Jamita Minggu 11 Agustus 2024 Minggu Pasampulusadahon Dung Trinitatis tarsurat di buku Epesus 4 ayat 25 - 32. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Ngolu na Imbaru di Bagasan Holong ni Kristus." Rap ma hita mangihuthon hatoranganna.
Pendahuluan
Buku Epesus naung pinasahat ni Apostel Paulus mandapothon huria Epesus asa hot haporseaon nasida di bagasan Kristus. Tudos ma i songon dakdanak na mura dope manjalo angka parsiajaran sian jolma. Sikap na diajarhon tu hita i ma sikap naung tang, naung umboto aha ma na niulahonna, na denggan manang na roa jala diboto aha do panghorhonna.
Dung ditanda huria Epesus Jesus Kristus jala olo nasida mangihuthon Kristus ndang diulahon nasida be angka bangkobangko na mangolu dohot debata sileban, alai tong do nasida mangadopi angka tangtangan hidup. I do asa diajarhon Apostel Paulus asa hot nasida mangihuthon Kristus. Dipaingot do nasida asa marparange na denggan songon tanda naung siihuthon Kristus jala manghangoluhon ngolu na imbaru di bagasan holong ni Kristus ro di saleleng ni lelengna.
Pembahasan
Poda naung pinasahat ni Apostel Paulus tu huria na adong di Epesus taringot tu aturan di parngoluon na imbaru.
Ayat 25
"Dibahen i" i ma hata na marimpola mangihuthon ayat na parjolo, ala panompaon na imbaru dohot marhapantunon. "Bolonghon" didok tu panompaon na imbaru asa tung dibolonghon angka bangkobangko na parjolo (ida Epesus 4:22; Kolosse 3:5). "Hatahon na sintong ganup." Ruas do hita sama hita patuduhon na sintong na mangihuthon Kristus. Di punguanta na nidokna i ma ingkon adong hasadaon di punguan i. Ala punguan i boi doi digombarhon songon daging ni Kristus, jadi sada daging ingkon masipaleanan unang marsihosoman alai ingkon sada jala masiantusan.
Ayat 26-27
"Boasa tarrimas ho" dibuat sian Psalmen 4:5 parsuruon na mandok unang tarrimas gabe mangulahon dosa. "Unang jolo mintop mata ni ari," molo di halak Jahudi molo mintop mata ni ari patuduhon di ujung ni ari dohot mula ni ari sogot. I do asa didok unang tarrimas sampe habis ari sadari alai ingkon mardame ma paima suda ari sadari i.
Unang dipasombu sibolis mangarajai jolma na porsea i. Sibolis lapatanna, i ma pangalaho na mangarajai roha dohot pingkiran na jahat. Unang dipaloas sibolis i mian di daging ni Kristus di halak na porsea.
Ayat 28
"Halak na manangko" sipasingot tu panangko asa mangula ma ibana "alai hir ma hodokna laho mangula" na mandok ingkon hir ma hodokna laho mangula ulaonna huhut pantun jala dihaporseai. "Asa adong bahenonna laho mangurupi angka na hurangan songon angka jolma na pogos."
Ayat 29
"Hata kotor" di hata Junani marlapatan busuk songon sipanganon naung busuk. Lapatanna hata buruk na bersifat na roa na sai paroaroa jolma, menghina, mangarehei manang manggabusi na mambahen sega." Pangke ma hata na denggan na mamboan las ni roha, mangurupi, mambahen sonang roha ni na umbegesa. Asa hata i gabe mamboan las ni roha jala mamboan dame tu jolma. Jala hata i pe ingkon pas do begeon ni jolma, asa di na umbege gabe taruli pasupasu.
Ayat 30
"Marhabot" mambahen jolma sedih manang marhabot ni roha sifat na si songon on i ma na so dihalomohon Kristus, mambahen Tondi Parbadia malungun. Tondi Parbadia na mambahen sada hadameon tu jolma na mangolu di Kristus. Hata na so denggan di ayat na parjolo na mambahen marhabot ni roha jolma na umbegesa na gabe manegai ulaon ni Tondi Parbadia. On do na gabe tanda di angka na porsea tu Debata paima ro ari panguhuman i. I ma ari paluahon jolma sian pardosaon di haroro ni Kristus na paduahalihon, paluahon jolma sian hamagoan.
Ayat 31: “Hapaeton” lapatanna kecewa manang termuruk ala ni pangalaho (Ulaon ni Apostel 8:23;Heb 12:15). “Halomoon dohot Hamurukon” paboahon naung tarrimas. Jolma naung tarmuruk boi doi mambaen gabe dendam na gabe mamboan parbadaan dohot na gabe mambaen hagunturon saling manalahon. Nagabe mambaen parbolakbolakon di jolma ikkon dipadao ma roha sisongoni jala unang dipeop asa unang gabe i mambaen hasegaon di akka jolma.
Ayat 32: “Jolma naporsea” ikkon do pantun burju jala pardame, lambok jala ikkon marsianjuan. Ikkon saling masiantusan jala dang masipailaan taringot tu akka na asing. Songonima Debata namian di Kristus nang jolma ikkon boi maniru Kristus i jala boi manjalo hahurangan ni dongan ala di mian do Kristus di ibana.
Kesimpulan dan Refleksi
Parngoluan naimbaru gabe mulani jolma jonok tu Kristus. Paulus mangajari huria Efesus songon dia ma jolma naung manjalo ngolu naimbaru. Mambolokkon bakko bakko jala manguba diri. Manahan unang mangulahon dosa unang gabe dirajai sibolis. Asa porlu mangorom jala mangulahon hata ni Debata. Mangarajai diri gabe tanda naung majalo ngolu naimbaru martoruk niroha, pardame, mamboan lasniroha jala dang mambaen bikkas tu dongan jolma. Ala nga mian Tondi ni Debata di bagasan rohana. Jala ise naung mardongan tu ibana gabe manjalo pasu pasu ala naung ditanda Debata jala naung mangolu ibana di hata ni Debata. Ido molo naung halak Kristen ibana naung mananda Debata ikkon ma manguba diri. Jolma naung manjalo ngolu naimbaru ikkonma ma mangolu jala manjalo Tondi Parbadia dingoluna.
Posting Komentar