Jamita Minggu 12 November 2023 Minggu 23 Dung Trinitatis tarsurat do di buku 1 Tessalonik 5 ayat 1-11 na manurathon poda na sian Apostel Paulus asa tongtong satia maimaima haroro ni Tuhan i jala mangula di bagasan lomo ni rohaNa huhut masipauliulian di angka halak na porsea. I do na naeng pabagasonta pangantusionta sian hatorangan ni turpuk ni Jamita on. Jala dibahen ma ojahanna "Masipauliulian di na Maimaima Haroro ni Tuhan." Tapamanat ma hatoranganna.
Pendahuluan
Di sada tingki dung borngin, ro ma sahalak ama mangalap (menjemput) anakna tu gareja. Mangihuthon perkiraan ni amanta i nunga hira sae be anakna i marguru ende naposo, ala nunga pukul 22.00 WIB. Dung sahat amanta i di lambung ni gareja i diparkirhon ma mobilna di tempat parkir na adong disi. Sian bagas mobilna i dibereng ma anakna i jongjong jonok ni pintu ni gareja i, alai ndang sadar anakna i naung ro bapana manomu ibana. Dipahohom amanta i do di bagas mobil na i huhut diparrohahon sadia leleng do asa lulululu anakna i di panomu (jemputan) ni amana. Pola sampe 30 menit amanta i maoarrohahon, dibereng sai momar do anakna i paidaida angka donganna.
Dipangolu amanta i ma klakson ni mobilna dalan manait roha (menarik perhatian) ni anakna i, alai tong do ndang diparrohahon. Dipangolu ma muse klaksonna songon tanda naung ro do amana i mangalapsa, alai tong do ndang dibege. Diklakson ma muse sahalinari huhut manggora amanta i, dung i pe asa tarsadar anakna i naung ro do hape amana. Dung didapothon anakna i, manjonokhon mobil i disungkun ma, "Sian dia do bapa? Nunga leleng iba tarpaima" ninna. "40 menit na salpu nunga dison bapa, alai ndang diparrohahon ho", ninna amanta i mangalusi. Tarsonggot do anakna i umbege alus ni bapana i.
Angka dongan sahaporseaon tudos ianakhon ni amanta i ma jotjot ngolunta. Sai lalap paberengbereng dongan jala lalap di ulaonta sandiri. Ujungna gabe ndang lao be rohanta marningot ari ni Tuhan i. Ndang sadar hita hape naung sai diparrohahon amanta Debata do pangalahonta.
Pembahasan
Ndang na mura asa sai tongtong marbulus ni roha (tetap memusatkan perhatian) paimaima haroroNa. Ala mansai godang do na di portibi on na sai tapingkirhon dohot taangananganhon. Jotjot do ala mar hasonangan jala dame ni rohanta, gabe pamenakhu ngolunta. Dibahen na pasonanghu manang na lalap i ma na mambahen gabe tahalupahon (kita kesampingkan) taringot tu na paingotingot haroroNa. Jamita on naeng manungguli hita, asa unang be tarlalap, unang tarpodom hita songon halak na leban. Alai totop ma hita marjagajaga huhut sadar, paboa di sada tingki, sian na so panagamanta pasti do ro Ibana.
Boha do bahenonta asa totap hita marjagajaga, hape so taboto sadihari haroroNa? Aha do siulahononta? Angka dongan, sasintongna ndang be soal "aha do sijagahononta" na gabe parsoalan, alai boha do hita na marjagajaga, i do.
Tangkas do diboto ruas ni huria Tesalonika inti ni parsoalan on. Diboto nasida do paboa naung jonok do ari ni Tuhan i, jala songon dia parroNa (ayat 1-2), alai busisaon do nasida ala so diboto dope hapastianna. Ndang holan halak Kristen na di Tesalonika na songon i, alai angka tokoh Kristen di angka ari na parpudi on pe torop do na suman tusi. Molo tapaihutihut do pardalan ni hakristenon, ndang otik be tokoh-tokoh Kristen na marusaha manjujur kepastian ni ari haroro ni Tuhan Jesus na paduahalihon. Nang pe mangasahon holan sian informasi dohot petunjuk na mansai minim. Nang pe so adong dope kepastian taringot tu hasintongan ni panjujurion i, alai torop do tong halak Kristen na manghaporseai. Memang mangihuthon tu pingkiranta, denggan ma nian molo adong kepastian i di hita, asa unang sai torus be busisaon bahenon ni na so pasti i andigan tingkina. Alai boha do hita, nunga sintong be caranta marjagajaga songon halak Kristen hita asa sai tajujur ari haroroNa i?
Apostel Paulus mandok: Ndang! Ala tung boha pe dibahen angka na malo manjujur ari haroro ni Tuhan i, ndang hea marhasil i. Toho do nian, molo taharhari do ragam ni panjujuron ni angka na hea manjujur ari haroro ni Tuhan i, nanggo sada pe ndang adong na sintong. Isarana songon: Sekte Leeds na di Inggris mandok taon 1806 ro nama ajal ni hasiangan on, hape ndang tutu. Sekte Mirelis na mandok di tanggal 23 April 1843 ma tingkina, alai ndang tutu. Sekte Mormon mandok di Desember 1891 ma tingkina, alai tong do ndang masa. Komet Halley mandok di taon 1910 ma tingkina alai tong do ndang masa. Sekte Coalition mandok di tanggal 31 Desember 1982 ma tingkina, i pe tong do ndang masa. Sekte Gerbang Surga mandok di tanggal 26 Maret 1997 ma tingkina, alai tong do ndang masa. Si Nostradamus mandok di taon 1999 ma tingkina, i pe tong do sala. Sekte Y2K mandok di taon 2000 ma tingkina, hape ndang masa. Ro muse hata ni si Noone mandok di tanggal 5 Mei 2000 ma tingkina, alai tong do sala. Songon i do nang sian Gereja Rhema Pentakosta Filadefia Balendah, Bandung Selatan na niuluhon ni Pdt. Mangapin Sibuea mandok di tanggal 10 November 2003 do tingkina ro, sian bisikan ni Tondi i, na sahat tu nasida, hape tong do sala. Ronald Weinland muse mandok di taon 2008 do masa kiamat, alai tong do ndang masa. Jala na parpudi i ma hata ni si Harold Camping na mandok di tanggal 21 Oktober 2011 ma tingkina hape tong do ndang masa.
Mangihuthon tu pandok ni Apostel Paulus ia angka usaha si songon i ndang na holan patubuhon harugian secara materi, alai laos dohot do nang harugion di partondion. Ala ni i do ndang adong lapatanna sasintongna jujuronta i, ai songon panangko borngin do haroro ni ari ni Tuhan i, tompu, jala ndang adong na umbotosa. Ala tompu do haroroNa, songon pambebeon tu na gabegabean jala ndang adong haporusannasida (ayat 2-3, patudos Jeremia 4:31). Jadi nang pe sai tajujuri ariari i, ndang tolap hita pasidinghon na so pasti i. Alai nang pe songon i ndang pola busisaon hita, na ringkot ingkon marjagajaga be ma hita manang sadihari pe parroNa.
Kesimpulan dan Refleksi
Tamba ni na paingothon angka halak na sai busisaon binahen ni ari na so pasti i, tong do dipaingot Apostel Paulus angka halak na so parduli di haroro ni Tuhan i. Didok, "molo didok halak, dame do jala mora so adong, disi ma tompu tahop tu nasida hamagoan i" (ayat 3). Dibahen i, asa saluhutna ma hita masipaingotan jala masipauliulian, asa unang tarpodom songon halak sileban, asa unang pasonanghu manang baliksa, gabe busisaon (ayat 11). Ala anak hatiuron jala anak arian do hita, antong marjagajaga ma hita dohot sintong, i ma marhite marroha na torang (ayat 5-6). Amen. (mtp)
Posting Komentar