Epistel Minggu 21 Juli 2024 - Markus 6 ayat 30-34 - Timothy Saragi

Epistel Minggu 21 Juli 2024 Minggu Paualuhon Dung Trinitatis tarsurat di buku Markus 6 ayat 30 - 34. Tapabagas ma pangantusionta taringot tu turpuk ni Epistel on. Hombar tu Almanak ni Hurianta dibahen ma ojahan ni Epistel "Debata Marmahani RuasNa." Rap ma hita mangihuthon hatoranganna. 

Pendahuluan 

Evangelium Markus on digoari do "Barita na Uli di Harajaon ni Debata" ala godang do impola ni Evangelium Markus on na manaringoti "Harajaon ni Debata" na dipapatar di bagasan Jesus Kristus. Jala mangihuthon angka pandapot ni halak na pistar di angka parsiajaran Teologi mandok Evangelium Markus on ma buku na tumua (na parjolo adong) di Padan na Imbaru. Singkop do di Barita na Uli na sinurat ni si Markus on angka pangajarion ni Jesus asa gabe panean angka na porsea i di harajaon ni Debata. Sada na mansai tangkas di Evangelium markus on i ma Jamita ni Tuhan Jesus di dolok, taringot Harajaon ni Debata. 

Turpuk ni Epistel sada do dohot Evangelium Markus 6:30-44 i ma na manurathon di na tinamue ni Jesus lima ribu halak jala patar do disi huaso ni Debata. Alai turpuk ni Epistel dibahen holan sian Markus 6:30-34 ma, na mangondolhon "Debata Marmahani RuasNa." 

Advertisement - Scroll untuk terus membaca postingan.

Pembahasan 

Dung tardidi Tuhan Jesus di batang aek Jordan laos i ma mula ni panghobasionNa, pintor sar do barita tu sude luat, taringot tu pangajarion dohot angka tanda halongangan na pinatupa ni Jesus. Mansai godang do na mangihuthon Jesus sian angka luat, laho tumangihon pangajarionNa dohot naeng marnida angka tanda halongangan na pinatupaNa. 

Ditodo Jesus do angka siseanNa asa adong donganNa laho padarathon barita Harajaon ni Debata tu saluhut jolma. Di turpuk ni Epistel on, di na ro angka sisean i mandapothon Tuhan Jesus dung diulahon nasida parsuruon ni Jesus, asa ro do nasida pabotohon tu Jesus angka aha ma naung diula jala naung niajarhon nasida. I do tutu tingkosna, molo dilehon sasahalak tu hita sada ulaon, molo dung nioloan jala ni ulahon ingkon paboahononhon do angka aha ma naung niula, tu na marsuru iba. I do molo sisean. Nian di turpuk on ndang pola digurithon angka aha ma barita na pinasahat ni angka sisean i tu Jesus, alai na tangkas dipaboa nasida do sude naniula jala naniajarhon nasida i tu Tuhan Jesus. 

Diboto Jesus do paboa naung loja angka siseanNa i, ala ni i do didok Jesus tu nasida "... Sumurut ma hamu, tungkan na suhi an, pahosahon saotik!" Ai torop do halak marlaho ro tu nasida; gari mangan, gari so sadihari. Sian hata ni Jesus on naeng antusanta paboa Ibana pe dilehon do partingkian tu angka siseanNa i asa pahosahon. Adong do partingkian pahosahon dibahen Jesus. Ndang gabe torus mulaulaon. 

Mansai ringkot do antusanta na nidok ni Tuhan Jesus on tu angka sisean na mangalehon partingkian pahosahon sian angka ulaon. Ala ni i borhat do Jesus rap dohot sisean i marparau tu inganan na suhi. 

Di na borhat nasida tu inganan na suhi i, torop do na marnida jala mananda nasida na borhat i, gabe sian darat ma marlojong angka na torop i, asa di na tardarat Jesus diidama punguan na bolon i, gabe asi ma rohaNa mida na torop i, ai songon birubiru na so marparmahan nasida, gabe godang ma dipodahon tu nasida. 

Molo sangkap ni Jesus tu angka sisean i, ala mamereng do Jesus di halojaon ni angka siseanNa i, i do asa borhat nasida pahosahan tu inganan na suhi. Alai songon na binaritahon ni turpuk on, di naborhat i nasida laho tu parau i mandapothon inganan na suhi i, diida jala ditanda angka na torop i do nasida ala ni i dijalahi na torop i do dalan jala marlojong nasida tu inganan na suhi i, gabe di na sahat parau ni Tuhan Jesus rap dohot sisean i tu inganan na suhi i, laos disi ma jumpang ni Jesus angka na torop i. Didapothon na torop i do Jesus tu inganan na suhi i, jala diida Jesus nunga torop nasida di inganan i. 

Marnida na torop i, asi ma roha ni Jesus, ai songon birubiru nasida so marparmahan, gabe godang ma dipodahon tu nasida. Nang pe sangkap ni Tuhan Jesus rap dohot sisean i naeng pahosahon do nasida tu inganan na suhi i, alai marnida na torop na ro marlojong mandapothon Jesus gabe asi do rohaNa, dijangkon do na torop i jala diajari do nasida. 

Molo tajaha muse udut ni turpuk on gabe dilehon Jesus do mangan na torop i marhite lima roti dohot dua dengke napineop ni sisean i, gabe boi mangan lima ribu halak holan bao jala lobi dope sampulu dua ampang nari. Sada na ingkon botoonta jala tiruonta di pambahenan ni Jesus tu angka na torop i ma: Nangpe naung loja jala maheu hita diangka ulaonta jala nunga tingkina hita ingkon pahosahon/istirahat tu inganan na suhi, alai molo jumpang hita angka na uso uso di inganan na suhi I, ingkon asi do rohanta mida nasida marhite namangalehon na ringkot di nasida songon Jesus namamodahon godang tu na torop I angaka barita hangoluan i. ai napasti diuas ni na torop I dipangajarion ni Tuhan Jessus di harajaon ni Debata, gabe hangoluan do di angka na ro tu Ibana. 

Advertisement - Scroll untuk terus membaca postingan.

Kesimpulan dan Refleksi 

Molo tapaumbuk tu ojahan ni turpuk Jamita sadarion “Debata marmahani Ruasna”, adong 2 poin na ringkot botoonta dohot hangoluhononta i ma: 
1. Asi ni roha ni Debata marhite namangalehon partingkian di hita “pahosahon” hita sian angka ganup ulaon na pinasahatna tu hita (Pahosahon na pinarmahanna).
2. Ndang adong tingki ni Debata pahosahon diriNa. Alai anggo Ibana ndang adong tingki “Pahosahon” ai sai tongtong do rade Jesus manjalo halak na uso uso tu Ibana asa dapotan pangajarion di harajaon ni Debata, asa marhite pangajarionna taruli hita sude gabe napinarmahanna sahat ro di saleleng ni lelengna. Amen.  

Catatan: 

Semua iklan yang terdapat pada website dan tulisan ini tidak ada hubungannya dengan timothysaragi.com. 

Dapatkan update artikel terbaru dari timothysaragi.com. Mari bergabung di Channel Telegram "timothysaragi.com Artikel Update", caranya klik link https://t.me/timothysaragicomupdate, kemudian join. Anda harus install aplikasi Telegram terlebih dulu di ponsel.