Jamita Minggu 21 Juli 2024 Minggu Paualuhon Dung Trinitatis tarsurat di buku Jeremia 23 ayat 1 - 6. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata Marmahani RuasNa." Rap ma hita mangihuthon hatoranganna.
Pendahuluan
Di mulana i sistem pemerintahan di bangso Israel menganut sistem "Teokrasi" do. Hata Teokrasi on marharoroan sian hata Junani, sian hata Theos lapatanna Tuhan manang Debata dohot sian hata cracy lapatanna pemerintahan, kekuatan atau pemerintah. Jadi molo didok Teokrasi lapatanna pemerintahan Allah manang Debata do na mamarenta. Molo di Alkitab boi do taida sistem pemerintahan on i ma di ngolu ni bangso Israel, Jahowa Debata do na gabe Raja di tongatonga ni bangso Israel. Jotjot do didok "Jahowa Raja ni Israel," manang "Jahowa Siparmahan Israel" jala Israel dipatudos songon biru-biruNa.
Alai dung sahat bangso Israel di tano Kanaan na binoan ni Debata, ala nunga godang bangso di sekitar nasida na memiliki pemimpin (raja), dipangido bangso Israel ma tu Debata asa dilehon Debata na gabe pemimpin di nasida (raja). Dioloi Debata do pangidoan nasida i, alai Debata do na mamillit raja di Israel jala raja na pinillitna i dalan ni Debata do i laho pasahathon sangkapNa tu bangso Israel. Lapatanna ndang gabe sangkap dohot lomo ni roha ni raja na pinillit ni Debata i na naeng saut di harajaon ni bangso Israel. Alai holan parhitean ni Debata do raja i laho marmuduhon bangso Israel.
Tangkas songon naung digurithon di buku na badia I raja di Israel dimulai ma sian si Saul, Daud, Salomo . Dimasa ni raja na 3 on sada dope bangso Israel na 12 margai. Alai dipudian ni raja Salomo gabe puttar ma harajaon Israel Raya gabe 2 ima Israel Selatan (Jehuda, ibukota Yerusalem) dohot Israel Utara (ibukota Samaria). Laos dimasa on ma gabe tarbuang Israel tu Babel.
Sibonsiri ni saluhutnai ima ala ndang be sangkap ni Debata na pinamasa ni raja I ditonga tonga ni bangso Israel alai nungga mangula dilomona sandiri. Di goar Debata do raja napinabangkitNai parmahan namarmahani biru biruna.
Secara khusus di Perikop ni Jamita on Jeremia 23 :1-6 on, Panurirang Jeremia manurirangan di masa pemerintahan I raja raja di Jehuda. Nunga marserak bangso Israel siala ni parmahanion ni raja na so unduk tu Debata, laos namamboan bangso I gabe manomba angka ganaganaan, ujungna gabe mampar ma angka biru biru I jala masitondong dalanna be gabe marserak jala marsingkor.
Pembahasan
Asa ido di ayat 1 di turpuk on didok Debata marhite panurirang Jeremia : Marjea ma parmahan angka namangago dohot paserakkon biru biru na huparmahan i.
AY.2, Nunga dipaserak hamu punguanKu, jala dionjar hamu, jala ndang dimatamatahon hamu nasida, luluhononku ma tu hamu hinajahat ni pambahenanmuna.
Hata marjea didok tu halak naung mangulahon hasalaan na melanggar angka patik naung diaturhon. Jala ingkon menanggung akibat ni ulaonnai. Sahalak raja ni nipatujolo ni Debata dohot tujuan lao patulushon sangkap harajaon ni Debata tu angka biru biruNa, alai melanggar ndang mangulahon lomo ni roha ni namarsuru/mengankat ibana, alai justru gabe mambahen lomo ni rohana, onma na ginoaranna marjea ala nungga melanggar patik ni Debata.
Tu angka sisongon ma na nidok na upa tinuhon nidosa do hamatean. Diangkat Debata ibana gabe raja asa laho patuduhon holong ni Debata di biru biru ni Debata hape gabe justru mambahen marserak, marsingkor jala lilu biru biru ni Debata. Na pungu hian biru biru ni Debata gabe marserak ala ni hajahaton ni parmahan na sinuru ni Debata. Uhum nama jambarna.
Ndang dipasombu Debata angka birubiruNai gabe mago. Marhite turpuk on adong 2 nanaeng patupaon ni Debata laho papunguhon dohot pauliulihon birubiruNai ima:
- Mengambil alih Haparmahanon.
Jala papunguonku ma pasipasi ni punguanki, sian saluhut luat haambolongan nasida, jala aduonku nasida mulak tu panjampalan nasida I, asa matorop mabue nasida.
Sian konteks na, hatihai bangso Israel maringan di habuangan Babel, asa disangkapi Debata do naeng mamboan mulak bangsoi tu bonapasogitna (Jerusalem), ai disi do inganan habaoran ni susu dohot situak ni loba, inganan hasonangan, jala inganan matorop mabue di bangso ni Debata.
- Manotophon Parmahan na tigor.
Mamungka ayat 4-6, Disangkapi Debata ma laho patindang Parmahan na Tigor I, ima namartudu tudu tu Tuhan Jesus, Mesias i. Tangkas do digurithon paboa dihaparmahanon ni Parmahan na tigor I; Ndang be tahutan manang tarsonggot nasida , jala ndang be mago nanggo sada biru biru ni Jahowa.
Pajongjongonna ma uhum dohot hatigoran di tano I, dapotan tua ma Juda jala Israel marsonang sonang (catt. Istialah Juda ima Israel selatan, Israel ima Israel utara).
Kesimpulan dan Refleksi
2 hal naingkon botoonta hombar tu barita nauli na sinurat ni panurirang Jeremia 23 : 1- 6 ima:
1. Debata do namanodo angka pemimpin/raja/panggonggom/parmahan di portibi on laho marmahani birubiru ni Debata. Taingot ma na dipatindang Debata do pemimpin i. jala ulaonna ima laho papatarhon harajaon ni Debata tu biru biru ni Debata i. alani ikkon mangihuthon aturan ni Debata do ganup angka natinodoNa lao marmahan biru biru ni Debata. Molo so diulahon i… Marjeama… jala mangihut ma uhum hamateani siteanonna.
2. Jesus do Parmahan na Tigor i. Hasingkopon ni Parmahanion holan di Jesus do. Ai diseahon do diriNa humongkop angka biru biruNa asa tu hangoluan. Molo tung marserak biru biru ni Debata hinorhon ni angka parmahan na jahat I, sotung mandele hita angka birubiru ni Debata, ai Parmahanon ni Debata do hita di portibion, toguon na tu aek na tio dohot jampalan na lomak, jala diujungna gabe marsonang sonang jala marsurak surak hita mangolophon : “Jahowa Parpintorantan”. Amen.
Posting Komentar