Jamita Minggu 3 Desember 2023 Minggu Advent na Parjolo tarsurat di Evangelium Markus 13 ayat 24-37 na manurathon bagabaga taringot tu hasesega ni huta Jerusalem dohot haroro ni Kristus. Dipodai Jesus do angka siseanna taringot tu haroroNa jala dipaboa do tu nasida, ndang adong na umbotosa manang sadihari haroroNa i, holan Ama i do na umbotosa. Ala ni i do asa dipaingot Jesus nasida ada tongtong dungo, unang tarpodom. Sahat do nang tona i di hita halak na porsea, asa sai tongtong ma hita dungo. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Dungo Manomunomu Haroro ni Kristus." Tapamanat ma hatoranganna.
Pendahuluan
Sahat ma tabe di hita sude parhalado dohot ruas ni huria. Sadari on goar ni minggunta i ma "Minggu Advent na Parjolo." Hombar tu aturan ni kalender liturgi ni huria, minggunta sadari on didok do tong "Taon Baru Huria." Marasing do pamuhaion di taon huria dohot taon masehi (dung Jesus) di ganup taon. Taon huria dipungka ma sian Minggu Advent, molo taon masehi dipungka ma sian tanggal 1 Januari ganup taon. Advent lapatanna manomunomu haroro ni Kristus.
Turpuk ni Jamita di Minggu Advent na Parjolo sadari on manaringoti taringot tu ujung ni partingkian di hasiangan on diuduti muse taringot tu haroro ni Kristus, na mamboan haluaon dohot haimbaruon. Ndada songon haroroNa na parjolo i be haroroNa na paduahalion. Ndada laho mate be laho patupahon haluaon sian dosa dohot hamatean. HaroroNa na paduahalihon on gabe panguhum na tigor jala na badia, laho papatarhon hamuliaon ni harajaon ni Jahowa jala manggohi taringot tu hasusuda ni angka harajaon, hamuliaon, hasangapon dohot saluhut na masa di hasiangan on. Jala pasiaphon hagogoon, hamuliaon dohot hasangapon ni angka debata sileban na sinomba ni angka jolma. Asa lam taantusi taringot tu haroro ni Anak ni Jolma i, masuk ma hita tu hatorangan ni turpuk.
Pembahasan
Sekilas tentang Kitab Markus
Evangelium Markus on disurathon sahalak na margoar Markus hirahira taon 64–67 dung Kristus, uju di panggomgomion ni kesar Lucius Domitius Ahenobarbus manang Nero Claudius Caesar Germanicus na jotjot didok kesar Nero, sahalak kesar na mansai karas jala na mambahen angka na so uhum tu halak Kristen na adong di angka luat na ginomgomanna. Hatiha di panggomgomion ni kesar Nero on ma dipabotohon Apostel Petrus tu si Markus barita taringot Jesus Kristus, angka panghobasionNa, tanda halongangan na binahenNa, huasoNa, hamuliaon dohot angka pangajarionNa. Laos disurathon si Markus ma saluhutna i di Evangelium Markus on, jala digoari ma buku na sinuratna on Evangelium Markus.
Turpuk Jamita sadari on i ma sada sian pangajarion ni Jesus taringot tu hapapatar ni harajaon, hasangapon dohot hamuliaon ni Debata. Hapapatar ni harajaon dohot hamuliaon ni Jahowa i ma hasasalpu dohot hasusuda ni saluhut hasangapon dohot hamuliaon na adong di hasiangan on. Hapapatar ni harajaon. Hasangapon dohot hamuliaon ni Jahowa i ma hapapatar ni uhum ni Jahowa na tigor jala na sintong. Molo didok hatigoran dohot hasintongan ni uhum manghorhon dua pangantusion do i: Na parjolo, panguhuman jala na paduahon tumpal haluaon.
Dung dipasahat Jesus pangajarionNa di bagas joro di Jerusalem (ida Markus 13), borhat ma Ibana manadinghon bagas joro i. Di na ditadinghon bagas joro i, ro ma sahalak sian angka siseanNa mamuji haulion ni batu dohot tongam ni angka jabu na di huta i (ayat 1). Tontu batu dohot angka jabu na nidokna dison i ma tu angka jabu na adong di humaliang ni bagas joro i. Angka jabu ni ise do na adong di humaliang ni bagas joro i? Angka jabu harajaon ni si Pilatus, angka halak na mamora, halak na sangap, na mangula di angka panggomgomi dohot angka malim.
Alai dialusi Jesus ma: "Diida ho do jabu angka na bolon on? Ndang pasombuon nanggo dua batu martinditindi na so gargaronna" (ayat 2). Lapatanna disi Jesus manghatahon taringot tu hasesega ni bagas i do. Alus ni Jesus on marasing do tu hata pamujion na nidok ni sisean i. Haulion ni angka bagas na di humaliang ni bagas joro i, di sada tingki haduan sega jala gargar do i. Ndang adong na hot, marhaujungan do saluhutna na masa di hasiangan on. Alus ni Jesus taringot hasesega ni bagas i paboahon taringot tu ajal ni hasiangan on dohot haroro ni Anak ni Jolma i na ro di bagasan hasangapon dohot hamuliaon. HaroroNa i manalpuhon angka hamuliaon, hasangapon dohot hatongamon na adong di hasiangan on.
Laho Salpu do Angka Hagogoon ni Angka Portibi dohot Langit (ayat 24-25)
Alai di angka ari i, dung salpu haporsuhon ondeng, mangholom ma mata ni ari jala ndang marsinondang be bulan i. Mardabuan ma angka bintang sian langit i jala humuntal ma angka hagogoon ni parlangitan (ayat 24–25). Haporsuhan dia do na nidokna dison? I ma angka na masa songon na didok di Markus 13:3–23, i ma angka pangaleleon, panggosagosaon, pangalaho na so uhum dohot ragam ni haporsuhon na ro sian angka panggomgomi, angka malim, nang sian angka horong ni na so manjangkon Jesus gabe Sipalua, angka na holan manghaholongi dirina, impolan di perak, parhata manggang, parroha haginjangon, angka panginsahi, na so marningot lagu, angka na tois, na so marroha holong, pangoseose, panihasnihas, na so umboto mangorom diri, parmurukmuruk, na so marholong ni roha di na denggan, parjehe, parroha na neang, halak na paburnang diri, halak na humolong di hisap ni daging asa di Debata, angka parrumang hadaulaton alai na marpangalahohon angka na so denggan (songon halak Parise).
Mangholom ma mata ni ari dohot bulan jala ndang be dipatuduhon haulion dohot hatongamonna marhite sondangna ala nunga salpu be saluhutna. Holom ni mata ni ari dohot bulan dison i ma angka hagogoon dohot hasangapon ni bangso na mardebatahon mata ni ari (isarana songon Misir, Rom, Junani) dohot bulan (isarana Persia, Mesopotamia). Songon i nang bintang na maraburan sian langit jala di na humuntal angka hagogoon ni parlangitan. Jumpang ma ajal ni hagogoon dohot haulion ni angka parangan ni langit, i ma angka bintang dohot sude angka na adong di langit. Saluhutna i naeng mandok taringot tu haulion dohot hasangapon na adong di hasiangan on, sude harajaon, hagiot dohot huasona. Laos songon i do angka bangso manang harajaon na mambahen bintang dohot angka na di langit gabe si sombaonna (isarana Persia, Junani dohot Rom). Saluhutna i ingkon marujung do jala ndang adong na hot harajaon nang hasangaponna.
Ndang Tarpatudos Huaso ni Debata (ayat 26-27)
Idaonnasida ma Anak ni Jolma i ro marhitehite ombun, mantat hagogoon dohot hasangapon godang (ayat 26). Ise do Anak ni Jolma na nidokna di turpuk on? I ma Jesus Kristus. Somal do hata "Anak ni Jolma" dihatahon tu sahalak naung dipillit jala naung ditotophon gabe Panuriang manang Mesias. Panjouon Anak ni Jolma marpardomuan do i tu parsuruon ni Debata tu AnakNa, i ma Jesus Kristus (patudos Johannes 3:16–17). Hata ni Jahowa naung gabe jolma jala mian rap dohot jolma (patudos Johannes 1:14). Panjouon Anak ni Jolma tu Jesus pabotohon hajolmaon ni Hata ni Debata, gabe daging do Hata i. Laos pabotohon partinaonan, hamamateNa laho manobus jolma sian dosa. Goar Anak ni Jolma naeng mandok tu hamulian ni Jesus do i di haroroNa. Di tingki i ma dipapungu nasa jolma dohot harajaon gabe sada harajaon, i ma harajaon ni Debata. Ro ma Anak ni Jolma i marhitehite ombun. Ombun songon hureta ni Debata paboa huaso dohot hamuliaonNa. Jala haroroNa i gabe Raja di saluhut raja jala Debata di saluhut debata. Anak ni Jolma i ro papatarhon huaso, harajaon dohot hamuliaon ni Jahowa. Ndang tarpatudos hagogoon dohot hasangapon na naeng pinapatar ni Jesus Kristus marhite haroroNa, nang pe dipapungu sude angka hagogoon dohot hasangapon na adong di angka inganan dohot tingki. Ndang tarpatudos angka i tu hagogoon dohot hasangapon ni Debata. Dung masa haroroNa i, papunguonNa ma angka na pinillitNa i sian desa na ualu, sian suhi ni tano sahat ro di suhi ni langit (ayat 27). I ma na pabotohon nasa jolma na mangolu dohot na mate, songon i nang par di surgo papunguonNa do di adopon habangsa ni Anak ni Jolma i. Ingkon somba do nasa ulu ni tot di adopan ni habangsa ni Anak ni Jolma i.
Jonok nama Ari Haroro ni Anak ni Jolma i (ayat 28-30)
Diumpamahon Jesus do saluhut na masa i marhite hau ara (ayat 28). Di Lukas 13:6–9 disurathon umpama ni Jesus Kristus taringot hau ara na so marparbue. Tarida do hau sian parbuena. Jala molo parbue tontu marharoroan do i sian bonana manang hau ingananna marparbue. Molo hau ara ingkon do mamparbuehon ara. Ndada holan asal marparbue, alai parbuena i pe ingkon denggan ma. Hau ara manggombarhon hadameon, pandumaan, parasinirohaon ni Debata, hatoguon. Jala tontu do parbuena i, ingkon patupahon holong do, hadameon, ulaon parasinirohaon, jala togu di angka ulaon na denggan (ida Galatia 5:22–23) mardongan panghirimon di saluhut panumpahion dohot pangurupion ni Debata di ngoluna. Ndang masa be ganggu dohot holsoan, ndang masa be parbadabadaon, hosom, pangiburuon dohot angka na asing (ida Galatia 5:19–21 patudos 2 Timoteus 3:2–8).
Dipangke Jesus do angka tanda na masa di hau ara i songon tanda taringot tu partingkian na naeng masa. Ia dung martunasi punsuna jala rungkar bulungna, i ma tandana naung jonok partaonan las (ayat 28). Lapatanna disi masa ma ragam sitaonon, angka ulaon na jat, angka pangoseose dohot angka na mangulahon na so uhum, masa ma nang angka penindasan dohot ketidakadilan, angka pangalaho songon tanda na masa jala lam jonok nama ajal ni hasiangan on. Molo masa angka si songon i, naung jonok do hasosonggopna (ayat 29). Hasosonggop ni ajal ni hasiangan on dohot haroro ni Anak ni Jolma i. Jala lam dipatangkas Jesus muse marhite hata: "Situtu do hatangKon tu hamu: Na so tupa salpu bangso on, so jolo songgop sasudena i" (ayat 30).
Ndang Adong na Hot di Hasiangan on (ayat 31)
Ndang adong na hot di hasiangan on. Marujung do saluhutna. Hasangapon, haulion, hamuliaon songon i nang na hansit, sitaonon, siporsanon dohot huaso na jahat pe salpu do i sude. Ndang adong na hot (ayat 31). Ndang adong na boi boanon nanggo otik pe huaso, sangap, arta, sihumisik, pangkat, saluhut na masa dohot na adong di diri, molo masa haroro ni Anak ni Jolma i. "Alai anggo hatangKi ndang olo salpu." I ma hata ni Debata na marsangap jala marmulia. Hata ni Jahowa, ndang marharoroan sian portibi, ndang ditompa jala ndang boi dibuat manang pasoon ni angka hagogoon dohot huaso na adong di portibi on. Hata ni Jahowa marharoroan do i sian Jahowa, marhite Hata i do ditompa langit dohot tano ro di saluhut nasa na adong di hasiangan on, songon i nang angka na adong di langit. Hata ni Jahowa na marharoroan sian Jahowa na mian rap dohot Jahowa sian na manongtong.
Sadihari do masa i saluhutna? Di hata Gorik adong dua hata taringot tu partingkian: Na parjolo, hata kronos, i ma partingkian ni hajolmaon dohot hasiangan on. Partingkian on i ma partingkian na lam jonok ma ari haujunganna. Lam martamba umur manang partingkian ni jolma di hasiangan on, lam jonok ma ajalna. Lam martamba umur ni portibi on, lam jonok ma ajal manang hasusuda ni partingkianna. Na paduahon i ma kairos, i ma partingkian ni Debata. Partingkian kairos on lapatanna partingkian na so marujung, na hot jala manongtong. Sadihari do masa i saluhutna? Ndang na gabe kronos manontuhon sadihari partingkianna, jala ndang boi disuhat partingkian di hasiangan on. Jahowa sandiri do na umboto sadihari masa partingkian i (kairos). Lam jonok ro ajal ni hasiangann on (kronos) lam jonok ma ari haroro ni Anak ni Jolma i.
Holan Ama i do na Umbotosa Sadiharina (ayat 32)
Ise do na umbotosa hamamasa ni partingkian haroro ni Anak ni jolma i? Ndang adong na umbotosa, nang surusuruan na di banua ginjang, nang Anak i pe. Holan Ama i do na umbotosa (ayat 32). Ayat on pabotohon hagogoon ni Ama i. Pargogo na so hatudosan, ndang hadodoan nasa sangkapNa. Debata na manongtong, hasangaponNa i manggohi saluhut portibi on. Holan Jahowa do na umbotosa ala di tanganNa do saluhut partingkian, nasa na adong (kronos dohot kairos). Guru di Ibana do saluhut partingkian na masa, jala guru di Ibana do Hata na sian Ibana. Ndang guru di Hata i nampuna Hata, ingkon saguru tu nampuna Hata i do angka Hata na sian Ibana. Jahowa do nampuna Hata i, jala Jesus Kristus do Hata ni Debata. Ndang tarsirang Nampuna Hata sian Hata na nidokNa, ai hataridaan ni nampuna Hata i do Hata i. Ndang tarsirang Jahowa, Ama i sian Jesus Kristus, AnakNa, ai hataridaan ni Ama i do Jesus Kristus. I do umbahen na didok, holan Ama i do na umbotosa.
Parbue ni Ngolu ni Halak na Porsea (ayat 33)
Antong tagam ma hamu, dungo ma hamu ai ndang diboto hamu, manang sadihari tingkina i (ayat 33). Ayat 33 on ndang na laho pabiarbiarhon hita, alai asa taparade do dirinta. Dungo ma hamu jala jaga situtu, ndang na patuduhon asa mabiar hita jala mandele hita, alai asa mangarade be do hita. Aha do siparadeonta jala aha do sipatupaonta? Unang ma tadok di bagasan rohanta, ingkon mangulahon angka na denggan ma ahu asa sahat ahu tu surgo i. Manang tadok, ingkon hulehon ma diringku dohot nasa artangku tu angka na pogos asa sahat ahu tu surgo. Ndang ala ni pambahenanta asa sahat hita tu surgo i. Jala ndang na gabe tiket masuk tu surgo angka haburjuon, ulaon na denggan dohot angka na tapatupa i. Antong aha do lapatanna taulahon angka na denggan? Aha do lapatanna sai tahaburjuhon mangolu di angka pangajarion ni Debata jala mian di ngolu na marhadaulaton, songon i nang patupahon na denggan molo ndang boi pasahathon hita tu surgo? Alusna amang/inang, didok Tuhanta Jesus: "Ahu do dalan i, Ahu do hasintongan, Ahu do hangoluan! Ndang adong na sahat tu Ama i anggo so marhite Ahu" (ida Johannes 14:6). Sian pandohan ni Jesus i, holan marhite Jesus do boi sahat hita tu Ama i. Halak na porsea, i ma halak na mian di bagasan Jesus Kristus. Jala halak na mian di bagasan Jesus i ma halak na marparbuehon hasintongan, hatigoran, hadaulaton, ulaon parasinirohaon nang angka ulaon na denggan. Halak na porsea dipatudos ma i songon hau ara, jala angka ulaonna, i ma parbue ni hau ara i.
Dungo Manomunomu Haroro ni Kristus (ayat 34-37)
Di ayat 34 dipangke Jesus do umpama taringot tu halak na marhuta sada na manadinghon jabuna, dilehon do huaso tu angka naposona, tu ganup siulaonna be, jala sijaga pintu didok do asa marjaga. Halak na marhuta sada na nidokna dison i ma Debata. Jala jabu na nidokna i ma portibi on (kosmos) dohot nasa na tinompa. Jahowa do nampuna i saluhutna. Disagihon do huaso tu angka naposoNa, tu angka jolma na ditompa tumiru rupaNa (ida 1 Musa 1:27). Asa marhite huaso i boi ma dipangke jolma dohot denggan, melestarikan jala manjaga jabu i (portibi on). Naposo na nidokna dison i ma angka malim, pamarenta dohot angka ulaon na asing, dilehon be do huaso hombar tu ulaonnasida be. Asa marhite ulaon i mamparbuehon parbue songon halak na mian di bagasan Jesus ma. Jala sijaga pintu i ma parangan, panguhum, i ma angka halak na pajongjonghon uhum na tigor dohot na sintong, jala na patoguhon uhum tu saluhut jolma.
Didok Jesus: "Antong dungo ma hamu, ai dang diboto hamu sadihari ro tuan nampuna bagas i, manang bot ni ari manang di na tonga borngin, manang di na martahuak manuk, manang di torang ni ari. So tung jumpangsa hamu modom, di na ro Ibana tompu" (ayat 35–36). Ayat on paingothon hita asa dungo angka na porsea jala na manangihon hata i (ayat 37). Unang gabe tarpodom. Molo halak na tarpodom i ma halak na sai maranganangan, loja, na so mulaulaon. Halak na tarpodom ndang diboto aha na masa jala ndang diboto aha siulaonna.
Kesimpulan dan Refleksi
Marhite turpuk ni Jamita sadari on marsiajar do hita:
1. Partingkian ni si Markus hatiha i uju di panggomgomion ni kesar Nero. Turpuk ni Jamita on pabotohon molo kesar Nero rap dohot harajaonna i ma harajaon na laho salpu. Molo pe uju i harajaon Rom di panggomgomion ni kesar Nero gabe sada harajaon na gogo jala dihabiari angka harajaon na di humaliangna. Di sada tingki salpu jala gargar do angka harajaon i. Salpu do harajaon i rap dohot tahitahi nang uloan na jahat i pe salpu do. Martingki do hasangapon dohot hagogoon ni harajaon ni kesar Nero jala ro do tingkina sega harajaonna i marhite na bunuh diri ibana uju di hasangapon dohot hamuliaon ni harajaonna. Ragam do angka pangalaho na jat dohot na bernit dibahen kesar Nero tu halak Kristen di sandok harajaon Rom. Alai nang pe songon i, disosoi do halak Kristen asa unang mandele manang gale marhaporseaon, alai hot marpanghirimon di Jahowa.
Haroro ni harajaon ni Debata nunga be masa di Padan na Robi, di partingkian ni Jesus, di Padan na Imbaru dohot di partingkian si nuaeng. Ia disi dipapatar goar ni Jahowa, disi ma patar harajaon ni Debata. HarajaonNa i manalpuhon angka harajaon na jat. Harajaon ni Jahowa do na manaluhon harajaon ni Misir, harajaon ni Jahowa do na manaluhon harajaon Babel, harajaon ni Jahowa do na manaluhon harajaon Rom, jala harajaon ni Jahowa do na manaluhon jala manalpuhon saluhut harajaon na adong di portibi on. Harajaon ni Jahowa do na manalpuhon, maniaphon angka harajaon na jat, harajaon na patupahon na so uhum. Harajaon ni Debata i ma harajaon dame, harajaon na patupa uhum na sintong. Harajaon ni Debata do na manaluhon harajaon ni sibolis dohot dosa na jorbut marhite Jesus Kristus.
2. Di partingkian si saonari on managam dope hita di haroro dohot hapapatar ni harajaon ni Jahowa marhite haroro ni Anak ni Jolma i, i ma haroro ni Jesus Kristus na paduahalion. Ndada songon haroroNa na parjolo i be haroroNa na paduahalihon. HaroroNa na paduahalion, gabe panguhum na tigor dohot na sintong ma Ibana. Na ro ma Ibana manguhumi halak na mangolu dohot na mate.
Antong aha do na boi siparedeonta andorang masa haroro ni Jesus na paduahalihon i? Hita na mangolu di partingkian si saonari on, aha ma na boi siparadeonta? Siparadeon ni rohanta i ma parbue ni haporseaonta, parbue ni na mian hita di bagasan Jesus Kristus. Halak na mian di bagasan Jesus i ma halak na mamparbuehon parbue na denggan, marhadaulaton, pajongjonghon uhum na sintong, patupa ulaon parasinirohaon dohot angka lan na asing.
3. Unang ma tarpodom hita jala tongtong ma hita dungo. Somal do molo dung sahat Minggu Advent godang do halak Kristen ndang gabe manghangoluhon pangaradeon diri marhite hamubaon ni roha dohot ngolu na lam pajonokhon diri tu Debata. Torop do halak Kristen molo dapot Minggu Advent gabe gok sihobasanna, gok sipingkiranna, gok sipatupaonna, gabe manghorhon halojaon, ungutungut, parsahiton, parbadaan dohot angka na asing.
Dihirim jala dipangidohon do tu hita di Minggu Advent sadari on asa manghorhon hadameon ma, las ni roha, ulaon parasi ni rohaon dohot hamubaon ni roha na lam denggan di angka parsaoran na markeluarga, marhuria songon i nang na marsahuta dohot na maraleale. Dungo ma hita. Unang ma lalap holan mangoloi hisap ni daging dohot hagiot ni portibi on. Dungo ma hita. Ai uju di hasiangan on do boi hita paradehon diri. Taingot ma amang/inang, hidup ini adalah kesempatan bagi kita mempersiapkan diri menantikan sukacita dan kemenangan dalam kerajaan Allah melalui iman yang berbuah dan hidup di dalam roh kebenaran sebagai bentuk ibadah kita yang sesungguhnya di Minggu Advent. Semoga. Selamat mepersiapkan diri berjaga-jaga menyambut kedatangan Kristus. Amen. (dbp)
Posting Komentar