Jamita Minggu 7 April 2024 Minggu Quasimodogeniti tarsurat di buku 1 Johannes 1 ayat 1-2 ayat 2. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mangolu di Bagasan Hatiuron." Rap ma hita mangihuthon hatoranganna.
Pendahuluan
Buku Johannes na parjolo on digurithon si Johannes laho paingothon angka halak Kristen di angka haporseaon songon na nidok ni angka pangajarion ni Tuhan Jesus, i ma asa mangolu di bagasan hasintongan dohot holong ni roha. Na sinurathon ni si Johannes di bindu na parjolo on manaringoti isi ni buku Musa na parjolo bindu 1 paboa Debata do hatiuron dohot Hata na Mangolu. Disungguli si Johannes do asa mulak tu na denggan angka jolma i jala mangolu di bagasan haporseaon. Tapaihutihut ma hatorangan ni turpuk Jamita on.
Pembahasan
Bindu na parjolo on paingothon paboa di bagasan Kristus do hita manjalo hangoluan na manongtong. Dilehon Debata do AnakNa na sasada i, asa dapotan hangoluaon dohot haluaon angka na porsea di Ibana. Manang ise na marnida, na manangihon jala na maniop Debata, i do na didok marhite hata "hami" di turpuk on. Hata "hami" na nidokna dison marlapatan, si Johannes sandiri dohot angka Apostel, nasida naung manghilala parsaoran dohot Jesus jala marnida Jesus. Ala ni i di na digurithon dison nigurithon ni "hami" tu "hamu," i ma tu ganup na torop na manorushon hakristenon i, angka siihuthon Jesus.
"Hata" i ndang holan hata sambing, alai hata na manghorhon hangoluan si saleleng ni lelengna. Dipabotohon si Johannes do taringot tu Debata na saor dohot Hata i, tagan so adong dope angka na di hasianganon, tagan so adong dope angka panompaon (ida Johannes 1:2-3). Didok mangolu dohot daging, lapatanna tuat Ibana jala dipangke pardagingon asa pajonokhon diriNa tu hajolmaon na naeng sipaluaonNa i. Uju dibaritahon angka Apostel taringot tu Jesus, ditogihon do angka jolma i asa saor tu Ama nang Anak i. Parsaoran dison i ma "Koinonia" na marlapatan "gabe parsidohot, saor." Tagan ditogihon angka Apostel i angka jolma i asa porsea tu Jesus, ditogihon do nasida asa marparsaoran lumobi ma di bagasan Jesus.
Barita na dipasahat ni angka apostel marhite Jesus i ma "Debata do Hatiuron". Ingkon do pabotohonon ni nasida sian jesus do ro hasesaan ni dosa. Molo naeng mangolu nasida jala malua sian dosa, ingkon di disondangi hatiuron na sian Debata. Marhite i diida jolma ma hatiuron ni Debata marhite hamamate ni Jesus na pangoluhon jolma. Ala nii dipalua pe hita nanaeng gabe sitindangi di hasintongan nang hata ni Jesus. Di ayat 9 dipatorang do ai dipasae Jesus do dosanta marhite silang i (1 petrus 2:24). Alai namangolu dibagasan dosa jala naso manandingkon hagiot ni dosa pamagohon parsaoran dohot Debata jala parohon hamatean (ayat 10). Molo satahi do tondi dohot pangalaho ima namangoloi Debata i ma namanghorhon parsoran dohot Debata. Laptanna di jangkon nasida do Debata jala mian Tondi ni Debata dibagasan nasida.
Di bagasan bindu na paduahon ayat 1 "asa unang mangulahon dosa hamu" Asa unang gabe siulahon dosa do angka pinompar ni huria i. Adong parngoluon na manghorhon hajahaton nanaeng sialoon ni nasida marhite hasintongan ni Kristus. "Alai molo mangulahon dosa sasahalak" Namarlapatan ma i na sipata madabu do jolma i tubagasan dosa. Unang pola mabiar angka naporsea i, ai adong do sada goar na uli naboi paluahon jolma i ima Jesus Kristus. Ai diganup portibion do asinirohaNa, umbahen i ingkon posma rohanta. Tu ganup portibi on do nian Jesus mate asa malua, alai ingkon do marpanghorhon haporseaonta maradophon asi niroha ni Tuhan i.
Kesimpulan dan Refleksi
1. Gabe halak Kristen rade laho mangihuthon sude na niajarhon ni Jesus Kristus. Jesus na gabe teladan hidup songon na didok hata na mangolu ima Tuhan Jesus Kristus.
2. Mangolu dibagasan hatiuron na sian Debata jala maninggalhon ngolu dibagasan pardagingon dohot haportibion.
Mangolu dibagasan haporseaon ima tanda ni jolma naung maninggalhon dosa. Lapatanna dibagasan parngoluonna dangbe adong sikap marhosom, teal, elat dohot late. Alai mangolu manjalo pasupasu sian Tuhan jala gabe pasupasu tu dongan jolma dohot mamboan dame.
Posting Komentar