Jamita Minggu 8 Oktober 2023 Minggu 18 Dung Trinitatis tarsurat do di buku Jesaya 5 ayat 1-7 na manurathon Jala dibahen ma ojahanna "Dihalomohon Debata do Hatigoran dohot Hasintongan." Tapamanat ma hatoranganna.
Pendahuluan
Turpuk ni Jamita Minggu 8 Oktober 2023 sadari on manurathon songon dia panghobasion ni panurirang Jesaya. Manghobasi do Panurirang Jesaya di Juda dohot Jerusalem, uju di ngolu ni si Usia, Jotam, Ahas, Hiskia, i ma angka raja ni Juda (740–701 Andorang Kristus/Sebelum Masehi). Manurirangi do si Jesaya tu bangso ni Debata, i ma angka anak na pinagodanggodang ni Debata (ida Jesaya 1:2), hape laos marbalik do nasida sian Debata. Mansai roa do pangalaho ni bangso i di adopan ni Debata. Manjahati do nasida (ida Jesaya 1:16), mangulahon pangarupaon, papeol uhum tu na sopot so marama, ndang olo mangondingi angka na mabalu (ida Jesaya 1:17), angka sintua pe gabe panggunturi jala gabe dongan ni angka panangko do. Luhut do nasida mangapian di sisip, jala dilului angka silehonlehon (ida Jesaya 1:23), dapotan tabantaban do nasida sian na dangol di bagasan angka jabunasida (ida Jesaya 3:14-15). Tabantaban sian na dangol naeng bahenonna pamonangkon parporangan, asa dapotnasida kenyamanan politik, paundukhon bangsobangso na asing gabe musu.
Gok roha utiutian sian habinsaran do nasida, jala angka parsibalik mata, songon halak Palistim jala satahi tu anak ni na pulik marga sian nasida. Gok perak dohot sere tanonasida jala ndang tarlilit artanasida, jala gok angka hoda do tanonasida, pola sahat tu na so habilangan be angka huretanasida. Gok angka ajiajian tanonasida jala marsombado do nasida tu jadijadian ni tanganna, tu na pinauli ni jarijarina (ida Jesaya 2:6-9). Marnida pangalaho angka na jahat i, digurithon panurirang i ma ende taringot tu bangsona, hasian ni Debata na marporlak anggur di punsu ni sada dolok na napu/subur (ida Jesaya 5:1), denggan do diurus Debata porlak i, dipature angka pangula ni porlak do tano nang parbuena. Tung manghirim do Debata di parbue na tonggi, hape na asom do diparbuehon, gabe tarhirim ma Ibana (menghasilkan kekecewaan).
Pembahasan
Jamita Minggu 8 Oktober 2023 sadari on naeng pasahathon tu hita pigapiga pokok bahasan.
1. Punsu ni dolok na napu (ayat 1).
Tubu do sada sungkunsungkun marhite ayat 1 on, molo tapingkiri tung adong do punsu ni dolok na napu? Somalna di rura/toruan do habaoran ni aek, laos i do na mamboan angka unsur hara na mambahen tano gabe napu na adong di toru ni sada dolok. Alai marhuaso do Debata manarihon dolok i, dibahen do napu marhite na parohon aek marhite ombun nang udan. Jala somalna, lam metmet do tano di punsu ni dolok sian na di toruan/kaki gunung. On ma na gabe gombaran na patuduhon, na dipillit Debata do bangso Israel, bangso na metmet gabe bangso na sangap (berada di puncak), laos marhite bangso i do hataridaan ni huaso nang hasangapon ni Debata.
2. Debata mangarade saluhut (ayat 2).
Songon sahalak pangula di hauma, dung jumpangna tano na napu, pungkaonna ma laho paulihon tano i, dipangkuri, dijomputi angka batu sian tano i, laos disuanhon lopok (bibit) na denggan tusi.
3. Parbue na asom (ayat 3-4).
Kecenderungan pingkiran ni jolma sai holan mangula na jat do di adopan ni Debata. Nang pe naung godang dibahen Debata pangurupionNa, panarihononNa, laho marmudumudu jolma i, alai jotjot do tagonan di roha ni jolma i mangolu di bagasan hajahaton. Saintongna molo tarajumi ndang adong be na so diparade Debata di ngolunta on. I do asa didok Debata, "tung aha dope sibahenon nian tu porlak anggurHu na so Hubahen tusi, boasa sai Hupaimaima parbuena, parbue na tonggi hape na asom do diparbuehon." Partingkian na arga jala na denggan na sian Debata ndang diparhaseang jolma i dohot denggan.
4. Uhum sipatupaon ni Jahowa tu hasudungan ni rohaNa na tangkang i (ayat 5-7).
Hinorhon ni pambahenan ni bangso i na so mangulahon Hata ni Deba gabe tubu ma di roha ni Debata asa patupahon uhum di bangsoNa na tangkang i.
Kesimpulan dan Refleksi
Marhite hatorangan ni Jamita Minggu 8 Oktober 2023 naung dipatorang di ginjang. Marsiajar ma hita taringot tu songon dia Debata marmudumudu bangsoNa. Ai didok do ia porlak anggur ni Jahowa Zebaot i ma pinompar ni Israel dohot angka baoa sian Juda, suansuanan hasudunganNa. Songon i do nang hita angka ruas ni Tuhanta, naung tinobusNa marhite mudar ni Kristus. Nunga tajalo asi ni roha ni Debata, marhite ragam ni angka na denggan di ngolunta na pinatupa ni Debata. Jala songon ojahan ni Jamita Minggu 8 Oktober 2023 na mandok dihalomohon Debata do hatigoran dohot hasintongan, anggiat ma nian boi taulahon i di tongatonga ni ngolunta. Molo naung tajalo angka na denggan, sai taparbuehon ma na denggan jala gabe pasupasu ma hita ala nunga tajalo pasupasu sian Debata. Amen. (wnis)
Posting Komentar