Jamita Minggu 7 Juli 2024 Minggu Paonomhon Dung Trinitatis tarsurat di buku Psalmen 48 ayat 1 - 15. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata do Pangondinganta." Rap ma hita mangihuthon hatoranganna.
Pendahuluan
Buku Psalmen i ma buku na manurathon angka ende, pujipujian, tangiang pangidoan, panghirimon dohot angka panindangion ni haporseaon ni angka parpsalmen. Angka Psalmen on manggombarhon songon dia so hubungan ni angka parpsalmen i maradophon Debata manang hubungan ni bangso ni Debata maradophon Debata. Lumobi ma di bindu 48 on, na sinurathon ni angka anak ni si Kora. Angka na pinillit ni raja do nasida laho manghobasi pamujion di bagas joro i. Disurathon nasida do Psalmen on laho manggombarhon haulion ni huta ni Debata huhu patuduhon las ni rohanasida marningot haluaon na pinatupa ni Debata.
Pembahasan
Adong do pigapiga poin na boi idaonta sian turpuk jamita on:
Parjolo, Sian gombaran ni huta ni Debata, naeng tangkas idaonta jala tandaonta hamuliaon, hasangapon dohot hagogoon ni Debata. (Ayat 1 – 9)
Boha do panandaonta tu Debata na tasombai? Torop do halak na mananda goar, alai dang mananda rupa. Manang, mananda rupa alai dang mananda roha. Boi dohononta, terbatas panandaonna tu sasahalak. Songoni do nang di tonatonga ni ngolunta songon halak Kristen, jotjot do tabege goar ni Jesus i, alai dang tatanda huasoNa, hagogoonNa, hasangaponNa. Ro pe hita rupani marminggu, holan sebatas rutinitas sambing. Manang adong do na mandok istilah naung somal tabege ima Kristen KTP. Alai dituntut do tu hita songon angka na porsea asa mananda Debata secara utuh. Sian bagian na parjolo on ditogihon do hita mananda hatimbulon dohot habalgaon ni Debata na mian di ingananNa nabadia i. Debata do partanobatoan di angka na mian di ingananNa i (Ayat 1 – 4). Dang holan i, naeng tangkas idaonta hasangapon dohot hamuliaon ni Debata marhite haulion ni huta ni Debata i. Ai didok do di ayat 5 “... marluhut do angka raja mandapothon” Sada inganan na mansai uli, na menarik do huta ni Debata umbahen na marroan angka raja laho mandapothon huta i. Dang holan haulion alai dohot do hagogoon ni Debata tarida sian hutai. Didok do di ayat 6 – 8 i : “... pintor tarhatotongdo, mabuk be do nasida maporus. Angka hitir do nasida disi, mangae songon boruboru na laho mangintubu. Diropuhi Ho do angka parau Tarsis marhitehite alogo sian habinsaran.” Ima manggombarhon hagogoon ni Debata. Jala sude na digombarhon i, sintong doi. Hagogoon ni sada huta i ditontuhon pangisina do. Hatimbulon, haulion, dohot hagogoon ni huta i pe ditontuhon Debata na maringanan disi.
Paduahon, Sian gombaran ni huta ni Debata, naeng tangkas tandaonta asi ni roha dohot hatigoran ni Debata. (Ayat 10 – 12)
Didok do di ayat 10 i didok: “Ditimbang rohanami do, ale Debata, asi ni rohaM di parsitongaan ni joroMi” sada gombaran do on, na tongtong do mian asi ni roha ni Debata di huta tongatonga ni huta i. Asi ni roha ni Debata ima patuduhon hadirionNa, patuduhon karakter ni Debata na manongtong manghaholongi angka na niasianNa. Sada karakter na asing naeng idaonta ima na tongtong do gok hatigoran do Debata. Di ayat 11 - 12 didok : “Suman tu goarMu do baritaM, ale Debata, ro di ujung ni tano on, gok hatigoran do siamunMi. Marlas ni roha ma dolok sion, marolopolop ma angka boru Juda ala ni panguhumMu” Sada pandohan na patuduhon karakter ni Debata, ima na tigor. Dipatupa do uhum hombar tu hatigoranNa i. Dang pandang bulu, dang siida bohi Debata. Tigor do uhum ni Debata saleleng ni lelengna. Asa ido las ni roha ni angka na porsea i, gok asi ni roha dohot hatigoran ni Debata do daionna di ngoluna.
Patoluhon, Tapajojor ma pambahenan ni Debata na balga i tu sundut naumposo. (Ayat 13 – 14)
Dang tarbaen hita patorangkon sada barita tu halak na asing molo so taboto tangkas aha do isi ni barita i. Tontu gabe sada kesimpang siuran manang gabe kabur do barita i molo so angkas taboto informasina. Ido asa, ingkon jolo taboto do barita i, asa boi denggan muse tapaboa tu halak na asing. On pe marhite pandohan na mandok “Haliangi hamu ma sion i jala liati hamu” “Bilangi hamu ma angka partanobatoanna i” “Tangkasi hamu ma parikna” “sigati hamu ma angka bagasna i” angka pandohan ima asa tutu jala tangkas informasi taringot tu Debata i taboto. Tatanda tangkas Debatanta i. Dungi pe tau hita pajojorhon i tu angka sundut naumposo. Asa marhite i nian, ditanda nasida Debata na gogo, na sangap, na marmulia, na gok asi ni roha dohot hatigoran i do na tongtong manogu hita sahat tu ujung ni ngolunta.
Kesimpulan dan Refleksi
Boha do panandaonta tu Debatanta? On ma na gabe renungan di hita, molo dung tangkas hita mananda Debata di ngolunta, botoonta ma, Ibana do Debata na mangondingi hita huhut manogunogu hita dibagasan asi ni roha dohot hatigoranNa. Nang pe godang angka hamaolon, parungkilon dohot sitaonon na masa di ngolunta, Ibana do Partanobatoanta, diondingi do hita. Ibana do Debata na tongtong satia manghaholongi hita saleleng ni lelengna. Amen.
Posting Komentar