Jamita Minggu 26 Mei 2024 Minggu Trinitatis tarsurat di buku Jesaya 6 ayat 1-8. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Na Badia, na Badia, na Badia do Jahowa Sebaot." Rap ma hita mangihuthon hatoranganna.
Pendahuluan
Masuk ma hita nuaeng tu Minggu Trinitatis, i ma minggu na manaringoti taringot tu Hasitolusadaon ni Debata. Manghatahon taringot hasitolusadaon ni Debata martudutudu do i manghatahon taringot tu Hapapatar ni Debata marhite goarNa, huasoNa, harajaonNa, patikNa, uhumNa dohot hatongtonganNa. Dipapatar Debata do hadirionNa tu na tinompaNa ndada ala ni pangidoan ni na tinompa i manang sian roharoha ni na tinompa, alai marharoroan sandiri do i sian Debata. Manang di dia Debata papatarhon hadirionNa, disi ma adong parsuruon laho manghatahon jala manghatidanghon haluaon naung pinatupa ni Debata. Turpuk ni Jamita on i ma hapapatar ni hamuliaon dohot hasangapon ni Debata tu si Jesaya.
Pembahasan
Turpuk ni Jamita on i ma pangungkapon na mansai bolon jala na marmulia na masa tu si Jesaya. Ndada na marharoroan sian rohana manang sian pingkiranna, manang sian pangidoanna masa pangungkapon i, alai sian Jahowa Debata do. Sai dijou Jahowa Debata do bangsoNa i marhite si Jesaya asa marhamubaon ni roha (ida Jesaya 1:1-20). Jadi ro ma Jahowa Debata diida si Jesaya. Rambu ni paheannNa manghuphupi bagas joro, jala diida ibana ma muse jongjong di atasna surusuruan Serapim na marhabong onom. Ungkap jala patar diida si Jesaya hatimbulon dohot hamuliaon ni Debata, harajaon na manongtong ro jala masuk tu harajaon ni portibi on na olo salpu.
Marendei ma angka surusuruan i mandok: na badia, na badia, na badia do Jahowa Sebaot. Ende habadiaon, ende hamuliaon do soara ni surusuruan i, gok timus ma tutu inganan i jala humuntal ma ojahan ni tiang bagas joro i. Na badia, na badia, na badia do Jahowa Sebaot, i ma panghatindanghonon ni angka surusuruan taringot Jahowa, Debata ni sude angka debata, Raja di saluhut raja, Panggomgom di saluhut panggomgomi. Ibana do Panompa, Ibana do na marmudumudu angka na tinompaNa i, jala dapotan hatuaon do ganup bangso na marDebatahon Jahowa. Jahowa na sun timbul jala na marmulia.
Dung diida si Jesaya na masa i, ditanda ma dirina sahalak na mardosa jala na so tama situtu do ibana marnida saluhut na niidana i. Manungkap ma ibana jala tung jea ma dihilala ibana. Tutu do nian ndang adong boi sipardosa marnida hamuliaon dohot hasangapon ni Debata na sun timbul. ai hamatean ma jambarna. Alai turpuk jamita on mangajarhon jala mamaritahon dohot manghatindanghon tu hita, ndang ala ni dosa umbahen sundat hita marnida hasangapon dohot hamuliaon ni Debata dingolunta. Ndada na mandok dipaloas Jahowa hita gabe pardosa. Alai marhite na boi hita marnida dohot manghilala hamuliaon dohot hatimbulon angka jadijadian ni tanganNa, tama situtu do hita unduk jala dipaserep ma rohanta, jala marhite i ma dijou hita lam pasolhothon dirinta tu Debata di ragam na masa dingolunta.
Kesimpulan dan Refleksi
Turpuk jamita on mangajarhon dohot mamodai hita taringot habadiaon dohot hatimbulon ni Jahowa Debata. Boi dope hita marnida, Dohot manghilala habadiaon, hamuliaon dohot hatimbulon angka pambahenan ni Jahowa Debata dingolunta? Manang na so adong be tingki laho mangarimangi saluhut hamuliaon dohot hatimbulon ni Jahowa Debatanta. Jolma na martua ma hita molo boi hita marnida dohot manghilala habadiaon dohot hatimbulon ni Jahowa Debata dingolunta. Tahatindanghon ma hatimbulon dohot habadiaon ni Jahowa Debata marhite haoloonta mangulahon lomo ni rohana, jala barani hita manulak angka parange na jahat.
1 komentar
~Alok