Jamita Minggu 14 Juli 2024 Minggu Papituhon Dung Trinitatis tarsurat di buku Markus 6 ayat 14 - 29. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Barani Mandok Hasintongan." Rap ma hita mangihuthon hatoranganna.
Pendahuluan
Jotjot do tabege manang laos tahatahon pandohan na mandok, "ia ngolu on pilihan do." Laos marhite pilihan i do hita mangolu jala marparange. Molo tapillit do ngolu na hombar tu Hata ni Debata, tarida do i sian parange si ganup ari na gok holong, barani manghatahon jala mangulahon na sintong. Jala jolma na mamillit dalan ni ngolu na holang sian Tuhan i, tong do tarida i di ngoluna, i ma halak na sai marparange na jat, gok elat nang late di rohana. Mamompom angka muruk nang riting ni roha, jala pola sahat tu na marsangkap manjehehon donganna jolma ala ni angka elat na di rohana i. Laos ido na laho pamanatonta marhite turpuk Markus 6 : 14 – 29 on. Ima taringot parange ni sada uluan/ raja namargoar Herodes, na diparsangapi alani huasona. Sada raja na so barani mangulahon na sintong holan ala naeng pasonangkon angka natorop tung pe salah na niulana i. Jala alani gengsi manghatindangkon hasintongan, gabe pola do diula mamunu jolma nasintong parangena.
Pembahasan
Ulaon halongangan napinatupa ni Jesus nunga pola sar sahat tu ganup huta nang ganup luat, jala sahat mai nang tu sipareon ni raja Herodes. Umbege barita i, taringot ma ibana tu sahalak jolma na burju na nibununa holan laho pasombu tagas ni oroanna na margoar Herodias. Umbege angka napinatupa ni Jesus i, diingot si Herodes ma di Johannes pandidi naung digotapna i rungkungna. Johannes pandidi (ndada sisean ini Jesus) pataridahon karakter ni halak na pinasupasu ini Debata marhite habaranionna pasingot si Herodes dohot si Herodias. Ia si Herodias on, ima oroan ni si Pilippus na mangarajai di luat Trakhonitis dohot Iturea. Alai ditadingkon si Herodias do si Pilippus jala mangalangkup do ibana tu si Herodes, haha ni si Pilippus. Mansai koras do angka hata ni si Johannes pandidi mangorai nasida nadua. Pola do didok si Johannes tu si Herodes, “Ndang jadi di ho anggi borumi”. Umbege i, tubu ma rimas di roha ni si Herodes jala laos dipahurungkon do di Johannes i. Suang songoni nang na nilangkupna i, ima si Herodias, sai manginsorbut do di rohana laho pamatehon si Johannes, alai ndang adong dalan na topet laho patupahon.
Tung pe tubu rimas di si Herodes umbege angka hata sipasingot na sian si Johannes, alai ndang haru lomo rohana laho pamatehon, ala godang do angka na toho jala na denggan na nidok ni si Johannes i di hilala si Herodes. Biar do roha ni si Herodes laho mamusa jala pamatehon si Johannes ala tangkas diboto jolma na bonar jala na tigor do si Johannes on. Angka hata na nihatahonna pe angka na tigor jala na marharoroan sian Tuhan i do, ido umbahen na marhuaso angka hatana i.
Molo tapamanat, raja Herodes nang Johannes pandidion, dua halak na manguluhon torop jolma. Si Johannes manguluhon angka jolma laho manopoti dosana jala marhaporseaon tu Debata, jala torop do jolma parjahat na olo muba dung dipodai ibana. Diboto ibana do godang angka hamaolon siadopanna molo manghatahon na sintong, alai ndang mabiar ibana laho manghatahon i, ai dirajumi ibana sian Debata do hata i jala ingkon saluhut do jolma umbegesa. Suang songoni do molo diboto ibana adong angka jolma namangulahon na jat jala na maralo tu hata ini Debata. Mardongan huaso ni Tondi do ibana mamodai jala mangapoi angka na marsala i. Ndang siida bohi ibana laho mangapoi jolma, haru raja Herodes na di habiari angka natorop i, tong do dipaingot ala pangalangkuponna i. Ndang olo ibana kompromi tu angka pangalaosion, nang pe raja na marhuaso si Herodes.
Alai marimbar ma tu si Herodes, na mangarajai Galilea uju i. Raja do nian ibana jala saguru di hatana do na ingkon sipamasaon uju i. Alai olo do holan alani gengsi dohot ala manjaga harga diri, dipapitpit do simalolongna sian hasintongan jala hajahaton pe diula do, holan asa sangap ibana idaon ni angka natorop, lumobi angka na somal mangolu di hajahaton. Tangkas ma tutu i hatiha dipatupa pesta marnongot ari hatutubu ni si Herodes. Pola do ro boru ni si Herodias marlas ni roha mardongan tortor mangadop raja i. Di na mamparsaulihon panganon ujuan nasida rap dohot angka na sangap nang induk ni soldaduna, las ma roha ni si Herodes marnida panortoron boru ni si Herodias i. Ala las ni rohana, di tonga ni na torop i, didok ma hatana, “Pangido sian ahu manang dia lomo ni roham; lehonongku do i tu ho! Manang dia pe sipangidoonmi, ro di na satonga ni harajaonki, sai na lehononnku do.” On ma tingki na pinaimaima ni si Herodias. Di na ro boruna i marpanungkun tu ibana, manang aha ma sipangidoonna sian raja i, pittor diajari ma boruna i mangido asa dilehon ma ulu ni si Johannes pandidi di atas ni pinggan, laos dihatahon mai tu si Herodes di adopan ni angka natorop. Umbege pangidoan i, ndang tartabunihon ni raja i songgot ni rohana, jala pola do marsak situtu ibana. Gabe hira na targasip do di hilala ibana alani hatana ondeng, ai tung soadong do panagamanna di pangidoan ni boru ni si Herodias i. Dison ma haidaan hadirion ni si Herodes, raja na diparsangapi i. Molo raja na sintong do ibana, boi do dohononna nian asa pangidoan na asing ma dipangido, ala ndang adong huaso ni jolma laho mambuat hosa ni donganna jolma. Alai ala umbiaran do ibana marnida angka natorop i, jala mabiar ibana gabe madabu harga dirina, diparsoada ibana ma angka hatigoran, laos dioloi do pangidoan i. Mate ma si Johannes pandidi gabe sada martir, mate ala manghatindangkon hatigoran mardongan tondi na girgir na sian Tuhan i. Mate ma ibana ala ini dendam na marsigorgor di ateate ni si Herodias. Jala molo nunga mian angka na jat di roha ni jolma, tubu ma angka sangkap na jahat sian i. Alai nang pe songoni, daging ni Johannes pandidi do na mate, molo spirit laho mambaritahon hatigoran i ndang sumurut di angka sisean ni si Johannes nang di angka na porsea di Tuhan i. Darah martir akan menjadi benih bertumbuhnya Injil. Jala lam tumorop do na manghangoluhon na niajarhon ni si Johannes i, ima marhaporseaon tu Debata di bagasan Jesus Kristus. Nang pe mate ibana, alai mangolu do ianggo hatigoran na binaritahonna i. Alai bereng ma si Herodes i, nang pe mangolu dope ibana, alai sai dilelei halinuna do ibana. Hatiha dibege ibana barita taringot Jesus naung sar di luat i, sai manginongi do rohana tu si Johannes pandidi i. Dietong rohana do na hehe muse ibana sian namate laos mandapot huaso laho patupahon angka halongangan bolon. Ndang adong hasonangan dihilala ibana, jala ido panghorhor ni angka dosa. Sombu do nian roha ni nasida hatiha ditampul rungkung ni si Johannes i jala pola mate ibana, alai panghorhonna gabe busisaon, marsak, mabiar, merasa bersalah, dohot ragam angka parrohaon na mambahen dan sonang dihilala.
Kesimpulan dan Refleksi
1. Ndang ulaon na mura laho manghatindangkon natigor dohot mangulahonsa, alai ingkon hatindangkonon jala ulahonon doi. Ai ido tanda/ jatidiri ni halak siihuthon Jesus.
2. Ingot ma, molo taulahon jala tahatahon na tingkos godang do hata nang ela-ela na ro tu hita. Alai tong ma ingot, molo taulahon pe na jahat maradophon donganta jolma, hona bura jala dipasiding do hita. Antong molo songoni, tagonan ma hona bura hita jala hona ela ala mangolu di bagasan hatigoran.
3. Komitmen ni si Johannes pandidi mansai tangkas do. Dan olo ibana kompromi tu angka hajahaton, tung pe jolma i sai kompromi do tu dosa. Tagonan do hape mate di bagasan haporseaon na togu, ai gabe tudos-tudos na denggan doi di angka na mangolu. Gabe siingoton jala sitiruon. Ndang songon si Herodes nang angka keluargana i, tung pe mangolu nasida, alai sai dilelei angka biar nang hasusaan. Soarahon ma hatigoran i marhite parange na denggan, marhite pamangan na mansoarahon holong, marhite sipareon na ungkap tumangihon hata ni Tuhan i, marhite simalolong na sai tonggor marnida haulion na sian Tuhan i, ro di marhite saluhut organ tubuhta bahen sangap ma di Tuhan i. Amen.
Posting Komentar