Jamita Minggu 26 November 2023 Minggu Ujung Taon Huria tarsurat di buku Pangungkapon 21 ayat 1-4 na manurathon bagabaga taringot tu banua ginjang dohot tano na imbaru na pinapatar ni Debata tu si Johannes. Digombarhon do banua ginjang dohot tano na imbaru, i ma Jerusalem na imbaru, ndang adong be disi iluilu nang arsak dohot angka na asing. I do na naeng pabagasonta pangantusionta sian hatorangan ni turpuk ni Jamita on. Jala dibahen ma ojahanna "Maimaima di Langit na Imbaru dohot Tanon na Imbaru." Tapamanat ma hatoranganna.
Pendahuluan
Buku Pangungkapon tu si Johannes on marisihon angka na naeng masa di angka partingkian na naeng ro di angka halak na porsea. Jala disosoi do haporseaon ni angka ruas huria i asa marsihohot, lam tang jala toras manghaporseai Tuhan i. Atik pe mangadopi angka hamaolon di na manghatindanghon haporseaonna.
Minggu Ujung Taon Huria di Minggunta sadari on somal do tong didok Minggu Tutup Liturgi. Dung i masuhanta ma Minggu-minggu Taon na Imbaru di parhuriaon, i ma: Masa-masa Adven I-IV. Somal do di hita molo di Minggu Ujung Taon Huria marningot angka donganta naung monding. Jala di na marningot hita di angka dongan naung jumolo i, olo do gabe tubu biar. Mallobok taroktok laho mangadopi hamatean, ala ni angka na marragam. Gabe olo sipata antar tapangido tu Tuhan i mandok: "Molo boi unang ma jo nian, ala songon on, songon an dope dohot angka na asing." Tontu asing halak, asing be do angka alana umbahen na mabiar mangadopi hamatean i.
Di ulaon Minggu sadari on dipasahat do turpuk ni Jamita di hita, na mangurupi hita laho mangadopi angka biar ni roha i. Manang boha pe, ingkon bolusanta do hamatean i, songon naung masa tu angka donganta naung jumolo manadinghon hita. Anggiat marhite turpuk ni Jamita on, lam dipatogu haporseaonta jala ndang be mabiar hita. Alai asa lam tu toguna ma haporseaonta, manang sadihari pe ro hamatean i tu hita.
Pembahasan
Di Buku Pangungkapon on disurathon do songon dia gombaran ni surgo. Digombarhon angka si las ni roha do di bagasan. Angka aha ma gombaran ni las ni roha i? Tapamanat ma di hatorangan na mangihut.
Jerusalem na Imbaru (ayat 1-2)
Di ayat 1 sada disurathon do paboa diida si Johannes do na imbaru, i ma banua ginjang dohot tano na imbaru. Ia banua ginjang dohot tano na parjolo i nunga salpu. Jala tuat ma sian banua ginjang, huta na badia, i ma Jerusalem na imbaru, na pinature songon oroan na sinanggulan mandapothon harajaanna.
Gombaran na parjolo on patuduhon ndada songon na parjolo i be hilalaonta dung sahat hita tu banua ginjang dohot tano na imbaru i. Ai na laho salpu do sude angka na adong di portibi on.
Molo adong dapotta na imbaru, tontu las do rohanta ala imbaru na adong di hita i. Alai haimbaruon na martingki do i sasintongna. Ai holan salpu saminggu, sabulan, manang sataon dohot tu angka tingki na naeng ro, ndada be imbaru i. I ma molo haimbaruon di jolma. Alai tandi do haimbaruon na naeng pasahaton ni Debata tu hita marhite banua ginjang dohot tano na imbaru, na dipataridahon tu si Johannes marhite pangungkapon na ro tu ibana. Jala didok do, banua ginjang dohot tano na imbaru i, dipature songon oroan na sinanggulan mandapathon harajaonna, i ma patuduhon hinauli ni banua ginjang dohot tano na imbaru i.
Molo taida angka na uli tontu sonang do rohanta, jala molo tabereng na uli minar do bohinta, laos boi do manghorhon lambok ni roha molo marnida angka na uli. Umotikna, molo taida na uli boi do moru arsak ni pingkiran jala boi do lumumbang panghilalaan. Isarana molo taida haulion ni Tao Toba dohot na asing. Sandok tung marpanghorhon do haulion i patupahon las ni roha di angka halak na marnidasa.
Sian gombaran na pinatudu ni turpuk on, patar do las ni roha na mamparbuehon olopolop marhite banua ginjang dohot tano na imbaru, i ma Jerusalem na imbaru. I do na gabe patoguhon roha di hita halak na porsea.
Salpu ma Nasa Iluilu (ayat 3-4)
Patar do digombarhon banua ginjang manang surgo i. Jala apuson ni Debata ma angka iluilu. Di na dibege si Johannes soara na mandok: "On do joro ni Debata di tongatonga ni angka jolma, na maringanan ma Ibana di tongatonganasida, jala nasida ma bangsoNa, jala Debata sandiri saor tu nasida." Angka halak na porsea, banua ginjang na imbaru i do na gabe jambarna. Debata do na patuduhon na adong Debata di tongatonganasida jala Debata sandiri do na saor tu hita. I do na patoguhon roha di angka na porsea, na apusan ni Debata do iluilu sian mata ni angka na porsea, jala ndang adong be hamatean, arsak ni roha dohot anggukangguk, na hansit. Salpu do angka na parjolo i. Tutu sada panghirimon do on di hita angka na porsea. Ragam do angka sibolusanta di portibi on na boi mambahen marabur ilunta ala ni angka parsorionta, alai molo manahan hita di haporseaonta jala ndang manimbil hita sian dalan ni Debata, sai na boi do bolusanta i.
Marhite turpuk ni Jamita on margogo ma hita, taingot ma na saor do Debata di hita jala ndang manongtong hita di portibi on. Ndang portibi on na gabe jambar ni halak na porsea, alai banua ginjang dohot tano na imbaru naung pinarade ni Debata i do. Manat ma hita di angka parsorion na ro di ngolunta on, sotung ala ni i gabe mandao hita sian Tuhan i. Tarbahen Debata do mangalehon las ni roha di hita, atik pe ro angka parungkilon na mambahen hita tariluilu jala marsak. Debata do na mangapuli hita angka na porsea.
Sian gombaran naung dipatorang di ginjang, disosoi hita asa unang mandele di saluhut na masa di ngolunta on. Parsatongkinan do sude na masa di ngolunta on. Molo pe ro las ni roha nang arsak di ngolunta ndang manongtong i, adong be do tingkina. Holan sada do na manongtong, i ma banua ginjang dohot tano na imbaru naung pinarade ni Debata. Ingkon porsea do hita di Debata naung paradehon inganan na imbaru i. Pos ma rohanta ndang adong be angka iluilu, arsak dohot na hansit disi.
Kesimpulan dan Refleksi
1. Ganup jumpang Minggu Ujung Taon Huria, taingot do angka donganta naung jumolo marujung ngolu. Sosososo do i di hita, paboa hita pe ingkon taadopi jala tabolus do hamatean i. Di na marningot hita di angka donganta naung jumolo i, tadok ma tu dirinta, di bagasan haporseaon: "Mangarade ma ho ale tondingku, manang sadihari pe ro hamatean i." Molo tolap do hita mandok songon i tu dirinta, i ma tandana na so mabiar be hita, jala i do hapataran ni haporseaonta tu Kristus di na laho mamolus hamatean i. Patar do banua ginjang dohot tano na imbaru i, i ma Jerusalem na imbaru na pinarade ni Debata tu hita angka na manghaporseai Ibana. Rade ma hita maimaima langit dohot tano na imbaru i, na laho pasahaton ni Debata tu hita.
2. Asing jolma, asing be do parsorionna. Sabagas pe na markeluarga, tong do marasingasing be parsorionna. Tandi do parsorion na ro tu ama dohot ina, songon i nang di ianakhon. Jala di parsorion na ro tu hita i, olo do ro iluilu. Alai taingot ma sai pargogoon ni Debata do hita mamolus saluhutna i, laos marhite hagogoon na sian Debata, jumpangta ma las ni roha na manongtong, molo ndang manimbil hita sian Debata.
3. Taingot ma, hasisingkop ni hapataran ni langit dohot tano na imbaru i, i ma di tingki parro ni Jesus Kristus muse tu portibi on. Ala ni i, mangarade ma hita marhite na manongtong marhaporseaon di Debata, manang sadihari pe ro tingkina. Amen. (ht)
Posting Komentar