah di Padan na Robi.
Dirimpu rohanasida do naposo na sinuru ni raja i gabe alonasida, gabe manggunturi nasida jala dipusa nasida ma naposo i. Naposo ni Debata i ma angka siseanNa, angka parjamita, angka panurirang, songon i nang angka naung pinabangkitNa gabe pangulaNa. Hape naposoNa i sasingtongna gabe wakil ni raja i do laho manjou nasida asa ro tu pesta i. Holan na manjou do uloan nasida, hape gabe dipusa jala dibunu do nasida. Sahalak naposo ni Debata i ma angka naung pinabangkit ni Debata laho manjou nasa jolma tu harajaon ni banua ginjang asa dapotan haluaon.
Nang pe ndang ro nanggo sada angka naung ginokhonna i, ndang gabe mago boti las ni roha ni raja i. Nang pe sasintongna pasti do adong kekecewaan molo adong sahalak na marulaon jala diontang angka jolma alai ndang ro be angka na ginokhonanna i. I do asa didok di turpuk ni Jamita on, "nunga rade nian na hasea tu pesta i, alai ndang tau angka na pinio." Didok Jesus "ndang tau", molo di bahasa Indonesia didok "tidak layak". Wajar do raja i mandok songon i, ala ndang denggan respon ni angka na di ontang i maradophon ibana. Angka na so tarharaphon be, angka pangalaho na so rade dijou, na gok angka sidalian, ndang tau i mandapot harajaon ni Debata, ndang tau i manjalo haluaon i.
Nang pe so ro angka naung niontangna i, ndang gabe sumurut las ni rohana, nang pe adong kekecewaan di ibana. Didok do muse naposona tu angka dalan balobung, asa diarahon angka saluhut na jumpangna. Lapatanna manang ise na olo diarahon. Na nidokna dison paboa godang do hape na manghirim jala porsea na gabe hasahatan ni haluaon i, ndang gabe jaminan i gabe olo ro manopot Tuhan i.
I do umbaen na didok raja i "manang ise jumpangmu." Lapatanna Rade do tangan ni Debata manjou manang ise na olo ro tu Ibana. Didok do "na jahat dohot na denggan" i ma na manggohi ulaon pesta i. Ndang sumurut hape las ni roha ni nampuna ulaon i, ai gabe torop do manang ise pe na ro tu pesta i. Halak naung jumpangan di Jahowa, i ma halak na marlas ni roha. Martua ma halak na nijumpangan ni naposoNa, ai tarjou ibana, jala martua ma ibana molo na rade do rohana jonok tu Debata. Ingkon gok do las ni roha ni ganup halak naung jumpang dohot raja i, na ro tu ulaon pesta i. Alai adong do sahalak na ditamue ni raja i "na so marpahean pesta." Tontu halak na ro tu pesta i ingkon denggan do paheanna, patuduhon haradeonna mangadopi pesta i. Merasa do ibana parsidohot marlas ni roha di ulaon pesta i, hape dirina sandiri pe ndang diparrohahon. Marparange do ibana songon halak naung layak manjalo las ni roha hape diboto Debata do na di bagas rohana. Nda haleaon do na binahenna i, hailaon do na binahenna disi molo so denggan manang molo so patut paheanna. Tarjalo roha do molo didok Jesus, "na boha do parmasuk mu tuson amang? Ai ndang marpahean pesta hamu. Ndang suman paheanmuna."
Nang pe sahalak raja Ibana, nampuna ulaon i manang hasuhuton ni ulaon pesta i, ditanda Ibana do angka na tinamuen jala diparrohahon Ibana do songon dia be angka pangalahonasida, sikapnasida be na ro tu pesta i. Ndang gabe sibuk sandiri ibana nang pe Ibana nampuna ulaon i. Molo di halak Batak, olo dope ra hasuhuton i pe ndang ditanda angka halak na ro tu pestana ala ni toropna. Alai molo raja i sumurung do. Jesus Kristus do na nidokna songon sahalak Raja di turpuk on, nampuna huaso di harajaonNa. Ganup na masuk tu harajaonNa i pe, i ma halak na tarjou hombar tu pangalahona dohot sikapna.
Sahalak na so marpahean pesta i, gabe ditali do patna dohot tanganna laos dibolonghon, masa ma angka anggukangguk. Jesus do nampuna harajaon i, di Ibana do hinsu ni hangoluan i. Lapatanna molo ro hita tu Debata, ingkon ma di bagasan sikap hormat, di bagasan habadiaon, ndada leas ni roha. Nang pe adong halak na mardosa jala adong muse na denggan masuk harajaon ni Debata, ndada diparsoalhon Tuhan i. Alai halak na ro tusi so marhite pahean hasintongan ni Kristus, jala ndang mangolu di bagasan Kristus, jaloonna do jambarna tu panguhuman. Ai didok do, "lan do na tarjou, alai otik do na tarpillit." Ise do na tarjou i? Ise do na tarpillit i? Lapatanna disi halak na tarjou i pe hape ndang gabe jaminan naung parsidohot di harajaon ni Debata. Alai halak naung tarpillit i, tontu i ma angka halak naung dijangkon Debata jala parsidohot di harajaon ni Debata.
Kesimpulan dan Refleksi
Marhite hatorangan ni Jamita Minggu 15 Oktober 2023 naung dipatorang di ginjang. Marsiajar do hita taringot tu harajaon banua ginjang na dipatudos songon sahalak raja na patupahon pesta jala boi do tarfleksihon songon dia pangauhononna tu tongatonga ni ngolunta marhaporseaon. Dipaingot do hita asa tahangoluhon di ngolu siap ari:
1. Ingkon tinggil jala olo do hita mangoloi joujou ni Tuhan i. Molo tadok dirinta halak na porsea, ingkon ma nian olo hita mangoloi joujou ni Tuhan i. Marragam do dalan panjouon ni Tuhan i asa mardalan hita di hasintonganna. Tung unang be marsidalian hita, marsiboan sidalianna, marsiboan sahitna, ndang boi hita manjua. Olo ma hita ro tu Tuhan i mangoloi hataNa jala mardalan di lomo ni rohaNa.
2. Rade do Tuhan i manamue hita. Holan Tuhan Jesus do panamue na burju. Ungkap jala rade do rohana manamue hita manang sadihari pe ro hita tu Ibana. Ndang hea disordak pintuNa, nang pe Ibana do nampuna hinsu ni hangoluan i. Ala ni i binsan adong tingkinta, binsan mangolu hita, ro ma hita, ai rade do dibahen Tuhanta ganup na pinangido ni rohanta jala holan di ibana do i, Ibana do bona ni hangoluan jala Ibana do haroan ni pasupasu. Ala ni i taharinggashon ma ro tu Tuhan Jesus. Ai didok do "ro ma hamu tu Ahu, hamu angka na loja ... " (bdk. Mateus 11:28) jala didok do, "Ahu do dalan i, dohot hasintongan dohot hangoluan ... " (bdk. Johannes 14:6) jala didok do, "Ahu do roti hangoluan i (bdk. Johannes 6:48).
3. Tuhan Jesus do na maniop hinsu ni haluaon. Tangkas do diboto Tuhan i manang ise na ro tu pesta i. Halak na tarjou i pe, na so ro mangalusi joujouNa i, ndang tau i dohot di harajaonNa. Jala halak na so denggan marpangalaho, na holan marsipaula parsidohot, ndang tau dapot haluaon i. Holan Jesus do na patut mamillit angka ise ma na bongot tu harajaonNa i. Sian tongatonga ni na tarjou i pe, diboto Debata so angka ise ma na tau sipillitonna. Dilehon do tu Ibana huaso laho manguhumi, ala Anak ni Debata do Ibana (bdk. Johannes 5:1). Di tingki diboto Ibana na so layak jolma i dipillit pintor ditali do, dung i dibolongkon. Jesus do nampuna uhum jala na manguhumi na mangolu dohot na mate. Ibana do na manontuhon jala manirang angka na porsea dohot na so porsea.
4. Godang do na tarjou alai otik do na tarpillit. Tuhan Jesus do na umboto manang ise ma na tau parsidohot di harajaonNa. Jala ndang sude i sian na tarjou i, nang pe naung digokhon, alai molo so olo do, na pasti ndang na parsidohot i. Jala adong do nang na tarjou, jala olo ro tu pesta i, alai molo ndang sian ias ni rohana, hona uhum di i sian Debata. Didok Jesus do, "Ndang saluhut halak na mandok Ahu Tuhanna na bongot tu harajaon banua ginjang i, holan angka na mangulahon lomo ni roha ni Damang na di banua ginjang i do" (ida Mateus 7:21). Jala dung ari parpudi i pe, ditanda Debata do angka birubiruNa, na sai sihol tu asi ni rohaNa, na mangulahon hataNa, jala na olo mamelehon dirina mangurupi angka na gale. Ganup na so mangulahon i didok Jesus do tu nasida, "Ndang Hutanda hamu, laho ma hamu sian lambungHon" (ida Mateus 7:23). Amen. (ash)
Posting Komentar