Jamita Minggu 5 November 2023 Minggu 22 Dung Trinitatis tarsurat do di buku Poda 3 ayat 9-10 na manurathon poda asa pasangap Debata marhite hamoraon dohot sian patumonaan ni na niula. Jala pasti do diramoti Debata angka halak na pasangap Debata. I do na naeng pabagasonta pangantusionta sian hatorangan ni turpuk ni Jamita on. Jala dibahen ma ojahanna "Pasangap ma Debata Marhite Hamoroaonmu dohot Dagingmu." Tapamanat ma hatoranganna.
Pendahuluan
Molo disungkun tu hita, "boi dope tahilala panarihonon ni Debata na adong di ngolunta on marhite angka arta nang hamoraon?" Manang taetong do ala ni gogonta dohot malonta molo godang artanta jala mamora hita? Mangalusi sungkunsungkun on naeng hangoluhononta Hata ni Debata di Poda 10:22 "Pasupasu ni Jahowa do mambahen mamora, jala ndang mardongan hangaluton dibahen." Nang pe naung tajalo Barita na Uli, alai sai adong dope jumpang hita di parngoluon on parngoluon ni jolma na mardebatahon (mepertuhankan) mammon manang hepeng dohot arta portibi. Parngoluon ni jolma si songon i digombarhon do songon na manginum aek laut, lam diinum lam uasan. Gabe arta i nama na mangatur jala mangarajai ngoluna. Ndang dapot hita di ngolu ni jolma na si songon i roha na marpanarihon tu donganna. Naeng do holan mangonsop mudar ni donganna jolma, songon i ma parngoluon ni jolma na sai holan mangharingkothon dirina, digoari ma i lintah darat. Na gabe sungkunsungkun, tung tarpatupa ni jolma na sai mardebatahon arta dope laho pasangaphon Debata di bagasan ngoluna marhite hamoraon dohot dagingna? Hombar tusi do na naeng sigatanta di turpuk jamita on.
Pembahasan
Pasangap ma Jahowa (ayat 9)
Dipillit Debata do Bangso Israel gabe bangso na miniahanNa. Taruli pasupasu do sandok parngoluan ni Bangso Israel, nang angka suansuanan ro di pahanpahanan. Marhite turpuk on, disosoi Debata do bangsoNa i asa pasangaphon Jahowa sian patumonaan ni sandok pangomoanna. Boasa ingkon pasangaponna Jahowa? Hata pasangap Jahowa di turpuk on ndang na mandok paboa na hurangan Debata di angka sipanganon, alai asa tangkas do diboto bangso i paboa Debata do nampuna tano, halak dagang jala paisolat do nasida (ida 3 Musa 25:23). Debata do na mamasumasu saluhut na niula ni tangannasida umbahen manjadi jala boi manggotil nasida marlompit ganda. Hata pasangaphon Jahowa dison marlapatan do tong, asa tangkas diboto angka bangso i, na ingkon jumolo do dihamauliatehon tu Debata (prioritas) sian saluhut na niula ni angka bangso i. I do umbahen dipasahat Debata tu bangso Israel: "Ingkon boanonmu do patumonaan sian tanomi masuk tu bagasan jabu ni Jahowa, Debatam" (2 Musa 23:19), ida 3 Musa 23). Songon i nang di 3 Musa 23:10 didok Jahowa do tu bangsoNa i: "Paboa ma tu halak Israel jala dohononmu ma tu nasida: Ia dung sahat hamu tu tano, silehononHu tu hamu, jala sanga hamu manggotil gogona i, ingkon boanonmuna ma tibalan parjolo sian patumonaanmuna i tu malim." Ruhutruhut taringot tu mamboan tu Debata sian patumonaan na niula tongtong do diihuthon ro di sundut na umpudi di angka pomparan ni bangso Israel (ida 5 Musa 26:1-11).
Marojahan tu Hata ni Debata maradophon bangsoNa dung sahat nasida tu tano Kanaan, gabe sipaihutihuton do i tu angka pomparan ni bangso Israel, sahat tu panggomgomion ni si Salomo na gabe raja di bangso Israel. Dihangoluhon si Salomo do, ummarga do Debata di pardalanan ni ngoluna, i do umbahen na boi ibana mamora jala maduma. Songon haporseaon ni si Salomo di Jahowa, naeng ma nian songon i bangso na ginomgomanna, asa manghangoluhon Jahowa di sandok gulmit ni ngoluna. Dipaingot Raja Salomo do bangsona asa unang manghalupahon Jahowa silehon pasupasu. Unang ala ni arta manang hamoraon gabe holang sian Jahowa (kacang lupa kulitnya). Unang ala ni arta dohot hamoraon gabe i dalan ni sibolis manegai parsaoran ni nasida dohot Debata. Unang ala ni arta dohot hamoraon gabe tubu dosa dohot ginjang ni roha. Alai naeng ma nian marhite arta dohot hamoraon na adong di hita, na marharoroan sian pasupasu ni Jahowa, naeng ma hita manongtong mandok maulite tu Jahowa silehon pasupasu di ngolunta. Dalannasida mandok maulite tu Jahowa i ma marhite pasangaphon Jahowa di saluhut hamoraon manang arta naung pinasahat ni Debata. Jala ingkon tongtong do dihangoluhon bangsoNa i, Jahowa do na ummuli, na gabe prioritas di sandok gulmit ni ngolu ni jolma i, ai Debata do na manarihon saluhut nasa na ringkot di ngolu ni natinompaNa.
Pasupasu na Sian Tuhan i (ayat 10)
Parbue ni pangoloion ni bangso i di Hata ni Debata, didok do: "Jadi marsipinjot ma angka sopom, jala sirnip tuak anggur angka pangilanganmu." Dalam Bahasa Indonesia dikatakan: "maka lumbung-lumbungmu akan diisi penuh sampai melimpah-limpah, dan bejana pemerahanmu akan meluap dengan air buah anggurnya." Na taparsiajari sian turpukon i ma, parsaoran na denggan tu Jahowa marhite pasangaphon Ibana sian patumonaan na niula, mambahen las roha ni Debata. Dipatuduhon Jahowa do las ni rohaNa mida jolma na pasangaphon Ibana marhite pasupasu hangoluan dohot hadumaon. Pasupasu i didok raja Salomo: "Jadi marsipinjot ma angka sopom, jala sirnip tuak anggur angka pangilanganmu." Hadirion ni si Salomo na manghangoluhon poda ni Debata marhite amana si David mambahen ibana gabe jolma na tarpasupasu, jala gabe pasupasu tu na humaliangna. Di turpuk 1 Rajaraja 3:14-15 didok: "Dung i molo sai tong marparange ho di angka dalanHu laho mangaradoti angka patikHu dohot tonangHu, songon parange ni amangmu si David, tumpahonHu ho huhut sarimatua." Jadi dung sahat ibana (Salomo) tu Jerusalem, jongjong ma ibana di jolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona."
Kesimpulan dan Refleksi
Di pigapiga inganan pelayanan di bona pasogit, sai adong dope dapot di luat i, molo dapot tingkina gotilon manang panen, sai jumolo do dipatupa mamonamona. Ulaon patumonaan sian na niula i dipatupa asa ingkon jumolo do pasahaton parbue ni na niula i tu Debata marhite naposoNa di Bagas Joro. Dipasahat ma i tingki patupa pesta gotilon na dipamasa di tongatonga ni huria. Dihaporseai ruas ni huria do songon hata ni Debata na didok di Buku Ende No. 373 "Mangula Hita Jolma" ayat 1 didok, "mangula hita jolma manabur boni i, alai anggo jadina di Debata do i. Dilehon las ni ari nang nambur, udan pe. Tongtong di panumpakNa marguru sasude. Nasa uli basa ro sian Debata. I pe Ibana puji ma huhut haposi da." Marhite pelean patumonaan na niula i, dihangoluhon ruas ni huria i do, dalannasida do i mandok mauliate tu Debata, ala ni pasupasu ni Debata do asa gabe na niula, sinur na pinahan jala horashoras di hajolmaon. Ringkot do dihangoluhon pelean patumonaan ni na niula di tongatonga ni huria asa manongtong di bagasan ngolu na pasangaphon Debata marhite hamoraon na jinalo ni jolma i sian Debata. Tanggung jawab ni huria do melestarikan kearifan lokal songon pelean patumonaan ni na niula gabe sada warisan na denggan tu sundut na umposo songon na pinatupa ni si Salomo tu bangso Israel.
Molo tapamanat partondion ni ruas naung manghangoluhon denggan basa ni Jahowa, sai adong do jumpang pangalaho pasangaphon Jahowa marhite hamoraon naung jinalona sian Debata. Adong do keluarga na olo pasahathon tanona gabe inganan pajongjonghon gareja, mangurupi biaya pembangunan gareja manang rumah dinas pelayan, mangalehon alat transportasi tu huria dohot angka na asing. Molo dipatupa huria pe pesta penggalangan dana, sian hamoraon na pinasahat ni Debata di ngoluna dipasahat angka ruas do bantuan dohot sumbangan. Jala molo tapamanat parngoluon ni jolma na sai manongtong pasangaphon Jahowa marhite hamoraonna, ndang na gabe suda na di ibana i, alai sai lam martambatamba do hamoraonna. Alai baliksa, parngoluon ni angka jolma na sai mangholit tu Tuhan i, lam pogos jala sai hira so adong na masa di ngoluna. Disonma hinaringkot ni pangauhononta di hata ni endenta sian Buku Ende No. 470 "Jesus Ho Nampuna Au" ayat 5 didok "sere, arta, hepeng pe, buat ma di Ho sude. Tondi nang pamatanghi, ingkon ho oloan ni i." Songon i do nang hata ni Jesus di Mateus 6:33 didok "sai jumolo ma lului hamu harajaon ni Debata dohot hatigoranNa, dung i tambahononNa do sude angka ondeng tu hamuna." Tahangoluhon ma i di tongatonga ni ngolunta, tapasangap ma Tuhan i marhite dirinta nang hamoraonta. Amen. (ns)
Posting Komentar