Jamita Kamis 9 Mei 2024 Parningotan di Ari Hananaek ni Jesus tarsurat di buku Lukas 24 ayat 44-53. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Tarhinsat Jesus tu Banua Ginjang dohot ma Hita Marlas ni Roha." Rap ma hita mangihuthon hatoranganna.
Pendahuluan
Topik ni jamita on manogihon hita di ari parningotan hananaek ni Jesus Kristus asa dohot hita marlas ni roha. Alai molo sian hajolmaon songon na maol do auhononhon i. Ai taboto do apala di ombas i ma marsirang Jesus sian angka siseanNa. On ma na paduahalihon angka sisean i marsirang sian Guru na hinaholongan ni rohanasida. Ombas na parjolo i ma uju ditangkup Jesus jala dipasahat tu hamatean marhite na di parsilangkon. Sitaonon dohot hamatean do manirang Jesus sian angka siseanNa. Siala na masa i sasintongna gabe mabiar rohanasida. Ndada holan i, lungun situtu do dihilala angka sisean dohot angka siihuthon Jesus ala ni parsirangan i. Lumobi ma marsirang sian na hinaholongan, lumobi molo marsirang ala ni hamatean. Ai ndang boi be pajumpang, nunga mansohot saluhut angka parsaoran dohot holong ni roha.
Alai andul do na masa songon na dipatorang di turpuk on. Na manaek do Jesus tu banua ginjang jala sirang ma Ibana sian angka siseanNa, alai ndang lungun roha ni angka sisean i. Gariada tahe marlas ni roha do nasida. Tangkas do i dipatorang di ayat 52: "Marlas ni roha situtu." Ndada holan marlas ni roha nasida, alai marlas ni roha situtu. Ala ni i gabe tubu ma sungkunsungkun: Aha do na mambahen angka sisean i marlas ni roha?
Pembahasan
Tangkas do alus ni sungkunsungkun i, i ma ala nunga lam diantusi angka sisean i sangkap ni Debata. Dung hehe Jesus sian na mate, adong do partingkian na ganjang i ma 40 ari dipangke Jesus laho patuduhon diriNa tu angka siseanNa dohot tu angka na torop na mangihuthon Ibana na sai laon. I ma dalan ni Jesus laho manungkoli haporseaonnasida jala laho paratarata pangajarion naung dipasahat Jesus uju manghobasi dope Ibana rap dohot siseanNa. Jala tutu tung godang do panghorhon ni i tu angka sisean. Nasailaon maol do nasida mangantusi jala manghaporseai Jesus, pola do didok Jesus tu nasida: "Oe hamu, na hurang roha jala na losok manghaporseai saluhut na hinatahon ni angka panurirang i!" (ida Lukas 24:25). Alai nuaeng dung dipatorang Jesus muse angka naung disurathon di patik ni si Musa, di angka panurirang dohot di buku Psalmen taringot tu Jesus, jala dung dibuhai Jesus rohanasida gabe diantusi nasida ma angka na tarsurat i. Laos tangkas ma di roha ni sisean i, marhite hananaek ni Jesus tu banua ginjang lam patar ma huasoNa na sumurung i. Ibana do Tuhan jala Raja na marhuaso. Sian banua ginjang do haroroNa, ndang sian portibi on, jala mulak ma muse Ibana tu hasangaponNa. Jala marhite hananaekNa tu banua ginjang lam dipasingkop Jesus ma holongNa tu angka na porsea. Ai na manaek ma Ibana tu banua ginjang laho parade inganan tu angka na porsea.
Dung dibuhai Jesus roha ni angka sisean i gabe diantusi nasida ma angka tarsurat i (ayat 45). Tutu Jesus do mambuhai rohanasida, alai adong roha na marsitutu di angka sisean i mambuha rohanasida laos i do gabe dalan di nasida boi margantusi angka na tarsurat i. Ala pos do rohanasida di sangkap haluaon na pinarade ni Debata di ngolunasida. Laos pos ni roha i do na patogu roha ni angka sisean manjalo jala mangulahon parsuruon ni Jesus laho manghatindanghon barita haluaon na pinatupa ni Jesus, laho manjouhon saluhut bangso asa marhamubaon. Disomba nasida ma Jesus, dung i mulak ma nasida di bagasan las ni roha godang huhut tongtong ma nasida mamujinuji Debata. Tarlumobi lam ganda ma tutu las ni roha ni angka sisean i ala tangkas do diantusi jala dihaporseai nasida paboa na tongtong do dipasupasu Tuhan i nasida. Ai di na tarhinsat Jesus tu banua ginjang dipaherbang do tanganNa mamasumasu nasida. Lam togu ma nasida, ai manongtong do Tuhan i mamasumasu nasida. I do ojahan na arga di nasida gabe marlas ni roha.
Kesimpulan dan Refleksi
Sada joujou na arga do on, jala sude do hita manghirim asa boi tongtong marlas ni roha di bagasan ngolunta. Alai di pardalanan ni ngolunta godang do sipata na mangambati hita asa marlas ni roha. Angka na masa di ngolunta on jotjot do mambahen hita maol marlas ni roha. Baliksa tahe godang do na boi patubu arsak ni roha di hita. Boha ma tarbahen hita marlas ni roha molo masa angka na rundut di ngolunta, isarana songon maol ni na mangatur angka ianakhon, maol mangalului pandaraman ni ngolu, olo do muse masa angka parsahiton na posa, molo ndang boi dos roha ni na mardongan saripe laho mangalugahon ngolu parrumatanggaon, molo nunga jojorjojor angka anak dohot boru naung magodang di jolonta hape ndang marna ro sirongkap ni tondina, molo ndang maralus dope angka tangiangta di jolo ni Tuhan i hape nunga leleng taparungkilhon, dohot lan dope angka na asing na boi patubu arsak ni roha di hita. Boha ma tarbahen hita marlas ni roha molo masa angka na rundut i? Maol do i molo pingkiranta tapangasahon mangadopi saluhut na masa i.
Alai molo taauhon songon na dipatorang di turpuk on, tabuhai ma pingkiranta dohot rohanta mangantusi sangkap dohot holong ni roha ni Tuhan i di ngolunta, tontu dapot hita do ojahan na togu manghaporseai Tuhan i jala laos disi ma boi jumpang hita las ni roha di ngolunta. Antong marhite parningotan di ari hananaek ni Tuhan Jesus sadari on, naeng ma tatambortambori haporseaonta tu Tuhan i asa boi jumpang angka si las ni roha di bagasan ngolunta. Pos ma rohanta, gok do huaso ni Tuhan i mangurupi hita di angka na borat na tadopi di ngolunta tuk do Ibana mangaramoti jala manjagai hita asa unang marmara, manongtong do Ibana mamasumasu hita di saluhut gulmit ni ngolunta. Asa di bagasan haporseaon na togu rap ma taingot hata ni endenta di Buku Ende nomor 763 "Molo Jesus DonganMi" ayat 1 mandok "molo Jesus donganmi, las roham. Jesus i pangurupim, las roham. Hot haporseaonmi dohot pos ni rohami. Mardonganhon Jesus i las roham. Las roham, las roham. Mardonganhon Jesus i, las roham. Marsinondang ma di ho bintang panghirimon i. Mardonganhon Jesus i las roham." Amen.
Posting Komentar