Jamita Partangiangan Epistel Minggu 20 Oktober 2024 Minggu Paduapulusadahon Dung Trinitatis tarsurat di buku Josua 24 ayat 14 - 24. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Hadaulaton na Marroha." Rap ma hita mangihuthon hatoranganna.
Pendahuluan
Debata tongtong do mangingot padan naung pinasahatNa tu bangso na pinillit jala na pinaluaNa sian tano parhatobanon Misir, mandapothon inganan na pinasahat ni Debata. Dipasahat Debata do ulaon na manguduti tu si Josua dung marujung ngolu si Musa. Dipargogoi, didongani huhut dibohali jala digohi Tondi ni Debata do si Josua laho manguluhon bangso Israel tu tano na niuarihon ni Jahowa (ida Josua 1:1-9). Sian turpuk on paboahon si Josua pabotohon taringot andorang so sahat nasida tu tano na nilehon ni Debata asa marsihohot haporseaon jala pangoloion nasida tu Debata jala mangidohon panindangion ni bangso i maradophon Debata.
Dipatuduhon si Josua jumolo sian dirina dohot keluargana jala panindangionnasida maradophon Debata Jahowa na hinaporseaon jala sioloan nasida. Alani i do dipasahat jala dipaboa si Josua asa dipataridahon huhut dipabotohon ni bangso i ma haporseaon na marhasintongan maradophon Debata Jahowa. Torop do parsidohoton nasida naeng mandapothon jala habobongornasida ru tano na pinasahat ni Debata, alai mansai porlu haimbaruon dohot marpangalaho dibagasan hasintongan na hinalomohon ni roha ni Debata Jahowa, jala ditadingkon bangso i ma angka parulaon na sai manimbil sian dalan dohot haporseaonna tu Debata Jahowa.
Pembahasan
1. Jahowa do Sioloan jala Sihaporseaon (ayat 14-15).
Marhite turpuk on diondolhon do na tutu do holan Debata sioloan jala sinaporseaon. Mansai dasip do pangondolon ni panghataion ni si Josua tu bangso Israel maradophon Debata taringot tu hasintongan ni haporseaon ni bangso i jala pangoloionnasida tu Debata huhut paradehon partingkian ni bangso i laho mamillit dalannasida andorang sahat dope tu tano na nilehon Debata. Diboto ibana do parrohaon dohot na masa diparulaon ni bangso Israel na sai di bagasan angka parungutunguton, bangso na tangkang jala na sai manimbil sian dalan ni Debata. Ndang dihalomohon Debata bangso na pinillitNa i mangingani tano na so hinalungunhon dohot huta na so pinauli nasida, jala inganan na gok pasupasu dohot ngolu na so sinuannasida (ayat 13). Dipapatar sian turpuk on paboaon na Debata do na sumarihon nasa parngoluon ni bangsoNa.
Sada uluan sitiruon do si Josua di jolo ni Debata, di bagasan keluargana dohot di tongatonga ni bangso Israel. Sian turpuk on ndang na manggogohon si Josua tu bangso Israel asa gabe dohot mangihuthon na di ibana laho manghaporseai Debata. Alai dipatuduhon si Josua do rap dohot angka donganna sajabu, ingkon Jahowa do oloannasida. Marhite pangoloion ni si Josua rap dohot angka donganna sajabu, dipangido jala dipaingot si Josua do tu bangso Israel ndada holan angka na denggan na pinatupa ni Debata Jahowa tu angka ompunasida si Abraham, si Isak, si Jakob, songon i dohot marhite na tinogihon ni Debata do bangsoNa ruar sian tano parhatobanon Misir jala sian pandonganion dohot pangaramotion ni Debata di na mamolus pardalanan mandapothon tano na nilehon ni Debata Jahowa. Alai diloas do bangso Israel mamillit atik tung adong di roha ni bangso i na so mangoloi manang sogo rohana mangoloi Jahowa.
2. Bagabaga na Manogihon jala Paluahon BangsoNa
Di angka sipangoloi di Debata hasahatan ni bagabagaNa manogihon dohot paluaon bangsoNa. Debata do na umboto nasa roha, pingkiran, tahi manang sangkap ni roha ni jolma. Dipaandar sian turpuk on do jala gabe panindangion ni bangso i marnida hagogoon sian bagabaga ni Debata Jahowa na marhasintongan:
1. Paluahon bangso Israel sian parhatobanon di tano Misir. Debata ndada holan na paluahon nasida alai diparorot jala diramoti Debata do pardalanan nasida mandapothon tano na niuarihon ni Debata. Ragam do na masa na niadopan ni bangso i dipardalanannasida, maradophon angka bangso na asing, maradophon angka haporluan sahat tu sangkap parngoluonnasida tolhas tu inganan na niuarihon ni Debata.
2. Dipamonang jala dipalua Debata do marhite hagogoon dohot huasoNa do boi taripar jala dipatunduk angka bangso na asing tingki nasida di bagasan pardalanan. Marhite sian Debata do tarpatunduk bangso na mangalo jala na so mangoloi di Hata ni Debata.
3. Debata do sioloan ni bangso Israel. Debata sai na marpamuati do rohaNa mida bangsoNa. Debata na marhasintongan, dibahen i ndada holan barita las ni roha dohot na pinasupasuNa alai tongtong do paboaonna na so tarjalo Debata do parulaon hasalaon dohot pangalaosion ni bangso i. Hinorhon ni i angka pangalaosion dohot hatangkangon ni roha ni bangsoNa do umbahen hona pinsang dohot uhum ni Debata. Heber 8:10; 12 "Ai on do padan na naeng pajongjongonhu tu pinompar ni Israel, dung salpu angka ari i, ninna Tuhan i: LehononHu do angka patikHu tu bagasan rohanasida jala tu ateatenasida surathononHu i; dung i gabe Debatanasida ma Ahu, jala nasida gabe bangsongHu. Ai marpamuati do rohangHu mida hageduhonnasida, jala na so tupa be ingotonHu angka dosanasida."
3. Gabe Sitindangi na Marhasintongan Marhite Pangoloion dohot Panangihonon di Debata
Dang paloason ni Debata nasida mangingani tano na nilehonNa molo so ias rohanasida jala marsitutu manghaporseai Debata. Dibahen i ndada hinorhon ni si Josua sitindangi nasa angka pandohan dohot pangoloion ni nasida, alai dirinasida maradophon Debata. Gabe sitindangi na marhasintongan marhite pangoloion di Debata. Sapala naung dihatindanghon dohot dipillitnasida do Debata Jahowa gabe sioloan jala sitangihononhon, asa unang be marbalik rohanasida mangihuthon angka hasomalanhasomalan na mambahen sogo ni roha jala rimas ni Debata Jahowa, i do umbahen mansai dipaampik turpuk on muse marpangulahi mangondihon hasintongan dohot haburjuon ni rohanasida marhaporseaon huhut marpangoloion di Debata. Dipaumbuk sian turpuk on muse hasadaon ni rohanasida jala na so dipaholang nama haporseaon dohot pangoloionnasida maradophon Debata.
Kesimpulan dan Refleksi
1. Mansai ringkot do uluan di tongatonga ni keluarga, ndada holan na manguluhon keluarga manang mangharingkothon na porlu di keluarga, alai uluan na marhabiaran jala marpangoloion mida Jahowa. Dia do na didok na dison? I ma uluan di keluarga na mangharingkothon marparsaoran tu Debata dohot martangiang pajonokhon diri tu Debata, uluan na mangajari huhut gabe sitiruan di na denggan di angka parulaonna di tongatonga ni keluarga. Songon i do uluan na bertanggung jawab jala marasi roha dohot marholong ni roha.
2. Hadaulaton marhite haporseaon dohot pangoloion di Tuhan i marhataridaan sian panghatindangonta di ngolu na mamillit Debata siolonta. Ndada holan targoar hita siihuthon Tuhan i, alai talehon ma dirinta magulahon ni lomo ni roha ni Debata. Rom 12:1 "Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha."
3. Haporseaon na mangolu na sai manongtong i ma pajonokon do tu Debata huhut berkomitmen di bagasan ngoluna na marhadaulaton (beribadah), na so dipaholang dirina sian angka ulaon na marhadomuan tu parsaoran mamuji jala pasangaphon Debata.
Posting Komentar