Jamita Minggu 11 Februari 2024 Minggu Estomihi tarsurat di Markus 9 ayat 2-9 na manurathon uju marsangap Tuhan Jesus di dolok na niida ni tolu halak sisean ni Jesus, i ma si Petrus, Jakobus dohot Johannes. Tung mansai uli jala sangap do na masa i jala ndang marimbar maradophon manang aha pe na adong di portibi on. Disi ma dipasahat Debata Ama tu angka sisean i mandok "On do Anak haholonganHu, tangihon hamu ma Ibana!" Hatahutan do angka sisean i, alai dipangido nasida asa dipajongjong ma nian tolu soposopo disi, sada di si Musa, sada di si Elia jala na sada nari di Jesus. Alai ndang i dalan na ingkon siboluson ni Jesus, tuat do Jesus sian hasangaponNa i jala ingkon manaon hamatean laho paluahon jolma sian dosa. Tapabagas ma pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Jesus Anak ni Debata, Tangihon ma Ibana." Tapamanat ma hatoranganna.
Pendahuluan
Mansai ringkot do adong panghatindanghonon taringot tu na hinahaporseaan. Molo adong halak na tahaporseai tontu rade jala olo do hita manangihon hatana. Songon ojahan ni Jamita Minggu Estomihi sadari on "Jesus Anak ni Debata, Tangihon ma Ibana." Panghatindanghonon taringot tu Jesus Anak ni Debata naeng ma tangihonon ni angka na porsea di Ibana.
Di Evangelium Markus on dipasahat do barita taringot Jesus Kristus na mamboan haluaon tu sandok portibi on. Na gabe turpuk ni Jamita di Minggu Estomihi sadari on dienet sian Evangelium Markus 9:2-9 (patudos Mateus 17:1-13, Lukas 9:28-36), disurathon barita uju marsangap Tuhan Jesus di dolok. Di tolu buku Evangelium (Mateus, Markus dohot Lukas) di Padan na Imbaru disurathon do na masa di dolok i jala panghatindanghonon ni si Petrus na mandok: "Kristus i do Ho!" (ida Markus 8:29).
Dipahot Debata do panindangion ni si Petrus marhite na niidana sandiri jala na binegena. Dibaritahon di na tolu Evangelium i, na masa i gok hasangapon nang hatongamon, jala dipatolhas si Petrus haporseaonna paboa Jesus Kristus i ma Anak ni Debata (ida 2 Petrus 1:16-18). Mansai uli do na masa di dolok i, sangap, marsinondang hamuliaon ni Tuhan Jesus rap dohot si Musa nang si Elia. Parjumpangan ni Tuhan Jesus rap dohot si Musa nang si Elia di dolok i, i ma na gabe patujolo di ujung ni angka partingkian di na lam donok Jesus tu sitaonon i, na ingkon boluson ni Anak ni Debata (ida Markus 9:1).
Pembahasan
Pandohan "dung i salpu onom ari" (ida Markus 9:2), paboahon hinatangkas ni na masa di na marsangap Jesus di atas dolok, dung salpu panindangion ni si Petrus taringot tu hamesiason ni Tuhan Jesus (ida Markus 8:27-30) ditogihon Jesus do siseanNa tolu halak, rap dohot Ibana, i ma: si Petrus, Jakobus dohot si Johannes (sisean na sumolhot tu Jesus, nangkok tu sada dolok na timbo, na suhi, jala patar disi hasangaponNa. Goar ni dolok i, i ma Dolok Tabor (timbo ni dolok i arga 588 meter na adong di sabola utara ni Israel di topi ni rura Jisreel purba, hirahira 17 kilo meter daona sian pastima ni tao Galilea). Di Padan na Robi, dolok i ma songon inganan na mansai ringkot, gombaran inganan parjumpangan ni banua ginjang dohot portibi on. Tung na lungun do inganan i, pola sahat tu na tarpodom angka sisean i (ida Lukas 9:32). Dao sian hagunturon, holang sian angka na ribur, disi ma nasida na opat padomu diri tu Debata Ama. Ndang tagamon so hibul roha ni sisean na tolu halak i marnida Jesus na martangiang i.
Gok Hamuliaon ni Debata di Jesus (ayat 2)
Uju martangiang Jesus, diida sisean i ma hasangapon ni Jesus, mimbar ma rupa ni Jesus. Didok di ayat 2 "gabe muba ma rupaNa diida nasida," ndang pola tangkas dipatorang songon dia parmubana, alai boi dohonon masa ma hamubaon di rupa ni Jesus (transfigurasi, metamorfosis, perubahan rupa), di jolo ni sisean na tolu i. Di Padan na Robi masa do tong si songon i di si Musa, di na tuat ibana sian dolok Sinai, i ma di na marsinondang sisik ni bohina ala naung manghatai ibana dohot Jahowa (ida 2 Musa 34:30). Gok hamuliaon ni Debata di hadirion ni Jesus.
Ndang Marimbar Hasangapon ni Debata (ayat 3)
Di ayat 3 didok, "gabe marsillam ma angka ulosNa, bontar sahali, na so dapot botoon ni panunsi di tano on bontar songon i." Marhite na marsillam angka ulos ni Jesus i naeng patuduhon hasangapon ni Tuhan Jesus, na olo manadinghon banua ginjang jala tuat tu portibi on, mangeahi hita pardosa asa malua sian rante ni dosa jala asa mangolu hita di Debata. Didok "na so dapot botoon ni panunsi di tano on bontar songon i," naeng dipasahat tu hita taringot tu hasangapon ni Debata, mansai uli do jala ndang marimbar.
Jesus do Hagogok ni Angka Patik (ayat 4)
Halongangan na masa di dolok i, na niida sisean i manghatai Jesus rap dohot si Musa dohot si Elia. Si Musa i ma sahalak panurirang na mansai sangap di bangso Israel, ala ibana do na manguluhon bangso Israel ruar sian tano parhatobanan Misir jala na pasahathon Patik ni Debata siradotan ni bangso Israel. On ma na gabe lam patangkashon paboa Jesus Kristus do hagogok ni patik i.
Molo si Elia, tong do sahalak panurirang na mansai sangap di bangso Israel ala angka tanda halongangan na pinatupana di Padan na Robi. Jala si Elia ma sahalak panurirang na manaek tu banua ginjang na niida ni panurirang Elisa (ida 2 Raja-raja 2:11). Si Musa dohot si Elia, i ma songon panurirang sian Padan na Robi na manghatai dohot Jesus, i ma angka naung sinurirangkon ni angka panurirang di Padan na Robi. Marhite haroro ni Panurirang Musa dohot Panurirang Elia, gok ma marhite Jesus angka naung dibagabagahon angka panurirang di Padan na Robi.
Di ayat 4b didok, na manghatai do nasida rap dohot Jesus, manghatai taringot tu ulaon si pasidungon ni Jesus di Jerusalem songon naung dihatahon hian (ida Markus 8:31). Jesus do hagogok ni patik na jinalo ni si Musa jala Ibana do Mesias na binagabagahon ni angka Panurirang di angka Padan na Robi.
Molo tajaha di buku 5 Musa 18:15-18, Jesus do Mesias na hinatahon ni si Musa disi, jala Mesias na binagabagahon ni angka panurirang songon na dihatindangkon si Petrus di Mateus 16:16 "Jadi ninna si Simon Petrus ma: Kristus (Messias), Raja na pinarbagabaga i do Ho, Anak ni Debata na mangolu!"
Tuat Jesus sian HasangaponNa Manaon Hamatean Laho Manobus Dosa ni Jolma (ayat 5-6)
Mansai sonang do roha ni sisean i marnida sondang na mansai uli di dolok, naeng lumeleng nian na masa i di roha ni nasida, ala ni i do umbahen na didok si Petrus, asa dipauli tolu soposopo di atas dolok i. Dung diida nasida si Elia rap dohot si Musa manghatai dohot Jesus, gabe dipanghulingi si Petrus ma Jesus marhite hata na mandok "Guru, denggan nai dison! Hupauli hami ma dison soposopo tolu: Sada di Ho, sada di si Musa, sada di si Elia" (ayat 5). Ndang dialusi Jesus pangidoanna i, ndang jolma parade inganan di jolma naung sahat tu surgo, alai Debata do na paradehon inganan ni na porsea i, songon na nidok ni Jesus di Johannes 14:3 "Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu."
Ndang diboto sisean i na nidokna i, ai gabe hatahutan do nasida. Ndang paradehon inganan na pinangido ni Jesus sian angka siseanNa i, alai manghaposi jala manangihon Ibana do. Pingkiran ni portibi do pangidoan ni si Petrus di na nidokna asa parade inganan di si Musa dohot si Elia. Dirajumi si Petrus do, molo di dolok i nasida, boi ma nian portibi on marnida hasangapon ni Jesus. Hape na ingkon tuat do Jesus sian hasangapon i laho manaon na bernit dohot hamatean di hau pinarsilang. Ndang diboto si Petrus na nidokna i, holan ala ni las ni roha ni hajolmaon sambing do na nidokna i, i do umbahen na didok "ai ndang diboto na nidokna i, tung hatahutan situtu do nasida" (ayat 6).
Jesus Anak Haholongan ni Debata Ama (ayat 7-8)
Dung i ro ma ombun mangalinggomi nasida, laos manghuling ma soara sian ombun i mandok "on do anak haholonganHu, tangihon hamu ma Ibana (ayat 7). "Ombun" i ma songon tanda hapapatar ni Debata di tongatonga ni bangsoNa, laho manogihon huhut paluahon (patudos 2 Musa 24:9-18). Paduahalion ma tarbege pandohan i, na parjolo, uju tardidi Jesus di batang aek Jordan (ida Mateus 3:17).
Dung i, ndang be diida nasida si Musa dohot si Elia, holan Jesus nama na tading disi. Sian on tarida ma songon dia Jesus dipasangap Debata. Alai si Petrus dohot si Jakobus diboto nasida ma naung dipatimbo Debata Jesus gabe Mesias na ingkon mangadopi hamatean. Hata "on da Anak haholonganHu, tangihon hamu ma Ibana," i ma hata ni Debata na ringkot siparrohahonon ni angka sisean i, jala lam tangkas ma di nasida paboa na tutu do Jesus na sinuru ni Debata Ama. Molo na tutu do porsea halak di Debata, ingkon porsea jala tangihononnasida do Jesus, ai halomoan ni Debata do Ibana (ida Mateus 3:17), sinuru ni Debata Ama laho paluahon jolma pardosa.
Dipangido Debata asa ditangihon angka sisean i Jesus. Marhite na manangihon Jesus do asa dipasangap nasida Jesus di ngoluna, ndada marhite na paulihon sopo di dolok i. Molo ditangihon jala dihangoluhon nasida Hata ni Jesus, na pasangaphon Jesus ma nasida disi. Ditangihon jala dihangoluhon ma i marhitehite panindangion na togu di angka sisean i songon i nang di angka na porsea.
Mabiar sisean i mambege soara i. Marhite ombun dohot soara i diboto nasida ma, na Debata do jongjong di jolonasida. Nunga diboto nasida hian sian buku ni si Musa, ndang boi jonok manang ise tu Debata, gari tu dolok Sinai ndang boi dais jolma (patudos 2 Musa 20:19-20). Ndang boi manang ise marnida bohi ni Debata (patudos 2 Musa 33:20-23). Hape nuaeng di punsu ni dolok i jongjong Debata huhut marsoara tu nasida, gabe mabiar angka sisean i. Alai ndang dipasombu Jesus nasida di bagasan hatahutan, pintor dipanghulingi do nasida.
Ingkon Saut do Sangkap ni Debata (ayat 9)
Dipatihi Jesus angka siseanNa asa unang dipaboaboa na masa i tu angka na torop. Dipopai Jesus nasida, asa unang dipajojor na niidanasida i tu halak, ia so jolo hehe Anak ni jolma i sian na mate. Na nidokNa disi, ndang pintor i dope sibaritahononnasida, adong dope na rumingkot sian i. Ingkon saut do na didok di na tarsurat i, jolo hehe do Anak ni jolma i sian na mate, ai i do na gabe punsu ni tanda halongangan na pinatupa ni Jesus. Hamonangan maralohon hamatean i do punsu ni sude ulaon ni Jesus Kristus di portibi on.
Kesimpulan dan Refleksi
Ndang holan di tingki na robi be ro soara ni Debata na sian banua ginjang na mandok "on do Anak haholonganHu, tangihon hamu ma Ibana," alai nang di partingkian si nuaeng pe, marhite hata ni Tuhanta na tarsurat di Bibel, Buku na Badia. Di minggu Estomihi (lapatanna: sai Ho ma gabe partanobatoan di ahu) sadari on dipatubegehon do nang tu hita hata na mandok "Jesus Anak ni Debata, Tangihon ma Ibana." Tagamon do ulaning sude hita marhatopothon manang manghatindangkon di ngolunta, ia Jesus na tahaporseai i tutu do Anak ni Debata naung ro tu portibi on laho paluahon hita sian dosa jala ingkon Ibana do sitangihononta? Molo tahatindangkon Jesus do Anak ni Debata tontu ingkon tatangihon do Ibana. Naeng ma nian marsangap goar ni Tuhanta Jesus marhite ngolu ni angka na porsea, marhite na mangulahon lomo ni roha ni Debata. Tapasiding ma pangalaho na mangasahon panghilalaan nang pingkiranta sandiri ia so sian Hata nang Patik ni Debata.
Angka halak na maniop biar ni roha di bagasan ngoluna jotjot do ndang denggan panghilalaanna jala jotjot do dihuphupi na holom di roha nang pingkiranna. Gabe madabu ma tu bagasan ngolu na mangasahon gogo nang pingkiran dohot panghilalaanna sandiri songon sisean ni Jesus na tolu i. Nang pe songon na uli pe sangkap ni nasida i, alai ndang apala i dope na ummuli jala na dumenggan di adopan ni Jesus. Ala ni i tatangihon ma Tuhanta Jesus, Ibana do Anak ni Debata na gabe partanobatoan di ngolunta.
Hasangapon ni Tuhanta Jesus ndada ala ni na binahen ni jolma, baliksa Ibana do na patamahon hita asa mangolu di bagasan hasangapon ni Debata marhite mudar ni Tuhanta Jesus di Dolok Golgata. Songon sisean ni Tuhan Jesus na ditogihon tu dolok na timbo jala na suhi, songon i do nang hita di pardalanan ni ngolunta. Ditogihon Tuhanta hita mangadopi angka dalan na rais, maol jala na suhi, marhite na mangadopi angka hamaolon, hapogoson, parsahiton, dohot hasusaan na marragam. Di na mamolus angka hamaolon i olo sipata sai songon na punjung tahilala jala sai songon na lungun panghilaanta di portibi on.
Di bagasan hapunjungan di tongatonga ni ngolunta dipanghulingi Tuhanta do hita marhite ojahan ni Jamita di Minggu Estomihi na mandok "Jesus Anak ni Debata, Tangihon ma Ibana." Halak na olo manangihon Anak ni Debata, papataronNa ma hasangaponNa laho paposhon rohanta mangadopi angka hamaolon i. Asa manang aha pe na masa di ngolunta, tabahen ma Ibana gabe partanobatoanta. Ala Debata do partanobatoanta gabe ndang mura be hita ganggu mamolus angka parungkilon, ndang muramura mandele alai lam marsihohot ma hita tu Ibana. Halak na porsea di Jesus Anak ni Debata, ingkon rade do manangihon dohot mangulahon hata ni Debata. Antong, tanda naung tahatindangkon Jesus Anak ni Debata, tatangihon ma Ibana di tongatonga ni ngolunta jala tabahen ma Ibana partanobatoanta. Amen. (ds)
Posting Komentar