Epistel Minggu 7 Juli 2024 Minggu Paonomhon Dung Trinitatis tarsurat di buku 2 Korint 12 ayat 2 - 10 na manurathon taringot tu panghatindanghonon ni Apostel Paulus di naung dijalo ibana pangungkapon na sian Tuhan i. Godang do angka pasupasu naung pinasahat ni Tuhan i tu Apostel Paulus marhite angka pangungkapon jala pangantusion di angka Barita na Uli na sian Tuhan i. Jala dipasahat do nang tu ibana huaso patupahon angka halongangan. Di angka ulaonna marbarita na uli pe sai diramoti Tuhan i do ibana. Alai ndang gabe ginjang rohana di angka naung jinalona sian Tuhan i. Alai sude na jinalona i holan asa tu hasangapon ni Tuhan i do. Jala ndang manongtong holan angka hasangapon jala na denggan na masa tu ibana, alai masa do nang sitaonon di daging tu ibana. Dipangido ibana do nian asa tung sumurut sitaonon i sian ibana. Alai dipasahat Debata do tu ibana mandok tuk ma asi ni roha ni Tuhan i di ibana, dipaloas Tuhan i do i masa di Apostel Paulus, ndang na asa marhaporsukon ibana, alai asa patar do asi ni roha ni Tuhan i marhite ibana. Ai di hagaleon i do sun timbul hagogoon. Asa songgop tu ibana hagogoon ni Kristus. Tapabagas ma pangantusionta taringot tu turpuk ni Epistel on asa songon na masa di Apostel Paulus gabe tarajumi molo masa pe hagaleon, disi do hita margogo rap Tuhan i. Hombar tu Almanak ni Hurianta dibahen ma ojahan ni Epistel "Debata do Pangondinganta." Rap ma hita mangihuthon hatoranganna.
Pendahuluan
Di turpuk ni Epistel on boi do idaonta godang ni pengalaman rohani dohot angka pangungkapon na pinasahat ni Tuhan i tu Apostel Paulus jala dipasahat Tuhan i do bisuk tu ibana. Molo sian pamingkirion ni hajolmaon sasintongna adong do dalan asa ginjang rohana, ala dipasahat do tu ibana habisukon. Boi do sasintongna papujipuji diri ibana di angka jamitana, ala ni angka haulion naung niidana rap dohot Tuhan i. Alai ndang i na rumingkot di rohana, asa molo tung pe dibaritahon ibana pengalaman rohani na tu angka na asing, asa marsangap do Tuhan i disi, ndang asa mambuat sangap di dirina. Asa tangkas dibege jala diboto halak, paboa Debata do na mangondingi ibana. Mansai andul do na niula ni Apostel Paulus maradophon na masa di tingki i. Ai masa do hatiha i angka kesombongan rohani na pinatuduhon ni angka parjamita na asing. Alai ndang songon i molo di roha ni Apostel Paulus, baliksa gabe maila do ibana paboaboahon angka pengalaman rohani na molo gabe tu ginjang ni roha do.
Pembahasan
Didok di ayat 2 – 6 "Di bagasan Kristus hutanda sada jolma: Nunga sampuluopat taon salpuna, tarhinsat halak i ro di lampis patoluhon ni banua ginjang i ... " (ayat 2). Pandohan on martudutudu tu Apostel Paulus do, i ma di na pajumpang ibana dohot Jesus di pardalanan laho tu Damaskus. Disi tangkas do diida ibana Jesus na hinasogohonna hian. Jala mapitung do simalolong ni pardagingonna i asa tangkas diida ibana Jesus i marhite parnidaan partondionna.
Disi ma parjumpangan na luar biasa na paubahon rohana sian halak na mangalelelele Jesus hian alai gabe siihuthon Jesus. Pandohan "nunga sampulu opat taon salpuna" patuduhon hatutuon ni tingki hamamasa na i, jala tutu do i masa sampulu opat taon andorang disurathon ibana surat 2 Korint on. Tarida do sian hatorangan na mangihut, ndang na sian na binahenbahen ni Apostel Paulus i, panindangionna i. Pandohan " ... tarhinsat halak i ro di lampis patoluhon ni banua ginjang i" (ayat 2) boi do talapati i songon gombaran ni haulion ni banua ginjang i, i ma inganan ni Debata, jala tusi do Ibana tarhinsat uju i.
Dung i diulahi do muse mandok di ayat 3, "Asa na hutanda do jolma i ... " na marlapatan tutu do masa di ibana jala i do na binaritahonna i, ndang na sian turiturian manang sian na ninna tu ninna, alai sintong do masa i di Apostel Paulus, ala ibana do sasintongna na hinatahonna disi. Na mangihut, adong dua hali pandohan: "Manang na di bagasan dagingna ibana uju i, manang sirang sian dagingna, ndang huboto; Debata do umbotosa" (ida di ayat 2 dohot 3). Pandohan on patuduhon hagaleonna songon sahalak jolma, laos patuduhon haulion ni Debata na umboto saluhut. Di ayat 5 – 6 ditorushon Apostel Paulus pasahathon panindangionna, naeng dohononna, molo pe ingkon hatahononna angka i ndang na laho patimbohon dirina ibana disi, alai asa idaon ni halak do hasangapon ni Debata marhite ngoluna.
Di ayat 7 – 10 dipatorang Apostel Paulus do na masa parungkilon di ngoluna, marhite pandohan: "Hona basirbasir do ahu di sibukhu, i ma suruan ni sibolis na mamukpuki ahu, asa unang hupatimbo diringku" (ayat 7). Sada parungkilon bolon do on di ngolu panghobasionna. Alai nang pe songon i, tangkas do ditanda ibana, dipaloas Debata pe masa i di ngoluna, asa unang ginjang do rohana di angka pangungkapon na sumurung na jinalona sian Debata (ida ayat 7). Pola do sahat tolu hali dipangido ibana tu Debata, asa tung dibolongkon i sian ibana, alai laos disi do naeng tandaonna, paboa dalan ni Debata do i asa tongtong serep rohana, jala asa tongtong marpangunsandean ibana tu Debata sian nasa rohana. Nang pe di bagasan parungkilon ibana, alai margogo do ibana di parungkilonna i, jala las do nang rohana, ai tangkas do ditanda ibana Debata do na mangondingi ibana saleleng ngoluna.
Kesimpulan dan Refleksi
Di tongatonga ni ngolunta siganup ari, ragam do angka naung tajalo jala naung dapotta jala sahat hita tu angka na sininta ni rohanta. Angka na tajalo i boi mambahen gabe ginjang rohanta, alai naeng ma nian angka na adong di hita i, naung dappota dohot sude tahe angka hasuksesan na di hita i, di ngolu siganup ari manang di ngolu partondionta pe, tapangke ma i laho pasangaphon Debata. Unang ma adong solot di hita ginjang ni roha. Ai Debata do haroroan ni pasupasu i saluhutna. Molo tung pe ingkon paboaonta angka naung tajalo sian Tuhan i di ngolunta, naeng ma nian holan asa mamboan sangap ma i di goar ni Debata marhite ngolunta, unang gabe mambahen ginjang ni roha.
Nang songon i pe, olo do sipata dipaloas Tuhan i do songgop angka "basirbasir" di ngolunta, ndang na laho mambahen asa manaon na porsuk hita di ngolunta, alai asa tongtong do hita marpangunsandean tu Debata. Asa benget do nang rohanta molo tung pe masa angka hamaolon, parsahiton dohot angka parungkilon di ngolunta. Asa tongtong tahatindangkon, paboa di sude angka hagabeon naung tajalo i, halak na gale do hita. Molo tatanda do ise dirinta di adopan ni Tuhan i, mangolu ma hita di bagasan serep dohot unduk ni roha i. Tongtong ma hita marpangunsadean tu Debata sian nasa rohanta di saluhut parngoluonta. Molo tung pe masa angka hamaolon, tarajumi ma, sai diondingi Debata do hita, jala asa unang ginjang rohanta, na gabe manait hita tu bagasan dosa. Antong tadok ma mauliate tu Tuhanta na tongtong mangondingi hita di ngolunta. Amen.
Posting Komentar