Jamita Minggu 18 Februari 2024 Minggu Invokavit tarsurat di buku Psalmen 25 ayat 1-10 na manurathon tangiang ni parpsalmen maradophon Debata asa diramoti Debata ibana di tongatonga ni ngoluna. Dirajumi parpsalmen do, tung godang do angka hamaolon na niadopanna di pardalanan ni ngoluna. Jala ndang tolapsa mangadopi i molo holan mangasahon gogona sandiri, dipasahat ibana alualuna tu Debata asa dipatudu Debata dalan tu ibana di na mandalani ngoluna. Tapabagas ma pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Debata Patuduhon Dalan na tu Ahu." Tapamanat ma hatoranganna.
Pendahuluan
Buku Psalmen marisihon angka pujipujian dohot tangiang tu Debata, tangiang elekelek mangido haluaon dohot pandonganion di ngolu si ganup ari). Di Psalmen 25 on, marende si David songon dalanna martangiang, mangido haluaon sian musu jala asa dipatudu Debata tu ibana dalan sidalananna. Boi do taida pangidoan ni si David na mansai gogo tu Debata, asa dipalua ibana sian nasa musuna. Tangiang na pinasahat ni si David tu Debata di turpuk on, ala dirajumi ibana do pandonganion ni Debata di ngoluna, jala dirajumi ibana mansai ringkot hian do pangurupion ni Debata di ngoluna. Di bagasan parsaoranna tu Debata tubu ma panindangion di si David di angka asi dohot holong ni roha ni Debata, na mansai tangkas manogunogu jala tongtong patuduhon dalan sidalananna di ngoluna. Songon i do nang hita di bagasan ngolunta si ganup ari. Saluhutna i holan ala asi dohot holong ni roha ni Debata do di na dipaloas hita mandalani nasa ngolunta.
Pembahasan
Manghalungunhon jala Marhaposan tu Debata (ayat 1-3)
Di ayat 1 dipasahat si David mandok Jahowa do dihalungunhon rohana. Hata "dihalungunhon" dison marlapatan raja David mansai manghasiholi jala sai maimaima do di Jahowa na ni haposanna. Mangolu di bagasan roha na manghalungunhon Jahowa. Sai na rade do pasupasu sian Jahowa jala rade do Jahowa mangalehon jala mangurupi di angka na manghaposi Ibana.
Di ayat 2 didok si David di endena mandok " ... unang tung paila ahu, asa unang marsuraksurak angka musungku mida ahu." On ma na patuduhon paboa na adong paraloan manang parungkilon na masa di ngolu ni si David ala panosak ni angka musu. Jala marhite i do tong dipatuduhon tu hita pos ni roha, jala asa marsihohot di haporseaon tu Debata, sai na tuk do Jahowa mangurupi jala paluahon angka na porsea di Ibana.
Mangasahon Debata di Ngolu Siap Ari (ayat 4-5)
Tarbarita do habisuhon dohot hamaloon ni si David. Alai ndang na gabe i dipangasahon ibana. Alai tangkas do ibana mangido pangurupion sian Debata, asa Debata na mangurupi jala na marmudumudu ibana pabotohon angka dalan sidalananna. Di ragam ni parungkilon nang angka hamaolon na masa di ngoluna asa unang lilu jala asa tongtong satia ibana mardalan hombar tu lomo ni roha ni Debata. Asa nang hita pe na mangihuthon Tuhan i, tontu ragam do na taadopi di ngolunta, sipata di bagasan las ni roha, sipata di bagasan arsak, tapangido ma sian Debata pangajarion asa tongtong hita diparmudumudu jala ditogutogu di angka dalanta di ngolu si ganup ari.
Manongtong do Asi ni Roha ni Debata (ayat 6-7)
Dirajumi parpsalmen do na gok dosa do ibana marodophon Tuhan i, nang pe na pinillit ni Debata ibana gabe sahalak raja, alai ndang na gabe sai i dipangasahon ibana, ndang didok ibana dirina halak na so mardosa. Alai diparhatopot ibana do, tung ala ni holong dohot asi ni roha ni Debata do asa tarbahen ibana mangolu jala malua, " ... ai sian na robi do angka i." I ma asi ni roha ni Debata na sai tongtong tajalo, gabe tarbahen hita mangolu jala malua.
Pardengganbasa do Jahowa (ayat 8-10)
Pardengganbasa jala na bonar do Jahowa. Tung tangkas do asi dohot holong ni roha ni Debata di ngolunta si ganup ari. Ndang ro di salelenglelengna uhum ni Debata tu angka na lilu dalanna, didok: "Asiasi ni Jahowa sambing do umbahen so haru sun siap hami, ai ndang marpansohotan asi ni rohaNa i. Mulak rata do i tahe ganup sogot, godang ma tutu habonaranMu!" (Andungandung 3:22-23). Sai na ungkap do asi ni roha ni Debata di angka na marhatopothon dosana manang hahuranganna di adopan ni Debata. Ala ni i sai tongtong ma hita marpos ni roha tu Jahowa di ngolunta si ganup ari.
Kesimpulan dan Refleksi
Goar ni Minggunta sadari on Invokavit, lapatanna " ... jouonna ma Ahu, jadi alusanku ma ibana, ... " jala ojahan ni Jamita i ma "Debata Patuduhon Dalan na tu Ahu." Na gabe sungkunsungkun di hita, di pardalanan ni ngolunta tu ise do hita joujou? Ise do na tajou molo masa angka parungkilon manang sitaonon? Manang baliksa, molo dapotan las ni roha hita, ise do na tajou? Molo hita halak na porsea, ingkon tu Tuhan i do hita tongtong joujou. Tapeop ma tongtong songon hata ni ende na mandok "joujou do au tu Tuhanhi na sai tongtong manatap au, na mangalusi angka alualungku." Di pardalan ni ngolunta, pos ma rohanta tu Debata, Ibana do na manogu hita, mangajari hita jala na paluahon hita. Songon na didok di Buku Ende nomor 753 "Di Pardalanan Jesus di Jolongku." Amen.
Posting Komentar