Jamita Minggu 4 Februari 2024 Minggu Sexagesima tarsurat di Jesaya 40 ayat 21-31 na manurathon apulapul tu bangso ni Debata, na ingkon pasahaton ni Debata do haluaon di angka bangsoNa. Jala disurathon do nang hatimbulon ni Debata na mangatasi angka debata. Debata do na marhuaso na mangatasi saluhut, jala na pasahathon gogo di angka na manghaposi Ibana. Tapabagas ma pangantusionta taringot tu hatorangan ni Jamita on. Hombar tu Almanak ni hurianta dibahen ma ojahanna "Debata na Manongtong." Tapamanat ma hatoranganna.
Pendahuluan
Turpuk ni Jamita di Minggunta sadari on, Minggu Sexagesima (60 ari andorang Paska/ parningotan di ari haheheon ni Tuhan Jesus) dienet sian buku Jesaya 40:21-31, sian horong paduahon buku Jesaya, na digoar Deutro Yesaya (Jesaya bagian na paduahon). Buku Jesaya bagian na paduahon on dipungka sian bindu 40 sahat tu bindu 55. Buku Jesaya bagian na paduahon on, manaringoti barita haluaon ni bangso Israel. Disalpuhon Debata angka pangalaosion ni bangso i hinorhon ni asi ni rohaNa. Haluaon ni angka pardosa i dibagabagahon na ingkon jumpang di haroro ni Sipalua i, jala jangkonon ni na torop.
Buku Jesaya bindu 40-50 on laho mangapuli bangso Israel uju di habuangan Babel nasida di na mangolu di haholomon bangso i. Alai nang pe songon i, tong do holong roha ni Debata di nasida, diapuli Debata do bangso i marhite naposoNa, sahalak panurirang, i ma si Jesaya. Didok do di Jesaya 40:9 " ... Pangiar ma soaram ale Jerusalem parbarita nauli i, sai pangiar ma, unang ho mabiar! ... " Dipasahat do tu nasida mandok "unang ho mabiar," jala didok muse di Jesaya 40:26 " ... Manaili ma matamuna dompak ginjang, jala ida hamu, tung ise ma na manompa angka i? ... " Na mangihut, dipasahat di Jesaya 40:29-30 mandok " ... Ibana balik mangalehon gogo tu na loja ... " Sian angka hata ni Debata naung didok di pigapiga ayat i, botoonta ma, nang pe di bagasan haholomon nasida alai manongtong do diparrohahon Debata nasida, asal ma porsea jala olo nasida mulak tu Debata, Debata parasiroha jala pardengganbasa, Debata na lambat tarrimas, jala parasiroha dohot parhasintongan godang (ida Psalmen 86:15).
Pembahasan
Ndang tarpatudos maradophon manang aha pe hagogoon, huaso dohot hasongkalan ni Debata. Ibana do panompa jala pargogo na so hatudosan, sian mulana i sahat ro di saleleng ni lelengna. Ala ni i do umbahen na dipaingot Debata bangso Israel marhite panurirang Jesaya asa unang lupa nasida di denggan basa ni Debata.
Uju tarbuang nasida tubu ma panghilalaan di nasida songon panghilalaan ni bangso sileban. Molo talu sada bangso di parporangan maralohon bangso na asing, na talu ma dohot debatana, molo tarbuang sada bangso laos tarbuang do nang debatana i. Hape ia Debata Jahowa ndang adong tudosna maradophon debata ni bangso sileban. Manongtong do asi ni rohaNa, nang pe tarbuang bangso Israel. Masa pe i ala ni pangalahonasida do na manimbil sian dalan ni Tuhan i. Masa ma di nasida songon nidok ni umpasa, "tinallik bulung sihupi, pinarsaong bulung siala, unang sumolsol di pudi ndada sipaingot na so ada." Sai dipaingot Debata do nasida, alai dihuphupi do sipareonna. I do umbahen na ingkon uhumon ni Debata bangsoNa i di habuangan Babel.
Debata Jahowa Pargogo na so Hatudosan (ayat 21-22)
Pangapulion na pinasahat panurirang Jesaya di ayat 21 boi do idaonta sungkunsungkun ni panurirang i, songon paingothon nasida di sude angka pambahenan ni Debata di portibi on. Sungkunsungkun on martudutudu taringot tu huaso ni Jahowa. Didok "Tung so mamoto hamu? Tung so dibege hamu ma i? Tung so pinaboaan tu hamu sian mulamula? Tung so ditimbangi hamu ma angka ojahan ni tano on?" Jala didok muse di ayat 22 songon paboahon tu bangso i huaso ni Debata na mangatasi saluhut raja ni portibi on jala angka jolma, manang angka na mian di portibi on di toru ni huaso ni Debata do. Debata do na pahembang angka langit songon dagangan na halus, dipahire angka langit i songon abit undungundung bahen inganan. Tangkas do ayat on mamaritahon hamuliaon ni Jahowa. Jahowa na so tinompa ni angka tangan manang pingkiran ni jolma.
Hamuliaon ni Debata ndada songon hamuliaon ni angka debata ganaganaan ni Babel. Ia Debata, na hot ro di salelenglelengna do. Didongani do ompunasida ruar sian Misir jala boi nasida malua holan ala ni hagogoon nang pangaramotion ni Debata. Uju di pardalanannasida, di arian na i dilehon Debata do ombun na marsijongjong manogihon nasida, jala di bornginna i dilehon do nang api na marsijongjong manulu dalannasida, asa tarbahen nasida mardalan arian dohot borngin (ida 2 Musa 13:21). Nang uju hurangan sipanganon nasida di sipanganon, diparmudu Debata do nasida marhite lote dohot sagusagu manang manna asa unang malean nasida (ida 2 Musa 16:1-15).
Ndang Tarpatudos Huaso dohot Hagogoon ni Debata (ayat 23-26)
Di ayat 23-24 dipatorang panurirang Jesaya do, manang aha pe na masa di portibi on saguru di Debata do. Nang angka panggomgomi, nang panguhum ni portibi on Debata do na pasahathon ulaon i tu nasida, unduk di toru ni huaso ni Debata do saluhutna. Panggomgomi dohot panguhum na didok di turpuk on martudutudu tu raja Babel nang angka panguhumna, paboahon ndang manongtong huaso nang harajaonnasida. Boi do salpu dibahen Debata saluhutna i gabe songon orbuk, ndang marlapatan. Parsatongkinan do huaso dohot harajaon ni angka panggomgomi dohot panguhum ni portibi on, alai ro di saleleng ni lelengna do harajaon dohot huaso ni Debata.
Antong tu ise ma boi doshononta Debata? Ia Debata ni Israel, pargogo na so hatudosan, jala ndang adong gogo nang huaso na tarpatudos tu Debata Jahowa (ayat 25). Nasa debata di toru ni huaso ni Debata do. Jala di ayat 26 dipapatar huaso ni Debata maradophon angka na di langit. Jala sude na di langit unduk tu hata ni Debata do, ala Ibana do na manompa saluhutna, jala guru di ibana do saluhutna.
Luhut do Patar di Adopan ni Debata (ayat 27-28)
Dipatorang panurirang Jesaya do tu bangso Israel, na so adong na holip manang buni di adopan ni Debata. Tung sura pe didok bangso i buni do dalanhu maradophon Debata, alai diboto jala diida Debata do angka na masa di bangsoNa. Pandohan "Jakob" di ayat 27 martudutudu tu panjouon ni Debara maradophon bangso na marpadan dohot Debata, jala padohan "Israel" martudutudu tu saluhut marga manang bangso Israel. Hata "dalanHu" di ayat 27 on, marlapatan, nasa na piningkiran, pargulmiton nang haporseaonnasida diboto Debata do sude. Nang pe songon na buni di parnidaan ni jolma alai molo di Debata patar do saluhutna.
Dipatolhas panurirang Jesaya do muse, ia Debata, Debata saleleng ni lelengna do, na manompa nasa na adong di tano on, ndang adong Debata dungkon ni Jahowa. Ndang songon debata ni portibi on na boi loja jala mandate. Debata na manongtong, jala ro di saleleng ni lelengna do huaso dohot harajaonNa, jala tung so tardodo do angka sangkap dohot pingkiran ni Debata (patudos Jesaya 55:8, Rom 11:36).
Debata Mangalehon Gogo di Angka na Manghaposi Ibana (ayat 29-31)
Dipatorang panurirang Jesaya muse paboa halak na marhaposan jala na porsea tu Debata i do na taruli di hagogoon. Debata mangalehon gogo tu na loja, jala dipargogoi situtu angka na so margellok (ayat 29). Turpuk on songon bagabaga do taringot tu pandaonion ni Debata tu bangso i. Lapatanna, ndang na gabe marujung di sitaonon manang parungkilon angka halak na marpos ni roha jala manghirim tu Debata.
Debata do na mangalehon gogo na imbaru tu bangso i. Molo porsea jala marpanghirimon di pangurupion ni Debata, gabe margogo ma mananda hahuranganna. Marhite hagogoon na sian Tuhan i, gabe margogo ma angka jolma mangula nasa ulaonna. Ndang margogo hita molo so marhaposan tu Debata. Angka halak na marhaposan tu Debata, idaonna ma hapapatar ni huaso ni Debata, na mambahen mulak gogona sian halojaon. Tung tangkas do dipaboa, marhaimbaruon do halak na marhaposan tu Debata di ngolu si ganup ari, maruli hagogoon mardapotdapot, songon lali na marhabong, laho manaek, marlojongi alai ndang olo loja, mardalani alai ndang olo madate (ayat 31).
Kesimpulan dan Refleksi
Di pardalanan ni ngolunta on, ragam do tabolus angka parsorion na boi mambahen hita madabu tu pandelean. Olo do gabe mambahen hita madabu tu roha na sala maradophon Debata. Uju ro hamaolon, hasusaan, ponjot ni angka pingkiran, isarana uju ro angka sahit, sibahenon na soada di ngolu si ganup ari, ndang jumpang na niluluan jala ndang dapot na jinalahan, olo do gabe pintor talului ise ma na sala, jala boasa boi songon on ngolungku? Jala boi do sahat tu na manalahon Debata. Gabe ro ma sungkunsungkun di roha, boasa ma dibahen songon on tu ahu? Di dia do Debata? Ndang adil Tuhan on! Sipata gabe mambahen hita mandele jala marmungutmungut songon ungutungut pandelean ni bangso Israel uju di tano habuangan nasida.
Jotjot do hamaolon na taadopi gabe mambahen ungutungut di hita, gabe sai holan tu parungkilon i rohanta. I do na mambahen sipata gabe tariluilu ma hita, mandele, jala gabe manalahon Debata hita, gabe marbalik roha laho manghaporseai angka gogo ni portibi nang sibolis. Gabe ditundalhon haporseaonna, dilului pangurupion sian huaso na di portibi on. Alai taingot ma, manang songon dia pe parsorion masa di tongatonga ngolunta, ndang adong na buni di adopan ni Debata, patar do saluhutna di Debata. Ndang na muba holong dohot asi ni roha ni Debata. Ndang na ditadingkon Debata hita mangadopi angka parsorion i.
Marhite Jamita Minggu Sexagesima sadari on dipaingot do hita marhite ojahan Minggu na mandok "Debata na Manongtong". Manongtong do holong, asi ni roha ni Debata mandongani hita, asal ma Ibana tabahen haporusanta. Ndang na gabe muba holong dohot asi ni roha ni Debata, jala marpangulahi do rohaNa mida hita songon tu bangsoNa. Dipaingot hita marhite hata ni panurirang Jesaya mandok: "Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek, marlojongi nasida ndang olo loja, mardalani nasida ndang olo mandate" (ida Jesaya 40:31). Molo ro na bernit nang hamaolon na taadopi, tudia do hita mangalualu? Nda ingkon marhaposan tu Jahowa do hita, ingkon marlojong do hita tu Debata. Alai na jumotjot nuaeng, godang do jolma ndang manahan di sitaonon na ro di ngoluna, didok rohana asa pintor hatop ma nian salpu angka hasusaan nang hagogotan i. Gabe sai adong ma na holan mangasahon pingkiran dohot gogona.
Molo tajaha di buku Poda 3:5 didok do: "Marhaposan tu Jahowa ma ho sian nasa roham, jala unang marpangunsadean ho tu pingkiranmu sandiri." Dilehon Debata do tu hita dalan asa unang gabe tu pandelean nang tu haporsuhon ngolunta, alai tu hasonangan si saleleng ni lelengna do. Nang hata ni Jesus di Mateus 11:28-30 mandok "Ro ma hamu tu Ahu, hamu angka na loja jala na sorat, asa Hupasonang hamu! Jangkon hamu ma augangKu, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangKu jala neang do dohot na Huporsanhon." Antong, tahaporseai ma gomos Debatanta, i ma Debata na manongtong, hot ro di saleleng ni lelengna. Holan Ibana do haporusanta jala na margogoihon hita mangadopi angka na masa di portibi on. Debata na manongtong i sai na rade do mandongani, margogoihon hita di ragam ni haporsuhon na taadopi. Antong taingot ma hata ni Apostel Paulus di Rom 12:12 na mandok "Marlas ni roha ma hamu manghirim, marbenget ni roha di haporsuhon. Jugulhon hamu ma martangiang." Tuhanta ma na mangaramoti hita saluhutna. Amen. (ds)
Posting Komentar