Jamita Minggu 24 Desember 2023 Minggu Advent na Paopathon tarsurat di Jesaya 35 ayat 1-4 na manurathon bagabaga taringot tu haluaon ni Bangso ni Debata. Didok do asa marlas ni roha jala marolopolop Bangso ni Debata ala paulion ni Debata do bangsoNa i. Jala didok do tu bangso i asa patoguhon angka halak na gale jala tahutan, ai Debata do na patupahon haluaon di bangsoNa. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Ro do Debata Paluahon BangsoNa." Tapamanat ma hatoranganna.
Pendahuluan
Turpuk ni Jamita di Minggunta sadari on dienet sian buku Jesaya bindu 35, na masuk tu horong ni Proto Yesaya (Jesaya bagian na parjolo) mamungka sian bindu 1-39, na disurathon uju harajaon Juda sai diasupi harajaon Assur, sada bangso na mansai margogo hatiha i. Alai antus do di roha Panurirang Jesaya ia na mambahen asa sai diasupi bangso Juda, ndang na holan ala ni bangso Assur, alai ala ni dosa ni bangso Juda do umbahen masa angka sitaonon na dokdok tu nasida. Bangso Juda gabe bangso si jogal rungkung, ndang satia nasida di uhum ni Debata, marhite pangalaho dohot hata. Ndang tarida be di ngolunasida paboa na dipillit Debata nasida gabe bangsoNa. Alai gabe balik do, gabe si alo uhum ni Debata do nasida. Gabe masa ma haleon, hagunturon di angka politik, parekonomian dohot na margugamo, gabe ndang denggan be. Parrohaon nang ngolu partondionnasida gabe sumurut tu hasesega. Boi dohonon gabe jumorbut do pangalahonasida sian angka bangso na leban, na so mananda Debata. I do umbahen hona uhum nasida jala mago sian tongatonganasida panghirimon di haluaon dohot haimbaruon di ngolu na dumenggan.
Alai sai tong do dionjar Panurirang Jesaya roha ni bangso i asa marsihohot jala marhaporusan tu Debata. Mangolu di bagasan uhum dohot lomo ni roha ni Debata. Disosoi do tu nasida angka uhum na naeng patupaon ni Debata di angka sialaosi Patik, marhite hamatean di angka na so tumangihon Hata ni Debata. Andul sian i, dipajojor si Jesaya do, bagabaga haluaon na sian Debata, molo dipaunduknasida rohana manundalhon angka dosa. Bagabaga i, i ma sai na hona uhum do saluhut bangso na naeng manegai bangso napinillitNa i (bindu 34) tung holan haluaon do na ro tu bangso ni Debata.
Sian i, tarida ma, ia si Jesaya pasahathon uhum ni Debata, huhut bagabaga haluaon molo dipauba nasida rohana, gabe siihuthon uhum ni Debata. Molo dapot tingkina hagogok ni bagabaga ni Debata tu nasida, gabe marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur. Marbunga situtu ma i jala marolopolop, masa ma tutu parolopolopon dohot pariaiaon. Hamuliaon ni Libanon dibasabasahon tusi rap dohot hinauli ni Karmel dohot Saron. Idaonnasida ma hamuliaon ni Jahowa dohot hatongamon ni Debata.
Pembahasan
Debata Pamalumhon jala Paulihon (ayat 1-3)
Ia dosa manghorhon hasesega dohot angka parungkilon do. Halongonan gabe sada tudosan jorbut ni panghorhon ni dosa. Alai Debata bona ni hangoluan i, pamalumhon jala paulihon angka na sega gabe mulak tu haimbaruon asa sahat tu haulion. Gabe marlas ni roha jala marolopolop do bangso i di bagasan ngolu na imbaru.
Debata do na Paluahon BangsoNa (ayat 4)
Marhite hata "dok hamu ma tu angka parroha na tahutan," lapatanna, hata on dipasahat tu sude bangso ni Debata na tahutan, angka na mago panghirimon, jala angka halak na marroha na bile. Didok tu nasida: "Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ho do ibana tongon paluahon hamu." Hata "Debatamuna i ro," lapatanna: Tahi ni Debata do na naeng paluahon bangsoNa i. Ndang hum roha ni debata di angka sitaonon ni bangsoNa. Dipapos Panurirang Jesaya do roha ni bangso i. Debata sandiri do na ro palua bangsoNa sian asupasup ni bangso si leban. Tudos ma i songon tingki na masa di si Musa, dipalua Debata do bangsoNa i sian angka parungkilon.
Mansai tangkas do panggohi ni haluaon na sian Debata di nasida, i ma marhite hatutubu ni Jesus, Tuhan Sipalua i. Marhitehite Tuhan Jesus, digohi ma bagabaga ni Debata taringot tu haluaon ni bangso i. Tutu situtu, gabe tubu panghirimon di bangso Israel. Marhitehite Jesus dipaimbaru do sude ngolunasida. Angka na bile, na so margogo, na tahutan, gabe dapotan panghirimon. Lobi sian na piningkiran ni bangso i dapotnasida sian Debata. Ndang holan haluaon sian bangso na mamparhatoban haluan na adong di nasida i, alai lobi sian i, haluan na ummarga do, i ma haluan sian hamatean si saleleng ni lelengna. Jala haluaon i ndang mansadi di nasida, alai sahat do nang tu nuaeng on, manang ise na olo gabe bangso ni Debata dapotan haluaon sian hamatean, asa sahat tu hangoluan si saleleng ni lelengna.
Di bagasan partingkian na mansai maol si nuaeng on, olo do gabe lilu hita jala mabiar, gabe mago angka panghirimon. Boi do ala ni angka tekanan di situasi ekonomi na mansai maol, angka parngoluan na sursar, tekanan di angka parkarejoan, manang angka parngoluan di kehidupan sosial na asing. Mansai godang do angka asup, haberniton, kesewenang-wenangan, korupsi, penyalahgunaan kekuasaan demi kepentingan diri sendiri. Godang dope angka na asing na boi manegai angka pingkiran dohot ngolu ni jolma di partingkian si nuaeng on. Gabe mago angka las ni roha dohot angka panghirimon. Ala ni angka haberniton, sitaonon, parungkilon, kekecewaan, parbadaan dohot angka na asing, gabe so margogo be ngolu ni jolma. Gabe tubu ma roha na bile.
Alai marhite Hata ni Debata di bagasan tingki on dipaingot jala diajari do hita asa unang be mabiar. Didok do: "Pir ma tondimuna, unang hamu mabiar! Ida ma Debatamuna i ro martubolhon dohot mamaloshon!" Adong do Debata di tongatonganta laho paluahon hita. Margogo do Ibana mambahen halongonan bage tano na imbur. Asal ma satia hita tu Ibana, jala taihuthon hataNa, poaluaonNa do hita sian angka hageduhan ni portibi on. PungkaonNa ma parnidaan ni rohanta, gabe taida ma angka ulaula ni tanganNa na mansai gogo jala marhuaso paluahon hita sian angka parungkilan.
Bangso ni Debata do hita marhitehite Tuhan Jesus, parsidohot do hita di holong ni Debata na bolon i. Masa pe hageduhon dohot hagunturon hinorhon ni dosa ni protibi on, alai molo hita angka na porsea di Jesus ingkon do marsihohot di bagabagaNa, na so tupa pasombuonNa hita di sude angka sitaononta. Ai na ro ma Ibana laho paluaon hita.
Kesimpulan dan Refleksi
Marhite Minggu sadari on, i ma minggu Advent na Paopathon, i ma Minggu na manaringoti panomunomuon di haroro ni Tuhanta Jesus, tama ma hita marpanghirimon di haluaon na binoan ni Jesus tu hita di partingkian si nuaeng on. Didaoni do angka sahitta. Diapusi do angka iluilunta, dipargogoi do hita di angka dalanta. Jouonta ma Ibana di bagasan haporseaon, jala alusanNa do hita, disesa do angka dosanta, jala sahat do hita tu hangoluan si saleleng ni lelengna. Antong satia ma hita sahat ro di ujung ni ngolunta. Taparade ma rohanta. Ai na ro ma Ibana paluahon bangsoNa. Amen.
Posting Komentar