Jamita Minggu 17 Desember 2023 Minggu Advent na Patoluhon tarsurat di Evangelium Lukas 1 ayat 46b-55 na manurathon ende pujipujian ni si Maria. Dipuji jala dipasangap si Maria do Tuhan i, ala ni denggan ni basaNa di angka naposoNa. Nunga dibagabagahon surusuruan Gabariel tu ibana naeng gabegabean ma ibana jala tumubuhon sahalak posoposo, i ma Jesus Kristus. Ndang ditagam ibana boi dipillit Debata ibana, ai halak na biasa do ibana, ndang na sian pinompar ni angka na sangap. Umbahen i do mariaia jala marlas ni roha ibana pasangaphon Debata. Las rohana dipillit Debata ibana na gabe tumubuhon Tuhan i, i ma Jesus Kristus. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Dipatimbul Rohangku do Tuhan i." Tapamanat ma hatoranganna.
Pendahuluan
Minggu on masuk ma hita tu Minggu Adven na patoluhon, jala ojahan ni Jamitanta i ma "Dipatimbul Rohangku do Tuhan i." Molo di Bibel i dibahen judulna "Ende Pujipujian ni si Maria." Aha do alana umbahen na mangendehon pujipujian si Maria patimbul Tuhan i? Alusna:
1. Boaboa Halongangan sian Surusuruan Gabariel.
Di Lukas 1:26-38, dipatorang do disi parjumpangan ni surusuruan Gabariel dohot sada anak boru na margoar si Maria. Disuru Debata suruanNa borhat tu Nasaret na di Galilea manopot si Maria. Dipasahat ma tabe tu ibana, didok ma:
a. Na niasian, didongani Tuhan i ma ho, ai dapotan asi ni roha do ho di Debata.
b. Gabegabean ma ho, tubuan anak ma ho; Jesus ma bahenonmu Goarna. Balga ma Ibana muse, goaron do Ibana Anak ni na Tumimbul i; lehonon ni Tuhan Debata do tu Ibana habangsa ni si Daud, amaNa i.
Disungkun si Maria do pardisurgo Gabariel, songon dia ma boi masa i? Jala dialusi ma ibana, sian Tondi Parbadia do i masa. Gabe didok si Maria ma: Naposo ni Tuhan i do ahu. Sai saut ma tu ahu songon na nidokmi.
Ala ni barita na balga i mansai las do rohana manjalo di na nidokna, "sai saut ma tu ahu songon na nidokmi" (ida Lukas 1:38). Laos ala ni i do umbahen dipuji jala dipatimbul si Maria Tuhan i.
2. Barita sian si Elisabet, si Maria do Ina ni Tuhan i.
Di Lukas 1:39-45, ditopot si Maria do si Elisabet (ripe ni Sakarias) tu huta Juda. Di na sahat ibana tu bagas i, dipasahat si Maria ma tabe tu si Elisabet. Umbege tabe i, manggunjal ma posoposo na di bortian ni si Elisabet laos digohi Tondi Parbadia ma ibana. Laos marsoara na gogo ma si Elisabet manghatahon: "Dapotan pasupasu do ho di tongatonga ni angka ina; dapotan pasupasu do na pinarorotmi." Ndang holan i, alai dohot do dihatahon si Elisabet, marhite Tondi Parbadia na songgop tu ibana, mandok: "Marhua ma pola ro ina ni Tuhanhi manopot ahu on" (ida Lukas 1:43). Di ayat on, didok si Elisabet, ia si Maria ina ni Tuhan i do. Tarsonggot do si Maria umbege i, jala las rohana, ai halongangan bolon do i. Si Elisabet marhata sian Tondi Parbadia dompak bohi mamaritahon tu si Maria, paboa ibana do ina ni Tuhan i.
Marlas roha si Maria ai ditatap Debata do haetehon ni naposoNa. Naposo na metmet do si Maria alai dipatimbul Debata ibana. Dipillit Debata si Maria laho patulushon bagabaga na bolon sian Debata hombar tu na binagabagahonNa hian tu angka ompunasida. Gabe ro ma tu rohana mamujimuji jala pasangap Debata.
Pembahasan
Marlas ni Roha Mamuji Tuhan i (ayat 46-49)
Marende pujipujian si Maria patimbulhon goar ni Tuhan i. Marende ibana sian nasa roha jala mariaia dohot tondina. Ndada holan di hata dohot pamangan, na tabo begeon sambing endena i, alai marende ibana sian nasa partondion. Ende na i gabe panindangion ala hinabalga ni pambahenan ni Debata na tu ibana. Ditodo Tuhan si Maria, tarpillit sian saluhut angka anak boru na di portibi on gabe ina ni Sipalua ni sandok portibi on, i ma Jesus Kristus.
Patut do antong mariaia tondina di Debata, ai dipabangkit ibana, ditatap haetehon dohot hagaleonna. Ndang apala jolma na sangap keluarga ni si Maria, alai ala dipillit Debata na Badia i ibana, gabe marsundutsundut saluhut jolma na porsea mandok: "Na martua do si Maria." Targoar ma ibana di saluhut Israel dohot di nasa luat di tano on.
Asi ni Roha ni Debata di Angka na Manghabiari Ibana (ayat 50-53)
Dipatubegehon si Maria do di endena, na masa dohot na naeng masa di ngolu ni angka partigor i ma jolma na manghabiari Jahowa, songon i nang tu angka jolma parjahat, angka si ginjang roha. Debata do na pamasa i di ngolu ni saluhut jolma, ai naung songgop do harajaon banua ginjang. Diendehon si Maria:
a. Suksuk do asi ni roha ni Jahowa pasahatonNa tu ganup jolma na manghabiari Ibana, jala marsundutsundut pamasaonNa. Sai patimbulonNa do angka na metmet, i ma angka na so marama so marina, na mabalu, na pogos, na ginosagosa dohot angka na manaon di angka ulaon na so uhum. Diparbohali do angka na male, pola suksuk dilehon sipanganonna be. Haroro ni Jesus Sipalua, mangalehon upa haluaon dohot pasupasu tu angka na tigor marroha. Magurupi angka partigor asa unang mago jala punu ala ni angka huaso ni portibi on dohot angka parjahat.
b. Alai ndada sarupa dipatupa Debata tu angka parjahat dohot jolma na ginjang marroha. Dipaserak do i, dipaijur habangsana, nang pe di na sai laon lobian nasida di angka arta sinadongan dohot sipanganon, alai gabe rumar jala ndang adong na denggan sijamaon ni tanganna muse, hurangan jala rapar do nasida dipalao sian adopanNa. Ndang parsidohot di hatuaon na binoan ni Sipalua i nasida ai dipalao do nasida, nang pe di adopanNa rade angka na ringkot di ngolu ni saluhut jolma.
Diingot Debata do Bangso na PinillitNa dohot BagabagaNa (ayat 54-55)
Dihatahon si Maria di ayat 54-55 on, mulak roha ni Debata mida jolma pardosa:
a. Manongtong do dijaga, diramoti jala diparorot Tuhan i Israel bangso na pinillitNa i. Haroro ni Jesus na naeng sorang i tu Israel dohot tu portibi on, ulaon ni Jahowa do i laho mangurupi nasida sian huaso ni dosa jala paluahon nasida sian na hansit, pardangolan ni jolma. Asi ni roha na sian banua ginjang do i masa, na sian Tuhan i. Mansai balga do asi ni roha ni Tuhan i tu portibi on, di angka na olo marhamubaon, tapatudos ma tu hata na tarsurat di Johannes 3:16 "Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana."
b. Mulak muse roha ni Jahowa jala marpamuati rohaNa marningot bangso na pinillitNa, Israel. Mamungka sian angka panurirang, adong 400 taon lelengna ndang mangkuling Debata dompak Israel. Ndang ro hataNa jala ndang disuru be panurirang manungguli nasida. Mandao Tuhan i hinorhon ni dosa ni hajolmaon. Alai diingot Debata do angka bagabaga naung niuarihonNa tu angka ompunasida si Abraham. I do na nidok ni si Jesaya uju i, "Dibahen i apala Tuhan i sandiri ma mangalehon sada tanda di hamu: Ida ma, gabegabean ma sada na marbaju, jala tumubuhon sada anak, jala bahenonna ma goarna: Immanuel" (ida Jesaya 7:14). Immanuel lapatanna: donganta ma Debata. Immanent lapatanna dekat. Ai nunga mandao Debata ala ni dosa i, pola ndang mangkuling Ibana mar 400 taon, ndang disuru be panurirangNa, alai nuaeng di na ro Jesus, jonok do Ibana, jala di tongatonganta.
c. Dipasahat Debata bagabagaNa tu si Abraham, alai dohot do i nang tu pinomparna marsundutsundut. Diboto si Maria do tarombo ni si Abraham, gabe didok ibana pomparan ni si Abraham ompu ni na porsea i do ibana. Laos sian i do lam tangkas taboto, hasintongan ni hata ni Tuhan i na tarsurat di Jesaya 54:10 "Ai munsat pe angka dolok, jala humuntal angka robean, alai anggo asiasingKu na so tupa munsat sian ho, jala padan ni hadameonHu na so tupa humordit, ninna Jahowa siasii ho."
Kesimpulan dan Refleksi
1. Marhite turpuk ni Jamita on, dipaingot do hita asa manongtong mamuji pasangap Tuhan i, songon si Maria ina ni Jesus. Ingkon patimbulonta do Tuhan i di nasa ngolunta, ai dilehon do tu hita barita las ni roha, diingot do hita pomparan ni si Abaraham, diingot do bagabagaNa angka na robi i asa dapotan pasupasu dohot haluaon nang hita. Marpamuati do rohaNa mida hita pardosa asa mardame hita tu Debata jala dapotan hangoluan si salelenglelengna. Songon si Maria, pamujion dipasahat ibana tu Debata, dipatimbul rohana do Tuhan i ala balga ni sangkap dohot ulaon ni Tuhan i di bagasan ngoluna. Ditodo Debata si Maria gabe parhitean asa sahat Sipalua i tu tano on paluahon saluhut jolma, hombar tu bagabagaNa di angka Padan na Robi. Dohot do dihatahon si Elisabet tu ibana "ina ni Tuhanhi" (ida Lukas 1:43), ina na martua na dipasupasu (ida Lukas 1:42).
2. Sai papataron ni Debata do haluaon dohot pasupasu tu angka jolma na manghabiari Ibana dohot jolma na bonar marroha. Alai baliksa, dipaserak Debata do angka na ginjang marroha, songon i nang angka na gogo, dipatutoru Tuhan i do angka na mora, na jat dohot na so marroha holong tu angka na pogos.
3. Debata do na mangaramoti, mangurupi dohot marmudumudu hita, ai Ibana do nampuna hita. Ala ni i sai tapuji ma Debata sian nasa roha dohot nasa pingkiranta.
4. Marhite Barita na Uli naung sahat tu hita sian Buku na Badia i, asa dohot ma hita marhatopothon; ia Debata marhuaso do manodo jala mamillit manang ise na gabe parhitean hasahatan ni bagabaga haluaon na pinatupaNa tu portibi on. Ndang mardia imbar di Tuhan i ragam ni status sosial, jabatan, huaso, dohot angka na asing. Alai ditodo Tuhan i do jolma na di bagasan habadiaon, na manghabiari Jahowa jala satia maradophon hataNa. Ala ni i di Minggu Adven na patoluhon on asa marhamubaon ma hita, jala tapadao ma dirinta sian angka bangko dohot pangalaho na maralo tu lomo ni roha ni Tuhanta. Laos tatiru ma parrohaon ni si Maria na marsihohot ibana, daulat marroha mardongan biar mida Jahowa. Amen. (hs)
Posting Komentar