Jamita Minggu 28 Juli 2024 Minggu Pasiahon Dung Trinitatis tarsurat di buku Johannes 6 ayat 1 - 15. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Marhuaso do Jesus Manarihon Ngolunta." Rap ma hita mangihuthon hatoranganna.
Pendahuluan
Molo di halak Batak, molo patupa pesta, sada tolak ukur asa tardok denggan pesta i, i ma molo boi singkop sude mangan jala bosur angka na niontang. Lumobi ma muse molo boi diboan be sian pesta i laho tu jabu. Asa boi do sar barita jala gabe sihataan molo apala hurang sipanganon di pesta ni sasahalak, jala olo do gabe ro hata mandok: " ... Unang ma songon pesta ni "si anu," godang halak ndang mangan." Ala ni i do, molo adong sada ulaon, sai jumolo do dibahen ulaon tonggo raja andorang diulahon pesta i, asa boi dibahen paretongan sadia godang ma halak na laho si ontangon jala sadia godang ma angka sipanganon sipatupaon di ulaon i. Ingkon dipastihon do angka halak na ro tu ulaon i boi denggan marsipanganon dalan manomunomu jala asa unang adong ungutungut di pudian ni ari. Antar songon i ma situasi na niadopan ni Jesus dohot angka siseanNa hombar tu turpuk ni Jamita on, i ma di na dilehon Jesus mangan sahat tu lima ribu halak so dohot dope dietong parompuan dohot angka dakdanak.
Pembahasan
Sar do barita taringot tu tanda halongangan na pinatupa ni Jesus lumobi ma i di angka na pamalumhon angka na marsahit. Gabe godang do halak na mangalului Jesus jala mangihuthon Ibana. Di na nangkok Jesus tu sada dolok jala hundul disi rap dohot siseanNa, diida nasida ma ro torop halak mandapothon nasida. Hape tongon tingki i nunga be tingkina laho marsipanganon jala diida Jesus na torop i nunga male. Ala ni i do umbahen tubu sungkunsungkun ni Jesus tu si Pilipus mandok: "Sian dia ma tuhoronta roti asa mangan angka on?" (ayat 5).
Tubu pe sungkunsungkun ni Jesus mandok songon i ndada na so diboto Ibana dalan laho mangatasi i. Alai ringkot botoon ni Jesus songon dia do haporseaon ni angka siseanNa i. Hape ro ma alus ni si Pilippus na mangasahon pingkiranna sandiri jala pintor diarga ibana do arga na ingkon sibahenon molo pola lehonon mangan angka natorop i. Tarida do i sian alusna na mandok: "Ndang sae roti arga duaratus hupang, asa dijalo ganup nasida sasaotik" (ayat 7).
Laos diihuthon ma muse marhite alus sian si Andreas na mandok na sasintongna, didok ibana: "Adong do dison sada dakdanak na umpeop lima roti dohot dua dengke, alai sadia ma i tu na sai torop?" (ayat 9). Nang alus ni si Andreas pe tong do patujolohon pingkiranna.
Tarhirim do Jesus di alus ni si Pilipus dohot si Andreas. Ai ariari do nasida rap dohot Jesus, jala nalnal do diida nasida godang ni angka tanda halongangan naung pinatupa ni Jesus andorang na masa di turun on. Hape ndang tubu jala magodang haporseaonnasida.
Alai nang pe songon i otik ni haporseaon ni angka sisean i, ndang gabe pangambati i di Jesus laho sumarihon angka na torop i. Didok Jesus ma tu sisean i, asa didok ma hundul angka na torop i huhut dijalo ma roti dohot dengke i laos ditangianghon. Dungkon i disuru ma dibagihon, gabe dapotan sude jala bosur nasida manganhon, pola lobi dope sahat tu sampuludua ampang nari.
Kesimpulan dan Refleksi
Sian hatorangan ni turpuk ni Jamita on, adong pigapiga na boi parsiajaranta na gabe impola ni Jamita on na boi taauhon di tongatonga ni ngolunta.
Na parjolo, boasa ingkon dengke dohot roti digombarhon na gabe sipanganon di turpuk on? Molo di hata Gorik "dengke" disurathon ma i marhite hata "Ichtus." Dung manaek Jesus tu Banua Ginjang dipangke do gombaran on dohot hata Ichtus i na gabe simbol ni halak na porsea (siihuthon Kristus). Jala adong do hatoranganna, didok ma i: "Iesous Christos Theos Uios Soter" lapatanna "Jesus Anak ni Debata Sipalua." Jala roti, i ma simbol pamatang ni Kristus. Boi do i idaonta uju patupahon ulaon na badia di hurianta, roti i do sada na dipangan, songon simbol ni pamatang ni Kristus.
Na paduahon, sipanganon na lobi i ndang na gabe bolong boti. Alai dipapungu do i jala dipargunahon tu kebutuhan na mangihut.
Na patoluhon, puncak ni sude impola ni Jamita on, i ma manghaporseai paboa Jesus do mual ni ngolunta. Sian Ibana do dapot hita ngolu ni partondionta, laos sian Ibana do ngolu ni pardagingonta. Ala ni i unang ma hita marhaporseaon tu angka na tinompa i, alai tu Na Manompa i ma hita marhaporseaon jala marhaposan. Ai ibana do na tuk manarihon ngolunta. Amen.
Posting Komentar