Jamita Minggu 20 Oktober 2024 Minggu Paduapulusadahon Dung Trinitatis tarsurat di buku Rom 12 ayat 1 - 8. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Hadaulaton na Marroha." Rap ma hita mangihuthon hatoranganna.
Pendahuluan
Sian Bindu 12 on mangondolhon taringot tu sipaingot manghangoluhon haporseaon dohot mangulahon holong ni roha dohot nasa na hinalomohon ni Debata. Surat Apostel Paulus tu huria Rom on na patuduhon panghophoponna dohot pangoloionna tu Tuhan Jesus umbahen sai diingot huhut diapopoi ibana do huria di Rom marhite suratna na sai ditangianghonna huhut masihol do rohana mandapothon huria i. Songon i hagogoon ni Barita na Uli na paluahon nasa na porsea, gabe hatigoran jala hangoluan di angka na porsea. Laos songon i do muse dipabotohon Apostel Paulus do laho mangalumbahon tu halak Rom asa togu di bagasan haporseaon ia taringot tu haluaon naung jinalo ni jolma ndada sian hinorhon ni patik, alai holan asi ni roha ni Debata do hinorhon ni naung dipalua hita marhite Jesus.
Barita na Uli sian surat ni Apostel Paulus on patariashon taringot tu mangalehon dagingta bahen pelean na mangolu, na badia jala na hinalomohon ni Debata; i ma hadaulaton ni na marroha. Pangondolon ni parbaritaan na uli on, ai sian Debata do nasa na di ngolunta, hinorhon ni asi ni rohaNa do umbahen mangolu hita jala sian silehonlehon ni Debata do tarbahen hita laho mangulahon saluhutna i. Hapapatar jala panghorhon ni nasa asi ni roha ni Debata di bagasan parngoluon di hita na marhaporseaon: 1. Pasahathon dagingmuna bahen pelean na mangolu, 2. Ganup marguru tu godang ni haporseaon na tinurpukhon ni Debata, 3. Ganup nasa silehonlehon marguru tu ragam ni asi ni roha.
Pembahasan
1. Pelean na Mangolu, na Badia, na Hinalomohon ni Debata, i ma Hadaulaton na Marroha (ayat 1-2).
Mansai manat dipatorang sian turpuk on taringot tu pangantusion pelean. Apostel Paulus mangondolhon pangantusion taringot tu pelean na mangolu, na badia, na hinalomohon ni Debata huhut dipahombar pangantusion taringot tu pelean i ma muse hahonaana tu pangalehonon ni dagingta. Molo tapaihutihut muse sian pangantusion taringot tu Pelean sian Padan na Robi marragam do goar ni angka pelean dohot nasa ruhutruhut ni pelean na laho sipasahathon, i ma: Angka pelean situtungon, pelean hamauliateon, pelean Paska, pelean sipasahaton sian patumonaan i angka na niula, pelean parpuluan, pelean ari raya dohot angka na asing. Alai di Padan na Imbaru na gabe impola ni pelean i ma manghamuliateon tu Debata di saluhut asi ni rohaNa laos dipatuduhon do, Jesus Kristus na gabe pelean birubiru na paluahon hita sian dosa dohot angka pangalaosionta tu Debata. Apostel Paulus mangapoi taringot tu pasahathon dagingta gabe pelean na mangolu, na badia, na hinalomohon ni Debata i ma hadaulaton na marroha. Hinorhon ni angka asi ni roha ni Debata rajumanta do dalan manghamuliateon jala mamuji pasangaphon Debata na mangalehon angka basabasaNa tu hita huhut dihalomohon Debata do nasa pelean marhite haporseaon dohot sian ias ni roha. Songon i do tongtong mansai arga situtu do nasa dagingta bahen pelean tu Debata. Ndada holan angka arta manang hamoraonta na targoar pelean na laho sipasahaton. Alai roha na ungkap jala angka na umuli dalan sipasahaton tu Debata sian peleanta i ma talehon dagingta manghaporseai jala manghatindanghon Jesus Kristus do Sipalua jala Hangoluanta. Hadaulaton ni na marroha i ma pasahathon dagingta bahen pelean na mangolu, na badia, jala na hinalomohon ni Debata (Ibadah yang sejati dan yang berkenan bagi Tuhan merupakan memberikan hidup kita melanjutkan karya pemberitaan Yesus Kristus). Tapatupa ma pelean na marimpola na marhadaulaton ni na marroha i ma mangulahon ulaon holong ni roha, marpambahenan na denggan maradophon dongan jolma huhut pasahathon ngolunta bahen hangoluan tu nasa jolma.
Apostel Paulus pabotohon na so sarombang dohot portibi on nasa na sian Debata. Dipaumbuk sian turpuk on do paboahon ndang tarpatupa jala jumpang na sian portibi on laho patulushon dohot mangulahon na ni halomohon ni Debata, ai na holom jala mansai rundut dohot angka hamaolon do na di portibi on. Malo do portibi on laho mangetaeta, mambuat roha ni jolma jala manegai pingkiran ni jolma i asa mangambati haporseaon ni jolma i tu Debata. Ndang tarpasiding dirinta sian portibi on, alai ndang gabe sarombang hita dohot portibi on. Na marlapatan tapatuduhon ma ngolu na marhaporseaon di Tuhan i, na manghamonanghon na pinaimbaru ni Debata sian nasa roha dohot pikingkiranta i ma manimbangi lomo ni roha ni Debata, i ma na uli, na hinalashonNa dohot na sun denggan. Na pinaimbaru ni Debata do hita asa mananda di angka na hinalomohon ni Debata.
2. Ganup Marguru tu Godang ni Haporseaon na Tinurpukhon ni Debata.
Sian turpuk on mangondolhon saguru di Debata do angka na tinurpukhononNa di parngoluon ni hita. Dipaingot Apostel Paulus do huria Rom asa "unang ma torbang rajumi hamu dirimu lobi sian na patut" lapatanna hinorhon ni asi ni roha ni Debata do nasa angka na taulahon, ndada mangasahon haginjangon diri manang marlomolomo dohot mangalului hasangapon diri. Ringkot dipabotohon sian turpuk on muse asa unang tartuktuk jala marhagaleon hinorhon ni na so sahat angka na hinirim ni roha dohot na pinigkiran jala marpanghurangi mangulahon angka na pinasahat manang na hinalomohon ni Debata.
Di buku 1 Korint 9:17-18 didok "Ai molo huula i sian lomo ni rohanghu, marupa ma ahu; alai nang sian na so tarjua, tong do diampehon tu ahu tohonan i. Asa aha do upanghu? On do: Di na mamaritahon Barita na Uli i ahu, so hurugi i hamu, asa unang hupangasahan huasonghu di Barita na Uli i."
Dipatudos Apostel Paulus do tu sada umpama dalan mangalehon pangantusion dohot pangajarion i ma: "Torop do ruas di dagingta, alai ndada saulaon ruas i sude." Gabe lam dipadasip pangodolhonon sian pandohan i i ma "Torop sadaging di bagasan Kristus, alai ruas be do hita sama hita," astuanna ragam do nasa ulaon ni ruas ni pamatangta, alai rap marpanghorhon di bagasan sada daging jala na rap marsipaleanan umbahen tarpatupa nasa ulaon i. Laos songon i do saluhut nasa na di bagasan sada daging manang pamatang, na marnampuna do i di saluhut nasa ruas. Dibahen i ndang tardok sada sian ragam ni ruas, na so sian sada daging manang pamatang. Ala ni i ruas be do hita sama hita, di bagasan sada daging ni Kristus. Songon parbaritaan "Ia mangae sada ruas, rap mangae ma saluhut ruas i, jala ia sangap dibahen sada ruas, rap marlas ni roha ma saluht ruas i. Alai daging ni Kristus do hamu, jala ruas hamu sama hamu" (patudos 1 Korint 12:26-27).
3. Ganup nasa Silehonlehon Marguru tu Ragam ni Asi ni Roha.
Dipaandar sian turpuk on do muse nasa silehonlehon ni Debata na ingkon masipaleanan do umbahen marhataridaan nasa panghobasion di ulaon i. Jala ganup nasa silehonlehon marguru to ragam asi ni roha na tinurpukhon ni Tuhan i tu ganup na porsea di Ibana. Sian nasa ragam ni asi ni roha i patar ma hagogoon dohot pasupasuNa di ngolu ni jolma, na mangalehon nasa panghobasion hombar tu parsuru ni Debata. Sian pandohan ni turpuk on: Ia panurirang naeng ma mardomu tu haporseaon, ulaon marhobas, ba ulaon marhobas ma; ia haguruon i ma. Ia pangapoion, i ma; ia na mangasi i, sian bulus ni roha ma; ia na manguluhon, marringgas ni roha ma; ia na marbasabasa, sian las ni rohana ma (ayat 7-8), nasa silehonlehon i pabotohon saluhutna marhite sian parsuru ni Debata do. Jala ulaon na marhadomuan tu angka holong ni roha, jala ndada na mangasahon hogogoon ni jolma alai panghobasion marhite pangalehonon ni roha dohot bulus ni roha.
Kesimpulan dan Refleksi
1. Tapangke jala tahobasi ma nasa silehonlehon ni Debata na di hita be bahen sangap dohot hamuliaon ni Debata. Tajalo pe saluhutna i hombar tu parsuruNa tu hita be, hombar tu ragam ni asi ni roha. Dilehon Debata pe ndada holan mangharinghothon tu dirinta, alai asa rap manghilalahon do nasa asi ni roha ni Debata di parngoluonta be. Alai lam gumodang do asi ni roha dilehon; ala ni i do didok: "Dialo Debata do angka na ginjang roha, alai dilehon do asi ni roha tu angka na serep marroha!" (Jakobus 4:6).
2. Panghorhon ni hadaulaton i marhite panghobasionta dohot pangoloionta mangulahon ragam ni asi ni roha ni Debata, sian nasa holong ni roha. Tarpatupa hita do saluhut nasa silehonlehon ni Debata naung pinasahatNa, asa hinorhon i ma hadaulaton na marhasintongan. On do hadaulaton na ias jala na so marlindang, di roha ni Debata Ama: Mandulo angka na so marama, so marina dohot angka na mabalu di haporsuhonnasida, huhut mangaramoti diriniba maralohon portibi on, unang marlindang (Jakobus 1:27).
3. Hamuliatehon ma nasa na nilehon ni Debata dingolunta marhite na radot jala ringgas laho mangulahon jala manghariingkoti mangulahon saluhutna i. Alai mauliate ma tu Debata ala ni silehonlehonNa, na so tarhatahon i! (2 Korint 9:15).
Posting Komentar