Jamita Minggu 3 November 2024 Minggu Paduapulutoluhon Dung Trinitatis tarsurat di buku Markus 12 ayat 28 - 34. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Manghaholongi Debata dohot Manghaholongi dongan Jolma." Rap ma hita mangihuthon hatoranganna.
Pendahuluan
Sian opat buku Evangelium di Padan na Imbaru, i ma Mateus, Markus, Lukas dohot Johannes, buku Markus on ma na umjempek na manurathon Barita na Uli taringot tu Jesus dohot ulaonNa. Nang pe ndang patar disurathon ise na gabe panurat ni buku Markus on, alai satolop do angka ama ni Huria na parjolo i manghatindanghon, si Markus na digoari Johannes Markus do na manurathon buku on. Ibana sahalak Kristen sian sundut na parjolo na magodang jala mian di Jerusalem. Tardok sisean jala pangurupi di panghobasion ni Apostel Petrus do ibana. Laos dohot do muse ibana mangurupi panghobasion ni Apostel Paulus dohot Apostel Barnabas. Mangihuthon Papias (hirahira taon 130 M) dohot angka ama ni Huria di angka abad paduahon, sian Apostel Petrus do si Markus manurathon isi ni buku on. Disurat ma buku on hirahira taon 50-60 M di huta Rom jala laos buku Markus on do na parjolo disurat sian na tolu Evangelium na asing. Impola ni buku Markus on i ma manghatindanghon Jesus do Anak ni Debata jala Sipalua. Manaon na porsuk, pola mate tarsilang alai monang maralohon dosa, hajahaton nang hamatean. Hinorhon ni i ndang jadi mabiar angka na porsea di Ibana, atik pe mangadopi angka hamaolon nang hamatean laho mangihuthon Ibana.
Pembahasan
Sude do jolma manghalungunhon ngolu na di bagasan holong. Manghaholongi dohot dihaholongi sai diparsinta jolma i do, ala mansai uli do ngolu na di bagasan holong. Pardonganan, ruma tangga dohot parsaoran na pinauli gabe mansai uli jala manghorhon dame dohot las ni roha do molo digohi roha holong. I do umbahen dipodahon Jesus asa manghaholongi Debata dohot dongan jolma. Manghaholongi Debata dohot dongan jolma gabe impola manang tona na mansai ringkot sian Patik na 10 i, nang sian angka buku ni angka panurirang pe. Nang di ateate ni jolma i pe nian nunga digurithon Tuhan i parenta asa marholong ni roha. I do umbahen sai dihasiholi jolma do ngolu na di bagasan holong. Di Minggu on dipaingot Hata ni Debata do hita asa masihaholongan di bagasan parsoaran tu Tuhan i dohot tu dongan jolma.
Disungkun sahalak sibotosurat do Jesus, dia do patik na ummangat. Adong 613 uhum manang aturan na marharoroan sian Patik na 10 i na gabe uhum di halak Jahudi. Marungkil do ibana mangulahon sudena i umbahen disungkun ibana, dia do patik na ummangat. Aha do alus ni Jesus maradophon sibotosurat i, asa laos hangoluhononta?
1. Haholongi ma Tuhan Debatam (ayat 28-30).
Dialusi Jesus do sibotosurat i jumolo mandok: "Tangihon ma ale Israel. Tuhan sasadasa do Tuhan Debatanta i." Digoari do pandohan on "Panindangion Haporseaon" (pengakuan iman/ Shema Yisrael) ni halak Israel. Panindangion on marhatopothon haporseaon ni halak Israel paboa sada do Debata (Allah itu Esa). Ndang adong debata na asing dungkon ni Debata Jahowa. Ndang adong inganan di debata na asing manang debata sileban di bagasan ngolunta, ingkon holan Debata Jahowa na sasada i do. Ala ni i holan sasadasa Debatanta do haholonganta.
Dung i diuduti Jesus muse mandok: "Haholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!" Ala sada do Debata (Allah itu Esa), ala ni i ingkon haholongan do Ibana sian nasa ateate, hosa, roha dohot gogo. Marlapatan do i manghaholongi Tuhan Debata ndang boi di bagasan ganggu ni roha (ragu-ragu). I do umbahen didok: "sian nasa" (bulat, utuh, keseluruhan). Didok sian nasa ateate, hosa, roha dohot gogo, patuduhon saluhut parngoluon ni jolma i. Boasa ingkon songon i panghaholonginta di Tuhan Debata? Ala Debata do na manompa jala na marmudumudu hita laos dipalua do hita sian hamatean tu hangoluan. Tung gok di Debata do ngolu ni hajolmaon. Ndang boi jala dang margogo jolma i mandalani ngoluna si ganup ari molo so raphon Tuhan i. Ala ni i do ingkon haholonganta Ibana jala paulionta parsaoran na denggan tu Debata Jahowa. Haholonganta do Tuhan Debata ala Ibana do jumolo manghaholongi hita (ida 1 Johannes 4:19).
2. Haholongi ma Donganmu Jolma (ayat 31).
Di udutna didok Jesus: "Haholonganmu do donganmi songon dirim!" Ndang adong jolma na manghalomohon asa digabusi, diotootoi, dileai, dihansiti dohot angka ragam ni na roa na diparo donganna jolma, alai naeng ma nian asa dihaholongi jala diparsangapi. Ala ni i do umbahen didok Jesus "doshon dirim haholonganmu donganmu jolma." Didok Jesus do: "Saluhut na pinangido ni rohamu, sibahenon ni halak tu hamu, i ma bahen hamu tu nasida" (ida Mateus 7:12). Ala ni i molo naeng haholongan ni jolma hita, patut ma nang hita pe manghaholongi dongan jolma sian ias ni roha. Jala ndada holan dongan, alai huhut do didok Jesus asa manghaholongi musu, angka na mambahen na jahat maradophon hita baloson do nasida dohot na denggan (ida Lukas 6:27). Panghaholonginta di dongan jolma gabe hataridaan ni holong ni rohanta do i di Tuhan Jesus dohot pangoloionta di hataNa. Angka na holong rohana di Jesus nang di hataNa, tau haholongan ni i do nang donganna jolma. Haunduhonta di parsuru na pinasahat ni Jesus patandahon na holong do rohanta di Jesus, ala ni i ngolunta i naeng ma songon ngolu ni Jesus. Manghaholongi dongan jolma marlapatan do i manghaholongi Jesus. Adong 2 hataridaan ni holong ni roha maradophon dongan jolma. Parjolo, ndang manghosomi (tidak membenci) donganna (ida 1 Johannes 2:9). Aha do lapatan ni na manghosomi? Mangihuthon songon na didok di 1 Johannes 3:12 taringot si Kain na mamunu anggina si Abel, manghosomi marlapatan do i mamunu, mangago hosa/ngolu ni jolma bahen ngoluna. Paduahon, manghaholongi donganna jolma (ida 1 Johannes 2:10). Marlapatan do i asa olo sumeahon hosana humophop donganna. Na olo sumeahon hosana humophop donganna, i do parholong ni roha na so halompoan (ida Johannes 15:13).
3. Bongot ma tu Harajaon ni Debata (ayat 32-34).
Ditolopi Sibotosurat i sude na pinatorang ni Jesus jala tarpatorang ibana do saluhut na hinatahon ni Jesus i di bagasan hapantason. I ma patuduhon paboa diparateatehon jala dijalo sibotosurat i do sude na nidok ni Jesus i. Gabe didok Jesus ma tu ibana: "Ndang sadia dao ho sian harajaon ni Debata!" Pandohan on patuduhon nunga jonok sibotosurat i tu Harajaon ni Debata, alai ndang bongot dope. Godang do halak nunga jonok tu sada tujuan alai di ujungna boi do gabe ndang sahat tu tujuan i. Antong aha nama na hurang di Sibotosurat i nang di hita pe asa ndang holan jonok, alai asa sahat bongot tu Harajaon ni Debata? Di mula ni buku Markus on didok do: "Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma Barita na Uli i" (ida Markus 1:15). Hamubaon ni roha dohot manghaporseai Barita na Uli, i nama na hurang. Sibotosurat i nang hita pe ringkot do asa pauba roha sian na jahat asa gabe siula na denggan ma hita; sian pardosa gabe partigor; sian parhosom gabe parholong ni roha; sian na so porsea gabe togu haporseaonta di Barita na Uli i. Dung i saut ma bongot hita tu Harajaon ni Debata.
Kesimpulan dan Refleksi
Ngolu holong ni roha nunga nian adong di ngolu ni jolma i. Alai mansai maol do dihangoluhon i ala ni godang ni dosa ni jolma. Ala ni i ingkon manongtong do jolma i marsiajar manghangoluhon patik holong ni roha. Ai marhite i do gabe taruli jolma i di las ni roha dohot haluaon. Las ni roha i jumpang hita holan di bagasan holong maradophon Tuhan i do dohot holong maradophon dongan jolma. Haluaon dapot di jolma molo patik holong ni roha i gabe patik na ummangat di ngoluna. Ringkot ni holong i hape di ngolu ni jolma i, i do asa didok si Johannes: "Na so parholong ni roha, mian do di bagasan hamatean" (ida 1 Johannes 3:14b). Sian ayat on boi do taida, ndang adong dalan na asing asa sahat di hita haluaon i, so holan mian di bagasan holong ni Debata.
Ala ni i, songon halak na porsea hita di Jesus Kristus, tahangoluhon ma patik ni Tuhan i, i ma mangulahon patik holong ni roha maradophon Tuhan Debata nang maradophon dongan jolma. Marhite na manghaholongi do asa dapot hita las ni roha dohot hatuaon di portibi on nang di surgo dung dapot tingkina. Amen.
Posting Komentar