Jamita Minggu 31 Desember 2023 Minggu Dung Natal tarsurat di Jeremia 31 ayat 7-9 na manurathon bagabaga taringot tu las ni roha dohot parolopolopon di tongatonga ni bangso ni Debata ala dipalua Debata do bangsoNa i sian angka haberniton. Debata na manguluhon nasida jala na mangapuli bangsoNa i sian angka haporsukon. Tapabagas pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Debata do Uluan jala Mual ni Apulapul." Tapamanat ma hatoranganna.
Pendahuluan
Di tongatonga ni panguhumon di bangsoNa, Debata parholong i tontong papatarhon holongNa. Asa taruli bangsoNa i dihasesaan ni dosa, jala manjalo pardengganan sian Debata. Debata manurathon padan pardamean di roha nang ateate ni bangso i jala gohanNa angka patik. Ai ndang margogo jala ndang tuk bangso i mangaradoti dohot mangulahonsa.
Debata manggohi padanNa marhite haroro ni Jesus na patupa haluaon di bangsoNa. Haluaon sahat tu angka jolma na olo ditogutogu jala mananda asi ni rohaNa na andul umbalga sian rimasNa. Di padan haluaon na nilehonNa, Debata sandiri do na manogunogu, mangajari bangsoNa mananda dohot manjalo haluaon marhite panghirimon, haporseaon dohot holong ni roha. Diparade Jesus do angka na hinirim ni bangso i jala ditogutogu do nasida mananda denggan basaNa marroha mauliate.
Pembahasan
Turpuk ni Jamita on manogihon hita asa bagas manulingkit haporseaonta tu Tuhan i. Nunga olat ni dia hita mananda dohot mangauhon angka padan na pinasahat ni Tuhan i di ngolunta. Di bagasan hapapatar ni holong ni roha ni Tuhan i, nasa jolma dijou asa parsidohot di las ni roha na sian Tuhan i.
Ai songon on do hata ni Jahowa: Marhinsa ni roha ma hamu marsuraksurak mida si Jakkob, jala marolopolop ma hamu mida ihutan ni angka bangso parbegu! Pangiar hamu ma soaramuna mamujimuji jala dok hamu ma: Sai palua ma ale Jahowa bangsom, pasipasi ni Israel! (ayat 7)
Joujou ni Debata tu halasan ni roha on dipasahat do di situasi ni bangso i na di bagasan pardangolan dohot hasusaan di habuangan Babel. Lapatanna di tongatonga ni pardangolan dohot sitaonon boi do tubu las ni roha ala ni pangurupion ni Debata. Sude na hansit, na dokdok na di rohanta i dibuat Tuhan Jesus (patudos BE No. 452 "Na Ro Pandaoni Bolon i" ayat 2 dohot 3). Dibagabagahon Debata do parngoluon na gok las ni roha tu sude jolma, na gok iluilu dohot tangis. Songon ojahan ni Jamita Minggu di hita sadari on "Debata do Uluan jala Mual ni Apulapul." Na ro do tingkina paubaon ni Debata jala apulonNa jala pasupasuonNa bangsoNa, molo manongtong Tuhan dipangasahon na gabe Sipartogi dohot Pangurupi.
Uju masa angka sitaonon, parungkilon dohot haberniton di ngolunta, margogo do hita jala dipapos rohanta sai na urupan ni Tuhan i do hita mamolus sude ragam ni hamaolon di ngolunta. Jala porsea do hita, pangurupion ni Tuhan i ndang mansadi jala uli di tingkina. Umbalga do holong dohot asi ni Roha ni Tuhan i marimbangkon hita manghaholongi dirinta sandiri. Umbotoan do Tuhan i di dirinta sian hita sandiri mananda dirinta. Ala ni i do, di sude na masa di ngolunta tontong ma hita marlas ni roha (patudos Pilippi 4:4). Aha do alana asa togu jala marsihohot hita? Boasa ingkon manongtong marlas ni roha hita mangadopi ragam ni na masa di ngolunta?
Debata Manggotap Huaso ni Dosa dohot Hamatean
Debata Pargogo na so Hatudosan jala Parasiroha situtu nunga manggotap angka huaso na manundati manang mangarante hita di na laho bongot tu halasan ni roha, i ma angka dosa, mual ni sitaonon, sorop ni hamatean. Alai di hadosaon ni jolma i, ro do Tuhan i di bagasan holongNa na balga, manesa dosa, asa malua jolma i (patudos Johannes 3:16). On ma na mansai arga di hita jolma boasa tung ingkon marlas ni roha, ala naung digotap Tuhan i do rante ni dosa. Ndang margogo be dosa manjorat hita di na mananda jala marsaor dohot Tuhan i.
Debata do na Pasahathon Las ni Roha
Debata do mual ni las ni roha. Angka jolma naung mananda jala mian di asi ni roha ni Tuhan i, mian ma di hasesaan ni dosa, mian jala mangolu di las ni roha na gok jala manongtong. Debata do na manongtong manogunogu, mamparmahani, mangurupi jala manarihon nasa na ringkot di pardalanan ni ngolunta, asal ma manontong hita mian jala porsea di HataNa. Haporseaon, panghirimon, haholongon tu Debata ndang hea mambahen hita gabe mandele. Debata do na tontong gabe partogi jala pangurupi di ngolunta. Didok Debata "Ahu ma manogihon nasida tu angka batang aek di dalan na hornop." Ala ni i manongtong ma hita marlas ni roha di ngolunta mangadopi angka na masa, ai diboto Debata do pardalanan ni ngolunta, jala une do sude di tingkina.
Kesimpulan dan Refleksi
Sude do jolma adong hahurangan, hagaleon dohot dosa. Ndang adong sada pe sian jolma na sempurna. Sude do jolma adong parsoalanna, gale jala sude do hea madabu tu hapariron, sitaonon dohot iluilu. Alai dia do hasurungon ni na porsea na marsihohot marhaporseaon di Debata? Hasurunganta songon na porsea mamolus ragam ni sitaonon dohot parungkilan i ma, ndang madabu hita tu pandelean, alai boi manontong marlas ni roha, di angka godang dohot borat ni si taononta. Debata do na mangalehon gogo jala mangurupi hita mamorsan sude na masa, gabe tolap hita mangadopi jala sonang panghilalaanta mamolus sude na masa i. Tahaposi ma i di bagasan ngolunta, songon ojahan ni Jamita di Minggunta sadari on "Debata do Uluan jala Mual ni Apulapul di Ngolunta." Amin. (sn)
Posting Komentar