Jamita Partangiangan Epistel Minggu 27 Oktober 2024 Minggu Paduapuluduahon Dung Trinitatis tarsurat di buku Markus 10 ayat 46 - 52. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Saguru di Debata do Luhut Angka na Masa tung so Hasundatan do Angka SangkapNa." Rap ma hita mangihuthon hatoranganna.
Pendahuluan
Borhat do Jesus dohot siseanNa laho mamaritahon Barita na Uli jala paluahon nasa jolma dohot bangso huhut patupahon nasa halongangan. Dibongoti Jesus dohot angka siseanNa ma huta Jeriko, laos dohot angka na torop mandohoti. Nunga tarbarita be taringot tu Jesus di sandok luat na di Jerusalem dohot nasa angka luat na asing pe na binolus ni Jesus rap dohot angka siseanNa jala angka siihuthon Ibana. Dipatuduhon Jesus do na sinuru ni Debata Ama i do Ibana ro tu portibi on laho paluahon nasa jolma asa dapaton haluaon dohot mamaritahon Barita na Uli, jala mamboan nasa jolma mananda Debata huhut mangalehon hangoluan na saleleng ni lelengna.
Mandapothon turpuk Markus 10:46-52 on, taringot tu na dipamalum Jesus si Bartimeus sipanehenehe jala na mapitung. Nasa na managam asi ni roha jala hot di bagasan haporseaonna jumpang jala dapot ni i do angka las ni roha dohot pasupasu na sian Tuhan i. Dipataridahon si Bartimeus do balga ni haporseaonna dohot panghirimonna jala hinorhon ni i do umbahen na gabe di pamalum Jesus ibana jala jumpang ma angka na hinalungunhon ni rohana.
Pembahasan
1. Tinggil Manangihon jala Ro ma Mandapothon.
Borhat sian haporseoan jala managam di haroro ni sipalua gabe jumpangsa do angka las ni roha. Si Bartimeus tarpaimaima do diharoro ni Jesus na laho pamalumhon ibana. Molo marnida sian angka na torop i na ro mandapothon Jesus, ndang tarbahen ibana jumpang, songon i sian kondisi ni pamatangna na mapitung do ibana, ndang tabahensa mamolus angka na torop i. Tung pe songon i ala ni na dijugulhon rohana do jala sian na manjou huhut ro mandapothon nama tarbahensa asa ditangihon Jesus ma soarana. Diharorona i do jala tinggil soarana manjouhon gabe martinangi ma Tuhan i dijoujouna.
Dipaumbuk sian turpuk on muse na pabotohon haporseaon ni si Bartimeus taringot tu Jesus i ma: "Jesus na sian Nasaret, jala Anak ni si Daud, asi ma rohaM di ahu," astuanna haporseaon na mangolu hinorhon ni na sian mananginangi huhut dipahusorhusor di rohana jala manghirim di asi ni roha ni Tuhan. Jotjot do hita jolma porsea sian na taida marhite mata ni pardagingonta, alai olo do sian na tarida di parnidaan simalolongta gabe manghorhon angka hajahaton jala patubuhon angka sogo ni roha na maralo tu lomo ni roha ni Debata. Dipaihutihut si Bartimeus do parbaritaan taringot tu Jesus andorang dipamalum dope ibana. Na tutu do dipaihutihut ibana jala tubu ma haporseaonna na togu, marhite parbinotoanna taringot tu Jesus na sian Nasaret jala Anak ni si Daud. Songon i do nang haporseaonna tu Jesus na sinuru ni Debata, di Ibana do dilehon huaso dohot hamuliaon laho paluahon nasa jolma sian dosa dohot pamalumhon nasa sahit jala na pasahathon halongangan. Hinorhon ni na martinangi i ibana di Hata ni Debata gabe martua jala jumpangsa do haluaon dohot las ni roha. Songon pandohan ni Jesus tu si Tomas i di Johannes 20:29 "Jadi didok Jesus ma tu ibana: Ala diida ho Ahu, umbahen na gabe porsea ho. Martua ma angka na porsea, atik pe so diida."
2. Jouhon ma GoarNa jala AlusaNa ma Ho.
Ndang adong na boi mangambati angka sangkap ni Debata di parngoluon ni jolma. Marhite diri ni jolma i do umbahen tarjalona haluaon, hamamalum dohot ragam ni asi ni roha. Tung so adong angka na torop i na pasahathon, mangaloas jala mangalehon dalan tu si Bartimeus asa boi jumpang jala boi dapothononna Jesus. Dipabotohon sian turpuk on do muse taringot tu Jesus na umboto saluhut jala na tongtong mamparrohahon na masa di humaliangNa. Dipangido Jesus ma tu angka siseanNa asa diboan si Bartimeus ro tu adopanNa. Ndang adong na so sian pamotoan ni Tuhan i hombar tu pardalanan ni ngolu ni jolma. Molo joujou di bagasan goarNa pe jolma, na patuduhon habalgaon ni haporseaonna do i tu Tuhan i. Songon i dipaumbuk sian turpuk on muse hinorhon ni na ro mandapothon Jesus do asa jumpangsa haluaon dohot hamalumon i. Si Bartimeus mandapothon Jesus i sian balga ni roha dohot haporseaonna, jala tartading pe do ulosna hinorhon arga ni haluaon dohot hamamalum na sian Tuhan i tu ibana. Jotjot do hinorhon ni angka arta na di portibi on sai diihot manang marsigulut gabe tartading do angka haluaon ni haporseaon dohot hasonangan di hangoluan si saleleng ni lelengna. Nasa na di portibi on parsatongkinan jala na ingkon tading do, songon i nang ngolu ni jolma i pe parsatongkinan do, alai na hot ro di saleleng ni lelengna na sian Tuhan i do haluaon dohot hangoluan saleleng ni lelengna.
3. Laho ma Ho, Dipangolu Haporseaonmi do Ho.
Ndang adong na so tarpatupa Debata. Dipanghulingi Jesus do si Bartimeus asa dipaboa ibana angka na hinirim ni rohana laho sipatupaon ni Jesus tu ibana. Disungkun Jesus tu ibana "Aha dipangido roham sibahenonHu tu ho?" sian pandohan ni Jesus on mangondolhon hasintongan ni roha dohot habalgaon ni haporseaon ni si Bartimeus maradophon Jesus. Ndang na so boi pintor dipatupa Jesus na laho sibahenonNa tu si Bartimeus, alai ditangkasi Jesus pe marhite sungkunsungkunNa, naeng patoguhon haporseaonna jala manigati nasa na hinirim ni rohana do.
Maralus si Bartimeus, "Gurunami, naeng marnida ma nian matanghu," diparsangapi jala dipabotohon ibana do, Jesus i ma Guru, na sian Ibana do haroro ni angka parbinotoan jala na porsea do ibana marhite Hata na nidok ni Jesus i gabe jumpangna ma hamamalum dohot haluaon i. Marpangidoan si Bartimues marhite toruk ni roha jala dipabotohon na ringkot sian hasintongan ni panghilalaanna dohot sihol ni rohana marhite tangiang tu Debata.
Dipaumbuk sian turpuk on do pandohan ni Jesus: "Laho ma ho! Dipangolu haporseaonmi do ho!" Dihamonanghon haporseaon ni si Bartimeus do umbahen sahat jaloonna haluaon marhite hamamalumna. Margogo jala marhuaso do Hata ni Jesus laho mangalehon pangidoan ni si Bartimeus asa marnida ibana. Na pinatupa ni Jesus tu si Bartimeus ndada na marhite manjama simalolongna alai marhite pandohan manang Hata ni Jesus do gabe dapotan haluaon jala jumpang hamamalum di si Bartimeus.
Kesimpulan dan Refleksi
1. Na masa si nuaeng on tung pe marnida jolma i sian simalolong pardagingonna, alai jotjot do mapitung mata ni partondion, haporseaon dohot panondang na di hita. Torop dope tapangke parnidaanta holan manghorhon na ringkot di dirinta, jala hagiot ni angka pardagingonta. Sipata manghorhon angka dosa dohot hajahaton. Ala ni i do songon na didok Barita na Uli di Mateus 6: 22-23 "Palito ni daging do mata. Molo hisar matami, tiur ma sude dagingmu! Alai molo roa matami. Holom ma sude dagingmu. Holomna i antong, anggo mangholom panondang na di bagasan ho!"
2. Saguru di Debata do saluhutna, ndang hasundatan angka sangkapNa. Molo pe marsangkap hita di angka parngoluonta, alai Debata do na pasauthon dohot na manontuhon saluhutna. Pangondihonon ni Tuhan i diangka na ro mandapothon Ibana.
3. Ndada tarpalua jolma i dirina jala ndada hinorhon ni angka artana asa boi tarboansa tu hasonangan dohot hangoluan si saleleng ni lelengna. Alai marhite haporseaon di Tuhanta Jesus Kristus do gabe sahat hita tu hangoluan i. Godang do angka sipangambati, tarlumobi ma nasa tahi dohot hisaphisap ni pardagingonta. Dibahen i unang sumurut ringgas ni rohanta mandapothon Tuhan i marhite Barita na Uli sitangihononhon, ai sian i do ro angka na patoguhon haporseaonta huhut pabotohon dalan tu hasintongan. Amen.
Posting Komentar