Jamita Malam Akhir Tahun Minggu 31 Desember 2023 tarsurat di Heber 13 ayat 20-21 na manurathon tangiang sian Apostel Paulus tu angka ruas ni huria, paboa Jesus Kristus, Siparmahan bolon di angka birubiru, Ibana ma na patauhon nasa naporsea di angka ulaon na denggan jala di Ibana ma hasangapon ro di saleleng ni lelengna. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Di Ibana ma Hasangapon Ro di Salelenglelena." Tapamanat ma hatoranganna.
Pendahuluan
Buku Heber dihaporseai digurithon Apostel Paulus. Buku on digurithon laho mamodai, paposhon roha jala mangapuli halak Heber Kristen na adong diparserahan Italia na marhata Gorik, asa tongtong porsea tu Tuhan Jesus (ida Heber 13:24). Ala hatiha i masa do pangalelean tu halak Kristen.
Di buku on disurathon do angka pangajarion ni Jesus dohot angka adat ni Jahudi. Buku on marisi 13 bindu jala adong 303 ayat. Digurithon ma buku on hirahira taon 67-69 dung Kristus di luat Italia (ida Heber 13:24). Jala ondolan ni buku on i ma, patoranghon hasurungan ni Jesus Sipalua i.
Pembahasan
Turpuk ni Jamita on marisi poda dohot tangiang haluaon sian Apostel Paulus tu angka na porsea tu Tuhan i, di ragam ni angka na masa na mansai na niadopannasida. Songon dia ma ruas ni Huria i asa tongtong holong rohana tu angka donganna, partamue, ingot di angka na tarhurung jala na manaon na porsuk, sangap dibaen pardongansaripeonnasida, unang diramuni, unang marholong ni roha tu hepeng, marpos roha tu Tuhan i (ida Heber 13:1-6).
Dipaingot do nasida asa ingot di angka na manguluhon jala na paboahon Hata ni Debata, unang mubauba di roha, alai ingkon songon Kristus na hot nantoari, sogot sahat ro di saleleng ni lelengna (ida Heber 13:7-8). Unang olo dielaela poda haliluon, ingkon marpos ni roha tu huaso ni Tuhan Jesus, unang lupa mambahen na denggan dohot ulaon asi ni roha, ingkon ditangihon jala dioloi ma angka na manguluhon nasida (ida Heber 13:9-17). Jala ingkon ingot do nasida manangianghon angka parhalado na manghobasi di tongatonganasida, asa margogo nasida di ulaon parhaladoon (ida Heber 13:18-19).
Adong do hata na mandok: "Ndang manghuling sada tangan laho martopak." Lapatan ni hata i mandok tung na so mungkin do adong panghuling ni partopakan molo so sauduran, manang dua tangan. Songon i ma nang ngolunta na martuhan, ndang jaloonta asi ni roha ni Debata molo ndang olo hita sauduran manang sadalanan dohot sangkap ni Tuhan i. Di ayat 20 on tangkas do dibaritahon Apostel Paulus tu hita ise do Jesus.
Adong pigapiga pandohan na dipangke Apostel Paulus laho patoranghon ise do Jesus i di bagasan turpuk on, i ma : Debata si Pardame, si Parmahan Bolon dohot Tuhanta. Ala ni i unang be ganggu hita di haporseaonta, lam leleng lam martamba do poda haliluon na naeng mansoadahon hadebataon ni Jesus.
Di ayat 21 tangkas dipaboa Apostel Paulus l, Jesus i do upanta, Jesus i do gogonta, Jesus i do na patauhon hita asa tongtong patupahon angka ulaon na denggan jala angka lomo ni roha. Hata patauhon lapatanna mandongani, pahothon, patandaphon, mangalinggomi. Sian i boi ma antusanta, molo holang do ngolunta sian Jesus, tontu angka na roa ma parbue ni ngolunta. Alai molo hot jala manongtong do hita di bagasan Jesus, angka na uli jala na denggan ma parbue ni ngolunta.
Kesimpulan dan Refleksi
Sadari on borngin ujung ni taon 2023, jala ondolan ni Jamitanta i ma, "Di Ibana ma Hasangapon Ro di Salenglelengna." Molo sahat hita di ujung ni taon on, tontu nunga tabolus angka pardalanan sataon bolon na gok las ni roha, gok arsak jala habot ni roha. Alai nang pe songoni, boi do hita taripar sahat di ujung ni taon on.
Molo tarimangi sada halolangan bolon do i na sian Debata di ngolunta marsadasada. Laos marhitehite angka na masa naung tabolus i boi ma antusanta, dipangke Debata do sude angka na masa, las ni roha nang na bernit laho patulushon sangkapNa tu hita, sangkap haulion dohot hadengganan, na olo sipata ndang hombar songon na di rohanta.
Nunga diparmudumudu Tuhan i hita sahat tu ujung ni taon on. Antong aha ma balosna bahenonta tu Tuhan i? Ndada sere manang perak na dipangido Tuhan i sian hita, alai tapasangap ma Tuhan i di ngolunta. Pasangaphon Tuhan i, marhitehite na mangula angka lomo ni rohaNa, i ma angka ulaon na denggan. Jala tapadao ma angka sogo ni rohaNa, i ma angka dosa.
Pasangap Tuhan i ndada ulaon parsatongkinan, manang ulaon sian roha na mubauba. Alai ingkon saleleng ni lelengna, hot, ndang muba. Nasa na di tano on boi sambing do muba, salpu taon, ari, bulan dohot tingki. Alai sada na so boi muba sian ngolu ni halak na porsea, i ma mangulahon na denggan jala padaohon diri sian dosa. Amen. (ejs)
Posting Komentar