Jamita Minggu 19 November 2023 Minggu 24 Dung Trinitatis tarsurat do di buku 5 Musa 8 ayat 7-18 na manurathon poda sipaingot tu bangso Israel asa tongtong marningot di angka denggan basa ni Debata jala unang manghalupahon angka pambahenan ni Debata na tu nasida. I do na naeng pabagasonta pangantusionta sian hatorangan ni turpuk ni Jamita on. Jala dibahen ma ojahanna "Unang Halupahon Debata." Tapamanat ma hatoranganna.
Pendahuluan
Buku 5 Musa on disurathon martujuan laho pabotohon tu angka sundut na umposo di bangso Israel na naeng masuk tu tano Kanaan asa manghangoluhon angka Patik naung pinasahat ni Debata di dolok Sinai marhite padan ni Debata dohot bangsoNa. Marhite buku 5 Musa on dipatangkas do, molo Patik i sahali do dilehon Debata tu saluhut pinompar ni Israel (ida 5 Musa 5:22). Dibahen i, tanggung jawab manang tugas ni sundut na tumua do pabotohon hinabalga ni asi ni roha ni Debata tu angka pinomparnasida, marhite na mangalehon jala mangajarhon Patik i (ida 5 Musa 6:4-9). Lumobi ma di bindu 27-30, na manurathon impola ni buku 5 Musa on, i ma taringot tu pasupasu dohot torutoru. Taruli pasupasu do bangso Israel molo mangolu jala mangula huhut manjamothon uhum dohot Patik i. Alai baliksa masa ma uhum manang torutoru tu bangso i, molo ndang satia bangso i tu uhum manang Patik i.
Na gabe impola ni buku 5 Musa on, i ma:
1. Dipaingot si Musa do bangso Israel taringot angka halongangan na masa di ngolunasida saleleng 40 taon di angka partingkian na salpu. Dipaingot ibana do bangso Israel asa marningot pambahenan ni Debata na mangiringiring bangso i haruar sian Misir sahat tu tano Kanaan, mamolus laut na dipahiang Debata, mangaramoti Israel saleleng di parhorsihan. Naeng ma tongtong marningot, unang manghalupahon pandonganion, panarihonon ni Debata. Gabe parroha sipangoloi ma tu Debata.
2. Dirataratai si Musa do Patik na Sampulu i jala dipaantushon do taringot tung na so jadi marangkup bahenon Debata. Ndang adong Debata dungkon ni Jahowa. Ai tung dihasogohon Debata do molo marsomba bangsoNa i tu debata na asing.
3. Dipaingot si Musa do bangso Israel taringot tu ihot ni padan ni Debata, padan na so boi diose.
4. Dipabangkit do si Josua manggantihon si Musa laho manguluhon bangso Israel, bangso na pinillit ni Debata, jala didongani do nasida sahat tu Tano Kanaan.
Di turpuk ni Jamita on, dipaingot si Musa do bangso Israel, bangso na pinillit ni Debata. Nunga 40 taon lelengna bangso i rap dohot Debata di angka pardalananna, jala ragam do angka naung dibolus bangso i. Tung godang do angka parsiajaran naung didapot bangso i, na so boi dihalupahon nasida. Pardalanan ni bangso i ndang na holan manaringoti angka naung salpu, alai gabe pangaradeon do i tu angka ari na mangihut. Saleleng 40 taon, diloas Debata do bangso Israel di halongonan manghilalahon angka parungkilon, hamaolon dohot pangunjunan. Dihilala do na male, mauas dohot angka hasusaan. Di angka hatahuton, dihilala bangso i do nang angka ancaman sian angka bangso na asing, dipatupa Debata do sipanganon, pahean dohot angka na asing na ringkot di nasida. Di angka tingki na si songon i ma sai diida Debata do songon dia do hasatiaon ni bangso i maradophon Ibana. Dihaholongi Debata do bangso i jala diajari, songon amaama na mangajari anakna.
Pembahasan
Diarahon si Musa do bangso i asa mangaranap tu jolo, tu tano Kanaan, tano habaoran ni susu dohot situak ni loba (ida 5 Musa 6:3), tano na denggan, ala godang disi dolok dohot rura jala sai ro do udan sian langit mamornohi tano i (ida 5 Musa 11:10-11). Ndada songon tano Misir na holan marsigantung tu aek na sian batang aek Nil. Tu tano na denggan do diboan Debata bangso i. Tano Kanaan, i ma tano na denggan, tano na marbatang aek, marmual jala martao na mabaor di angka rura dohot di angka dolok. Boi do gabe gumodang batang aek di tano i dapot ni bangso Israel ala naung jumolo hatiha di ngolu si Abraham nunga dihali halak Kanaan angka mata ni aek di tano i.
Tano Kanaan on mamparbuehon angka parbue na denggan, marlompit ganda, jala ndang holan angka na ringkot di ngolu pardagingon ni bangso i, alai dohot do nang manghilala ngolu na dame, na so adong masa parhorsihan. Diharingkothon Debata do ngolungolu bangso i jala dipasingkop do saluhutna. Angka na mansai ringkot pe di bangso i dipatupa Debata do, i ma marhite na so pola marhangaluton nasida, panganonnasida do angka roti disi, jala ndang hurangan manang aha.
Sai dipaingot do Bangso Israel asa tongtong marsihohot jala mangasahon goar ni Debata. Ndang holan asal mangolu bangso i, alai asa tong do marpinompari bangso i di tano i. Marhite pardalanan na ganjang di halongonan, diajari Debata do bangso i asa lam antus di hagogoon ni Debata maralohon angka hagogoon ni portibi on. Ndang manongtong di bagasan parungkilon na dokdok bangso i, ala dipataridahon Debata do padanNa tu nasida marhitehite pangaramotion di ngolunasida. Dapotan hamoraon do bangso i, jala ingkon mandok mauliate do bangso i tu Debata ala naung ditogihon tu tano na denggan. Sahali nari dipaingot si Musa nasida asa unang lupa diri molo dung mamasuki tano Kanaan. Ingkon torus do bangso i mangingot songon dia maolna uju di halongonan nasida, ndang boi mangolu nasida molo so ala ni Tuhan i. Molo dihalupahon bangso i do angka pambahenan dohot dengganbasa ni Debata, ingkon mago situtu ma nasida. Songon bangso parbegu angka naung niago ni Jahowa maradophon nasida, suang songon i ma nang bangso i, molo so ditangihon soara ni Jahowa.
Jahowa do Sibahen Hadengganon di BangsoNa (ayat 7-9)
Uju mamasuki tano Kanaan bangso Israel, mansai denggan do tano i dapotnasida ala godang do batang aek di luat i, mata mual dohot tao, dohot angka adaran nang dolok bahen hatubuan ni angka suansuanan, songon angka eme (di hata Indonesia: gandum), jagung, hau anggur, hau ara dohot dalimo, tano na marmiak Jetun jala na marsituak ni loba, tano na denggan, na so adong hurangna di ngolu siapari.
Alai boi do masa logo ni ari ranggapuri songon di tingki ni panurirang Elia, jala ala ni uhum ni Debata do umbahen na masa i (ida 1 Rajaraja 17-18), jala sahat tu tingki na mangihut pe boi do masa angka si songon i dalan paingothon jolma i jala manguhum angka halak pardosa (ida 5 Musa 8:19-20 dohot 5 Musa 11:17).
Unang Paginjang Roha jala Unang Lupa di Jahowa (ayat 10-16)
Ditonahon do tu bangso Israel asa mangaradoti diri, asa unang ginjang rohanasida ia dung maduma. Ala dapotnasida tano na denggan, laho inganan mangula, marmahan dohot inganan laho pertambangan, jala gabe lam ganda do sinamotnasida. Ai olo do sipata ala dung denggan ngolungolu (maduma) gabe tundal sian adopan ni Debata, gabe lupa mandok mauliate huhut mamuji Jahowa, silehon hangoluan. Dipaingot do nasida sotung gabe lupa bangso Israel di angka uhum dohot aturan ni Debata, na paruarhon bangso Israel sian tano parhatobanan Misir. Ai uju mamolus parhorsihan nasida, ditogutogu do nasida di halongonan na bolon jala na jorbut, inganan ni ulok tulung api dohot hala, tano hasang huhut na so marisi aek; Debata do na paruarhon di nasida sian dolok batu na pir sahali (ida 5 Musa 8:15). Dilehon do sipanganon siapari di nasida marhite manna di halongonan, paima tolhas nasida tu tano Kanaan. Unang gabe lupa nasida di angka pambahenan ni Debata molo dung maduma.
Boi do tabahen songon refleksi songon na nidok ni Panurirang Hosea na manurirangi Israel: "Hape Ahu do nian Jahowa Debatam olat ni tano Misir, jala Debata dungkon ni Ahu, ndang adong tinandam, jala ndang adong sipangolu dungkon ni Ahu. Ahu hian marhamaol ho di halongonan di tano na mohop situtu. Alai dung jumpangan panjampalan nasida Hubahen, bosur ma nasida, dung bosur nasida, ginjang ma rohanasida, alani dihalupahon nasida Ahu" (ida Hosea 13:4–6). Dipaingot Debata do asa unang lupa nasida di Debata dohot pambahenan ni Debata di ngolu ni nasida.
Roha na Marningot Jahowa (ayat 17-18)
Dipaingot do bangso Israel sotung gabe ginjang rohanasida maradophon Debata, marhite na mandok di bagas rohana: Gogongku sandiri dohot ala ni huaso ni tanganku do asa mangomo ahu di hamoraon. Ingkon manat do bangso i mangarajumi angka hagabeon dohot hamoraon na adong di nasida (ida 5 Musa 8:18 patudos Jakobus 4:13-17).
Holan ala asi ni roha ni Jahowa do i sude tu bangso Israel (patudos 5 Musa 9:4-6). Ala ni i, dipaingot do nasida asa tongtong dipaingotingot rohanasida Debata na mangalehon gogo umbahen na mangomo nasida di angka arta. I ma padan na ingkon tongtong dipahot nasida, songon padan na tu angka ompunasida ujui, jala hot do i sahat ro di ujungna.
Kesimpulan dan Refleksi
Jotjot do masa di ngolu ni jolma, uju marsingkor ngoluna, sai dinunuti do martangiang tu Debata, angka na denggan dope diula, serep rohana maradophon donganna jolma jala biar mida Jahowa. Alai ia dung malua ibana sian hapariron i, lam denggan ngolungoluna, lam tamba artana, dapot angka sintasinta ni rohana, gabe ginjang ma rohana, gabe lupa martangiang, jala laos mangula angka hajahaton, gabe ndang biar rohana mida Jahowa.
Nang uju marsahit pe, jotjot do jolma i sai mangido pangurupion sian Debata asa tung malum nian sahitna, tar songon sampulu halak na huliton (penyakit kusta), ia dung malum, sia halak sian na sampulu i gabe lupa do nasida mandok mauliate (ida Lukas 17:11-19).
Marhite turpuk ni Jamita on, dipaingot do hita, songon pandok ni Presiden Sukarno "Jangan sekali-kali melupakan sejarah, disingkat (jasmerah). Asa unang adong be sian hita songon si Mardan di turiturian ni halak Batak, manang songon hata na mandok, kacang lupa kulitnya. Ingkon tarajumi do, sude na tajalo di ngolunta on holan ala ni asi ni roha ni Tuhan i do. Unang tahalupahon sude angka denggan basa ni Debata di ngolunta. Alai naeng ma nian tabahen sikap di dirinta, "burju ma hita rasirasa mate," dung i lehonon ni Debata ma tu hita tumpal hangoluan i (ida Pangungkapon 2:10). Amen. (bs)
Posting Komentar