Jamita Minggu 4 Agustus 2024 Minggu Pasampuluhon Dung Trinitatis tarsurat di buku 2 Musa 16 ayat 2 - 8. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Diusehon Debata Roti Hangoluan tu BangsoNa." Rap ma hita mangihuthon hatoranganna.
Pendahuluan
Ia Buku 2 Musa on digoari do di hata Indonesia ‘Keluaran’, molo di hata Inggris ‘Exodus’; ima manaringoti haluaon ni bangso Israel sian parhatobanan Misir na pinatupa ni Debata marhite naposoNa si Musa. Buku on marisihon 40 bindu na boi sagionta marhite 2 bagian:
1. Bindu 1 -15 ima taringot tu sori ni ngolu bangso Israel saleleng 400 taon di parhatoban di Misir sahat tu na pinalua Debata nasida marhite naposoNa si Musa. Maringan do bangso Israel di Misir saleleng 430 taon alai ndang saleleng i nasida di parhatoban, siala di tingki ngolu ni si Josep + 80 taon dungkon masuk tu Misir, ndada di parhatoban bangso Israel ( 2 Musa 12 : 40- 41). Alai ndungkon gabe raja ma si Firaun na so mananda si Josep i asa gabe marsingkor bangso Israel. Ndang apala dipaboa secara menditail leleng ni parhatobaon i, dungkon na pinaboa ni Debata tu si Abraham di 1 Musa 15 : 13, ia bangso Israel di parhatoban saleleng 400 taon.
2. Bindu 16 – 40 ima taringot tu sori ni ngolu ni bangso Israel lobi hurang 40 taon lelengna di parhorsihan Sinai.
Dung i sahat ma hita molo ro sungkunsungkun; Boasa pola 40 taon bangso Israel di parhorsihan Sinai? Asa anggiat leleng ni 40 taon tartopa nasida di harohaon, rumang ni ngolu dohot haporseaon na hot jala pita holan tu Debata. Taingot ma 40 ari do leleng ni Jesus di halongonan (padang gurun) dungkon tardidi Ibana. Saleleng 40 ari i do Jesus marsaor dohot Debata songon na niulahon ni angka rabbi uju andorang so mangula songon rabbi nasida (guru). Bangso Israel pe nunga tudos na tardidi nasida (1 Korint 10:1-2; Ai naeng ma tangkas botoonmuna di rohangku, ale angka dongan: Ia angka amanta najolo, saluhut do nian nilinggoman ni ombun i, jala saluhut do nasida mamostang laut i. Jadi saluhut do nasida tardidi tubagasan si Musa, di bagasan ombun i dohot di laut i.) Jala 40 taon di parhorsihan asa lam jonok tu Debata jala mangantusi dalan nang sangkap ni Debata andorang so sahat nasida tu tano Kanaan.
Pembahasan
Bangso Israel naung ruar sian tano Misir manorushon pardalanan nasida di halongonan jala dibolus nasida do ragam ni angka parsoalan. Arga 430 taon ma nasida na gabe hatoban di tano Mosor, hinorhon ni i andul do na niadopan parsoalan di halongonan i. Marungutungut do nasida maradophon si Musa nang tu si Aron, dirimpu nasida do ala ni nasida nadua do umbahen na manaon na porsuk nasida. Di na marungutungut i nasida ndang na gabe maradophon si Musa manang tu si Aron nasida marungutungut alai maradophon Debata do, ala Debata do na manjou si Musa dohot si Aron asa mamboan bangso Israel ruar sian tano Misir. Parungutunguton nasida i i ma songon sada hataridaan paboa na so porsea do nasida di Debata. Dirimpu nasida do na so tolap ni Debata asa paluahon nasida sian angka parsoalan na niadopannasida i di halongonan. Gab songon na diida bangso i do parsoalan na umbalga sian 10 uhum na pinatupa ni Debata di tano Misir na niidanasida sandiri uju diboan Debata nasida ruar sian tano Misir. Diurupi Debata do nasida alai ingkon adopan nasida do pola mar 40 taon lelengna di halongonan nasida ala parungutunguton nasida i.
Jadi marmungutmungut ma sandok luhutan ni halak Israel di halongonan i (ayat 2). Ganup nasida marungutungut maradophon si Musa nang si Aron ala mabiar nasida anturapar. Parmungutmunguton sada ulaon na so denggan do i. Pola sahat tu onom hali disurathon di ayat na mangihut. “Ndada dompak hami hamu marmungutmungut, dompak Jahowa do” (ayat 8). Na sai dihasiholi nasida i ma holan tu hudon angka na marisi juhut i do (ayat 3). Mansai ingot do di nasida di angka hudon angka na marisihon juhut uju di Misir nasida i do umbahen na sai dijujui nasida si Musa mandok, “Tung so mate hami dibunu tangan ni Jahowa di tano Misir, di na hundul hami di lambung hudon angka na marisi juhut, di na bosur hami mangan sagusagu; ai ditogihon hamu hami ruar tu halongonan on laho mambunu sandok luhutan on anturaparon” (ayat 3). Aha do sibonsiri niungut-ungut nasida tu si Musa dohot dompak Aron? Sude do ungut-ungut i holan alani na ringkot tu siubeon/butuha. Boido tadok ungut-ungut nasida alani papangan sambing do. Ingkon sai rade ma nian manongtong sipanganonna. Ala mungkin di Misir sude do rade angka sipanganoni tung pe so martuhor jala ia jumpang ma dipardalanan i dangjumpangsa be songon na masa diparhatobatanan i gabe ima ungut-ungut niroha nasida. Dietong do na so marhuaso Debata ido asa gabe marungut-ungut. Jala hasomalan ni hahipason do marungut-ungut.
Jahowa patupahon sagusagu. “Dung i ninna Jahowa ma tu si Musa: Ida ma paroonku ma tu hamu udan sagusagu sian banua ginjang, asa ruar bangso i jala dipapungu sae sadarina i, asa huunjuni nasida manang turuton nasida patikki manang ndang” (ayat 4). Ndada si Musa na patupahon sagusagu di bangso Israel, alai Debata sandiri do na patupahonsa. Marhite turpuk on naeng diboan Debata do bangsoi asa unang holan mangoloi hagiot ni butuha sambing. Ai molo holan mangaradoti siubeon/butuha/pardangingon holan ngolu parsatongkinan doi, alai molo mangaradoti patik ni Jahowa mangeahi ngolu na manongtong doi. Molo pe ringkot mangeahi naringkot di ngolu parsatongkinan on, alai unang gabe gumodang tingki, gogo, pingkiran mangaradoti tu ngolu parsatongkinan i sian namangharingkothon tu ngolu na manongtong i. Jadi unang gabe sipanganon juhut, sagu-sagu gabe sibonsiri ni ungut-ungut nasida alai dipauli ma parsaoran na denggan dohot Jahowa.
Kesimpulan dan Refleksi
1. Di Turpuk 2 Musa 16: 2 – 8 on ima manaringoti manna dohot sagu-sagu. Jala hagogok ni manna dohot sagusagu i ma diri ni Jesus songon roti na tutu situtu roti na mangalehon hangoluan na manongtong rodi salelenglelengna. Jesus do manna dohot sagusagu na tutu situtu na gabe bohal ngolu lumobi ma bohal ni ngolu partondion i.
2. Unang ma holan ungut-ungut na tabaen tarlumobi ma i di adopan ni Debata, alana ungut- ungut i mambaen hasesega dohot holan mangharingkothon roha daging do i.
3. Mandok mauliate ma hita tu Debata ai nungga dipatupa dihita ima haluaon i marhite AnakNa Jesus Kristus, antong ta tatap ma tu jolo unang be sai manatap tu pudi hita.
4. Dalam situasi dan kondisi bagaimanapun kehidupan yang kita jalani saat ini tetaplah berserah dan mengandalkan nama Tuhan, biarkan Tuhan yang bekerja atas hidupmu. Ketika kita mau di PROSES jangan PROTES.
1 komentar