Jamita Minggu 12 Mei 2024 - Psalmen 1 ayat 1-6 - Timothy Saragi

Jamita Minggu 12 Mei 2024 Minggu Exaudi tarsurat di buku Psalmen 1 ayat 1-6. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Partuaon ni Halak Partigor." Rap ma hita mangihuthon hatoranganna. 

Pendahuluan 

Psalmen na marlapatan ende pujipujian tu Debata sian angka na porsea taringot tu masa di ngoluna maradophon Debata. Psalmen bindu 1 on, digoari do I : ende habisuhon. Boasa didok ende habisuhon? Ala marisihon poda laho mangajarhon dalan tu ganup jolma manang dia sipareahonna. Angka dia ma na disoarahon Psalmen bindu 1 on, asa didok gabe sada ende habisuhon? Godang do rumang ni pangalaho ni angka jolma di zaman nuaeng on, na sai jotjot manegai pikkiran halak na porsea I, jala sai adong do halak na porsea i gabe terpengaruh di angka halak parjahat. Ala di ida parngoluon ni parjahat i sai hira na soadong hambatan dinalaho mamolus ariari nasida. Ido ra na mambaen halak na porsea i gabe olo manimbil sian dalan ni Debata. 

On ma na naeng idaonta sian turpukta on asa marbisuk nian hallak na porsea I mandalani parngoluonna hombar tu lomo ni roha ni Debata, jala diboto pasidinghon pangalaho naso dihalomohon Debata. Asa taboto dia ma sipillitonta laho mandalni parngoluan on, molo di hata parjolo di turpuk on dipungka do mandok “martua” jala di ujung ni ayat on ditutup do sian hata “lonong”. On ma na naeng idaonta marhite turpuk on. 

Advertisement - Scroll untuk terus membaca postingan.

Pembahasan 

Songon topik manang tema na diangkat sian jamita on didok ma i “hatuaon ni halak na tigor roha”. Antong halak na martua ima angka na tigor roha. Songon dia ma halak na tigor roha i? ima halak na so olo “mangihuthon” (Ind. Berjalan) tahi ni angka parjahat, na so olo jongjong (Ind. Berdiri) tu dalan ni angka pardosa, jala na so olo sahundulan (Ind. Duduk) dohot angka pangarahei. Adong 3 kata (Mangihuthon, Jongjong, Sahundulan) na ringkot asa tauhal hata i asa taboto songon dia do ngolu na martua i. Molo di bahasa Indonesia 3 kata on ima : Berjalan, Berdiri, Duduk. 

1. Na so olo mangihuthon (berjalan), lapatanna unang sapikkiran dohot parjahat, pardosa, nang dohot pangarehei. 

2. Na so olo jongjong (berdiri), molo di hata Heber “Lo amid” lapatanna secara harafiah, unang sajabu, unang saroha, unang sarombang dohot halak na tolu i. 

3. Na so olo sahundulan (duduk), molo di hata Heber “Mosab” lapatanna unang sepakat, sakonsep, dohot parjahat, pardosa, nang dohot pangarehei. 

Halak na mandapot hatuaon ima halak na so olo sadalan, saroha, sapingkiran, sajabu, sarombang, satahi, dohot angka halak parjahat, pardosa, nang pangarehei.

Antong songon dia do huroa na didok na parjahat, pardosa, dohot pangarehei? Ai nda pardosa do hita sude? 

Parjolo : Molo didok angka “parjahat” (Heber : Resaim), lapatanna ima na so parduli tu Debata, tu agama, tu Hata ni Debata. on ma nasida. Ido umbaen didok di ginjang nakkin, unang sapingkiran tu halak sisongoni. 

Paduahon : Molo didok angka “pardosa” (Heber : Hattat/Hattayim), lapatanna sai torus mangulahon na salah, ndang lomo rohana di aturan/patik, sai manimbil sian hatigoran. 

Patoluhon : Molo didok angka “pangarehei” (Heber : Lesim), lapatanna holan na manguruurui halak, manghata dongan, silului tihas ni donganna, pailahon dongan, parhata tundal.  

Songoni ma sifat-sifat ni 3 jenis i alani do umbahen didok asa unang sarombang, sapikkiran, saroha, sajabu, sapandapot, rap dohot tu halak sisongoni. 

Na mangihut halak na martua ima halak na sai patik ni Jahowa do lomo ni rohana, jala sai i do dipingkiri rohana arian dohot borngin (ay. 2). Hata “Lomo ni rohana” (Heber : Hepes), lapatanna sai mauas, seleranya tinggi, keinginan besar, tu aha..? tu patik ni Jahowa. Sai masihol, mauas, male, di hata ni Debata. Dipangke do tingkina laho manangihon jala mangulahon hata ni Jahowa. 

Nuaeng idaonta ma muse aha do hatuaon ni halak na tigor roha? Songon tema ni jamitta on.

Marasing do parngoluaon ni halak na tigor roha tu halak parjahat. Halak na tigor roha, hatuaonna ima di ayat 3 i : “Songon hau na disuan di topi ni batang aek”. Tontu hau na disuan di topi batang aek, bahan makanan na selalu tersedia, persediaan makanan selalu cukup, dang tagamon hahurangan. Marparbue denggan. Musim kering pun tahan. Angka alogo na mangullus pe dang gabe mambaen rumpak bonana. Akar na pasti kokoh, kuat, sahat tu tano. Ima gombaran ni halak na tigor roha. Di topi batang aek na nidok na manggombarhon peranan ni Tondi Porbadia (Joh. 7:38-39). Jadi dibagasan ngolu ni halak na tigor roha i, mangula do Tondi Porbadia na tongtong mangurupi, mangapuli, mandongani. Aha pe na masa di ngoluna pasti hot do hadirionna. Molo pe hurangan pasti sabar, ditingki di haporsuhon pe dang marungutungut tu Debata. Ro pe angka parungkilon mangarongrong parngoluonna, alai ndang mumpat ia haporseaonna. Jala halak na tigor roha marparbue do i di ngoluna. Songon hata Batak mandok “Tarida do hau sian parbuena”, tarsongon parbue ni halak na sai olo mangulahon Hata ni Debata sai na manjalo hangoluan ma i jala saluhut na ringkot di ngoluna disarihon Debata. 

Alai marasing sian angka halak parjahat, didok songon orbuk, na hinabangkon ni alogo do nasida. Adong tolu uhuman na digombarhon ni parpsalmen on gabe uhuman tu halak parjahat i : 

1. Songon orbuk na hinabangkon ni alogo ima gombaran saluhut namarhuaso naso tarida di portibion laho menghancurkan pardalanan ni ngolu nasida, jala malua nasida sian pasupasu ni Debata (Ef. 2:2). 

2. Dang manahan angka parjahat i maradophon paruhuman, ndang adong na boi jongjong molo dung ro rimas ni Debata (Psalm. 76:8). Jadi mura do nasida stress, frustasi, mura gale, molo dung ro na masai. Alani dang pola mangapian tu angka halak parjahat. 

3. Lonong do anggo dalan ni parjahat. 

Advertisement - Scroll untuk terus membaca postingan.

Kesimpulan dan Refleksi 

Marragam do dalan dilehon Debata tu angka jolma laho mandalani ngoluna. Songon halak na porsea ingkon do mangolu dibagasan ruhut-ruhut naung ditontuhon Debata ima marhite na mangulahon Hata ni Debata na tarsurat di Bibel i. Molo taulahon i dapot ma hatuaon (hangoluan) alai molo so diulahon gabe lonong ma hita (hamagoan). 

Ngolu on adong do 2 pilihan, hangoluan manang hamagoan. Tontu pillitonta ma hangoluan, ima marhite na gabe halak na tigor roha hita. Na tongtong manghalomohon Hata ni Jahowa jala na sai i do dipingkiri rohanta arian nang borngin. Asa dapot hatuaon hita jala nunga tangkas taboto songon dia hatuaon ni halak na tigor roha. Jala nunga tangkas taboto songon dia uhuman na didapot ni angka halak parjahat. Antong taulahon ma Hata ni Debata, tapadenggan ma ngolunta, asa tanda hita anak ni Debata, jala aha pe na taula ingkon ma hombar tu lomo ni rohaNa. 

Catatan: 

Semua iklan yang terdapat pada website dan tulisan ini tidak ada hubungannya dengan timothysaragi.com. 

Dapatkan update artikel terbaru dari timothysaragi.com. Mari bergabung di Channel Telegram "timothysaragi.com Artikel Update", caranya klik link https://t.me/timothysaragicomupdate, kemudian join. Anda harus install aplikasi Telegram terlebih dulu di ponsel.