Jamita Minggu 5 Mei 2024 Minggu Rogate tarsurat di buku Mateus 7 ayat 1-11. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Pangido ma Sai na LehononNa do." Rap ma hita mangihuthon hatoranganna.
Pendahuluan
Horas ma dihita saluhutna, marhite turpuk naung tabege jala tajahahon sian Mateus 7:1-11 on ra tubu do pamingkirion di hita mandok nunga jotjot tabege turpuk on jala tadok, nga hea tajaha on. Jala tadok muse nunga taantusi songon dia pahembanghon turpuk on. Minggunta sadari on digoari Rogate, lapatanna martangiang. Jala ojahan ni jamita di hita "Pangido ma Sai na LehononNa do." Dison lam dipahot do paboa sai adong halak Kristen na so umboto martangiang, marminggu pe sahalisahali do, boi kiraon muse piga hali ibana martangiang. Alai nang pe songon i olo do sipata diboto do tong martangiang. Na gabe parsoalan na so pola ungkap do rohana martangiang. I do umbahen na boi dohonon godang do halak naung Kristen, alai ndang mananda Debata. Godang do angka halak na malo, na marugamo alai ndang ditanda Debata. Godang do angka jolma na malo, na marugamo alai maol rohana porsea di pangajarion nang di Hata ni Debata. Boi do taida, godang dope songon na borat rohana mangoloi martangiang, isarana molo dipangido mamboan tangiang di sada parpunguan, partangiangan manang di ibadah. Taringot tu turpuk ni Jamita on dipabotohon do tu hita, songon dia do sasintongna halak Kristen martangiang, jala songon dia do manghangoluhon angka naung tapasahat di tangiang i.
Pembahasan
Mateus 7:1-11, di turpuk on diajarhon Jesus do tu hita, songon dia hita manjaga parangenta, marhahonaan tu hasalaan ni angka donganta. Hata ni Debata di Evangelium Mateus on pabotohon tu hita, gabe hata sipaingot ma on tu angka siboto surat, dohot halak Parise, angka na marhuaso na jat, na ginjang rohana, angka na sai muruk, dohot angka joma na ginjang marroha na sai holan patingkoshon dirina. Ala ni i do didok Debata hata poda manang sipaingot marhite na pinasahat ni turpuk on tu angka na manjaha di huria na parjolo, nang tu hita pe di partingkian si nuaeng. Sada poda sian Jesus, i ma "unang hamu manguhumuhumi, asa unang hona uhum hamu" (ayat 1). Nian adong do jolma naung ulaonna manguhumi, songon panguhum di hita manisia. Alai panguhum na sintong holan Debata do. Ai panguhum na adong di portibi on mansai mura do pauba manang pabalikhon hasintongan di portibi on.
Poda asa unang manguhumi dipabotohon do tu angka jolma nang ru angka sisean. Molo taida di bindu na parjolo andorang turpuk on, diajari Jesus do angka sisean i taringot tu na manesa dosa, di Evangelium Mateus 6:12 didok, "sesa ma dosanami songon panesanami di dosa ni angka na mardosa tu hami." Sian on boi idaonta songon dia do jolma boi masisesaan dosa molo sai olo dope manguhumi donganna. Songon dia ma Debata manesa dosa ni sasahalak jolma molo ibana sandiri pe ndang olo manesa dosa ni donganna (ida Mateus 7:1). Mamungka sian partingkian ni Jesus sasintongna nunga sai adong na sai mangalului hasalaan ni Jesus. Manang tu dia pe laho Jesus sai diihuthon nasida do, jala sai dilului do dalah asa tung jumpang nian hasalaan ni Jesus, i ma songon angka halak Parise, Siboto surat, halak Saduki na sai mangihuthon jala mangalului hasalaan. Nang na laho marsiajar tahi nasida, alai holan laho mangalului hasalaan do asa tung madabu nian Jesus jala laos i ma na gabe dalan di nasida asa paroaroahon Jesus.
Molo di partingkian si nuaeng on, tudos do i songon pigapiga halak na adong di media sosial nuaeng na mangihuthon angka akun-akun ni angka naposo ni Debata manang angka na asing pe, alai ndang na laho marsiajar alai laho mandabuhon do, mandiori hasalaan. Diihuthon nasida be do manang tu dia pe Jesus laho, asa tung jumpang nasida nian hasalahan ni Jesus, laos boi ma nian uhuman nasida Jesus i. Sai dibaritahon do angka barita na so suman jala sai didok angka barita na so tutu holan laho mandabuhon Jesus. Songon i do nang uju manukkun pe nasida, ndang na asa antus nasida taringot tu Hata ni Jesus i, alai holan laho mangalului hasalaan ni Jesus do nasida marhite angka sungkunsungkun i. Di rohanasida nian, sadihari silap ma Hata ni Jesus, laos disi ma tingkina patupaon nasida dalan laho manguhum Jesus.
Molo taida di Evangelium Johannes 8:3-6, on ma songon sada turpuk na pataridahon angka siboto surat, halak Parise na laho mandabuhon Jesus, laho manguhumi Jesus. Alai songon dia ma alus ni Jesus mangadopi angka jolma na sai mandiori hasalaa i. Tongtong do dipasip Jesus jala ndang pola gabe mambahen marsak roha ni Jesus ala ni i. On ma sada parsiajaran sian Tuhanta Jesus songon dia do hita laho mangadopi angka panghataion na so denggan na binahen ni jolma tu hita di parngoluanta. Songon i do nang na masa nuaeng di angka media sosial, unang ma nian gabe olo hita angka halak Kristen gabe tartuktuk, jala gabe tubu angka hansit ni roha, lumobi ma molo pola gabe laos tapatupa muse angka dalan na asing songon dalanta mambaloshon angka pangalaho ni jolma na tu hita, lumobi ma molo pola sahat tu na manguhumi. Ala molo gabe ulaon manguhumi do na taulahon, songon naung didok di hata i, sarupa ma parangenta songon angka jolma si songon i.
Sada do alana boasa asa tung didok asa unang manguhumi jolma i. Didok "asa unang hona uhum hamu." Jolma na sai olo manguhumi donganna, mangarajumi dirina ndang marsala manang na sai tingkos di ngoluna, alai ingot ma hita hona uhum do nang ibana pe di angka aris sogot. Ndang sian donganna jaloonna, alai sian Debata do. Ai Debata do panguhum na sintong. Dumokdok do uhum tu jolma na sai olo mambahen si songon i. Molo olo hita manguhumi angka donganta, sae do i holan di portibi on alai molo Debata manguhumi hita, ala ni angka pambahenanta tung mansai dokdok do sijaloonta. Ingkon tangkas do tatanda dirinta, hagaleonta, hahurangan dohot angka na asing, asa tatanda nang donganta. Unang sai taida hasalahan ni dongan holan laho manghuphupi hasalaanta.
Aha na ringkot di ngolu ni angka jolma i, rade do dibahen Debata, alai dipasahat do tu jolma asa olo nang pasahathon pangidoanna di bagasan tangiang. Adong tolu pandohan na jotjot dipangke taringot tangiang, i ma mangido, mangalului dohot manuktuhi. Tona na arga do i sian Tuhanta Jesus, ala ni i ndada sae holan sahali tapangido tu Tuhan i, dung i laos singkop sude, ingkon do tongtong jala marsitutu hita mangido tu Debata.
Molo di halak Batak adong poda na mandok "Di toru do tangan mangido." Lapatanna ndang sian ginjang ni roha. Mangelek do jolma molo mangido ndang gabe mamaksa. Boasa ingkon mangido? Ala so adong di diri ni jolma i, umbahen na gabe ro mangido: Ala ni i, asa boi dapotan, ingkon sian roha na toruk do mangido. Na boi do jolma tarhirim mangido tu donganna. Alai ndang songon i molo tu Debata.
Didok Tuhanta Jesus, "pangido hamu ma, sai na lehononNa do tu hamu." Molo marsitutu jolma mangido tu Debata ndang tagamon tarhirim ibana. Alai nang pe songon i, ringkot do denggan taantusi hata ni Debata di turpuk on, ndang na mandok asa manang aha pe na tapangido tu Debata gabe sai ingkon dilehon. Molo tapangido angka na ringkot tu Debata loason ni Debata do hita dapotan disi. Asa unang sala hita mangantusi tangiang.
Godang jolma sai marungutungut mandok ndang dioloi Debata tangiangna, nunga marpiga taon dipangido tu Debata hape laos so dapotsa. Didok do, "sai na lehononNa do tu hamu." Dilehon do dalan tu hita laho mandapot angka na taparsinta, na talului dohot na tahasiholi. Songon i do nang pandohan "halak na sai mangalului sai na jumpangan do." Molo tu Debata do hita laho mangalului na ringkot, sai patuduhononNa do dalan jala laos jumpang do na talului i.
Nang hata na mandok asa manuktuhi pe, talapati ma songon na manuktuhi pintu ni sada bagas. Sai diungkap do pintu tu angka na manuktuhi. Ingkon denggan do hita laho mangantusi Jamita on, asa unang songon na neang tangiang i, disi didok pintor saut. Jala ndang adong di hita gogo manang huaso laho mandasdas Debata laho mangoloi pangidoanta. Na nidok ni Jesus i ma, "sai dialusi Debata do jolma na mangido tu Ibana." Godang do tudosan di Padan na Imbaru na pinangke ni Jesus taringot tu tangiang. Sada hataridaan ni jolma na marsitutu martangiang i ma na so mansadi martangiang.
Kesimpulan dan Refleksi
Parjolo, halak naung mananda dirina ingkon tongtong do patutoru roha jala manolsoli angka na hurang di pambahenanna. Unang ma nian sai mamintori diri jala mangetong na so adong hagaleonna asa unang madabu tu pangunjunan, gabe olo manguhumuhumi donganna. Ingkon sai rade do hita marnida haulion ni dongan asa unang dibaloshon Debata paruhuman tu ibana siala hadirionta na sai olo manalahon dongan. So tung adong hita na mamuji diri na sai mangarajumi dirina mandok ias sian dosa.
Paduahon, ndang na sai singkop di ngolunta angka na taparsita. Nang pe gogo hita mangula, alai sai godang dope na so jumpang na tajalahi. Molo masa pe si songon i, unang ma gabe lam holang hita sian Debata. Gariada ingkon lam solhot jala jugul do hita mangido tu Ibana marhite tangiang.
Patoluhon, dipaingot ojahan ni minggu on do hita asa manghaporseai panarihonon ni Debata di angka na ringkot di parngoluonta. Lam tapapos ma rohanta, ai sai jaloonta do angka na tapangido tu Ibana di bagasan tangiang. Amen.
Posting Komentar