Epistel Minggu 28 Juli 2024 Minggu Pasiahon Dung Trinitatis tarsurat di buku 2 Samuel 11 ayat 1 - 15. Tapabagas ma pangantusionta taringot tu turpuk ni Epistel on. Hombar tu Almanak ni Hurianta dibahen ma ojahan ni Epistel "Marhuaso do Jesus Manarihon Ngolunta." Rap ma hita mangihuthon hatoranganna.
Pendahuluan
Molo pinaihutihut ganup manjaha jujur ngolu ni halak Batak molo marujung ngolu ni sasahalak, somal na sai angka barita na denggan do dipaboa uju di ngoluna. Dipasiding do angka barita na hurang denggan, atik pe naung godang halak mamoto parangena na hurang denggan.
Alai andul molo taida songon na masa manang na dibaritahon di turpuk ni Epistel on. Dibaritahon do songon dia hadengganon ni na niula ni raja Daud uju di ngoluna. Alai ndang holan barita na denggan dipaboa, dohot do nang hahurangan manang dosa na hea diulahon Raja Daud tagan di ngoluna. Sian on ma berengonta kejujuran ni angka barita na adong buku Bibel i.
Pembahasan
Panurat ni buku 2 Samuel on paboahon keadaan na masa di tingki i, ingkon dohot do raja Daud marporang rap dohot angka pasukanna, nang pe so pola diharaphon ibana terlibat kontak fisik, na lobi diharaphon i ma mangalehon semangat dohot strategi do, ala godang ni pengalaman naung ni bolusna. Di turpuk ni Epistel on ndang pola dipatorang aha alana umbahen ndang dohot Raja Daud tu parporangan i. Alai justru ulaon na santai do dipatorang tingki i na niula ni Raja Daud.
Somal do bentuk ni jabu di daerah Timur Tengah ia tarupna sai dibahen do i inganan pemandangan, na boi mamereng tu angka sekitar ni na jonok tu jabu i. Di tingki i Raja Daud mardalandalan do ibana di tarup ni jabuna i, laos diida ibana ma sada borua tongon maridi. Jala laos gabe lomo do rohana di borua i, gabe laos disuru ma suruanna manangkasi, jala diboto ma paboa borua i, i ma "si Betseba" jolma ni si Uria. Laos disuru ma suruanna mangalap ibana. Jala dunghon sahat tu jolona laos diangkupi ma modom.
Hape dung gabegabean parompuan i, tubu ma di roha ni Raja Daud laho manabunihon hasil hubungan gelap nasida i, gabe ditonahon si Daud ma tu si Joab asa disuru si Uria mulak jala madapothon raja i. Laos disuru si Joab ma si Uria mangadop raja i. Dibahen si Daud ma strategi, asa mulak si Uria mandapohon jabuna dohot maksud molo nunga pajumpang si Uria dohot si Betseba tontu angkupanna ma modom, asa gabe hungkup nian ulaon pangalangkupona i. Hape ndang olo si Uria laho tu jabuna, di lambung ni pintu ni raja i do ibana modom rap dohot angka naposo ni raja i.
Gagal strategi na parjolo, diulahi si Daud ma muse patupahon cara na asing, marhite na paminumhon si Uria dohot minuman keras asa tung mabuk ibana, arop roha ni si Daud molo naung mabuk si Uria laos mulak ma ibana tu jabuna, dung i laos diangkupi modom dohot inantana i ma si Betseba. Hape tong do ndang lao si Uria mandapothon jabuna. Ala na so saut do strategina na paduahonon, gabe disurati si Daud ma si Joab. Laos si Uria do na disuru pasahathon surat i tu si Joab, na marisihon: "Patongon hamu ma si Uria tu inganan na sumobu marporang, jala lumindak hamu sian pudina, asa hona ibana jala laos mate." Dipatupa si Joab ma songon i jala laos i ma dallanna gabe mate si Uria.
Kesimpulan dan Refleksi
Molo taida pardalanan ni ngolu ni Raja Daud, mamungka sian pamilliton ni Debata di na gabe raja ibana di tonga ni bangso Israel, sian na so pola diparetonghon bapa na hian ibana, alai gabe ibana tutu ditodo Debata. Na mangihut, dihamonanghon ibana parporangan maralohon si Goliat, halak na balga jala na gogo i atik pe marhite ambalang dohot sada batu na metmet. Di angka pardalanan ni ngoluna pe, malua do ibana sian jorgong na pinatupa ni Raja Saul.
Hape holan ala ni haulion ni si Betseba i, gabe madabu do ibana tu dosa pangalangkupon dohot tu ulaon pamunuon, suang songon i nang penyalahgunaan ni kekuasaan. Asa dison ma berengonta, ndang adong tutu jolma i na so mardosa. Sude do jolma i marhagaleon, molo so mardonganhon Debata.
Ala ni i naeng ma tongtong hita marpangunsandean tu Debata asa unang madabu hita tu bagasan dosa. Ai molo tapangasahon gogo dohot hapistaranta, i do na mambahen hita gabe madabu tu bagasan dosa dohot angka pambahenan na holan manado ni dok ni lingkaran hape maralo tu uhun ni Debata. Asa holan mangasahon gogo ni Debata do na tuk manghamonanghon hita sian nasa hagogoon ni portibi on. Amen.
Posting Komentar