Jamita Minggu 23 Juni 2024 Minggu Paopathon Dung Trinitatis tarsurat di buku Psalmen 107 ayat 23-32. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Joujou tu Jahowa di Nasa Hagogotan." Rap ma hita mangihuthon hatoranganna.
Pendahuluan
Psalmen 107 on manurathon ende na patuduhon roha mauliate ala manjalo haluaon sian Debata. Haluaon na nidokna dison, i ma ala uju masa hagogotan, joujou do angka na porsea i tu Debata. Jala ditangihon Debata do joujounasida i. Dipalua Debata do nasida sian angka hagogotan i. Mandok mauliate do nasida tu Debata ala ni asi dohot holong ni rohaNa tu bangsoNa, nang tu halak na porsea jala na marsigantung tu Ibana.
Dipalua do nasida sian hagogotan. Dison ma patar, hasatiaon ni Debata di angka na hinaholonganNa. Ai jotjot do ndang tarpingkiran ni jolma i dalan ni Debata di ngoluna. Lobi sian na piningkiran manang na hinirim ni jolma i tarpatupa Debata do. Dilehon Debata do angka tingki di jolma i asa mananda di asi dohot holong ni roha ni Debata. Marhite na mangurupi nasida uju masa hagogotan. Hinorhon ni i asa tangkas ma nian ditanda bangsoNa i ise do Debata, parasiroha jala pardengganbasa na sumurung i.
Pembahasan
Dipaboa do di turpuk on adong angka halak na marparao mamolus angka laut na bolon, mandapothon muara. Alai di tonga ni laut i, masa ma habahaba jala dipahehe ma galumbang, hinorhon ni galumbang i boi do gabe karom kapal i. Ala ni galumbang na balga dohot habahaba na gogo jala ndang mansohot, gabe mabiar be do nasida na di kapal i. Malala do rohanasida hinorhon ni hamamago i, jala joujou ma nasida tu Debata Jahowa mangido asa malua sian hasosahan i.
Pola naeng lonong nama paraunasida i, alai di bagasan parsitutuon dohot haporseaon na mangolu, joujou do nasida tu Debata Jahowa, mangido pangurupion, asa dipalua nasida sian parmaraan i. Asa boi nasida tolhas tu muara lomo ni rohanasida. Ditangihon Debata do joujounasida na mangido pangurupion i asa malua. Asi do roha ni Debata Jahowa di nasida.
Dipalua do nasida sian parmaraan i. Mansohot ma habahaba i, menak jala demak ma muse nang laut i. Ditorushon nasida ma muse na marparau i manuju muara, jala tutu do sahat nasida tu muara na tinuju ni rohanasida i. Asi ni roha ni Jahowa sambing do na mangurupi nasida umbahen na so mago nasida di tonga ni laut i. Halongangan do na binahen ni Debata tu nasida, naung paluahon nasida sian galumbang ni laut i.
Sahat do nasida tu muara i di bagasan hahipason jala sonang situtu. Dung i dipasahat nasida ma pamujionna tu Debata di bagasan roha mauliate. Mamuji Debata nasida ala ni habalgaonNa i dohot ala ni holong ni roha ni Debata na tu nasida, Debata na rade paluahon nasida uju masa hagogotan.
Kesimpulan dan Refleksi
Sada na diondolhon di turpuk ni Jamita on i ma mandok mauiate tu Debata di panandaonta angka na porsea di balga ni asi dohot holong ni roha ni Debata na marmudu jala mangaramoti hita di pardalanan ni ngolunta be, sahat ro di sadari on. Mandok mauliate tu Debata ala parasiroha jala pardenggan basa do Ibana. Patar do asi dohot holong ni roha ni Debata di pardalanan ni ngolunta, ndang holan na paluahon hita sian ragam ni parmaraan, dipamalum do nang hita sian angka parsahiton, jala diurupi di tingki hagogotan.
Lumobi sian i sude, dilehon do asi ni rohaNa tu hita jolma. Di naung ro Tuhan Jesus Kristus tu portibi on. Ibana do na paluahon hita sian goloman ni dosa, sibolis dohot hamatean, jala dibasabasahon tu hita hangoluan na saleleng-ni lelengna.
Di pardalanan ni ngolunta songon halak Kristen manang angka na porsea hita, ringkot do pabotohononta pambahenan ni Debata di ngolunta on, tu angka donganta, nang tu ianakhon manang tu angka pinomparta. Molo tabaritahon taringot tu Debata, na marasi roha jala na marholong ni roha, pardengganbasa na sumurung, gabe tamba do pos ni roha ni nasida, di na mamolus manang mardalan nasida di nasa ngoluna di portibi on.
Nang pe sipata tarsosak na deba, alai molo marningot do nasida di angka naung tapasahat tu nasida taringot tu asi dohot holong ni roha ni Debata di hita, gabe margogo do nasida. Tahirim do nasida asa gabe angka jolma na tongtong mangalualu tu Debata di ganup hagogotannasida be.
Di Psalmen 50:15 didok, " ... jou ma Ahu jumpa di ari hagogotan, asa hupalua ho, asa dipuji ho Ahu." On ma na paingothon hita asa tongtong margogo jala mangula di nasa ngolu di portibi on di bagasan pos ni roha tu Debata. Asa gabe halak na tongtong marlas ni roha hita, mandok mauliate ma hita tu Debata di sude asi ni roha dohot denggan ni basaNa di ngolunta. Amen.
Posting Komentar