Jamita Minggu 10 Desember 2023 Minggu Advent na Paduahon tarsurat di Sakaria 9 ayat 9-10 na manurathon bagabaga taringot tu haroro ni Raja manopot jolma. Raja na ro i, i ma Raja Partigor, Siparmonang jala na serep rohaNa. Didok mariaia di haroro ni Raja i, ala mamboan hadameon do Raja i. Bagabaga on dipasahat tu angka bangso ni Debata, jala digohi marhitehite na ro Kristus tu portibi on. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Manomunomu Raja ni Hatigoran jala na Marsangap." Tapamanat ma hatoranganna.
Pendahuluan
Panurirang Sakaria i ma anak ni si Berekia, tubu ni si Ido (ida Sakaria 1:1). Ia si Sakaria i ma induk ni angka malim (ida Nehemia 12:12, 16) jala marharoroan ma ibana sian pinompar ni halak Lepi. Dungkon masa habuangan, mangula ma ibana di Jerusalem gabe sahalak malim jala panurirang. Buku Sakaria on boi ma disagihon tu dua horong: na parjolo, Hata ni Debata taringot tu bagabaga laho paulihon bagas joro ni Debata (Sakaria 1:1-8:23). Na paduahon, Hata ni Debata taringot tu bagabaga taringot tu Israel dohot Mesias na naeng ro (Sakaria 9:1-14:21). Molo tapamanat di bindu na parjolo, boi ma idaonta songon dia na masa hatiha i. Bangso na pinillit ni Debata sai mangula dosa dohot hajahaton, alai sai tong do holong roha ni Debata di nasida.
Ndang dipasombu Debata nasida di bagasan parhatobanon Babel, alai dijou jala diboan Debata do nasida mulak tu huta ni ompunasida. Dijou jala dipangke Debata do panurirang Sakaria pasahathon hataNa tu bangso i, asa anggiat nian gabe sipangoloi nasida di Hata ni Debata. Asa unang be masuk nasida tu pangunjunan manang parhatobanan ni bangso na asing. Dipasahat Panurirang Sakaria do tu nasida asa paubahon roha, asa unang ro rimas ni Debata tu nasida. Molo gabe sipangoloi do nasida di Debata, ndang adong bangso na boi mangalo nasida, ai Debata do na mamasumasu pardalanannasida. Di turpuk on di pasahat Panurirang Sakaria do bagabaga taringot tu si Panggomgom Hadameon. Ndang dipasombu Debata nasida manaon na porsuk uju tartaban nasida manang dihuasoi bangso na asing. Hot do holong ni Debata di nasida.
Pembahasan
Marolopolop jala Mariaia Tumopot Raja i (ayat 9)
Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajaM tumopot ho, partigor Ibana jala Siparmonang; na serep do rohaNa jala marsihundul di halode dohot di anak ni halode inaina.
Surat on i ma songon bagabaga taringot tu Sigomgom Hadameon. Ise do Raja Hadameon i? I ma Jesus Kristus, Sipalua. "Mariaia situtu ma ho," hata on i ma hata surasurak las ni roha ala naung ditaluhon Debata angka alo ni bangso na pinillitNa i. Hata mariaia ditujuhon do tu saluhut bangso. "Ale boru Sion, marolopolop ma ho ale boru Jerusalem," hata on jotjot do dilapati na deba songon taringot tu angka ari panguhumion. Alai di turpuk on, hata on marlapatan, holong ni Debata naung dipatupa tu angka pomparan ni si Abraham, si Isak dohot si Jakob. "Ida ma, na ro ma Rajam tumopot ho," jotjot do dipangke Panurirang Sakaria hata on, jala dipangke do hata on di anngka Evangelium, di Padan na Imbaru, di na mamasuki huta Jerusalem Tuhan Jesus (ida Mateus 21:5, Johannes 12:15).
"Partigor Ibana jala Siparmonang," hata on martudutudu tu angka naung sinurathon ni angka panurirang di buku na badia na paboa songon dia harajaon ni Mesias i (ida Jesaya 9:7, 11:4-5). Mesias i ma songon "Naposo ni Debata na timbul jala na metmet" (ida Jesaya 52:13-53:12). "Na serep do rohaNa jala marsihundul di halode dohot di anak ni halode inaina." Hata on pataridahon ia Mesias na naeng ro i, i ma parroha na lambok, serep jala manghophop bangsoNa, sada gombaran do i di na didok marsihundul di halode, lapatanna holan raja do na boi manghunduli halode, on ma tingki na parjolo sahali sahalak raja manghunduli halode. Hatorangan on paboa raja na naeng ro i, i ma sian pinompar ni Juda (ida 2 Samuel 7), na serep marroha jala Naposo ni Debata, na manaon na porsuk.
Buku Sakaria on songon bagabaga jala gombaran ni panghirimon di angka ari sogot. Manghirim do bangso ni Debata asa ro Debata paulihon nasida jala pamonanghon nasida sian angka musuna. Ala ni dosa ni jolma do tartaban Jesus di hau pinarsilang, jala ingkon mate humophop manisia. Sesa pe dosanta ndang ala ni hagogoon manang ala ni haburjuonta. Ai molo tajujur do nuaeng angka pangalaosionta siganup ari maradophon Debata, ra ndang adong nanggo sada pe sian hita na sahat tu Ama i. On ma bagabaga na dilehon Debata marhite Panurirang Sakaria tu bangso i, asa adong panghirimon di nasida. Ai ndang manongtong nasida manaon na porsuk, alai ingkon marhite na olo nasida paubaon roha, ai ro nama Mesias naung dibagabagahon i, tumopot bangso i.
Raja na Ro i, Raja Sipardame (ayat 10)
"Jala ahu maniaphon angka hureta sian Epraim dohot angka hoda sian Jerusalem, siap dohot sior tu hamusuon. Dung i baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Euprat sahat ro di angka ujung ni tano on."
Turpuk on patoranghon haroro ni Mesias, na naeng mamboan hamonangan dohot haluaon. Holan sian Tuhanta do na tuk mangalehon hadameon tu ganup bangso. Dijagai jala diulosi do angka bangsoNa i sian angka musu (ayat 8). Diuhum pe nasida holan asa unang be nasida mangulahon dosa. Jala manjadi do nasida gabe bangso ni Debata (ayat 10). Ibana do Raja Siboan Dame na pasadahon saluhut bangso asa unang sai marbadai manang marporang sama nasida. Unang sai marporang, gabe diparhatoban donganna manisia, jala olo sipata gabe dibuat hosana.
Umbahen i do ro Jesus Kristus laho padamehon. Ai Ibana do Raja na tinongos ni Debata asa gok dame portibi on. Dipelehon do diriNa bahen garar ni utang ni dosanta. Pola do diparsilanghon Ibana singkat ni panguhuman na tu hita hian gabe Ibana na mamorsan. Angka haburjuonNa i, songon tanda ni holongNa tu ganup manisia, asa mardame Debata dohot jolma na tinompaNa. On ma na diulahon Jesus. Ro do Ibana laho mamaritahon hadameon tu angka bangso parbegu, lapatanna disi, ia Jesus i ro tu saluhut jolma na adong di portibi on ndang marimbar nanggo sada. Ndang holan tu halak Jahudi Ibana ro, alai tu sude jolma, nang tu na so mananda Ibana dope. "Sian laut tu laut jala sian batang aek Euprat sahat ro di angka ujung ni tano on." Lapatan ni Hata on i ma, Barita na Uli sibaritahononNa i ingkon do sahat tu sude luat na adong di portibi on, jala ingkon sude do jolma mariaia manomunomu haroroNa. Tapaserep ma dirinta, asa ro hadameon na sian ginjang i, laos i do na patuk hita mamboan dame tu angka donganta jolma.
Kesimpulan dan Refleksi
Disungguli Panurirang Sakaria do hita taringot tu haroro ni Mesias, i ma Jesus Kristus na ro di bagasan goar ni Tuhan, na mamboan dame dohot haluaon. Dibahen i, tasulingkit ma dirinta boha do pangaradeonta manomunomu Raja Hatigoran jala Raja na Sangap i? Na pasti, na parjolo sahali, ingkon paradeonta do dirinta, tapaias rohanta, dung i pe asa boi hita mariaia jala marlas ni roha laho manomunomu Ibana. Taihuthon ma Ibana naung ro marhitehite goar ni Tuhan. Ala ni i, manang tu dia pe hita mangalangka ingkon do mamboan pasupasu hita tu angka humaliangta. Ditogihon do hita asa mariaia jala marlas ni roha manomunomu haroroNa.
Raja na ro i, i ma na sian Debata. Jala Raja i, Debata sandiri do, i ma Jesus. Ibana do Kristus manang Mesias, di Ibana do pujianpujian jala olopolop. Jala tu Ibana do soara ni angka jolma joujou. Songon parngoluon ni bangso na pinillitNa i, atik pe ala ni angka dosa gabe tartaban nasida, alai ndang dipasombu Debata nasida manaon na porsuk i saleleng ni lelengna. Dilehon do bagabaga tu nasida, na ingkon ro do Raja Siboan Dame, i ma Tuhanta Jesus Kristus. Songon i do nang di hita saonari, godang do hamaolon di hita di na mangadopi parngoluonta, godang do angka tantangan laho mampartahanhon haporseaonta, angka tantangan laho mampartahanhon ulaon panghobasionta, ala ni angka hagiot ni portibi on dohot angka na asing, alai marhite turpuk ni Jamita on dipaingot do hita, asa olo ma hita mangarade, mangalehon dirinta, asa Debata na manguluhon hita di na laho mangadopi angka na masa di ngolunta. Mariaia jala marolopolop ma hita manomunomu Rajanta i. Amen. (is)
Posting Komentar