Jamita Minggu 27 Oktober 2024 Minggu Paduapuluduahon Dung Trinitatis tarsurat di buku Job 42 ayat 1 - 6. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Saguru di Debata do Luhut Angka na Masa tung so Hasundatan do Angka SangkapNa." Rap ma hita mangihuthon hatoranganna.
Pendahuluan
Ragam jala marsingkat sorin do angka sitaonon dohot hamaolon i jumpang di parngoluon ni jolma. Jotjot do hinorhon ni sitaonon dohot hamaolon i gabe tubu ma hailaon, hagaleon di pardagingon songon i nang di partondion. Marhite turpuk ni Jamita di Mingguta sadari on na paingothon jala mangajarhon hita di na mangadopi angka sitaonon dohot patoguhon haporseaon molo jumpang sitaonon dohot angka hamaolon. Songon ondolan ni Jamita on "saguru di Debata do saluhutna; ndang hasundatan angka sangkapNa," diloas Debata do hita laho mangadopi jala mangalaosi angka sitaonon dohot hamaolon i, alai dipaingot do tu ganup hita asa hinorhon ni angka sitaonon na masa di hita asa unang manadinghon haporseaon i jala saluhutna na boi olat ni na tarpatupa hita, lobi sian i Debata do na humophop hita.
Targoar do hadaulaton ni si Job jala na burju huhut biar mida Jahowa jala dipadao do rohana sian hajahaton. Songon na masa diadopi si Job, tung pe naung adong hian di ibana hamoraon, hasangapon dohot hagabeon i, alai diadopi dope angka sitaonon manang parungkilon, jumpang jala masa do dihilala ibana na magoan manang ditadinghon hinorhon ni hamatean di tongatonga ni keluargana, jumpangsa do angka parsahiton, hamagoan di pardonganon, suda nasa artana dohot na asing. Sian haporseaon ni si Job na so tadingkonon ni Debata do ibana mangadopi sitaonon dohot parungkilon i. Hatoguon ni haporseaonna tarida do i songon na didok di Job 1:21 "Jala didok ma: Na marsaemara do ahu ruar sian butuha ni dainang, jala marsaemara do ahu mulak tusi. Jahowa do na mangalehonsa, Jahowa do muse mambuatsa pinuji ma goar ni Jahowa." Laos marhite sian turpuk ni Job on godang parsiajaran dohot patoguhon haporseoanta di na mangadopi angka sitaonon dohot parungkilon.
Pembahasan
1. Guru di Debata do Luhut jala ndang Hasundatan SangkapNa.
Nasa na masa di hasiangan on guru di Debata do. Jala molo naung marsangkap do Debata, ndang hasundatan manang ise pe sangkapNa i. Ndang adong na so sian parbinotoan ni Debata angka na masa di pardalanan ni ngolu ni si Job. Ala ni i do umbahen na ro pandohanna mandok "Nuaeng pe asa huboto, tung guru dokMu do luhutna, jala ndang hasuhatan sangkap ni rohaM nanggo sada." On ma pangarajumion di diri ni si Job, laos dipaunduk ibana do jala dirimangi di bagas rohana mida angka pambahenan ni Debata. Ndang tadinghonon manang pasombuon ni Debata ibana di na mangadopi angka sitaonon dohot parungkilonna. Sian turpuk on muse pabotohon holan Debata do na tuk patupahon jala paluahon nasa parsorion dohot sitaonon i. Tangkas do dirajumi si Job i di bagasan rohana nang pe songon na dipasombu Debata jala songon na so mardongan nama di parngoluonna, songon i sahat tu na mangidohon ibana asa tumagonan do dipangido hamatean i asa unang be dihilala ibana nasa haparirion (ida Job 14:13-22).
Molo so taadopi hape sitaonon manang parungkilon ndang taboto mananda dirinta, ndang taboto pasahathon ngolunta jala manghamuliatehon nasa na adong tu Debata. Jala jambar di hita na mangolu do ingkon mangadopi angka sitaonon dohot parungkilan. Hinorhon ni angka sitaonon dohot parungkilon i do lam tang manang lam togu haporseaonta tu Debata.
2. Halongangan do Angka Pambahenan ni Debata.
Ndang loason ni Debata si Job tarunjun di bagasan dosa manang hajahaton hinorhon ni angka sitaonon dohot parungkilon na masa di ibana. Sian turpuk on dihatahon do "Ise do ibana nа paholom tuptupan so marpanimbangon?" Marhite i ma gabe maralus si Job "Tongon tahe, nunga huhatahon tutu na so huantusi; halongangan do angka i; salpu sian rohanghu na so huboto." Pangalapation di pangantusion sian turpuk on i ma Debata na so pasombuonna di bagasan partinaonan jala sian parbinotoan ni Debata do saluhut angka na masa di parngoluonna. Maralus do sungkunsungkun i di roha ni si Job marhite toruk ni rohana jala na so sian pangantusionna, gabe diboto ibana ma halongangan do saluhut pambahenan ni Debata di parngoluonna, jala songon i do haroro ni angka sitaonon dohot parungkilon na so tinagam ni rohana ingkon adopanna, jala songon i do muse parsalpuna sian rohana jala na so diboto. Songon na didok di Psalmen 40:6 "Torop do angka halongangan dohot sangkapsangkap dibahen Ho humophop hami, ale Jahowa, Debatanghu, ndang tarpajojor tu Ho, nang pe naeng baritahononhu jala paboaonhu, ndang tarpajojor tahe dibahen toropna."
Songon i do muse diulahi Debata paboahon tu si Job angka na laho sipabotohonon tu ibana. Disurathon turpuk on do panangkasion di hasintongan halongangan na binahen ni Debata di parngoluon ni jolma. Na tutu do sian pandohan ni si Job, ndang loason ni Debata hape ibana mananda halongangan i sian hata na binegena taringot tu Debata, alai lam tu tangkasna ma sian parnidaan ni matana. Laos marhite i ma gabe pamorahon pangantusion, na tutu do Debata na pabotohon marhite na marnida angka halongangan na binahenNa dipardalanan ni ngolu ni angka na porsea.
3. Hamubaon Manghorhon Haluaon dohot Pasupasu.
Mananda do si Job sian angka hahurangan dohot hagaleon di hadirionna. Pangarajumion di diri ni si Job jala dihamuliateon rohana do Debata marpanatap jala halonganan do na binahenNa tu ibana. Marhite turpuk on dihatahon "Dibaben i jora ma ahu jala husolsoli daginghu hundul di bagasan orbuk dohot sirabun," astuanna ditanda si Job do nasa hahuranganna, pola do ibana patuduhon panolsolionna na hundul di atas orbuk dohot sirabun, na pataridahon bagas ni panolsolionna di dirina. Dipatarias turpuk on do muse hamubaon na manghorhon haluaon jala gabe pasupasu ma muse di ngoluna. Pambahenan ni Debata na paluahon jala mangalehon saluhutna na so sian panagaman jala tarpatupa Debata do mangalehon saluhutna.
Kesimpulan dan Refleksi
1. Mansai ringkot do pangapulion dohot patoguhon haporseaon. Unang ma ala ni angka sitaonon dohot parungkilon, gabe mandao jala ditadinghon haporseaonna tu Debata. Ndang adong na so sian pamotoan ni Debata nasa na di ngolunta, jala tarpatupa Debata do i, lobi sian na tapangido manang sian na tapingkiri. Tarpatupa Debata do lobi sian na tapangido manang tapingkiri, hombar tu hagogoonNa na marpanghorhon di bagasan hita (ida Epesus 3:20).
2. Unang mabiar hita mangadopi angka sitaonon manang parungkilon i. Marhite i do gabe jumpang jala asa mura hita mananda angka halongangan na binahen ni Debata, suang songon i muse asa botoonta manimbangi dia do na hinalomohon ni Debata, jala tama do hita mandok mauliate di Debata. Holan pangunjunan na patut di jolma do na mangonai tu hamu. Haposan do Debata, ndang loasonNa hamu unjunan lobi sian gogomuna; Ibana na parohon pangunjunan i, laos Ibana mambahen hapateanna asa tartaon hamu (ida 1 Korintus 10:13).
3. Molo so Debata donganta, ndang tarpatupa jala ndang tarulahon hita mandalani nasa parngoluonta. Raphon Tuhan i ma hita laho mangula nasa ulaonta, asa marhite biar mida Jahowa ma hita laho mangulahon saluhutna i. Songon na didok di Buku Ende omor 476 "Ndada au guru di au be, Jesus do nampuna au. Las rohanghu dung hubege, Jesus Sipangolu au." Amen.
Posting Komentar